'एमएचटी-सीईटी- 2018' परीक्षा

नांदेड केंद्रांतर्गत सुरळीत संपन्न  

नांदेड, दि. 10 :- राज्यातील अभियांत्रीकी आणि औषधनिर्माण अभ्यासक्रमांच्या प्रवेशासाठी राज्य शासनाच्या तंत्रशिक्षण संचालनालयाच्या सामाईक प्रवेश परीक्षा कक्षांतर्फे घेण्यात येणारी 'एमएचटी-सीईटी -2018' परीक्षा आज येथे सुरळीत पार पडली. परीक्षेसाठी नांदेड केंद्रांतर्गत 34 परीक्षा उपकेंद्रावर व्यवस्था करण्यात आली होती. नांदेड केंद्रांतर्गत 10 हजार 154 विद्यार्थ्यांनी नोंदणी केली होती. ही परीक्षा कोणताही अनुचित प्रकार न घडता शांततेत व सुव्यवस्थेत संपन्न झाल्याची माहिती परीक्षा संयोजक समितीच्यावतीने देण्यात आली. जिल्हाधिकारी कार्यालय व शासकीय तंत्रनिकेतन नांदेड यांच्यावतीने परीक्षेचे संयोजन करण्यात आले.

नांदेडसाठी जिल्हा केंद्र प्रमुख म्हणून जिल्हाधिकारी अरुण डोंगरे, निवासी उपजिल्हाधिकारी जयराज कारभारी यांच्या मार्गदर्शनाखाली जिल्हा संपर्क अधिकारी म्हणून शासकीय तंत्रनिकेतन नांदेडचे प्राचार्य पी. डी. पोपळे तसेच उपजिल्हा संपर्क अधिकारी म्हणून प्रा. डी. एम. लोकमवार यांनी काम पाहिले. तहसिलदार उज्ज्वला पांगरकर, अप्पर कोषागार अधिकारी एन. पी. पाचंगे  यांनी परीक्षा सुरळीत संपन्न होण्याच्या दृष्टिने संयोजन केले. परीक्षेसाठी उपकेंद्र प्रमुख - 34, समवेक्षक - 440, पर्यवेक्षक - 110, उपसंपर्क अधिकारी - 7, सुक्ष्म निरीक्षक - 6 यांच्यासह 24 वैद्यकीय पथकांची अधिकाऱ्यांसह नियुक्ती करण्यात आली होती.

 'एमएचटी-सीईटी 2018' ही अभियांत्रिकी व तंत्रज्ञान, औषध निर्माण शास्त्र (फार्मसी) व फार्म.डी तसेच कृषि विज्ञान, कृषि अभियांत्रिकी व तंत्रज्ञान या अभ्यासक्रमासाठी ही सामायिक प्रवेश परीक्षा आहे. या परीक्षा केंद्राची विभागणी 'एमएम', 'एमबी', 'बीबी' अशी करण्यात आली आहे. परीक्षेसाठी शहरातील 34 परीक्षा केंद्र निश्चित करण्यात आली होती. दिव्यांग विद्यार्थ्यांसाठी महात्मा फुले हायस्कूल, केंब्रिज माध्यमिक विद्यालय आणि शारदा भवन हायस्कूल या केंद्रांवर व्यवस्था करण्यात आली होती. परीक्षेसाठी उपस्थित विद्यार्थी संख्या पुढील प्रमाणे आहे. (कंसात नोंदणी केलेली एकूण विद्यार्थी संख्या )- 'एमएम' केंद्र 4 हजार 765 (4 हजार 960 ), 'एमबी' केंद्र 9 हजार 835 (10 हजार 154), 'बीबी' केंद्र 7 हजार 338 (7 हजार 588).  

प्रशासनाने परीक्षेसाठी सातत्यपूर्ण संपर्क व समन्वय ठेवून परीक्षा केंद्रांवरील सुविधांबाबत वेळीच खबरदारी घेतली. यामध्ये पिण्याचे पाणी, भोजन व्यवस्था, वैद्यकीय सेवा, अखंडीत वीज पुरवठा व अनुषंगीक पोलीस बंदोबस्त याबाबत सुनियोजन करण्यात आले. नांदेडसह लातूर, परभणी आणि हिंगोली या चार जिल्ह्यांसाठी विभागीय प्राधिकारी म्हणून तथा गुरु गोबिंदसिंघजी अभियांत्रिकी महाविद्यालयाचे संचालक डॉ. वाय. व्ही. जोशी यांनी काम पाहिले. या परीक्षेचा निकाल 3 जून 2018 रोजी किंवा त्यापुर्वीही जाहीर होऊ शकतो, असे सामायीक प्रवेश परीक्षा कक्षाच्या संकेतस्थळावर नमूद करण्यात आले आहे.

या परीक्षेसाठी सहाय्यक जिल्हा संपर्क अधिकारी प्रा. यादव, प्रा. दमकोंडवार, प्रा. डॉ. चौधरी, डॉ. डक, प्रा. कळसकर, प्रा. मुधोळकर, प्रा. साहूसाकडे, श्री. दुलेवाड तसेच जिल्हाधिकारी कार्यालयाच्या ज्योती बाऱ्हाळीकर, दिपक गुरनळे, शासकीय तंत्रनिकेतनच्या कर्मचाऱ्यांनी परिश्रम घेतले. एमएचटी-सीईटी 2018 परीक्षा यशस्वीपणे पार पाडल्याबद्दल जिल्हा संपर्क अधिकारी तथा प्राचार्य शासकीय तंत्रनिकेतन पी. डी. पोपळे यांनी सर्व परीक्षेशी संबंधीत अधिकारी, कर्मचारी वर्गाचे आभार व्यक्त केले.   

000000