वृत्त क्रमांक 576

प्रधानमंत्री धरती आबा जनजाती ग्राम उत्कर्ष अभियानांतर्गत

किनवट तालुक्यात मांडवा व घोगरवाडी येथे शिबीर संपन्न 

आदिवासी समाजातील नागरिकांना विविध योजनेचा दिला लाभ    

नांदेड दि. 5 :- केंद्र शासनामार्फत सुरु करण्यात आलेल्या ‘प्रधानमंत्री धरती आबा जनजाती ग्राम उत्कर्ष अभियाना’च्या (PM D​A-JGUA) अंमलबजावणीसाठी किनवट तालुक्यातील मांडवा व घोगरवाडी येथे आज 5 जून रोजी विशेष शिबिराचे आयोजन करण्यात आले होते. 

या शिबिरात लाभार्थ्यांना आधारकार्ड, आरोग्य तपासणी, आयुष्यमन कार्ड वाटप, कृषी विभागामार्फत महाबीज बियाण्याचे वाटप किनवटचे सहाय्यक जिल्हाधिकारी तथा एकात्मिक आदिवासी विकास प्रकल्प कार्यालयाचे प्रकल्प अधिकारी जेनित चन्द्रा दोन्तुला व तहसीलदार डॉ. शारदा चौडेकर यांच्या हस्ते करण्यात आले. यावेळी पंचायत समिती, तालुका आरोग्य अधिकारी व विविध विभागाचे अधिकारी-कर्मचारी, नागरीक आदींची उपस्थिती होती. सहाय्यक जिल्हाधिकारी जेनित चन्द्रा दोन्तुला व तहसीलदार डॉ. चौडेकर यांच्या मार्गदर्शनाखाली आयोजित या शिबिरात त्यांनी लाभार्थ्यांना योजनेबाबत मार्गदर्शन केले. या योजनेत नांदेड जिल्ह्याचा समावेश असुन किनवट तालुक्यातील 128 व माहूर तालुक्यातील 4 गावांचा समावेश आहे.

0000

 

 वृत्त क्रमांक 575

हवामान अनुकूल शेतीतून उत्पादनवाढीचा मार्ग 

विकसित कृषि संकल्प अभियानाचा सहावा दिवस संपन्न 

नांदेड दि. 4 जून :- "विकसित कृषि संकल्प अभियान" अंतर्गत हवामान अनुकूल तंत्रज्ञान आणि आधुनिक शेती पद्धतींचा प्रभावी वापर करून उत्पादनवाढीच्या संधींवर केंद्रित सत्र आयोजित करण्यात आले. विशेषतः ऊस शेतीच्या सुधारित तंत्रज्ञानाचा अवलंब आणि उत्पादनवाढीसाठी वैज्ञानिक दृष्टिकोन यावर भर देण्यात आला. आज धर्माबाद तालुक्यातील शेळगाव, माष्टी, मोकली व देगलूर तालुक्यातील शेळगाव, कोटेकल्लुर, तमलुर या गावी अभियान नुकतेच संपन्न झाले. 

प्रमुख तज्ज्ञ आणि अधिकारी उपस्थित

या महत्वपूर्ण कार्यक्रमात राष्ट्रीय डाळिंब संशोधन संस्थेचे प्रमुख शास्त्रज्ञ डॉ. शिरगुरे आणि शास्त्रज्ञ श्री. राहुल sab यांनी शेतीत डाळिंब उत्पादन करण्यासाठी तंत्रज्ञानाचा उपयोग कसा करावा यावर मार्गदर्शन केले. ऊस संशोधन शास्त्रज्ञ डॉ. थोरात आणि डॉ. बोरसे यांनी ऊस उत्पादन वाढवण्यासाठी उन्नत तंत्रज्ञान, सुधारित वाण आणि काटेकोर व्यवस्थापन यावर चर्चा केली. 

संस्कृती संवर्धन मंडळ संचालित कृषि विज्ञान केंद्राचे शास्त्रज्ञ डॉ. कपिल इंगळे, डॉ. माधुरी रेवणवार आणि डॉ. प्रियंका खोले यांनी हवामान अनुकूल शेती, पीक विविधता आणि जैविक शेतीच्या संधी यावर सखोल मार्गदर्शन केले. प्रभुदास उडतेवार, बालाजी चंदापुरे, प्रशांत शिवपणोर आणि संतोष लोखंडे यांचीही विशेष उपस्थिती लाभली, ज्यांनी शासकीय योजनांचा प्रभावी लाभ घेण्यासाठी शेतकऱ्यांना मार्गदर्शन केले. 

उत्तम उत्पादनासाठी हवामान अनुकूल तंत्रज्ञान

·         सुधारित लागवड तंत्रज्ञान - हवामान बदलांचा परिणाम कमी करण्यासाठी योग्य पीक योजना

·         मृदा आरोग्य आणि जैविक शेती - जमिनीच्या सुपीकतेसाठी संतुलित खत व्यवस्थापन

·         जलसंधारण आणि आधुनिक पाणी व्यवस्थापन - ड्रिप सिंचन, सूक्ष्म सिंचन आणि सेंद्रिय उपाय

·         पीक संरक्षण उपाय - नैसर्गिक उपायांचा प्रभावी उपयोग 

कृषी व्यवसाय आणि उत्पादनवाढीचा मार्ग

·         सेंद्रिय शेती आणि जैविक उत्पादनांचा वापर - निर्यात व मूल्यवर्धित उत्पादनास चालना

·         डिजिटल मार्केटिंग आणि आधुनिक विक्री व्यवस्था - शेतकऱ्यांना थेट ग्राहकांशी जोडण्याचा मार्ग

·         सेंद्रिय खत निर्मिती आणि जैविक प्रक्रिया उद्योग - गट शेतीद्वारे अधिक नफा मिळवण्याची संधी

 

शेतीत नवी क्रांती - शेतकऱ्यांसाठी संधी

शेतकऱ्यांनी उत्तम तंत्रज्ञानाचा अवलंब करून उत्पादनवाढीसाठी योग्य नियोजन करण्याचा संकल्प केला आहे. या अभियानाद्वारे हजारो शेतकऱ्यांना मार्गदर्शन मिळत असून ते शेतीत नव्या संधी शोधत आहेत. शेतीच्या प्रगतीसाठी वैज्ञानिक दृष्टिकोन, गट शेती आणि शासकीय योजनांचा प्रभावी उपयोग करण्याचे आवाहन तज्ज्ञांनी केले आहे.

00000

 वृत्त क्रमांक 574

क्रीडा व युवक कल्याण मंत्री दत्तात्रय भरणे यांचा दौरा 

नांदेड दि. 4 जून :- राज्याचे क्रीडा व युवक कल्याण, अल्पसंख्यांक विकास व औकाफ मंत्री दत्तात्रय भरणे हे 6 जून रोजी नांदेड दौऱ्यावर येत असून त्यांचा दौरा कार्यक्रम पुढीलप्रमाणे राहील.

शुक्रवार 6 जून 2025 रोजी वाशिम येथून मोटारीने दुपारी 3 वा. नांदेड विमानतळाकडे प्रयाण. सायंकाळी 5 वा. नांदेड विमानतळ येथे आगमन व राखीव. सायं. 6.10 वा. नांदेड विमानतळ येथून पुणेकडे  प्रयाण करतील.

0000

 वृत्त क्रमांक 573

भारतरत्न डॉ. बाबासाहेब आंबेडकर स्वाधार योजना

नवीन व नुतनीकरणाचे अर्जाबाबत सूचना

नांदेड दि. ४ जून :-  महाराष्ट्र शासनाच्या सामाजिक न्याय व विशेष सहाय्य विभागाकडून अनुसूचित जाती व नवबौध्द घटकातील जे विद्यार्थी शासकीय प्रवेशास पात्र असून प्रवेश मिळालेला नाही. अशा विद्यार्थ्यांना मॅट्रीकोत्तर शिक्षण घेता यावे म्हणून भोजन, निवास व इतर शैक्षणिक सुविधा विद्यार्थ्यांना स्वतः उपलब्ध करून घेण्यासाठी आवश्यक रक्कम संबधीत अनुसूचित जाती व नवबौध्द घटकातील विद्यार्थ्यांच्या आधार संलग्न बँक खात्यामध्ये थेट वितरीत करण्यासाठी 13 जुन 2018 व 26 डिसेंबर 2024 च्या शासन निर्णयान्वये भारतरत्न डॉ.बाबासाहेब आंबेडकर स्वाधार योजना राबविण्यात येत आहे. 

भारतरत्न डॉ. बाबासाहेब आंबेडकर स्वाधार योजना शैक्षणिक वर्ष 2024-25 मध्ये ज्या विद्यार्थ्यांनी नवीन व नुतनीकरण ऑनलाईन अर्ज भरलेले आहेत, अशा विद्यार्थ्यांचे नुतनीकरण अर्ज ऑनलाईन पध्दतीने तपासणी सुरु आहे. ज्या विद्यार्थ्यांचे अर्ज अपूर्ण कागदपत्राअभावी त्रुटीत आलेले आहेत अशा विद्यार्थ्यांना त्यांच्या नोंदणीकृत मोबाईल क्रमांकावर एसएमएस द्वारे माहिती देण्यात येत असून, अर्ज त्रुटीत आलेल्या विद्यार्थ्यांनी https://hmas.mahait.org या संकेतस्थळावर तात्काळ माहिती व्यवस्थीत भरावी जेणेकरुन या वर्षीचा लाभ देणे सोयीचे होईल.

नांदेड जिल्ह्यातील सर्व स्वाधार योजनेचा लाभ घेणाऱ्या विद्यार्थ्यांनी कुठल्याही त्रयस्थ व्यक्तीशी संपर्क न साधता व कुठल्याही अमिषाला बळी न पडता प्रत्यक्ष संबंधीत कार्यालयातील स्वाधार विभागाशी संपर्क साधावा. तसेच या योजनेबाबत काही अडचणी असल्यास कार्यालयातील जबाबदार व्यक्तीकडे संपर्क करावा व माहिती  घ्यावी. ही योजना थेट विद्यार्थ्यांना त्यांच्या बँक खात्यामध्ये रक्कम वितरीत केली जाते. यामुळे आपण या बाबतीत जागृत राहून कार्यालयाबाहेर कुठल्याही यंत्रणेस संपर्क साधु नये याची दक्षता घ्यावी, असे आवाहन सहाय्यक आयुक्त शिवानंद मिनगिरे यांनी केले आहे.

00000

वृत्त क्रमांक 572

एकात्मिक फलोत्पादन विकास अभियानातर्गंत अर्ज करण्याचे आवाहन 

नांदेड दि. 4 जून :- एकात्मिक फलोत्पादन विकास अभियान अंतर्गत सन 2025-26 अंतर्गत फळे, फुले, मसाला लागवड, अळिंबी उत्पादन प्रकल्प व जुन्या फळबागांचे पुररूज्जीवन हा घटक राबविण्यात येत आहे. यामध्ये विदेशी फळे, फुले, मसाला लागवड व आंबा, चिकू, संत्रा व मोसंबी, लिंबु, पेरु, आवळा या फळपिकांच्या जुन्या फळबागांचे पुररूज्जीवन करणे तसेच अळिंबी उत्पादन प्रकल्प उभारणे करणे या बाबींचा समावेश आहे. 

तरी सर्व शेतकऱ्यांनी विदेशी फळे, फुले, मसाला लागवड व अळिंबी उत्पादन प्रकल्प उभारणे करणे तसेच आंबा, चिकू, संत्रा व मोसंबी, लिंबु, पेरु, आवळा या फळपिकांच्या बागा असलेल्या अधिकाधिक शेतकऱ्यांनी महाडीबीटी पोर्टल mahadbtmahait.gov.in फलोत्पादन या घटकाखाली अर्ज करावेत. योजनेच्या अधिक माहितीसाठी संबंधित नजीकच्या कृषि कार्यालयाशी संपर्क साधावा असे आवाहन जिल्हा अधिक्षक कृषी अधिकारी दत्तकुमार कळसाईत यांनी केले आहे.

00000

वृत्त क्रमांक 571

शाश्वत शेतीसाठी जैविक संसाधनांचे महत्व

विकसित कृषि संकल्प अभियानाचा आज सातवा दिवस

नांदेड दि. 4 जून :- शेतकऱ्यांच्या सशक्तीकरणासाठी आणि जैविक शेतीला चालना देण्यासाठी विकसित कृषि संकल्प अभियान यशस्वीपणे सातव्या दिवशी पोहोचले. या उपक्रमाद्वारे शाश्वत शेतीसाठी जैविक संसाधनांचे महत्व अधोरेखित करण्यात आले आहे, अशी माहिती सगरोळीच्या कृषि विज्ञान केंद्राचे वरिष्ठ शास्त्रज्ञ व प्रमुख यांनी दिली. 

शेतीसाठी जैविक संसाधनांची गरज

या अभियानाच्या सातव्या दिवशी तज्ज्ञ आणि कृषी मार्गदर्शकांनी 7 हजार 368 गावांचा दौरा केला. जिथे 7.95 लाखांहून अधिक शेतकऱ्यांना जैविक शेती, मृदा आरोग्य, नैसर्गिक खतांचा वापर आणि जलवायु अनुकूल शेती तंत्रज्ञान याबद्दल माहिती देण्यात आली. 

आज हे अभियान देगलूर तालुक्यातील कुषावाडी, होट्टल, काठेवाडी आणि धर्माबाद तालुक्यातील पाटोदा खुर्द, पाटोदा बुद्रुक व चिकना या गावी प्रभावीपणे पार पडले. 

मृदा आरोग्य राखणे, रासायनिक घटकांचा अतिरेक टाळणे आणि सेंद्रीय शेतीच्या संधीचा विकास हे या अभियानाचे प्रमुख उद्देश आहेत. शेतीतील जैविक संसाधनांचा प्रभावी वापर केल्यास उत्पादनाची गुणवत्ता वाढते तसेच मृदाची सुपीकता आणि जलसंधारण सुधारते, असे शेतकरी वैज्ञानिकांनी सांगितले. 

तज्ज्ञांचे मार्गदर्शन आणि योजनांचा आढावा

या अभियानात कृषि विज्ञान केंद्र, सगरोळी येथील तज्ञांची दोन टीम्स सहभागी झाल्या असून, त्यांनी गावोगावी फिरुन शेतकऱ्यांना सेंद्रीय शेतीसाठी आवश्यक उपाय आणि तंत्रज्ञान यांचे मार्गदर्शन केले. 

तज्ज्ञांची नावे

या अभियानात राष्ट्रीय डाळिंब संशोधन संस्थेचे प्रमुख शास्त्रज्ञ डॉ. शिरगुरे आणि राहुल डमाळे, ऊस संशोधन शास्त्रज्ञ डॉ. थोरात आणि डॉ. बोरसे तसेच संस्कृती संवर्धन मंडळ संचालित कृषि विज्ञान केंद्राचे शास्त्रज्ञ डॉ. कपिल इंगळे, डॉ. माधुरी रेवणवार आणि डॉ. प्रियंका खोले यांनी हवामान अनुकूल शेती, पीक विविधता आणि जैविक शेतीच्या संधी यावर सखोल मार्गदर्शन केले. 

तसेच प्रभुदास उडतेवार, बालाजी चंदापुरे, प्रशांत शिवपणोर आणि संतोष लोखंडे उपस्थित होते. शायकीय योजनांची प्रभावी लाभ घेण्यासाठी कृषि विभागाच्या कर्मचाऱ्यांनी शेतकऱ्यांना मार्गदर्शन केले. 

याशिवाय कापूस संशोधन केंद्राचे प्रख्यात तज्ज्ञ डॉ. चींचाने यांनी कापूस उत्पादनासाठी सुधारित तंत्रज्ञान, जैविक संसाधनांचा प्रभावी वापर आणि आधुनिक व्यवस्थापन यावर विशेष मार्गदर्शन केले. 

शाश्वत शेतीकडे एक महत्वाचा टप्पा

विकसित कृषि संकल्प अभियानाच्या सातव्या दिवशी शेतकरी, तज्ज्ञ आणि कृषी संस्थानी एकत्र येऊन जैविक शेतीच्या प्रवासाला गती देण्याचा निर्धार केला. आगामी दिवसांत याला अधिक व्यापक स्वरुप देण्यासाठी शासन आणि संस्थात्मक पातळीवर निर्णय घेतले जातील. शाश्वत शेती आणि जैविक संसाधनांच्या प्रभावी वापरामुळे पर्यावरण अनुकूल शेतीस चालना मिळेल, याचा शेतकऱ्यांनी लाभ घ्यावा, असे आवाहन तज्ज्ञांनी केले आहे. 

00000

 

वृत्त क्रमांक 570

सारथीमार्फत मराठा-कुणबी विद्यार्थ्यांना परदेशात उच्च शिक्षणाची संधी 

महाराजा सयाजीराव गायकवाड शिष्यवृत्ती योजनेच्या माध्यमातून

जागतिक स्तरावर उच्च शिक्षणासाठी जाता येणार 

नांदेड दि. 4 जून :- मराठा, कुणबी, कुणबी-मराठा, मराठा-कुणबी या जातीतील गुणवंत विद्यार्थ्यांना परदेशातील नामांकित विद्यापीठामध्ये उच्च शिक्षण घेण्यासाठी आर्थिक मदत पुरवणारी महाराजा सयाजीराव गायकवाड सारथी गुणवंत मुला-मुलींना परदेशात उच्च शिक्षणासाठी शिष्यवृत्ती योजना राबविण्यात येत आहे. इच्छूक विद्यार्थ्यांनी सारथीच्या fs.maharashtra.gov.in या अधिकृत संकेतस्थळावर विहित नमुन्यात ऑनलाईन अर्ज 16 जून 2025 पर्यत सादर करावा असे आवाहन छत्रपती संभाजीनगरचे सारथीचे उपव्यवस्थापकीय संचालक यांनी केले आहे.

शैक्षणिक वर्ष 2023-24 पासून प्रभावीपणे राबविली जात आहे. या योजनेच्या माध्यमातून दरवर्षी 75 विद्यार्थ्यांना शिष्यवृत्ती प्रदान केली जाते. ही योजना मराठा-कुणबी समाजातील गुणवंत विद्यार्थ्यांना जागतिक स्तरावर शिक्षण घेण्यासाठी प्रोत्साहन देणारी ठरणार आहे.  

अर्ज प्रक्रीया आणि मदत

शैक्षणिक वर्ष 2025-26 साठी स्प्रिंग 2025 (एप्रिल/मे 2025), 2025(जुलै/ऑगस्ट/सप्टेंबर 2025) आणि 2026 (जानेवारी ते मार्च 2026) या कालावधीत प्रवेश घेणारे विद्यार्थी अर्ज करु शकतात.

योजनेचा उद्देश आणि व्याप्ती

ही योजना मराठा, कुणबी, कुणबी-मराठा, मराठा-कुणबी या जातीतील विद्यार्थ्यांना परदेशात पदव्युत्तर पदवी, पदव्युत्तर पदविका आणि पीएचडी QS World University Ranking मध्ये 200 च्या आत असलेल्या परदेशातील शैक्षणिक संस्थामध्ये प्रवेश घेणाऱ्या 75 विद्यार्थ्यांना ही शिष्यवृत्ती मंजूर केली जाते. यामध्ये 50 जागा पदव्युत्तर पदवी/पदवीका आणि 25 जागा पीएचडी च्या विविध अभ्यासक्रमासाठी राखीव आहेत.

शिष्यवृत्तीचे स्वरुप  

या योजनेअंतर्गत विद्यार्थ्यांना शिक्षण शुल्क, निर्वाह भत्ता आणि वैयक्तीक आरोग्य विमा यासाठी आर्थिक सहाय्य मिळते. प्रतिवर्ष पदव्युत्तर अभ्यासक्रमासाठी कमाल 30 लाख रुपये आणि पीएचडी अभ्यासक्रमासाठी कमाल 40 लाख रुपये या मर्यादेत शिष्यवृत्तीचा लाभ दिला जातो.

पात्रता निकष 

नागरिकत्व आणि रहिवास लाभार्थी हा मराठा, कुणबी, कुणबी-मराठा, मराठा-कुणबी जातीतील महाराष्ट्राचा रहिवासी आणि भारतीय नागरिक असावा.

शैक्षणिक पात्रता

पदव्युत्तर अभ्यासक्रमासाठी भारतातील मान्यताप्राप्त विद्यापीठातून किमान 55 टक्के गुणांसह पदवी उत्तीर्ण असावी.

वयोमर्यादा : पदव्युत्तर अभ्यासक्रमासाठी कमाल वय 35 वर्ष आणि पीएचडी साठी 40 वर्ष

उत्पन्न मर्यादा

 कुटूंबाचे मागील आर्थिक वर्षातील सर्व मार्गानी प्राप्त एकूणप वार्षिक उत्पन्न 8 लाख रुपयापेक्षा जास्त नसावे.

विद्यापीठ प्रवेश पात्रता 

क्युएस वर्ल्ड युनिव्हर्सिटी रॅकींग 200 च्या आत असलेल्या परदेशी विद्यापीठात पूर्णवेळ अभ्यासक्रमासाठी अनकन्डींशनल ऑफर पत्र असणे आवश्यक आहे.

इतर अटी

यापूर्वी कोणतीही राज्य किंवा केंद्र शासनाची परदेशी शिष्यवृत्ती घेतलेली नसावी. अर्धवेळ किंवा एक्झिक्युटीव्ह अभ्यासक्रमासाठी प्रवेशित विद्यार्थी पात्र ठरणार नाहीत.

आवश्यक कागदपत्रे

विहित नमुन्यातील अर्ज, सक्षम प्राधिकाऱ्यांचा उत्पन्नाचा दाखला आणि आयटीआर 2025-26, फार्म नं. 16, दहावी, बारावी, पदवी, पदव्युत्तर पदवीच्या गुणपत्रिका इतर आवश्यक दाखले, परदेशी विद्यापीठाचे बिनशर्त ऑफर पत्र, विद्यापीठाच्या माहिती पत्रकाची प्रत, अद्यावत QS World University Ranking ची माहिती.

विशेष सूचना

विद्यार्थ्यांना प्रत्येक सत्रासाठी प्रगती अहवाल आणि खचा्रची उपयोगिता प्रमाणपत्रे सादर करणे बंधनकारक आहे. खोटी माहिती किंवा बनावट कागदपत्रे सादर केल्यास फौजदारी कारवाई आणि खर्चाची व्याजासह वसुली केली जाईल.

संपर्क 

अधिक माहितीसाठी सारथीच्या विभागीय कार्यालयाशी संपर्क साधावा किंवा सारथीच्या अधिकृत संकेतस्थळाला भेट द्यावी. सारथी कार्यालयाचा संपर्क क्रमांक -0220-25592507 असा आहे.

000000

दि. ३ जून 2025

वृत्त क्रमांक 569

जिल्हा कोषागार अधिकारी पदाचा 

विक्रम देशमुख (पतंगे) यांनी पदभार स्विकारला 

नांदेड दि. 3 जून :- नांदेड जिल्हा कोषागार अधिकारी म्हणून विक्रम देशमुख (पतंगे) किल्लेवडगावकर हे मंगळवार 3 जून 2025 रोजी रुजू झालेत. यावेळी जिल्हा परिषदेचे मुख्य लेखा वित्त अधिकारी शिवप्रकाश चन्ना, अप्पर कोषागार अधिकारी विष्णु सुर्यवंशी, सहाय्यक संचालक श्रीमती सुनिता सुंकवाड तसेच जिल्हा परिषदेचे लेखाधिकारी विशाल हिवरे यांनी त्यांचे स्वागत केले.  

0000

दि. ३ जून 2025

वृत्त क्रमांक 568

जागतिक सायकलींग दिनानिमित्त 

“संडे ऑन सायकल”रॅलीस नांदेडकरांचा उत्सफुर्त प्रतिसाद 

नांदेड दि. ३ जून :-  आयुक्त, क्रीडा व युवक सेवा संचालनालय, महाराष्ट्र राज्य, पुणे, जिल्हा प्रशासन व जिल्हा क्रीडा अधिकारी कार्यालयाच्या वतीने जागतिक सायकलींग दिवसानिमीत्त संडे ऑन सायकलचे आयोजन रविवार 1 जून,2025 रोजी सकाळी 7 वा. करण्यात आले होते. या रॅलीत नांदेडकरांनी भरभरुन प्रतिसाद दिला. 

या संडे ऑन सायकल रॅलीमध्ये सायकल चालवा निरोगी रहा, सायकल चालवा पर्यावरणास वाचवा, सायकल चालवा- शरीरातील रोग घालवा असे श्लोक म्हणत सायकल स्वारांनी नागरीकांना संदेश दिला व सायकल रॅलीस सुरुवात केली. तसेच सायकल रॅलीमध्ये सहभागी झालेल्या सायकल पटुना गुलाबाचे फुल व प्रत्येकांना पाण्याची बॉटल देवून त्यांचे स्वागत केले. 

ही संडे ऑन सायकल रॅली यशस्वी करण्यासाठी जिल्हा क्रीडा अधिकारी जयकुमार टेंभरे यांच्या मार्गदर्शनाखाली कार्यालयातील क्रीडा अधिकारी संजय बेतीवार, राज्य क्रीडा मार्गदर्शक बालाजी शिरसीकर, सी.आर.होनवडजकर, श्रीमती शिवकांता देशमुख, क्रीडा अधिकारी राहुल श्रीरामवार, विपूल दापके, वरिष्ठ लिपीक संतोष कनकावार, कनिष्ठ लिपीक दत्तकुमार धुतडे, संजय चव्हाण, चंद्रकांत गव्हाणे, विदयानंद भालेराव आदींनी सहकार्य केले.

00000

दि. ३ जून 2025

 वृत्त क्रमांक 567

शेतकऱ्यांनी पेरणीपूर्वी बीजप्रक्रिया करावी

नांदेड दि. ३ जून :- पेरणीचा हंगाम उंबरठ्यावर आहे. शेतकऱ्यांनी आता योग्य बियाणांची निवड आणि त्यावर बीजप्रक्रिया करण्याकडे लक्ष देण्याची नितांत गरज आहे. तरी जास्तीत जास्त शेतकऱ्यांनी पेरणीपूर्वी बीजप्रक्रिया करून घ्यावी, असे आवाहन जिल्हा अधिक्षक कृषि अधिकारी दत्तकुमार कळसाईत यांनी केले आहे.

रोगट बियाणांमुळे शेतकरी संकटात सापडतात आणि उत्पादनावर परिणाम होतो. योग्य बीजप्रक्रिया आणि उगवण क्षमतेची खात्री झाल्यास पेरणीनंतरचा नुकसानीचा धोका मोठ्या प्रमाणावर टळतो. तसेच दर्जेदार उत्पादन मिळण्याची शक्यता वाढते. बियाणांची उगवण क्षमता तपासण्याची प्रक्रिया अत्यंत सुलभ आहे. बियाणांच्या साठ्यातून सुमारे १०० दाणे निवडून त्यांची उगम चाचणी करावी. त्यासाठी मातीचा ट्रे, गोणपाठ किंवा टिशूपेपर वापरता येतो. ५ ते ७ दिवसांत किती दाण्यांतून कोंब फुटले यावरून उगवण क्षमता समजते. किमान ७० टक्के किंवा त्यापेक्षा जास्त उगम दिसल्यास ते बियाणे वापरण्यायोग्य ठरते. बियाणांवर योग्य प्रक्रिया न केल्यास उगम दर कमी होतो आणि उत्पादनात मोठी घट होते. त्यामुळे शेतकऱ्यांनी पेरणीपूर्वी बीज प्रक्रिया करून घ्यावी.

बीजप्रक्रिया केल्यामुळे बियाण्यापासून प्रसारित होणाऱ्या आणि जमिनीत असणाऱ्या बुरशीजन्य रोगापासून संरक्षण मिळते. जमिनीत असणाऱ्या किडींचा तसेच पेरणी पासून ३०-३५ दिवस रस शोषक किडी आणि खोड माशी यांचा प्रादुर्भाव कमी करण्यास मदत होते. कीड व रोग व्यवस्थापनेच्या खर्चात बचत होते. बियाण्याची उगवण क्षमता वाढवते. जैविक खताच्या प्रक्रियेमुळे जिवाणू झाडांना/पिकांना अन्नद्रव्य लवकर उपलब्ध करून देतात. त्यामुळे झांडाची/पिकांची वाढ जोमाने होते. उत्पादनात वाढ होते.

बीजप्रक्रिया करण्यासाठी हातमोजे, मास्क, चष्मा या सारख्या व इतर संरक्षण करणाऱ्या बाबीचा वापर करावा. बीजप्रक्रिया तळवटावर किंवा बारदाण्यार किंवा सीड ड्रम/यंत्राद्वारे सावलीत करावी. बियाणे हाताने चोळू नये, कापडाने किवा पिशवी मध्ये एकत्र मिसळून घ्यावे. रासायनिक आणि जैविक बीजप्रक्रिया एकत्र करू नयेत. बीजप्रक्रिया केलेले बियाणे ३-४ तासाच्या आत पेरणी साठी वापरावे. बीजप्रक्रिया बुरशीनाशक-किटकनाशक-जीवाणू अशा क्रमाने करावी.

00000

वृत्त क्रमांक 566

किनवट, इस्लापूर भागाकडे अधिक लक्ष देऊ 

-अन्न व औषध प्रशासन मंत्री नरहरी झिरवाळ

नांदेड दि. 2 जून : महाराष्ट्र शासनाचा प्रतिनिधी म्हणून सामान्य माणसाची कामे करणे आमची जबाबदारी असून अतिदुर्गम भागातील बंजारा, आदिवासी बहुल भाग असलेला इस्लापूर किनवटकडे अधिक लक्ष देणार असल्याची ग्वाही राज्याचे अन्न व औषध प्रशासन मंत्री नरहरी झिरवाळ यांनी दिली.  हुडी येथील शेतकऱ्यांच्या संवाद कार्यक्रमा प्रसंगी ते बोलत होते.

आज किनवट तालुक्यातील इस्लापूर भागात अन्न व औषध प्रशासन मंत्री नरहरी झिरवाळ यांचा दौरा होता. सर्वप्रथम त्यांनी इस्लापूर वनविभागाच्या कार्यालयाला भेट देऊन याठिकाणी वृक्षारोपण त्यांच्या हस्ते करण्यात आले. नंतर त्यांनी नांदेड जिल्हयातील पर्यटन स्थळ असलेल्या सहस्रकुंड धबधबा येथे महादेवाचे मंदिराचे दर्शन घेऊन धबधबा परिसराची पाहणी केली. यावेळी ट्रस्ट व वाळकी ग्रामपंचायतच्यावतीने त्यांचा सत्कार करण्यात आला. त्यानंतर इस्लापूर परिसरातील वन्य प्राण्याचे प्रसिद्ध ठिकाण असलेल्या हरण खरबा वरील वन्य प्राण्याची त्यांनी पाहणी केली. त्यानंतर हुडी येथे शेतकऱ्यांशी संवाद साधला.

00000

 “भारत गौरव ट्रेन - छत्रपती शिवाजी महाराज सर्किट” द्वारे पर्यटकांनी ऐतिहासिक पर्यटनाचा लाभ घ्यावा-विभागीय आयुक्त जितेंद्र पापळकर

छत्रपती संभाजीनगर विभागाचा आयुक्तांकडून जिल्हानिहाय आढावा

छत्रपती संभाजीनगर, दि.2 : भारतीय रेल्वे खानपान व पर्यटन महामंडळाने (आयआरटीसीटी) ऐतिहासिक व सांस्कृतिक वारशाला उजाळा देण्यासाठी आणि छत्रपती शिवाजी महाराज यांच्या जीवनकार्याचा परिचय करून देण्यासाठी 'छत्रपती शिवाजी महाराज सर्किट' या एका विशेष रेल्वेची घोषणा केली आहे. ही यात्रा 'भारत गौरव टुरिस्ट ट्रेन' अंतर्गत 9 जून 2025 पासून सुरू होत आहे. या सहलीद्वारे महाराष्ट्रातील विविध ऐतिहासिक, धार्मिक व सांस्कृतिक महत्त्व असलेल्या ठिकाणांचा पर्यटकांनी अनुभव घ्यावा, असे आवाहन विभागीय आयुक्त जितेंद्र पापळकर यांनी केले आहे. 

विभागीय आयुक्त श्री. पापळकर यांनी आज दूरदृष्य प्रणालीव्दारे आढावा घेतला. यावेळी छत्रपती संभाजीनगर विभागातील सर्व जिल्हाधिकारी, जिल्हा परिषदेचे मुख्य कार्यकारी अधिकारी, रेल्वे विभागाचे अधिकारी श्री गुरूराज सोना यांच्यासह बैठकस्थळी अपर आयुक्त खुशालसिंह परदेशी, नगरविकास विभागाचे देविदास टेकाळे उपस्थित होते.

विभागीय आयुक्त श्री. पापळकर म्हणाले, 'भारत गौरव टुरिस्ट ट्रेन' च्या या पाच दिवसांच्या विशेष प्रवासात छत्रपती शिवाजी महाराज यांच्या जीवनाशी संबंधित महत्त्वाच्या ऐतिहासिक स्थळांना भेट, इतिहासावर आधारीत कार्यक्रम असणार आहेत. भारत गौरव ट्रेनच्या माध्यमातून या यात्रेदरम्यान गडकोटावर, ऐतिहासिक स्थळी पर्यटकांना आवश्यक सुविधा देण्यात येणार आहेत. भारतीय रेल्वे विभाग आणि महाराष्ट्र पर्यटन विकास महामंडळ यांनी ऐतिहासिक उपक्रमासाठी चांगली तयारी केली आहे. भारत गौरव ट्रेन ज्या-ज्या ठिकाणी पोहोचेल, त्या ठिकाणी असलेल्या पर्यटन स्थळांची सविस्तर माहिती पर्यटकांना देण्यात येणार आहे.

यात्रेदरम्यान, सर्व प्रवाशांचा अनुभव सुखकर आणि संस्मरणीय व्हावा, यासाठी महामंडळाचे अधिकारी आयआरटीसीटीच्या समन्वयाने प्रत्येक टप्प्यावर मार्गदर्शन करतील. पाच दिवसांच्या या प्रवासात रेल्वे स्थानकांपासून ते गडकिल्ल्यांपर्यंत, प्रत्येक ठिकाणी इतिहासाच्या पाऊलखुणांचा वेध घेत, पर्यटकांना समृद्ध अनुभव दिला जाईल. प्रत्येक गडकोटावर, ऐतिहासिक स्थळी पर्यटन व्यवस्थेचे काटेकोर नियोजन करण्यात येणार आहे. 

यावेळी रेल्वेसह निवासी उपजिल्हाधिकारी, महानगरपालिका तसेच सबंधित विभागाचे अधिकारी उपस्थित होते.

0000

 वृत्त क्रमांक 565

हिमायतनगर-उमरी येथे शुक्रवारी

“शिवराज्यभिषेक” दिवस होणार साजरा 

नांदेड दि. 2 जून :- महर्षी कपील शासकिय औद्योगिक प्रशिक्षण संस्था हिमायतनगर व संतकवी दासगणू शासकिय औद्योगिक प्रशिक्षण संस्था उमरी येथे शुक्रवार 6 जून 2025 रोजी सकाळी 10 वा. “शिवराज्यभिषेक” दिवस साजरा करण्यात येणार आहे.

विद्यार्थ्यामध्ये चांगले विचार रूजविण्यासाठी पंचपरिवर्तनवर आधारीत नागरीक कर्तव्य आणि शिष्टाचार या विषयावर हिमायतनगर येथे कमलाकर दिक्कतवार तर उमरी येथे मारोती संबोड हे मार्गदर्शनपर प्रबोधन करणार आहेत. शहरातील विद्यार्थी, नागरीकांनी या कार्यक्रमास उपस्थित राहून लाभ घ्यावा, असे आवाहन संस्थेचे प्राचार्य जे. एल. गायकवाड यांनी केले आहे.

0000

वृत्त क्रमांक 564

अवैध वाळू उपसाबाबत तहसील कार्यालय नांदेडची कारवाई

नांदेड, दि. २ जून:- आज दिनांक २ जून 2025 रोजी जिल्हाधिकारी राहुल कर्डिले, उपविभागीय अधिकारी डॉ.सचिन खल्लाळ, तहसीलदार  संजय वारकड यांच्या मार्गदर्शनाखाली  आज  सकाळी 05 वाजता तहसील कार्यालय नांदेडचे महसूल पथक यामध्ये नायब तहसीलदार स्वप्निल वामनराव  दिगलवार ग्राम महसूल अधिकारी रमेश गिरी ,मनोज सरपे ,दिलीप पवार ,माधव पाटील , गोपीनाथ कल्याणकर मंडळ अधिकारी राजेंद्र शिंदे तसेच महसूल सेवक बालाजी सोनटक्के यांच्यासोबत मार्कंड येथील गोदावरी नदीपत्रात गस्त करत असताना दोन वाळू उपसा करणारे इंजिन व आठ तराफे आढळून आले. 

पथकाने आठ तराफे जाळून नष्ट केले व दोन इंजिन जप्त करून तहसील कार्यालयाच्या परिसरात जमा करण्यात आले आहेत.या कारवाई मध्ये ११ लक्ष रुपयाची इंजिन व तराफे जप्त करण्यात आले आहेत .सदर कारवाईच्या वेळी नांदेड ग्रामीण पोलीस स्टेशनचे एसआय गवळी हे उपस्थित होते. वाळू उपसा करणाऱ्या इंजिन मालकांबाबत माहिती मिळू शकली नाही. मालकाचा शोध लागताच याबाबत फौजदारी गुन्हा दाखल करण्याची तजवीज ठेवण्यात आली आहे अशी माहिती तहसीलदार संजय वारकड यांनी प्रसिद्धीपत्रकाद्वारे दिली आहे.

००००००

वृत्त क्रमांक 563

औद्योगि‍क प्रशिक्षण संस्थेत शिल्प कारागीर प्रशिक्षण योजनेतंर्गत प्रवेश प्रक्रीया सुरु

प्रवेश इच्छूक उमेदवारांनी अर्ज करण्याचे आवाहन

नांदेड दि. 2 जून श्री गुरु गोबिंदसिघजी शासकीय औद्योगिक प्रशिक्षण संस्था, नांदेड येथे शिल्प कारागीर प्रशिक्षण योजनेतंर्गत (Craftsman Training Scheme)ऑगस्ट-2025 सत्रासाठीची प्रवेश प्रक्रिया 15 मे 2025 पासुन ऑनलाईन सुरु करण्यात आलेली आहे. येथे प्रवेश घेणाऱ्या इच्छूक उमेदवारांनी www.admission.dvet.gov.in या संकेतस्थळावर ऑनलाईन पद्धतीने अर्ज व प्रवेश शुल्क भरावेत. नंतर नजीकच्या शासकीय किंवा खाजगी औद्योगिक प्रशिक्षण संस्थेत जाऊन अर्ज निश्चीत करणे आवश्यक आहे. अर्ज निश्चीतीकरण केल्यानंतरच उमेदवारांना व्यवसायाची निवड करता येणार आहे.

 

तरी नांदेड जिल्हयातील युवक व युवती ( उमेदवारांनी ) यांनी मोठ्या प्रमाणात ऑनलाईन पद्धतीने प्रवेश अर्ज व निश्चितीकरण करावे, असे आवाहन शासकीय औद्योगिक प्रशिक्षण संस्थेचे प्राचार्य एस. व्ही. सुर्यवंशी यांनी केले आहे.

 

श्री गुरु गोबिंदसिघजी शासकीय औद्योगिक प्रशिक्षण संस्था नांदेड येथे प्रवेश सत्र ऑगस्ट 2025 साठी एकुण 23 व्यवसायाच्या 40 तुकडया अंतर्गत 864 जागा करीता प्रवेश उपलब्ध आहेत. ज्यामध्ये 8 व्यवसाय 10 वी उत्तीर्ण / अनुत्तीर्ण पात्रतेवर तर 15 व्यवसाय 10 वी उत्तीर्ण पात्रतेवर प्रवेशासाठी उपलब्ध आहे.

 

औद्योगिक प्रशिक्षण संस्थातील शिल्प कारागीर प्रशिक्षण योजनेतंर्गत (Craftsman Training Scheme)  ऑगस्ट-2025 सत्रासाठीची प्रवेश प्रक्रिया 15 मे 2025 पासुन  ITI Admission Portal: https://admission.dvet.gov.in या  संकेतस्थळावर सुरु करण्यात आलेली आहे. यासाठी दहावी उत्तीर्ण अथवा अनुर्तीर्ण इच्छुक विद्यार्थी अर्ज करु शकतात. औद्योगिक प्रशिक्षण संस्थेमध्ये प्रवेश घेण्यासाठी तयार करण्यात आलेल्या प्रमाणित कार्यपध्दती व माहीती पुस्तीका ऑनलाईन स्वरुपात संकेतस्थळावर Download Section मध्ये पीडीएफ स्वरुपात उपलब्ध आहे. विद्यार्थ्यांनी अर्ज नोंदवून झाल्यावर उमेदवारांनी नजीकच्या औद्योगिक प्रशिक्षण संस्थेमध्ये जाऊन आपला अर्ज निश्चित करावा व त्यानंतर विकल्प सादर करावे. प्रवेश प्रक्रियेच्या विविध टप्प्यांबाबत औद्योगिक प्रशिक्षण संस्थामध्ये समुपदेशन करण्यात येत आहे. यामध्ये उमेदवारांना विविध व्यवसाय अभ्यासक्रमांची माहिती देण्यात येते.

 

राज्यभरातील औद्योगिक प्रशिक्षण संस्थेमध्ये एकुण 83 प्रकारच्या व्यवसाय अभ्यासक्रमांचे प्रशिक्षण दिले जात आहे. त्यांची एकुण वार्षिक प्रवेश क्षमता जवळपास एक लक्ष ऐवढी आहे. येणाऱ्या कालावधीत औद्योगिक प्रशिक्षण संस्थामध्ये जादा मागणीचे तसेच अधिकचे तंत्रज्ञानावर आधारित 652 नवीन अभ्यासाच्या तुकडया समाविष्ठ करण्याचे प्रस्तावित आहे. तसेच जागतिक बँकेच्या सहकार्याने औद्योगिक प्रशिक्षण संस्था आधुनिकरण करण्यात येत आहे. तसेच आयटीआय प्रवेशित उमेदवारांना प्रतिमाह देण्यात येणाऱ्या विद्यावेतनात वाढ करण्यात आलेली आहे. विविध प्रवर्गात उमेदवारांसाठी प्रशिक्षण शुल्क प्रतिपुर्ती योजनाही लागु करण्यात आलेली आहे. दहावी अनुउत्तीर्ण विद्यार्थ्यांना आयटीआय अभ्यासक्रम पुर्ण केल्यानंतर नियमानुसार दहावी उत्तीर्ण समकक्षता  करण्यात येते. तर दहावी उत्तीर्ण विद्यार्थ्यांना आयटीआय अभ्यासक्रम पुर्ण केल्यानंतर नियमानुसार बारावी उत्तीर्ण समकक्षता प्रदान करण्यात येते. तरी दहावी उत्तीर्ण अथवा अनुत्तीर्ण विद्यार्थ्यांनी आयटीआय मधुन व्यावसायिक शिक्षण पुर्ण करुन त्वरित रोजगार स्वयंरोजगार अथवा उच्च शिक्षणाच्या संधी प्राप्त होण्यासाठी आयटीआय मध्ये प्रवेश घ्यावा, असे आवाहन शासकीय औद्योगिक प्रशिक्षण संस्थेच्यावतीने करण्यात आले आहे.

00000