वृत्त क्रमांक 19

माळेगावात पारंपारिक लोककला महोत्‍सवात कलाकारांनी जिंकली रसिकांची मने

लोककला महोत्सवाचे  आ. प्रतापरावरा पाटील चिखलीकर यांचे हस्‍ते उद्घाटन

नांदेड दि. ३ जानेवारी : महाराष्ट्रातल्या मातीत जन्मलेल्या कलाकारांचा सन्मान करण्यासाठी माळेगाव यात्रेत पारंपारिक कलामहोत्‍सवाची सुरुवात केली आहे. पारंपारिक लोककलांचे संवर्धन व कलाकरांना प्रोत्साहन देणे हे आमचे ध्येय असून, कलाकारांना शासकीय अनुदान मिळवून देण्यासाठी प्रयत्‍न करणार असल्‍याचे प्रतिपादन आमदार प्रतापराव पाटील चिखलीकर यांनी केले.

माळेगाव यात्रेत आज वैभव असलेल्या पारंपारिक लोककला महोत्सवाचे उद्घाटन आ. प्रतापराव पाटील चिखलीकर यांच्या हस्ते करण्‍यात आले, त्‍यावेळी ते बोलत होते. यावेळी जिल्हा परिषदेचे मुख्य कार्यकारी अधिकारी संदीप माळोदे, जिल्‍हा कृषी अधिक्षक कृषी अधिकारी ब-हाटे, पोलीस निरिक्षक संजय निलपत्रेवार, आनंदराव पाटील ढाकणीकर, शंकरराव ढगे, रोहित पाटील, सचिन पाटील चिखलीकर, नरेंद्र गायकवाड, भगवानराव राठोड, लक्ष्मण भालके, सरपंच प्रतिनिधी हनुमंत धुळगंडे, बालाजी कदम आदींची यावेळी उपस्थिती होती.

पुढे ते म्‍हणाले, माळेगाव यात्रेत कायमस्वरूपी सुविधा निर्माण करण्यासाठी सर्वपक्षीय बैठक आयोजित करण्यात येणार असून, जिल्हा नियोजन समितीकडून भरीव निधी उपलब्ध करून घेतला जाईल, असेही ते म्‍हणाले. यावेळी जुन्‍या काळातील तमासगीर अशाताई सुकळकर, शाहीर रमेश गिरी, कलावंत लच्‍छु देशमुख यांचा स्मृतीचिन्ह व प्रमाणपत्र देऊन आ. चिखलीकर यांच्‍या हस्‍ते महोत्सवाची सुरुवात शाहीर रमेश गिरी यांच्या महाराष्ट्र गीतने झाली. यावेळी रघुवीर खेडकर नाट्य मंडळ, पांडुरंग मुळे नाट्य मंडळ, आनंद लोकनाट्य मंडळ, सविताराणी पुणेकर, हरीभाऊ बडे नगरकर व शिवकंन्‍या बडे नगरगर  यांसह विविध कलाकारांनी गण गवळण, बतावणी, रंगबाजी, लावणी व इतर पारंपारिक कला सादर करून रसिकांची मने जिंकली. माळेगाव यात्रेतील पारंपारिक लोककला महोत्सवाने जिल्ह्यातील सांस्कृतिक वारशाला एक नवा आयाम दिला आहे. या महोत्सवातून महाराष्ट्रातील लोककलेचे महत्व अधोरेखित होत आहे.

000000

 वृत्त क्रमांक 18

'दर्पण 'कार बाळशास्त्री जांभेकर यांच्या जयंतीला जिल्हाधिकारी अभिजीत राऊत यांचे व्याख्यान 

नांदेड दि. ३ जानेवारी : आद्य पत्रकार दर्पणकार बाळशास्त्री जांभेकर यांच्या जयंती दिनाला अर्थात ६ जानेवारीला सोमवारी जिल्हा माहिती कार्यालयाने पत्रकार दिनाचे आयोजन केले आहे. नियोजन भवन येथे दुपारी ४ वाजता होणाऱ्या या कार्यक्रमांमध्ये नांदेडचे जिल्हाधिकारी अभिजीत राऊत 'आर्टिफिशियल इंटेलिजन्स आणि बातमीदारी ' या विषयावर पत्रकारांना संबोधित करणार आहेत.

नांदेड जिल्हा प्रशासन, नांदेड पोलीस प्रशासन, जिल्ह्यातील विविध पत्रकार संघटना व जिल्हा माहिती कार्यालय नांदेड यांच्या संयुक्त विद्यमाने दर्पण दिनाच्या पर्वावर या कार्यक्रमाचे आयोजन करण्यात आले आहे.

६ जानेवारी आद्य पत्रकार बाळशास्त्री जांभेकर यांचा जयंती दिवस.मराठी पत्रकार दिन म्हणून सर्वत्र साजरा होतो. या दिनाचे औचित्य साधून पत्रकारांसोबत प्रशासनाचा संवाद आयोजित करण्यात आला आहे. यावेळी 'कृत्रिम बुद्धिमत्ता आणि बातमीदारी ', या विषयावर जिल्हाधिकारी अभिजीत राऊत यांचे व्याख्यान आयोजित करण्यात आले आहे. कृत्रिम बुद्धिमत्तेचा बातमीदारीमध्ये कशा पद्धतीने वापर करता येईल, त्याचे फायदे व तोटे याबाबत ते मार्गदर्शन करणार आहेत. या कार्यक्रमाला जिल्हा पोलीस अधीक्षक अबिनाश कुमार उपस्थित राहणार असून ते देखील पत्रकारांशी संवाद साधणार आहेत.

सोमवार दिनांक 6 जानेवारी रोजी दुपारी चार वाजता जिल्ह्यातील विविध संघटनांशी, माध्यम संस्थांशी, केंद्रांशी संबंधित सर्व प्रिंट इलेक्ट्रॉनिक्स माध्यमातील पत्रकार बांधवांनी या कार्यक्रमाला उपस्थित रहावे, असे आवाहन जिल्हा माहिती अधिकारी प्रवीण टाके यांनी केले आहे.

00000

  वृत्त क्रमांक 17

ऑनलाइन सेवा आणखी लोकाभिमुख करा : दिलीप शिंदे 

 राज्य सेवा हक्क आयोगाच्या आयुक्तांकडून जिल्हयाचा आढावा

नांदेड दि. 3 जानेवारी : पारदर्शिता ठेवतानाच अगदी वेळेत नागरिकांना माहिती देण्याचे उद्दिष्ट ठेवून काम करा. जिल्ह्यामध्ये प्रत्येक सेवा ऑनलाईन होईल याकडे कटाक्ष ठेवा ऑनलाईन सेवा आणखीन लोकाभिमुख करा असे आवाहन राज्यसेवा हक्क आयोगाचे आयुक्त निवृत्त सनदी अधिकारी दिलीप शिंदे यांनी आज येथे केले.

नांदेड जिल्ह्यातील राज्यसेवा हक्क आयोग अंतर्गत येणाऱ्या सेवांच्या संदर्भात आढावा घेण्यासाठी ते या ठिकाणी आले होते. जिल्हाधिकारी कार्यालयामध्ये आज त्यांनी जिल्हाधिकारी अभिजीत राऊत,जिल्हा पोलीस अधीक्षक अबिनाश कुमार, महानगरपालिका आयुक्त डॉ. महेशकुमार डोईफोडे, जिल्हा परिषदेचे अतिरिक्त मुख्य कार्यकारी अधिकारी संदीप माळोदे,उपजिल्हाधिकारी सामान्य अजय शिंदे यांच्यासह विविध विभाग प्रमुखांकडून जिल्ह्यातील गेल्या वर्षभरातील सेवांसंदर्भात आढावा घेतला.

आयोगाने सेवांची व्याप्ती वाढविण्याचा निर्णय घेतला असून अधिकाधिक सेवा ऑनलाईन पद्धतीने दिल्या जाव्यात. याकडे लक्ष वेधले आहे. त्यामुळे जिल्ह्यातील ही यंत्रणा अधिक गतिशील करावी, असे आवाहन त्यांनी केले.

नांदेड जिल्ह्यात गेल्यावर्षी प्रलंबित प्रकरणांची टक्केवारी 25% पर्यंत गेली होती. मात्र ती आता दोन टक्क्यांवर आली आहे. तसेच अर्ज प्राप्त होण्याची संख्याही सातत्याने वाढत आहे. गेल्या वर्षभरात पाच लाख अर्ज प्राप्त झाले होते. आता नऊ महिन्यांमध्येच पाच लाख तीन हजार अर्ज प्राप्त झाले आहेत. या कामगिरीकडे सकारात्मकतेने बघताना त्यांनी सेवा आणखीन लोकाभिमुख कशा होतील याकडेही कल्पकतेने लक्ष देण्याचे आवाहन केले.

यावेळी त्यांनी अन्नधान्य व पुरवठा, उच्च शिक्षण, तंत्रज्ञान, गृह विभाग, घरे निर्मिती, उद्योग विभाग, कामगार विभाग, कायदा व सुव्यवस्था विभाग, अल्पसंख्यांक विकास विभाग, महसूल विभाग, ग्रामविकास, शालेय शिक्षण व क्रीडा,समाज कल्याण,उत्पादन शुल्क विभाग, वाहतूक, आदिवासी विकास, स्थानिक स्वराज्य संस्था, जलसंधारण, महिला व बालकल्याण विभागाचा आढावा घेतला.

वय ,राष्ट्रीयत्व आणि अधिवास प्रमाणपत्र, जातीचे प्रमाणपत्र, उत्पन्नाचे प्रमाणपत्र, नॉन क्रिमीलेअर प्रमाणपत्र, तात्पुरता रहिवासी प्रमाणपत्र ,ज्येष्ठ नागरिक प्रमाणपत्र ,अयपतीचा दाखला अशा तातडीच्या दाखल्यासंदर्भात आणखी तत्परता दाखवून वेळेच्या आत तातडीने नागरिकांना सेवा उपलब्ध करण्याच्या सूचना दिल्या. 

सेतू केंद्राचा वापर जिल्ह्यात वाढला आहे. तो सर्वत्रच वाढत आहे. मात्र ज्या ठिकाणी सेतू केंद्र सुरू झाले नसतील ते तातडीने सुरू करण्याचे निर्देशही त्यांनी दिले.जिल्ह्यात सद्यस्थितीत 1575 सेतू केंद्र मंजूर करण्यात आले आहे. यापैकी जिल्ह्यामध्ये 14O4 सेतू केंद्र कार्यान्वित आहे. शहरी भागात 265 सेतू केंद्र कार्यान्वित आहे. 171 ठिकाणी आणखी सेतू केंद्र उभारण्याचे काम बाकी असून हे काम तातडीने मार्गी लावण्याचे निर्देशही त्यांनी यावेळी दिले.

00000

रस्ता सुरक्षा सप्ताह या संदर्भातील जिल्हाधिकारी अभिजीत राऊत यांचे आवाहन

 लोकसेवा हक्क आयोग, जिल्हाधिकारी अभिजीत राऊत यांची माहिती

 वृत्त क्रमांक 16

माळेगाव यात्रेत निक्षय वाहनाचे आमदार चिखलीकर यांच्या हस्ते उद्घाटन

नांदेड दि. 3 जानेवारी :-  नांदेड जिल्ह्यात 7 डिसेंबर 2024 ते 24 मार्च 2025 या कालावधीत शंभर दिवसीय क्षयरोग शोध मोहीम राबविण्यात येत आहे. या अंतर्गत क्षयरोग विभागातर्फे निक्षय वाहन म्हणजे एक फिरस्ती रुपी वाहन तयार करण्यात आले आहे. या निक्षय फिरत्या वाहनाचे उद्घाटन नुकतेच माळेगाव यात्रेत आमदार प्रताप पाटील चिखलीकर यांच्या हस्ते करण्यात आले .

या निक्षय वाहनाच्या माध्यमातून ट्रू नेट या उपकरणाद्वारे संशयित क्षय रुग्णांचे थुंकी नमुने तपासणे व रोग निदान करणे व यातून अति जोखीम रुग्णही शोधणे तसेच रुग्णांचे एक्स-रे काढून निदान करणे व निदान झालेल्या क्षय रुग्णांचे लगेच औषधोपचार चालू करणे असे नियोजन करण्यात आले आहे . सोबतच क्षयरोगाविषयी जनजागृती करण्यात येत आहे. या तपासण्या तज्ञ व्यक्तींच्या नियोजनातून होत आहेत.

वाहनाच्या उदघाटन प्रसंगी उपमुख्य कार्यकारी अधिकारी (पंचायत ) मंजुषा जाधव कापसे ,जिल्हा आरोग्य अधिकारी डॉ सौ.संगीता देशमुख ,जिल्हा क्षयरोग अधिकारी डॉ. सतीश कोपुरवाड , माता व बालसंगोपन अधिकारी डॉ. शिवशक्ती पवार, क्षयरोग विभागाचे जिल्हा समन्वयक डॉ. खाजा मैनोद्दीन , तालुका आरोग्य अधिकारी डॉ.कांबळे, पीपीएम समन्वयक श्रीमती ज्योती डोईबळे , वरिष्ठ क्षयरोग उपचार पर्यवेक्षक दिगंबर मुसळे आदी मान्यवर उपस्थित होते. या निक्षय वाहनाच्या माध्यमातून उपलब्ध करून दिलेल्या सेवेचा गरजूंनी मोठ्या प्रमाणात लाभ घ्यावा, असे आवाहन जिल्हा क्षयरोग अधिकारी डॉ. सतीश कोपुरवाड यांनी केले आहे .

00000

वृत्त क्रमांक 15

सततच्या वाचनाने यश निश्चितच प्राप्त होते : अप्पर पोलीस अधिक्षक सुरज गुरव

नांदेड दि. 3 जानेवारी :-  वाचन संकल्प महाराष्ट्राचा या अभियानातंर्गत आज अप्पर पोलिस अधिक्षक सुरज गुरव यांच्या हस्ते विविध विषयावरील ग्रंथ प्रदर्शनाचे उदघाटन जिल्हा ग्रंथालयात करण्यात आले. यावेळी ग्रंथालयातील विविध विषयावरील ग्रंथाचे प्रदर्शन मांडण्यात आले होते. स्पर्धा परिक्षांची तयारी करणारे विद्यार्थी, अभ्यासक, संशोधक यांनी सतत वाचन करावे. त्यामुळे निश्चित यश प्राप्त होते असे प्रतिपादन अप्पर पोलिस अधिक्षक सुरज गुरव यांनी केले.

यावेळी भारताच्या स्त्री शिक्षणाच्या गंगोत्री तसेच ज्ञानज्योती, क्रांती ज्योती म्हणून ओळखल्या जाणाऱ्या सावित्रीबाई यांचे प्रतिमेचे तसेच ग्रंथालय शास्त्राचे जनक डॉ.एस.आर.रंगनाथन यांच्या प्रतिमेचे पूजन मान्यवरांच्या हस्ते करण्यात आले.

यावेळी जिल्हा ग्रंथालय अधिकारी कार्यालयात वाचन संकल्प महाराष्ट्राचा या अभियानांतर्गत स्पर्धा परिक्षेची तयारी करणारे विद्यार्थी ,विदयार्थीनी ,अभ्यासक उपस्थित होते. या कार्यक्रमात जिल्हा ग्रंथालय अधिकारी अनिल सुर्यवंशी, ग्रंथालय निरीक्षक कै.सं.गायकवाड, अजय वटटमवार, मुंजाजी घोरपडे, महानगरपालिकेचे ग्रंथपाल श्रीनिवास इज्जपवार, बाळू पावडे आदीचा सहभाग होता.

00000

  वृत्त क्रमांक 14

निराधार लाभार्थ्यांना मिळणार आता थेट बँक खात्यात अनुदान

नांदेड दि. 3 जानेवारी :- संजय गांधी निराधार योजना, श्रावणबाळ सेवा राज्य निवृत्तीवेतन योजना, इंदिरा गांधी राष्ट्रीय वृध्दापकाळ निवृत्तीवेतन योजना, इंदिरा गांधी विधवा निवृत्तीवेतन योजना आणि इंदिरा गांधी दिव्यांग निवृत्तीवेतन योजनांचे अनुदान आता थेट लाभार्थ्यांच्या खात्यात जमा होणार आहे.

सामाजिक न्याय विभागामार्फत राबविल्या जाणाऱ्या या योजनांचा माध्यमातून लाभार्थ्यांना अधिकाधिक सुविधा देण्याच्या उद्देशाने डायरेक्ट बेनिफिट ट्रान्सफर (डीबीटी) पोर्टलवर लाभार्थ्यांची माहिती अद्ययावत केली जात आहे. यासाठी आधार प्रमाणिकरण अत्यावश्यक असून दिनांक 1 ते 31 जानेवारी 2025 या कालावधीत प्रत्येक तालुक्यात विशेष मोहिम राबविण्यात येणार आहे.

जिल्हाधिकारी अभिजीत राऊत यांच्या मार्गदर्शनाखाली ही मोहिम युध्दपातळीवर राबविण्यात येत आहे. लाभार्थ्यांनी आपल्या तालुक्यातील तहसील कार्यालयात संजय गांधी योजना विभागाशी त्वरित संपर्क साधावा, असे आवाहन निवासी उपजिल्हाधिकारी महेश वडदकर यांनी केले आहे.

तसेच सप्टेंबर 2023 पासून प्रलंबित असलेले कुटूंब अर्थसहाय्य योजनेचे अनुदान ज्यामध्ये दारिद्रय रेषेखालील कुटुंबातील कर्त्या व्यक्तीचे निधन झाल्यास 20 हजार एकरकमी वारसांना देण्यात येतात. अशा 400 लाभार्थ्याचे एकूण 80 लक्ष रुपये अनुदान प्राप्त झाले आहे. इंदिरा गांधी वृध्दापकाळ, विधवा आणि दिव्यांग निवृत्तीवेतन योजनेतील केंद्र शासनाचे अनुदान देखील जिल्ह्याला प्राप्त झाल्याची माहिती संजय गांधी योजना विभागाच्या तहसिलदार प्रगती चोंडेकर यांनी दिली आहे.

00000

  वृत्त क्रमांक 13

प्रत्येक अपघात टाळला जाऊ शकतो : अभिजीत राऊत 

 राज्य रस्ता सुरक्षा अभियानास नांदेड जिल्हयात सुरुवात 

नांदेड़ ,दि.०3.जानेवारी : निष्णात फलंदाज सचिन तेंडुलकर फिरकी गोलंदाजीवरही हेल्मेट घालून का खेळतो ?याचे उत्तर ज्याला कळले त्याला रस्तासुरक्षेचे मर्म कळले.त्यामुळे रस्त्यावर अतिआत्मविश्वास  न दाखवणे, नियमांचे काटेकोर पालन करणे, हेल्मेट लावणे, सीट बेल्ट लावणे, मोबाईल न वापरणे,फुटपाथवर पायी चालताना कायम रस्त्याच्या उजव्या बाजूला वाहनांकडे तोंड करून चालणे, महत्त्वाचे ठरते. असे केल्यास प्रत्येक अपघात टाळल्या जाऊ शकतो, असे प्रतिपादन जिल्हाधिकारी अभिजीत राऊत यांनी आज केले.

 १ जानेवारी  ते ३१ जानेवारी  पर्यंत परिवहन विभागामार्फत राज्य रस्ता सुरक्षा अभियान २०२५ राबविण्यात येणार असून, त्याकरिता 'पर्वा ' अर्थात इंग्रजी मधील केअर ही थीम घोषीत करण्यात आली आहे. सदर अभियानाचे उद्घाटन ०३ जानेवारी रोजी प्रादेशिक परिवहन कार्यालय, नांदेड येथे  अभिजीत राऊत, जिल्हाधिकारी, नांदेड यांच्या हस्ते करण्यात आले.

प्रथम दिपप्रज्वलन व सावित्रीबाई फुले यांच्या प्रतिमेस पुष्पहार अर्पण करुन सुरवात करण्यात आली. सदर कार्यक्रमास प्रमुख पाहुणे म्हणून.अबिनाश कुमार, पोलीस अधिक्षक, नांदेड, डॉ.  महेश कुमार डोईफोडे, आयुक्त, नांदेड-वाघाळा मनपा, श्रीमती दलजितकौर जज, सचिव नांदेड जिल्हा विधी सेवा प्राधिकरण, .बि.सी.पांढरे, मुख्य अभियंता, सार्वजनिक बांधकाम मंडळ, नांदेड इतर शासकीय विभागाचे कार्यालय प्रमुख उपस्थित होते.

या कार्यक्रमाच्या प्रस्ताविकात संदिप निमसे, उप प्रादेशिक परिवहन अधिकारी (अ.का), नांदेड यांनी रस्ता सुरक्षा अभियाना मागचा उद्देश व विभागाची भूमिका मांडली. विभागातर्फे राबविण्यात येणा-या अंमलबजावणी (Enforsment) मुळे व भविष्यातील तंत्रज्ञानाने अपघात कमी करण्याबाबत तसेच सदर अभियान अंतर्गत पूर्ण महिनाभर परिवहन विभाग विविध उपक्रम राबविण्यात येणार असल्याचे सांगितले.

कार्यक्रमाचे अध्यक्ष  अभिजीत राऊत, जिल्हाधिकारी यांनी उपिस्थतांना वाढते अपघात कमी करण्यासाठी वाहतुकीच्या नियमांचे सर्वांनी काटेकोरपणे पालन करण्याबाबत मार्गदर्शन केले. तसेच पायी चालणाऱ्यांनी कायम रस्त्याच्या उजव्या बाजूने चालावे अर्थात फूटपात वरून वाहनाकडे तोंड करून पायी चालण्याची पद्धत अवलंबावी (Walk on Right ) या बाबीचे पालन करण्याबाबत मार्गदर्शन केले. ओव्हर कॉन्फीडन्स मध्ये वाहन चालविणे, मोबाईल टॉकीग, तसेच छोटया छोटया चुकामुळे अपघात होत असल्यामुळे त्या चुका होऊ न दिल्यास अपघात थांबतील. वाहनांना, सायकली, बैलगाडींना रिफलेक्टर लावण्यानंतरच वाहने चालविण्याबाबत सुचना दिल्या. तसेच सहा साखर कारखान्यांमध्ये वाहतूक करताना वाहतूकदारांनी रिफ्लेक्टर लावूनच उसाची वाहतूक करण्याचे आवाहन केले. या वर्षाच्या 'पर्वा ' संकल्पनेची थिम असल्याबाबत सांगितले.

रस्ता सुरक्षा समिती सर्व यंत्रणा सदर अभियान जिल्हाभर राबवून अपघात मुक्त नांदेड करण्याचे संकल्पना मांडण्यात आली.श्रीमती दलजितकौर जज, यांनी रस्ता सुरक्षा करिता वाहतुक नियमांचे पालन करणे व दूचाकी चालविताना हेल्मेटचे वापर करण्याबाबतचे मत व्यक्त केले. 

सदर कार्यक्रमाच्या प्रसंगी.पोलीस अधीक्षक  अबिनाश कुमार यांच्या हस्ते आपल्या प्रिय व्यक्तीकरिता Parwah - care (संदेश फलकाचे) रस्ता सुरक्षा कार्यक्रमाच्या वेळी उदघाटन करण्यात आले.उपस्थितांना वाहतूक चिन्हे, रस्ता सुरक्षा चिन्हे याबाबत अधिकारी यांनी प्रत्यक्ष व भिंती पत्रकाद्वारे रांगोळी द्वारे मार्गदर्शन केले तसेच प्रथमोपचार व अपघातांनंतर घ्यावयाची काळजी बाबत डॉ. कुलकर्णी, डॉ. गुटे यांनी मार्गदर्शन केले.

कार्यक्रमाचे आभार प्रदर्शन श्रीमती रेणुका राठोड यांनी केले. संपूर्ण कार्यक्रमाचे सूत्र संचालन श्रीमती अनुराधा पतकी यांनी केले. या प्रसंगी प्रादेशिक परिवहन कार्यालय, नांदेड येथे कार्यरत अधिकारी व कर्मचारी, तसेच सुमारे २०० एनसीसी कैडेट, वाहन वितरक प्रतिनिधी  फरांदे, श्री. कोठारी, जाधव, . राठी, मोटार वाहन चालक-मालक संघटनेचे अध्यक्ष . हुंदल, तसेच ऑटोरिक्षा संघटनेचे अध्यक्ष . नरेंद्र गायकवाड,  अहेमद बाबा, स्कुलबस संघटनाचे अध्यक्ष  निखिल लातूरकर, . मनाळकर मोटार ड्रायव्हींग स्कूलचे संचालक . जयवंत पवळे, .धुळे,  मस्के व जनसमुदाय उपस्थित होते. सदर कार्यक्रमाच्या यशस्वीतेसाठी सहायक प्रादेशिक परिवहन अधिकारी . समीर शेख,  प्रशांत कंकरेज, मोटार वाहन निरिक्षक . अनुश्री केंद्रे, किशोर भोसले, . राघवेंद्र पाटील,  गणेश तपकिरे कार्यालयातील सर्व सहा. मोटार वाहन निरिक्षक, कर्मचारी गजानन शिंदे व इतर कर्मचारी यांनी परिश्रम घेतले.

बॉक्स / चौकट

कोरोना आजारापेक्षा  अपघातात मृत्यूमुखी 

 श्रीमती दलजितकौर जज यांनी देशातील अपघातात मृत्यु पडलेल्या व्यक्तीची संख्या पाहिली असता ती संख्या ही मागिल काही कालावधीमध्ये कोरोना या महाभयंकर बिमारीपेक्षाही अधिक असल्यामुळे रस्त्यावर वाहन चालवितांना सर्वानी वाहतूक नियमाचे पालन करुन वाहने चालविण्याबाबत सुचना दिल्या.

 नांदेडमध्ये वर्षभरात 394 अपघाती मृत्यू 

जोपर्यंत एखादी घटना आपल्या घरात घडत नाही तोपर्यंत त्याचे गांभीर्य कळत नाही. नांदेड मध्ये गेल्या वर्षभरात झालेल्या अपघाती मृत्यूची संख्या 394 आहे. आणखी एक ज्यांचा काही दोष नाही अशा पायी चालणाऱ्या 64 जणांना वाहनांनी चिरडले आहे. 365 दिवसात 394 अधिक 64 एकूण 458 लोकांचा जीव बेदर्कारपणे चालणाऱ्या वाहनांनी एकट्या नांदेड जिल्ह्यात  घेतला आहे.

00000

 वृत्त क्रमांक 12 

राष्ट्रीय ग्राहक दिनाचा सोमवारी कार्यक्रम

 

नांदेड, दि. 3 जानेवारी : ग्राहकांचे हक्क व ग्राहक संरक्षण कायदा याबाबत जागृती होण्याच्या उद्देशाने दरवर्षीप्रमाणे यावर्षी सोमवार 6 जानेवारी 2025 रोजी राष्ट्रीय ग्राहक दिन साजरा करण्यात येणार आहे. हा कार्यक्रम जिल्हाधिकारी कार्यालय परिसरातील डॉ. शंकरराव चव्हाण प्रेक्षागृह नियोजन भवन येथे दुपारी 1 वा. साजरा करण्यात येत आहे. जिल्ह्यातील सर्व नागरिक, ग्राहकांनी कार्यक्रमास उपस्थित रहावे, असे आवाहन जिल्हाधिकारी अभिजीत राऊत यांनी केले आहे.

 

या कार्यक्रमाचे उद्घाटन जिल्हाधिकारी अभिजीत राऊत यांच्या हस्ते होईल तर अध्यक्षस्थानी जिल्हा ग्राहक तक्रार निवारण मंचाचे अध्यक्ष राहूल पाटील हे असतील. प्रमुख वक्ते इंजि. बालाजी लांडगे (संघटक, छ. संभाजीनगर विभाग ग्राहक पंचायत महाराष्ट्र), प्रा.डॉ.दीपक कासराळीकर (जिल्हा अध्यक्ष ग्राहक पंचायत महाराष्ट्र), अॅड.आनंद बळवंतराव कृष्णापूरकर (जिल्हा संघटक नांदेड ग्राहक पंचायत महाराष्ट्र), सायन्ना मठमवार (जिल्हा उपाध्यक्ष नांदेड ग्राहक पंचायत महाराष्ट्र) हे राहतील.

00000

 वृत्त क्रमांक 11 

‘न्याय आपल्या दारी’ उपक्रमांतर्गत फिरते लोकअदालत

नांदेड, दि. 3 जानेवारी :- ग्रामीण भागातील जनसामान्यांना न्यायव्यवस्थेपर्यंत पोहोचता यावे व ते न्यायापासून वंचित राहू नये याकरिता नांदेड जिल्हामध्ये ‘न्याय आपल्या दारी’ या संकल्पनेंतर्गत सोमवार 6 ते शुक्रवार 24 जानेवारी 2025 पर्यंत मोबाईल व्हॅनमधून फिरते लोकअदालत जिल्ह्यातील निवडक गावापर्यंत पोहोचणार आहे. प्रमुख जिल्हा व सत्र न्यायाधीश तथा नांदेड जिल्हा विधी सेवा प्राधिकणाच्या अध्यक्षा सुरेखा कोसमकर यांच्या हस्ते जिल्हा न्यायालय नांदेड येथून सोमवार 6 जानेवारी रोजी मोबाईल व्हॅनच्या प्रवास कार्यक्रमास हिरवा झेंडा दाखवून कार्यक्रमाचे उद्घाटन होणार आहे.

 

त्यानंतर त्याच दिवशी लोहा तालुक्यातील मौजे सुनेगाव व पुढे 7 जानेवारी रोजी कंधार तालुक्यातील पेठवडज, 8 जानेवारी रोजी मुखेड तालुक्यातील पांडुरणी, 9 जानेवारी रोजी देगलूर तालुक्यातील करडखेड, 10 जानेवारी रोजी नायगाव तालुक्यातील मांजरम, 13 जानेवारी रोजी बिलोली तालुक्यातील आटकळी, 14 जानेवारी रोजी धर्माबाद तालुक्यातील येवती, 15 जानेवारी रोजी उमरी तालुक्यातील सोमठाणा, 16 जानेवारी रोजी मुदखेड तालुक्यातील बारड, 17 जानेवारी रोजी अर्धापूर भोगाव, 18 जानेवारी रोजी हदगाव तालुक्यातील तामसा, 20 जानेवारी रोजी माहूर तालुक्यातील सारखनी, 21 जानेवारी रोजी किनवट तालुक्यातील इस्लापुर, 22 जानेवारी रोजी हिमायतनगर तालुक्यातील सरसम, 23 जानेवारी रोजी भोकर तालुकयातील मोघाळी येथे पोहोचणार आहे. तर नांदेड तालुक्यांतर्गत ग्रामपंचायत धनेगाव येथे 24 जानेवारी 2025 रोजी पोहोचणार आहे.

 

या ग्रामपंचायतीच्या क्षेत्रातील वादपुर्व प्रकरणे, संबंधीत पोलीस स्टेशन हद्यीतील प्रलंबित दिवाणी व फौजदारी तडजोडपात्र प्रकरणे तसेच गुन्हा कबुलीची प्रकरणे याठिकाणी तडजोडीसाठी ठेवण्यात येणार आहेत. ‘न्याय आपल्या दारी’ या फिरत्या लोकअदालतीचे पॅनल प्रमुख म्हणून निवृत्त जिल्हा न्यायाधीश मो. युनुस अब्दुल करीम शेख यांची नियुक्ती करण्यात आली आहे.

 

वरील नमुद  दिवशी  प्रत्येक गावामध्ये सकाळी 11 वा. पासून फिरत्या लोकअदालतीच्या माध्यमातून कायदेविषयक  शिबिरादरम्यान विविध कायद्यांचे मार्गदर्शन होणार आहे. यासंधीचा लाभ सर्व ग्रामस्थ, नागरिकांनी घ्यावा, असे आवाहन नांदेड जिल्हा विधी सेवा प्राधिकरणाच्या सचिव श्रीमती दलजीत कौर जज यांनी केले आहे.

0000

 वृत्त क्रमांक 10 

अण्णासाहेब पाटील आर्थिक मागास विकास

महामंडळाचे अध्यक्ष नरेंद्र पाटील यांचा दौरा

नांदेड, दि. 3 जानेवारी :- अण्णासाहेब पाटील आर्थिक मागास विकास महामंडळाचे अध्यक्ष (मंत्री दर्जा) नरेंद्र अण्णासाहेब पाटील हे नांदेड जिल्ह्याच्या दौऱ्यावर येत असून त्यांचा दौरा पुढीलप्रमाणे राहील. शनिवार 4 जानेवारी रोजी परभणी शासकीय विश्रामगृह येथून वाहनाने दुपारी 2 वा. विमानतळ नांदेडकडे प्रयाण. सायं. 6.10 वा. नांदेड येथून विमानाने पुणेकडे प्रयाण करतील.

0000 

 वृत्त क्रमांक 9 

माळेगावच्या यात्रेला शासनाच्या विविध कार्यक्रमाने भरली रंगत

 

सकाळी पशु प्रदर्शन व स्पर्धा, दुपारी कृषी प्रदर्शन, कृषीनिष्ठांचा सत्कार, सायंकाळी लावणी महोत्सवाचा तडका

 

यात्रेची श्रीमंती व परंपरेला राजाश्रय मिळवण्यासाठी वचनबद्ध : आ.प्रताप पाटील चिखलीकर

 

बाळासाहेब ठाकरे हरिद्रा संशोधन केंद्राचे अध्यक्ष आ. हेमंत पाटील,

लातूरचे खासदार शिवाजीराव काळगे,

आ. बाबूराव कदम कोहळीकर यांच्यासह मान्यवरांची उपस्थिती

 

नांदेड दि. 2 जानेवारी : राष्ट्रीय दुखवट्यामुळे लांबणीवर गेलेल्या माळेगाव यात्रेच्या शासकीय कार्यक्रमाला आज थाटात सुरुवात झाली. विविध कार्यक्रमांचे नीटनेटके आयोजन करून यात्रेला आलेल्या लाखोंच्या समुदायाला खिळवून ठेवण्याचे कार्य आज नांदेड जिल्हा परिषद, लोहा पंचायत समिती व माळेगाव ग्रामपंचायतीने पार पाडले.

 

प्रशासनामार्फत 5 जानेवारीपर्यंत विविध कार्यक्रमाचे आयोजन करण्यात आले .आजही हजारो पर्यटकांनी श्रद्धाळूंनी आणि यात्रेकरूंनी श्री. क्षेत्र खंडोबाच्या दर्शनासाठी गर्दी केली होती. यात्रेमध्ये सर्व वयोगटातील नागरिकांच्या मनोरंजनासाठी करमणुकीची साधने उपलब्ध आहेत. तसेच खरेदी करण्यासाठी जीवनावश्यक वस्तूंपासून तर बाळ गोपाळांच्या खेळण्याच्या साहित्याची रेलचेल आहे. थंडीपासून बचाव करणारे बिछान्याचे साहित्य कपडे याची प्रचंड मोठी दुकाने यात्रेत आली असून पशूंचा बाजार लक्षवेधी आहे. शेकडो वर्षाच्या आयोजनाची परंपरा असलेल्या या यात्रेला मोठ्या संख्येने भेट देण्याचे आवाहन जिल्हा प्रशासनाने केले आहे.

 

5 जानेवारीला पशुस्पर्धांचा निकाल

आज पशुप्रदर्शन व स्पर्धेला तर कधी न बघितले असतील अशा पद्धतीच्या विविध प्रजातीचे अश्व, श्वान, वळू, कुक्कुट यांची देशातील विविध भागातून आलेली विविधता हजारोची नजर वेधून घेत होती. पशुप्रदर्शन व स्पर्धा सकाळी 11 वाजता आयोजित करण्यात आली होती. या पशुप्रदर्शनीचा निकाल ५ जानेवारीला वृत्तपत्रातून घोषित केला जाणार आहे. या कार्यक्रमाचे उद्घाटन आमदार प्रताप पाटील चिखलीकर यांनी केले. जिल्हा परिषदेचे मुख्य कार्यकारी अधिकारी संदीप माळोदे, यात्रेच्या सचिव उपमुख्य कार्यकारी अधिकारी मंजुषा कापसे, लातूर विभागाचे प्रादेशिक पशुसंवर्धन सहायुक्त डॉ नाना सोनवणे, पशुसंवर्धन अधिकारी डॉ. प्रवीणकुमार घुले,उदगीरचे पशुवैद्यकिय महाविद्यालयाचे सहयोगी अधिष्ठाता नंदकुमार गायकवाड, नांदेडचे जिल्हा पशुसंवर्धन उपायुक्त पडीले, यातिन पुजारी, हिंगोलीचे जिल्हा पशुसंवर्धन उपायुक्त एस. बी. खुणे, लातूरचे जिल्हा पशुसंवर्धन उपायुक्त श्रीधर शिंदे  यांची उपस्थिती होती.

 

कृषी प्रदर्शन थाटात

नांदेड जिल्हा परिषदेच्या कृषी विभागामार्फत आयोजित प्रदर्शन व सत्कार समारंभाचे थाटात आयोजन करण्यात आले. फळे,भाजीपाला, मसाला प्रदर्शनातील दर्जेदार व जिल्ह्यातील शेतकऱ्यां प्रति कृतज्ञता व्यक्त करणारा सत्कार सोहळा स्मरणीय ठरला आजच्या कार्यक्रमामध्ये  डॉ. शंकरराव चव्हाण कृषिनिष्ठ पुरस्कारासाठी निवड करण्यात आलेल्या नांदेड तालुक्यातील गुंडेगाव येथील भगवानराव हंबर्डे, मुदखेड तालुक्यातील पिंपळकौठा (म.) रामराव मगरे, अर्धापूर तालुक्यातील लहान येथील प्रभाकर हारकरी, भोकर तालुक्यातील रेणापूर येथील व्यंकट हामंद, हदगाव तालुक्यातील रुई (धा.) प्रकाश भालके, हिमायतनगर तालुक्यातील दरेसरसम येथील सुभाष राठोड, किनवट तालुक्यातील गोकुंदा येथील ज्योतिबा गौणारकर, माहूर तालुक्यातील अंजनखेड येथील राजू बाळस्कर, उमरी तालुक्यातील पळसगाव येथील गणेश पवळे, धर्माबाद तालुक्यातील समराळा येथील अविनाश जैरमोड, बिलोली तालुक्यातील किनाळा येथील माधव भोसले, देगलूर तालुक्यातील भोकसखेडा येथील गोपाळ जाधव, मुखेड तालुक्यातील एकलारा येथील प्रभावती नरहरे, कंधार तालुक्यातील सुजानवाडी येथील कृष्णा भालेराव, लोहा तालुक्यातील पेनुर येथील बालाजी लोखंडे, नायगाव खै. तालुक्यातील वजिरगाव येथील माधवराव ढगे तर उत्तेजनार्थ अर्धापूर तालुक्यातील कामठा बु. येथील श्रीमती महानंदा कल्याणकर, हदगाव तालुक्यातील लिंगापूर येथील सचिन देवसरकर व कंजारा येथील ओम इंदेवार या प्रयोगशील शेतकऱ्यांचा सत्कार करण्यात आला. आमदार प्रताप पाटील चिखलीकर, सीईओ संदीप माळोदे, जिल्हा परिषदेचे कृषी विकास अधिकारी सचिन कपाले, जिल्हा अधीक्षक कृषी अधिकारी भाऊसाहेब बऱ्हाटे, राजकुमार मुक्कावार , समाज कल्याण अधिकारी सत्येंद आवूलवार,यात्रेच्या सचिव उपमुख्य कार्यकारी अधिकारी मंजुषा कापसे, कृषी विभागाचे विविध मान्यवर अधिकारी व माजी पदाधिकारी तसेच शेतीनिष्ठ पुरस्कार प्राप्त शेतकऱ्यांचे कुटुंबीय मोठ्या संख्येने उपस्थित होते.यात्रेच्या निमित्याने जिल्हा परिषद प्रशासनामार्फत हा एक मोठा कार्यक्रम दरवर्षी आयोजित केला जातो.

 

लावणी महोत्सवाला हजारोंची उपस्थिती

सायंकाळी महाराष्ट्रातील नामवंत नऊ संचांकडून सादर झालेल्या लावणी नृत्याने माळेगावात यात्रेसाठी आलेल्या यात्रेकरूंना वेड लावले.महोत्सवात संचामध्ये आशा रूपा परभणीकर मोडनिंब, शामल स्नेहा लखनगावकर मोडनिंब, आकांक्षा कुंभार प्रस्तुत मराठमोळा-नादखुळा, प्रिया पाटील सोलापुर प्रस्तुत झंकार घुंगराचा, योगेश देशमुख पुणे प्रस्तुत तुमच्यासाठी कायपण, श्रुती मुंबईकर प्रस्तुत लावण्यवतीचा जलवा या संचाने सादरीकरण केले. विशेष म्हणजे नांदेड जिल्ह्यातील अनुराधा नांदेडकर व स्वर सरगम कलासंच माळाकोळी या दोन कला संचांनीही आपली दमदार उपस्थिती नोंदविली.

 

माळेगावसाठी मुख्यमंत्र्यांना साकडे

आजच्या सर्व शासकीय कार्यक्रमाचे उद्घाटन लोहाचे आमदार प्रताप पाटील चिखलीकर यांच्या हस्ते झाले. माळेगावच्या यात्रेची श्रीमंती वाढविण्यासाठी व परंपरा जोपासण्यासाठी थेट मुख्यमंत्र्यांना प्रसंगी साकळे घालू असे आश्वासन यावेळी त्यांनी हजारोंच्या जनसमुदायाला दिले. जिल्हा परिषदेचे सभापती असतानाच्या काळापासून या यात्रेच्या परंपरेची व इथल्या लोककलेची आपण जोडल्या गेलो आहोत त्यामुळे लागणारा खर्च व या संस्कृतीची जोपासना करण्यासाठी कार्यक्रमांमध्ये बदल तसेच नव्याने काही आयोजन करण्याबाबत आपण जिल्ह्यातील सर्व लोकप्रतिनिधींची तसेच सर्व लोकप्रतिनिधी मिळून राज्याचे मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री अजितदादा पवार यांच्याशी बोलणार असल्याचेही त्यांनी यावेळी सांगितले.यात्रेची श्रीमंती व परंपरेला राजाश्रय मिळवण्यासाठी वचनबद्ध असल्याचा त्यांनी तीनही कार्यक्रमात पुनरुच्चार केला.

 

लोकप्रतिनिधींची उपस्थिती

लावणी महोत्सवाला सायंकाळी बाळासाहेब ठाकरे हरिद्रा संशोधन केंद्राचे अध्यक्ष आ.हेमंत पाटील,लातूरचे खासदार शिवाजीराव काळगे,आ. बाबूराव कदम कोहळीकर,माजी आ. गंगाधर पटणे, जिल्हा परिषदेचे माजी पदाधिकारी मोठ्या संख्येने उपस्थित होते. उपस्थित जनतेला त्यांनी शुभेच्छा दिल्या.

 

3 जानेवारीला लोककला महोत्सव

3 जानेवारीला सकाळी 11 वाजता आरोग्य शिबिर होणार आहे. तर याच दिवशी जिल्हा परिषदेमार्फत पारंपारिक लोककला महोत्सवाचे आयोजन करण्यात आले आहे. हा कार्यक्रम दुपारी दोन वाजता सुरू होईल.   

4 जानेवारी रोजी सकाळी दुपारी १२वाजता शंकर पटाचे ( बैल जोडी,बैलगाडा शर्यत ) आयोजित करण्यात आली आहे. 

5 जानेवारी रोजी दुपारी अकरा वाजता पशुप्रदर्शन व दुग्ध स्पर्धा बक्षीस वितरण समारोह होणार आहे. तर 5 जानेवारीला दुपारी बारा वाजता कुस्त्यांची दंगल होणार आहे.

00000

 वृत्त क्रमांक 8

नांदेड जिल्ह्यात वाचन संकल्प महाराष्ट्राचा पंधरवड्यास मोठ्या उत्साहात प्रारंभ

नवीन वर्षाची सुरुवात वाचनाने

नांदेड दि. १ जानेवारी :- “वाचन संकल्प महाराष्ट्राचा” वाचन पंधरवाडयानिमित्त नांदेड जिल्हयातील सार्वजनिक ग्रंथालयामध्ये १ ते १५ जानेवारी २०२५ या कालावधीत ग्रंथप्रदर्शन व वाचन सामूहिक कार्यक्रम

असे विविध कार्यक्रमाचे आयोजन करण्यात येत आहे.

उच्च व तंत्रशिक्षण विभागाच्या निर्देशाप्रमाणे 1 जानेवारी ते 15 जानेवारी या कालावधीत वाचन संकल्प महाराष्ट्राचा या उपक्रमाअंतर्गत जिल्हा ग्रंथालय अधिकारी कार्यालय व जिल्हयातील शासनमान्य सार्वजनिक ग्रंथालय यांच्या संयुक्त विद्यमाने आज विविध कार्यक्रमांची सुरुवात झाली त्यामध्ये ग्रंथप्रदर्शन,वाचन कौशल्य कार्यशाळा निवडलेल्या पुस्तकांचे सामुहिक वाचन लेखन व विद्यार्थी यांच्या मधील वाचन संवाद कार्यक्रम,पुस्तक परिक्षण व कथन स्पर्धेचे आयोजन करण्यात आले.जिल्हा ग्रंथालय अधिकारी कार्यालय व राम मनोहर लोहिया सार्वजनिक वाचनालय,नांदेड वाघाळा शहर महानगरपालिका नांदेड या अभ्यासिकेत सामुहिक वाचन करताना जिल्हा ग्रंथालय अधिकारी अ.वा.सुर्यवंशी, महापालिकेचे ग्रंथपाल श्रीनिवास इज्जपवार यांनीही विद्यार्थ्यासोबत सामुहीक वाचन करुन “वाचन संकल्प महाराष्ट्राचा” या उपक्रमाची सुरुवात केली.

नांदेड जिल्ह्यात आज संभाजी सार्वजनिक वाचनालय,वाढवणा, भगवान श्रीकृष्ण वाचनालय,भोकर, हु.संतराम कांगठीकर वाचनालय,अर्जापूर,सचखंड गुरुव्दारा संचलित श्री हुजूर साहेब सार्वजनिक वाचनालय,नांदेड,डॉ.बाबासाहेब आंबेडकर वाचनालय,नगर परिषद कंधार, श्री समर्थ वाचनालय देगलूर,श्री संत नारायणगीरी महाराज सार्वजनिक वाचनालय वासरी, का.मातोश्री सुंदराबाई सार्वजनिक वाचनालय,बिलोली यांनी या उपक्रमात प्रामुख्याने सहभाग घेतला.

०००००

 वृत्त क्रमांक 7

​उद्योग राज्यमंत्री इंद्रनिल नाईक यांचा दौरा

 

नांदेड दि. 1 जानेवारी :  राज्याचे उद्योग, सार्वजनिक बांधकाम, उच्च व तंत्रशिक्षण, मृद व जलसंधारण, आदिवासी विकास व पर्यटन राज्यमंत्री इंद्रनिल नाईक हे गुरूवार 2 जानेवारी 2025 रोजी सकाळी 10.30 वा. किनवट तालुक्यातील दहेली तांडा येथे माजी आमदार स्व. प्रदीप नाईक यांचेकडे सांत्वन भेट. सकाळी 11 ते 11.30 वाजेपर्यंत राखीव. सकाळी​ 11.40 वा. माहूर, सारखणी मार्गे दहेली तांडा ता. किनवट येथून नाईक बंगला कार्ला रोड पुसद जिल्हा यवतमाळकडे प्रयाण करतील.

0000