https://fb.watch/t22ioNI_zB/

कृषि विभाग महाराष्ट्र शासन, कृषि विभाग जिल्हा परीषद नांदेड, आत्मा नांदेड व पंचायत समिती नांदेड यांच्या संयुक्त विद्यमाने महाराष्ट्र राज्याचे माजी मुख्यमंत्री व हरित क्रांतीचे प्रणेते कै. वसंतरावजी नाईक यांच्या जयंती निमित्त कृषीदिन या कार्यक्रमाचे थेट लाईव्ह प्रक्षेपण जिल्हा माहिती कार्यालय, नांदेड Facebook पेज वर.

सैनिकी मुलांचे वसतीगृह विष्णुपुरी येथे प्रवेश प्रक्रिया सुरु

  वृत्त क्र. 543

सैनिकी मुलांचे वसतीगृह विष्णुपुरी येथे प्रवेश प्रक्रिया सुरु

नांदेड दि. 28 :-  माजी सैनिक, माजी सैनिक विधवा व सेवारत सैनिक आणि इतर नागरीकांच्या पाल्यांसाठी अत्यल्प दरामध्ये सर्व सोयीयुक्त सैनिकी मुलांच्या वसतिगृहामध्ये प्रवेश प्रक्रिया सुरु आहे. जिल्हयातील सर्व माजी सैनिक/माजी सैनिक विधवा व सेवारत सैनिक आणि इतर नागरीकांनी याचा लाभ घ्यावा. अधिक माहितीसाठी वसतीगृह अधिक्षक यांचा भ्रमणध्वनी क्रमांक 8918774880/8380873985 वर संपर्क साधावा, असे आवाहन जिल्हा सैनिक कल्याण अधिकारी यांनी केले आहे. 

 

सैनिकी मुलांचे वसतिगृह विष्णुपुरी हे जिल्हा सैनिक कार्यालयांतर्गत चालविण्यात येते.  प्रवेश  सैनिक/ माजी सैनिकांच्या विधवा व सेवारत सैनिक आणि इतर नागरिक पाल्यांना सुध्दा उपलब्ध आहेत.  प्रवेशासाठी प्रवेश अर्ज सैनिकी मुलांचे वसतीगृह, विष्णुपुरी, नांदेड येथे विक्रीस उपलब्ध आहेत. या वसतीगृहात उत्तम जेवणाची सोय (आठवड्यातून तीन वेळा नॉन-वेज/वेज व नाश्त्यामध्ये अंडी), स्वतंत्र अभ्यासिका, जिमखाना, भोजनालय कक्ष तसेच सकाळी पीटी आणि सायंकाळी रोल कॉल या सर्व सोयींनी सज्ज आहे. अधिक माहितीसाठी जिल्हा सैनिक कल्याण कार्यालयाशी संपर्क करावा. तसेच संबंधितांनी याची नोंद घ्यावी, असेही आवाहन जिल्हा सैनिक कल्याण कार्यालयाच्यावतीने केले आहे.

0000 

विद्यार्थ्यांसाठी जात वैधता प्रमाणपत्राबाबत मार्गदर्शन विशेष मोहिम शिबिराचे आयोजन

  वृत्त क्र. 542

विद्यार्थ्यांसाठी जात वैधता प्रमाणपत्राबाबत

मार्गदर्शन विशेष मोहिम शिबिराचे आयोजन   

 

नांदेड, दि. 28 :- राजर्षी शाहू महाराज जयंती पर्वानिमित्त सन 2024-25 या वर्षात प्रवेशित इयत्ता 11 वी व 12 वी विज्ञान शाखेतील मागासवर्गीय विद्यार्थ्यांना जात वैद्यता प्रमाणपत्र मुदतीत मिळाण्यासाठी  तालुक्याच्या ठिकाणी महाविद्यालयस्तरावर 1 व 2 जुलै रोजी मार्गदर्शन व ऑनलाईन अर्ज स्विकृतीसाठी विशेष मोहिम शिबिराचे आयोजन केले आहे. तरी विद्यार्थ्यांनी या विशेष मोहिम शिबिराचा लाभ घ्यावा, असे आवाहन समितीचे अध्यक्ष सुनिल महिंद्रकर, उपायुक्त तथा सदस्य अनिल शेंदारकर व संशोधन अधिकारी तथा सदस्य सचिव रामचंद्र वंगाटे यांनी केले आहे.

 

मागासवर्गीय विद्यार्थ्यासाठी सर्व महाविद्यालयामध्ये स्थापन केलेल्या समान संधी केंद्राचे नियुक्त केलेले प्रमुख प्रतिनिधी (नोडल अधिकारी) यांना जात प्रमाणपत्र पडताळणीबाबत मार्गदर्शन करण्यासाठी आणि महाविद्यालय स्तरावर समान संधी केंद्रामार्फत सन 2024-2025 या वर्षातील प्रवेशित इयत्ता 11 वी 12 वी विज्ञान शाखेतील मागासवर्गीय विद्यार्थ्यांनी ऑनलाईन भरलेले एकत्रित अर्ज स्विकृतीसाठी 2 जुलै 2024 पर्यत महाविद्यालयामध्ये एक दिवशीय शिबिर आयोजित करुन विशेष मोहिम राबविण्यात येत आहे.

  

सोमवार 1 जुलै 2024 रोजी सकाळी 11.30 ते 3.30 वाजेपर्यत आयोजित शिबिर याप्रमाणे आहेत. धर्माबाद व बिलोली तालुक्यासाठी लाल बहादूरशास्त्री महाविद्यालय, धर्माबाद येथे नोडल अधिकारी म्हणून वरिष्ठ लिपिक सिद्राम रणभिरकर व मनोज वाघमारे यांची नेमणूक केली आहे. भोकर, हिमायतनगर, किनवट तालुक्यासाठी हुतात्मा जयवंतराव पाटील कनिष्ठ महाविद्यालय, हिमायतनगर येथे कनिष्ठ लिपिक विठ्ठल बी. आडे व प्रकल्प सहाय्यक ओमशिवा चिंचोलकर यांची तर  देगलूर व नायगांव तालुक्यासाठी देगलूर महाविद्यालय, देगलूर येथे पोलीस  कॉन्स्टेबल बालाजी शिलगिरे व प्रकल्प सहाय्यक राजेश मेथेवाड यांची नेमणूक केली आहे. लोहा व कंधार तालुक्यासाठी श्री. संत गाडगे महाराज महाविद्यालय, लोहा येथे  संशोधन सहाय्यक वैजनाथ मुंडे यांची नेमणूक केली आहे.

 

मंगळवार 2 जुलै 2024 रोजी सकाळी 11.30 ते 3.30 आयोजित शिबिर पुढीलप्रमाणे आहेत. हदगांव व माहूर तालुक्यासाठी पंचशिल महाविद्यालय, हदगांव येथे व्यवस्थापक शिवाजी देशमुख व कार्या. सहाय्यक संजय अरगडे यांची नेमणूक केली आहे. मुखेड तालुक्यासाठी महात्मा ज्योतिबा फुले महाविद्यालय, मुखेड येथे अभि. पाल बाबू कांबळे व प्र. सहायक राजेश मेथेवाड यांची नेमणूक केली आहे. नांदेड, अर्धापूर तालुक्यासाठी  यशवंत महाविद्यालय नांदेड येथे विधी अधिकारी साजीद हासमी व प्रकल्प सहायक माधव बेलके यांची नेमणूक केली आहे. उमरी व मुदखेड तालुक्यासाठी कै. बाबासाहेब देशमुख बोरटकर कला, वाणिज्य व विज्ञान महाविद्यालय, उमरी येथे  अभि. पाल बाबू काबंळे व प्रकल्प सहायक ओमशिवा चिंचोलकर यांची नेमणूक केली आहे.

 

सन 2024-25 या वर्षातील प्रवेशित इयत्ता 11 वी 12 वी विज्ञान शाखेतील सर्व मागासवर्गीय विद्यार्थ्यांनी तसेच महाविद्यालयाचे प्राचार्यानी, समान संधी केंद्र नियुक्त प्रमुख प्रतिनिधी व नोडल अधिकारी यांनी तालुक्याच्या ठिकाणी महाविद्यालय स्तरावर आयोजित केलेल्या शिबिराच्या ठिकाणी माहितीसह उपस्थित राहावे असे आवाहन जिल्हा जात प्रमाणपत्र पडताळणी समितीच्यावतीने केले आहे.

00000

  वृत्त क्र. 541

मुख्यमंत्री रोजगार निर्मिती कार्यक्रमाच्या माध्यमातून

युवक युवतीना उद्योजक होण्याची संधी

 

नांदेड, दि. 28 :- विविध क्षेत्रात उपलब्ध होत असलेल्या स्वयंरोजगार व रोजगाराच्या नवीन संधी विचारात घेवून उद्योजकतेला चालणा मिळावी यासाठी मुख्यमंत्री रोजगार निर्मिती कार्यक्रम ही योजना सन 2019 पासून राज्यात राबविली जात आहे. या योजनेची अंमलबजावणी जिल्हास्तरावर जिल्हा उद्योग केंद्र व महाराष्ट्र राज्य खादी ग्रामोद्योग मंडळामार्फत करण्यात येते. तरी नांदेड जिल्ह्यातील जास्तीत जास्त पात्र व होतकरु सुशिक्षित बेरोजगार युवक-युवतींनी या योजनेचा लाभ घ्यावा, असे आवाहन जिल्हा उद्योग केंद्राचे महाव्यवस्थापक अमोल इंगळे यांनी केले आहे.  

 

या योजनेतर्गत अर्जदारांना उत्पादन व्यवसाय (उदा. बेकरी, पशुखाद्यनिर्मिती, फॅब्रीकेशन ) व सेवा उद्योग (उदा. वैद्यकीय सेवा, ब्युटीपार्लर, सलून) साठी अर्ज करता येतील. ही योजना ऑनलाईन पध्दतीने राबविण्यात येते. या योजनेचे https://maha-cmegp.gov.in  संकेतस्थळ आहे. या योजनेच्या पात्रतेसाठी अर्जदार हा सर्वसाधारण प्रवर्गात 18 ते 45 वर्षे व राखीव प्रवर्गासाठी 18 ते 50 वर्षे असावा. अर्जदाराने केंद्र, राज्य शासनाच्या योजनेमध्ये लाभ घेतलेला नसावा. अर्जदारास आवश्यक कागदपत्रांमध्ये पासपोर्ट साईज फोटो, आधारकार्ड , शाळा सोडल्याचा दाखला, शैक्षणिक पात्रता प्रमाणपत्र आवश्यकतेप्रमाणे जात प्रमाणपत्र, ग्रामीण भागासाठी लोकसंख्येचा दाखला इ. वेबसाईटवर अपलोड करावेत.

 

तरी नांदेड जिल्ह्यातील बेरोजगार युवक व युवती यांना नवीन व्यवसाय सुरु करावयाचा आहे किंवा  व्यवसायवाढ करावयाची आहे त्यांनी https://maha-cmegp.gov.in   संकेतस्थळावर अर्ज करावा किंवा योजनेची सविस्तर माहिती घेण्यासाठी जिल्हा उद्योग केंद्र, उद्योग भवन, पहिला मजला, सहकारी औद्योगिक वसाहत, शिवाजीनगर, नांदेड येथे कार्यालयीन कामाच्या दिवशी प्रत्यक्ष भेट द्यावी. तसेच ही योजना राबविण्यासाठी कोणत्याही खाजगी व्यक्तीची नेमणूक केलेली नाही व त्रयस्थ/मध्यस्थ व्यक्तींकडून आपली फसवणूक होणार नाही याची दक्षता अर्जदारांनी घ्यावी, असे आवाहन जिल्हा उद्योग केंद्राच्यावतीने करण्यात आले आहे.

000000

 वृत्त क्र. 540 

‘रिव्हर्ट बॅक’ची विद्यार्थ्यांनी संधी

30 जूनपर्यंत ऑनलाईन सादर करता येणार अर्ज

 

नांदेड, दि. 27 : शैक्षणिक सत्र 2023-24 मध्ये महाडीबीटी या ऑनलाईन पोर्टलवर शिष्यवृत्ती योजनेस पात्र असणा-या काही विद्यार्थ्यांकडून अनभिज्ञतेमुळे ‘राईट टू गिव्ह अप’ हा विकल्प नजरचुकीने, अनावधानाने निवडण्यात आलेला आहे. महाडीबीटी पोर्टलवर ज्या विद्यार्थ्यांकडून अनवधानाने अथवा नजरचुकीने राईट टू गिव्ह अप हा पर्याय निवडून त्यांचे शिष्यवृत्तीचे अर्ज रद्दबातल झाले असतील केवळ अशा विद्यार्थ्यांना शासनातर्फे 30 जूनपर्यंत अंतिम संधी देण्यात आलेली आहे.

 

विद्यार्थ्याने आपल्या महाविद्यालयाच्या प्राचार्याशी संपर्क साधून महाविद्यालयांच्या प्राचार्य लॅाग ईनमधून आपला अर्ज रिव्हर्ट बॅक करून घेणे आवश्यक आहे. रिव्हर्ट बॅक झालेला अर्ज विहित वेळेत विद्यार्थ्याच्या लॅाग इन मधून ऑनलाईन फेरसादर करणे आवश्यक राहील. विहित वेळेत विद्यार्थ्याने अर्ज फेरसादर न केल्यास त्याची सर्वस्वी जबाबदारी विद्यार्थ्यांची राहील. विहीत वेळेत यासंबंधाने आवश्यक कार्यवाही करण्याची दक्षता घ्यावी असे आवाहन करण्यात आले आहे. अधिक माहितीसाठी व संपर्कासाठी सहाय्यक आयुक्त, समाज कल्याण विभाग, नांदेड  संपर्क साधावा.

00000

 वृत्त क्र. 539 

दिव्यांग व्यक्ती व संस्थांनी राष्ट्रीय पुरस्कारासाठी

ऑनलाईन अर्ज करण्याचे आवाहन

 

नांदेड, दि. 27 : केंद्र शासनाच्या सामाजिक न्याय व अधिकारीता मंत्रालयाअंतर्गत दिव्यांगजन सशक्तीकरण विभागाच्या संकेतस्थळावर दिव्यांग व्यक्तींकरीता राष्ट्रीय पुरस्कार सन 2024 करीता ऑनलाईन माध्यमातून अर्ज, नामांकन मागविण्यात आले आहे. अर्ज 31 जुलै पर्यंत   www.awards.gov.in या संकेतस्थळावर  स्वीकारण्यात येणार आहे. अधिक माहितीसाठी जिल्हा समाज कल्याण कार्यालयाशी संपर्क साधण्याचे आवाहन जिल्हा समाज कल्याण कार्यालयाने प्रसिद्धीपत्रकाद्वारे केले आहे.

00000

वृत्त क्र. 538

 कंत्राटी शिपाई पदाच्या भरतीसाठी संस्थानी

10 जुलैपर्यत अर्ज करण्याचे आवाहन

 

नांदेड, दि. 27:- जिल्हा कौशल्य विकास, रोजगार व उद्योजकता मार्गदर्शन केंद्र, नांदेड या कार्यालयासाठी सहा महिन्यासाठी कंत्राटी तत्वावर शिपाई पदाची भरती (शिपाई पदासाठी कामवाटप) करावयाची आहे. ज्या नोंदणीकृत सेवा सोसायट्यांनी नोंदणी प्रमाणपत्र अद्ययावत केले आहे आणि ज्या संस्थेचे ऑडीट रिपोर्ट अद्यायावत आहे अशा संस्थांनी त्यांचे प्रस्ताव 10 जुलै 2024 रोजी सायंकाळी 5 वाजेपर्यत जिल्हा कौशल्य विकास, रोजगार व उद्योजकता मार्गदर्शन केंद्रास सादर करावेत, असे आवाहन कौशल्य विकास, रोजगार व उद्योजकता विभागाच्या सहाय्यक आयुक्त रेणूका तम्मलवार यांनी केले आहे.  

 

बेरोजगारांच्या सेवा सहकारी सोसायट्यांना आर्थिकदृष्टया सक्षम करण्याच्या उद्देशाने 3 लाख इतक्या रकमेची कामे विनानिविदा उपलब्ध करुन देण्यासाठी रोजगार व स्वयंरोजगार विभागात शासन निर्णयान्वये कामवाटप समिती स्थापन करण्यात आली आहे . त्या अनुषंगाने कामवाटप समितीकडे कौशल्य विकास रोजगार व उद्योजकता आयुक्तालय व त्याच्या अधिनस्त कार्यालयासाठी कंत्राटी तत्वावर शिपाई पदे सुशिक्षित बेरोजगार सेवा सहकारी संस्थेमार्फत करार पध्दतीने नियुक्त करण्याबाबत आयुक्तालयाचे कळविले आहे. त्याअनुषंगाने कौशल्य विकास, रोजगार व उद्योजकता मार्गदर्शन केंद्रासाठी सहा महिन्यासाठी कंत्राटी तत्वावर शिपाई पदाची भरती करावयाची आहे. या पदासाठी संस्थानी प्रस्ताव सादर करताना अद्ययावत नोंदणी प्रमाणपत्र, संस्थेचे ऑडीट रिपोर्ट सन २०२३-२४ , बँकेचे स्टेटमेंट संस्थानी प्रस्तावासोबत जोडावे. आवश्यक अटी व शर्तीची पूर्तता करणे अनिवार्य असून उशिरा प्राप्त झालेली तसेच अपूर्ण स्वरुपातील प्रस्ताव स्विकारण्यात येणार नाहीत, याची कृपया नोंद घ्यावी, असेही जिल्हा कौशल्य विकास, रोजगार व उद्योजकता मार्गदर्शन केंद्राच्या सहाय्यक आयुक्त यांनी प्रसिद्धीपत्रकाद्वारे कळविली आहे.

00000 

वृत्त क्र. 537

 बांबू लागवड शेतकऱ्यांच्या फायद्याची : जिल्हाधिकारी

·         बांबू लागवडीमुळे आर्थिक फायद्यांसह पर्यावरणाचे होईल रक्षण व संवर्धन

·         जिल्ह्यातील शेतकऱ्यांनी बांबू लागवडीसाठी पुढाकार घेण्याचे आवाहन

नांदेड दि. 27 :- बांबू जगातील सगळयात वेगाने वाढणारी व एक बहुपयोगी वनस्पती आहे. मानवी जीवनात विविधांगी उपयोग असणाऱ्या बांबू या वनस्पतीमध्ये महाराष्ट्रातल्या हजारो गावांचे अर्थकारण, रोजगार निर्मिती, कृषि संपन्नता, किफायतशिर घरबांधणी, फर्निचर, इंधन, ऊर्जा, हस्तव्यवसाय, निसर्ग पर्यटन, औषध अन्न प्रक्रीया, उद्योग इ. बांबू लागवडीमुळे शेतकऱ्यांना आर्थिक फायद्या निश्चित होणार असून यासोबत पर्यावरणाचे रक्षण व संवर्धन होण्यास मदत होणार आहे. त्यामुळे शेतकऱ्यांनी बांबू लागवड करण्यासाठी पुढे यावे, असे आवाहन जिल्हाधिकारी अभिजीत राऊत यांनी केले आहे.

बांबूच्या बहुउपयोगीत्वाबरोबरच त्याच्या आर्थिकदृष्टया असलेल्या महत्वामुळे त्यास हिरवे सोने समजले जाते. मानव जातीच्या लाकूड विषयक मुलभूत गरजा पूर्ण करण्यासाठी सहज उपलब्ध होणारी व परवडणारी ही वनस्पती डोंगराळ व सपाट प्रदेशात आढळून येते. जलदगतीने वाढणारी, सदाहरित व दीर्घायु असलेल्या बांबूच्या संपूर्ण जगामध्ये 1200 प्रजाती आहेत. त्यापैकी 128 प्रजाती भारतात आढळून येतात. महाराष्ट्रातील एकूण 61936 चौ.मी. वनक्षेत्रापैकी 8400 कि.मी. वनक्षेत्राच्या जवळपास 13 टक्के इतक्या क्षेत्रावर बांबू आढळून येतो.

अशा बहुउपयोगी बाबूंच्या लागवडीतून शेतकऱ्यांना निश्चित उत्पन्नाचा स्त्रोत निर्माण व्हावा यासाठी महाराष्ट्र शासनाने बांबू लागवडीसाठी मिशन सुरु केले आहे. महात्मा गांधी राष्ट्रीय ग्रामीण रोजगार हमी योजनेमधून (मनरेगा) मधून शेतकरी बांबू लागवड करु शकतात. यासाठी महाराष्ट्र शासनाने पुढीलप्रमाणे कार्यपध्दती आखून दिलेली आहे. शेतकऱ्यांना शासन निर्णयात नमूद ईशवेद बायोटेक प्रा. लि. विमान नगर, पुणे, अल्माक बायोटेक एल.एल.पी. लातूर, ग्रामोअर बायोटेक लि. होसुर कृष्णागिरी, तामिळनाडू या संस्थेकडून बांबू खरेदी करता येईल. तसेच बांबू लागवडीसाठी वैयक्तीक वनहक्क धारक लाभार्थ्यांनी ग्रामपंचायतीकडे तर सामुहिक वनहक्क धारक यांनी वन विभागाकडे तर वैयक्तीक लाभार्थ्यांनी (शेतकरी) कृषि विभागाकडे संपर्क साधावा.

शेतकऱ्यांना हेक्टरी बांबू लागवड व जोपासना, संगोपन करण्यासाठी लागणारा खर्च व रोपांचा खर्च असा मिळून 4 वर्षात एकूण हेक्टरी 7 लाख 4 हजार रुपये एवढा आहे व मजूरी महात्मा गांधी राष्ट्रीय ग्रामीण रोजगार हमी योजनेतून मिळणार आहे. म्हणजेच हेक्टरी वार्षिक खर्च 1 लाख 76 हजार शेतकऱ्यांना मिळणार आहे. तसेच साधारण लागवडीनंतर 3 वर्षापासून बांबूचे उत्पादन सुरु होते व त्याचे उत्पन्न मिळते. बांबू लागवडीमुळे शेताला कुंपण तयार होईल. तसेच मातीची झीज थांबेल व इतर पर्यावरण पूरक फायदे होतात. त्यामुळे बांबू लागवडीमधून शेतकऱ्यांना निश्चित उत्पन्न होणार आहेच परंतु सोबतच पर्यावरणाचे रक्षण व संवर्धन होण्यास मदत होणार आहे. त्यामुळे या योजनेचा शेतकऱ्यांनी मोठया प्रमाणात लाभ घ्यावा, असे आवाहन जिल्हाप्रशासनाच्यावतीने करण्यात आले आहे.

00000

वृत्त क्र. 536

 प्रादेशिक परिवहन कार्यालयातर्फे तालुक्याच्या ठिकाणी

शिकाऊ व पक्के अनुज्ञप्ती शिबिराचे आयोजन

नांदेड दि. 27 :-  प्रादेशिक परिवहन कार्यालयातर्फे शिकाऊ व पक्के अनुज्ञप्ती साठी माहे जुलै ते डिसेंबर 2024 या कालावधीत तालुका शिबिर कार्यालयाचे आयोजन करण्यात येणार आहे. या शिबिरासाठी जागा उपलब्धतेच्या आधीन राहून ऑनलाईन अपॉईटमेंट महिना सुरुवात होण्याच्या 5 दिवस आधी कार्यालयीन वेळेत सुरु करण्यात येईल. तरी अपॉईटमेंट घेतलेल्या अर्जदारांनी यांची नोंद घेवून शिबिर कार्यालयास उपस्थित राहावे, असे आवाहन प्रभारी सहा. प्रादेशिक परिवहन अधिकारी रेणुका राठोड यांनी केले आहे.

तालुकानिहाय कॅम्पचे ठिकाण व दिनांक पुढीलप्रमाणे आहे. कंधार येथे 3 जुलै, 2 ऑगस्ट, 3 सप्टेंबर, 3 ऑक्टोबर, 4 नोव्हेंबर, 4 डिसेंबर रोजी शिबिराचे आयोजन करण्यात आले आहे.  धर्माबाद येथे 8 जुलै, 7 ऑगस्ट, 6 सप्टेंबर, 7 ऑक्टोबर, 7 नोव्हेंबर, 6 डिसेंबर या दिवशी आयोजन करण्यात आले आहे. किनवट येथे 10 जुलै, 9 ऑगस्ट, 10 सप्टेंबर, 10 ऑक्टोबर, 11 नोव्हेंबर, 10 डिसेंबर या दिवशी शिबिराचे आयोजन केले आहे. मुदखेड येथे 15 जुलै, 14 ऑगस्ट, 13 सप्टेंबर, 14 ऑक्टोबर, 14 नोव्हेंबर, 13 डिसेंबर रोजी तर माहूर येथे 18 जुलै, 19 ऑगस्ट, 19 सप्टेंबर, 18 ऑक्टोबर, 18 नोव्हेंबर, 18 डिसेंबर या‍ दिवशी तर हदगांव येथे 22 जुलै, 21 ऑगस्ट, 23 सप्टेंबर, 21 ऑक्टोबर, 20 नोव्हेंबर, 20 डिसेंबर रोजी शिबिर ठेवण्यात आले आहे. धर्माबाद येथे 24 जुलै, 23 ऑगस्ट, 25 सप्टेंबर, 23 ऑक्टोबर, 22 नोव्हेंबर, 23 डिसेंबर यादिवशी शिबिर ठेवण्यात आले आहे. हिमायतनगर येथे 29 जुलै, 28 ऑगस्ट, 27 सप्टेंबर, 25 ऑक्टोबर, 26 नोव्हेंबर, 27 डिसेंबर, तर किनवट येथे 31 जुलै, 30 ऑगस्ट, 30 सप्टेंबर, 24 ऑक्टोबर, 28 नोव्हेंबर, 30 डिसेंबर या दिवशी शिकाऊ व पक्क्या अनुज्ञप्ती साठी तालुक्याच्या ठिकाणी मासिक शिबिराचे आयोजन करण्यात आले आहे. तसेच वरील शिबिराच्या दिवशी स्थानिक सुटटी जाहीर झाल्यास अथवा आपत्कालीन परिस्थिती निर्माण झाल्यास शिबिराच्य तारखेमध्ये बदल होवू शकतो याची नागरिकांनी नोंद घ्यावी असेही प्रसिध्दीपत्रकान्वये कळविले आहे.

00000

वृत्त क्र. 535

                                शिवछत्रपती क्रीडापीठांतर्गत विविध क्रीडा प्रबोधीनीत

सरळ प्रवेश व खेळनिहाय कौशल्य चाचणीद्वारे निवासी व अनिवासी प्रवेश प्रक्रिया  

 

नांदेड, दि. 27:- राष्ट्रीय, आंतरराष्ट्रीय दर्जाचे खेळाडू घडविण्यासाठी राज्यात प्रतिभावंत खेळाडूंची निवड करुन शास्त्रोक्त प्रशिक्षण, शिक्षण, भोजन, निवास, अद्ययावत क्रीडा सुविधा, क्रीडा प्रबोधीनीच्या अंतर्गत खेळाडूंना देण्यात येत आहेत. राज्यातील क्रीडा प्रबोधीनीमध्ये सरळ सेवा प्रवेश व खेळनिहाय कौशल्य चाचण्यांद्वारे निवासी व अनिवासी खेळाडूंना प्रवेश देण्यात येणार आहे. यासाठी चाचण्यांचे आयोजन करण्याचे प्रस्तावित करण्यात येत आहे. तरी जिल्हयातील खेळाडूंनी चाचणीसाठी आपले अर्ज 5 जुलै, 2024 पर्यंत श्रीमती शिवकांता देशमुख (राज्य क्रीडा मार्गदर्शक ॲथलेटिक्स-9657092794 ) यांचेकडे सादर करावेत, असे आवाहन जिल्हा क्रीडा अधिकारी जयकुमार टेंभरे यांनी केले आहे.

 

क्रीडा प्रबोधीनीमध्ये सरळसेवा प्रवेश प्रक्रिया या खेळनिहाय कौशल्य चाचणीबाबत अर्हता खालीलप्रमाणे आहे. खेळनिहाय प्रवेश मर्यादा विचारात घेऊन प्रवेश देण्यात येणार आहे.

सरळ प्रवेश प्रक्रिया:- क्रीडा प्रबोधीनीतील असलेल्या सबंधीत खेळात राज्यस्तरावर पदक प्राप्त केलेले खेळाडू किंवा राष्ट्रीयस्तरावर राज्याचे प्रतिनिधीत्व केलेले खेळाडू ज्यांचे वय 19 वर्षेआतील आहे, अशा खेळाडूंना सबंधीत खेळाबाबतची चाचणी तज्ञ समिती समक्ष देऊन प्रवेश निश्चित केला जातो. यामध्ये निवासी करीता आर्चरी,  हॅन्डबॉल,  बॉक्सींग,  कुस्ती,  बॅडमिंटन, अनिवासीकरीता - ॲथलेटिक्स, जलतरण, शुटींग, सायकलींग, हॉकी, फुटबॉल, ज्युदो, टेबलटेनिस, वेटलिफटींग, जिम्नॅस्टिक्स याखेळाचा समावेश आहे.

खेळनिहाय कौशल्य चाचणी :- क्रीडा प्रबोधीनीतील असलेल्या सबंधीत खेळात राज्यस्तरावर सहभागी खेळाडूंना ज्यांचे वय 19 वर्षाआतील आहे, अशा खेळाडूंना सबंधीत खेळाच्या खेळनिहाय कौशल्य चाचणीचे आयोजन करुन गुणानुक्रमे प्रवेश निश्चीत केला जातो. यामध्ये हॅन्डबॉल, जलतरण, सायकलींग, फुटबॉल, ज्युदो व जिम्नॅस्टिक्स याखेळाचा समावेश आहे.

वैद्यकीय चाचणी  :- या चाचण्यांमध्ये निवड झालेल्या खेळाडूंची वैद्यकीय पथकाद्वारे चाचणी घेऊन क्रीडा प्रबोधिनीमध्ये शारीरिकदृष्टया सुदृढ खेळाडूंची निवड अंतिम करण्यात येते.

 

क्रीडा व युवक सेवा संचालनालय, महाराष्ट्र राज्य, पुणे अंतर्गत शिवछत्रपती क्रीडापीठांतर्गत विविध क्रीडा प्रबोधीनीमध्ये सन 2024-25 साठी सरळ प्रवेश व खेळ निहाय कौशल्य चाचणीद्वारे निवासी प्रवेश प्रक्रीया व खेळ निहाय कौशल्य चाचणी कार्यक्रम तपशील पुढीलप्रमाणे आहे.

जिल्हास्तर नावनोंदणी अंतिम दिनांक 5 जुलै, 2024 पर्यंत आहे.  (जन्मतारखेचा दाखला, आधारकार्ड,  खेळाडूचे प्रमाणपत्र छायांकीत प्रत सोबत आणावे.), विभागस्तर चाचण्यांचे आयोजन सरळ प्रवेश 8 जुलै, 2024 व कौशल्य चाचणी 9 जुलै,2024 (स्थळ कळविण्यात येईल.), राज्यस्तरीय चाचण्याचे आयोजन सरळ प्रवेश 15 जुलै, 2024 व कौशल्य चाचणी 16 जुलै,2024 रोजी शिवछत्रपती क्रीडा संकुल, म्हाळुंगे बालेवाडी, पुणे येथे होणार आहे, असे जिल्हा क्रीडा अधिकारी नांदेड यांनी प्रसिद्धीपत्रकाद्वारे कळविली आहे.

000000

वृत्त क्र. 534

 लोकशाही दिनाचे सोमवारी आयोजन 

नांदेड दि. 27 :- सामान्य जनतेच्या तक्रारी, अडचणी ऐकून घेऊन त्या सोडविण्यासाठी राज्य शासनाच्यावतीने प्रत्येक महिन्याच्या पहिल्या सोमवारी लोकशाही दिन साजरा करण्यात येतो. या महिन्यात लोकशाही दिन सोमवार 1 जुलै 2024 रोजी दुपारी 1 ते 3 वाजेपर्यंत जिल्हाधिकारी कार्यालय परिसरातील नियोजन भवन येथे आयोजित केला आहे. 

 

या दिवशी महसूल, गृह, ग्रामविकास, पाटबंधारे, बांधकाम, परिवहन, सहकार, कृषि विभाग व पाणी पुरवठा समन्वय अधिकारी इत्यादी जिल्हा स्तरावरील प्रमुख अधिकारी व ज्या कार्यालयाचे लोकशाही दिनात प्रलंबीत प्रकरणे आहेत असे अधिकारी बचत भवन जिल्हाधिकारी कार्यालय परिसरात उपस्थित राहतील. सकाळी 12 वाजेपासून निवेदनाची नोंदणी सुरु होणार आहे. त्यानंतर लगेचच प्राप्त झालेल्या अर्जावर, निवेदनावर म्हणणे ऐकून घेण्याच्या कामास सुरुवात करण्यात येईल. 

लोकशाही दिनाच्या दिवशी प्राप्त होणाऱ्या जनतेच्या तक्रारी, अडचणी एकत्रीतरीत्या समजावून घेऊन त्या शक्य तितक्या लवकर सोडविण्यात येतील,  असे निवासी उपजिल्हाधिकारी महेश वडदकर यांनी कळविले आहे.

00000

 वृत्त क्र. 533

प्रत्येक स्टॉलवर लोकराज्य अंक उपलब्ध

 

 विद्यार्थी, अभ्यासक व शाळांनी मागणी करावी

 

नांदेड, दि. 26 :- राज्य शासनाचे मुखपत्र असलेले लोकराज्य हे शासकीय योजना व महत्वाची माहिती देणारे मासिक आहे. स्पर्धा परीक्षेसाठी विद्यार्थ्यांना अत्यंत उपयुक्त असलेले लोकराज्य नव्या जोमाने प्रसिध्द होणार असून प्रत्येक विद्यार्थ्यांनी, अभ्यासक, लेखक व सर्व क्षेत्रातील मान्यवरांनी आपला अंक राखून ठेवावा , असे आवाहन  जिल्हा माहिती अधिकारी प्रवीण टाके यांनी केले आहे.

 

आज पहाटे नांदेड जिल्ह्यातील वृत्तपत्र वितरण संघटनेच्या पदाधिकाऱ्यांशी त्यांनी संवाद साधला. यावेळी महाराष्ट्र राज्य वृत्तपत्र विक्रेता संघाचे कार्याध्यक्ष तथा नांदेड जिल्ह्याचे अध्यक्ष बालाजी पवार, राज्य संघटनेचे कार्यकारी सदस्य चंद्रकांत घाटोळ, उपाध्यक्ष गणेश वडगावकर, कोषाध्यक्ष बाबू जल्देवार सह पदाधिकारी व वृत्तपत्र विक्रेते मोठ्या संख्येने उपस्थित होते.

 

लोकराज्यचा अंक प्रत्येक स्टॉलवर उपलब्ध केल्यास विद्यार्थ्यांना सहज खरेदी करणे शक्य होवून उपलब्ध होईल. यासाठी सर्व वितरकांनी आपल्या स्टॉलवर लोकराज्य अंक विक्रीसाठी ठेवावा,असे आवाहन जिल्हा माहिती अधिकारी प्रवीण टाके यांनी केले.

 

लोकराज्य हे मासिक सर्वासाठी उपयोगी असून यात राज्य शासनाने घेतलेले धैयधोरणे, सर्व सामान्यांसाठी घेतलेले निर्णय, मंत्रिमंडळातील निर्णय, विशेष प्रसंगावर आधारित विशेषांकात सखोल माहिती असलेले लेख,पर्यटनावरील माहिती अशा अनेक विषयावर आधारित माहितीचा संग्रह खात्रीशीर आकडेवारीसह प्रसिध्द करण्यात येतो. जुलै महिन्याचा विशेष अंक राजर्षी छत्रपती शाहू महाराज यांच्यावरील विशेषांक आहे.

या मासिकाची वार्षिक वर्गणी फक्त 100 रुपये असून या वर्गणीमध्ये वर्षभर 12 अंक वर्गणीदारांना त्यांनी दिलेल्या पत्त्यावर पाठविण्यात येतो. वर्गणी भरण्यासाठी आता आपल्या घरी येणाऱ्या वृत्तपत्र विक्रेत्यांकडे देखील वर्गणी दिली जाऊ शकते. शहरातील प्रमुख बुक स्टॉलवर हे अंक उपलब्ध असतील. तसेच जिल्हा माहिती कार्यालयात कार्यालयीन वेळेमध्ये अंक नोंदणीसाठी संपर्क साधला जाऊ शकतो.

 

कार्यालयाशी संपर्क साधा

या कार्यालयाशी संपर्क साधावा लागेल. या कार्यालयाचा पत्ता-जिल्हा माहिती अधिकारी, जिल्हा माहिती कार्यालय, पार्वती निवास, खुरसाळे हॉस्पिटल, यात्री निवास रोड, बडपुरा नांदेड असा आहे. अधिक माहितीसाठी लोकराज्य समन्वयक काशिनाथ आरेवार (मो. क्र. मोबाईल नंबर 9422350213 यावरही संपर्क साधता येईल.

 

प्रमुख स्टॉलवर उपलब्ध

तसेच नांदेड जिल्ह्यातील प्रत्येक स्टॉलवर हा अंक आता फक्त 10 रुपयांस मिळणार असून वार्षिक वर्गणी भरून वर्गणीदार होण्यासाठी या कार्यालयात येवून 100 रुपये वर्गणी भरावी लागेल. या 100 रुपयांची शासकीय पावतीही वर्गणीदारांना मिळणार असल्याची माहिती यावेळी देण्यात आली. आतापर्यत अनेक मोठया पदावर कार्यरत असलेल्या अधिकाऱ्यांनी स्पर्धा परीक्षा देताना लोकराज्यचा अंक नियमित वाचत असल्याचे त्यांच्या अनुभवात नमुद केलेले आहे.

 

तुमच्या वृत्तपत्र विक्रेत्याला घरपोच लोकराज्य मागा !

नांदेड जिल्ह्यातील वृत्तपत्र विक्रेत्यांनी लोकराज्य घराघरात पोहोचवण्याचा संकल्प केला आहे. केवळ शंभर रुपयांच्या वर्गणीमध्ये वर्षभर अंक घरपोच येऊ शकतो.आपल्या घरी वृत्तपत्र टाकणाऱ्या विक्रेत्याकडे शंभर रुपयाची पावती घेऊन आपली नोंद करू शकता. आपल्या विक्रेत्याकडे आपल्यापर्यंत अंक पोहोचवले जाईल, असे आवाहन वृत्तपत्र विक्री संघटनेचे अध्यक्ष बालाजी पवार यांनी केले आहे. घरपोच अंकासाठी चंद्रकांत घाटोळ ( मो.क्र. 7020345110) यांच्याशी संपर्क साधावा.

00000

 वृत्त क्र. 532

आत्महत्याग्रस्त कुटुंबाना जिल्‍हाधिकाऱ्यांच्या हस्ते कृषि निविष्ठा सामुग्रीचे वाटप

नांदेड दि. 26 :- जिल्ह्यातील आत्महत्याग्रस्त कुटुबांना उत्पादन खर्च कमी करण्यासाठी वापरावयाच्या संवेदनशील कृषि निविष्ठा सामुग्रीचे (क्रिटीकल इनपुट किट) चे वाटप आज जिल्हाधिकारी कार्यालयात जिल्‍हाधिकारी अभिजित राऊत यांचे हस्ते प्रातिनिधीक स्वरुपात करण्यात आले.
 
यावेळी जिल्‍हा अधिक्षक कृषि अधिकारी तथा प्रकल्‍प संचालक (आत्‍मा) भाऊसाहेब बऱ्हाटे, व्यवस्थापक नाबार्ड दिलीप दमयावार, जिल्हा कृषि अधिकारी जिल्हा विजय बेतीवार, उपविभागीय कृषि अधिकारी दत्तकुमार कळसाईत, नोडल अधिकारी (स्मार्ट प्रकल्प) तथा प्रकल्प उपसंचालक (आत्मा), अनिल शिरफुले, तालुका कृषि अधिकारी, एस. बी. मोकळे, कृषि सहाय्यक, तालुका तंत्रज्ञान व्यवस्थापक सी डी कदम व आत्माचे श्रीहरी बिरादार व नंदीग्राम शेतकरी उत्पादक कंपनीचे संदीप डाकुलगे, के-फर्टस लॅबचे बी. बी. पेंडकर व नांदेड तालुक्यातील मौजे. तळणी येथील आत्महत्याग्रस्त कुटूंबीय उपस्थित होते.
 
आत्महत्याग्रस्त कुटूंबांना उत्पादन खर्च कमी करण्यासाठी वापरावयाच्या संवेदनशील कृषि निविष्ठा सामुग्री पिक प्रात्यक्षिक अंतर्गत (0.40 हेक्टरसाठी उच्चतम अनुदान मर्यादा चार हजार रुपये प्रति लाभार्थी/ प्रति प्रात्यक्षिक याप्रमाणे आहे. तसेच विविध आधुनिक कृषीतंत्रज्ञानाचा (जैविक, नैसर्गिक इ.) प्रचार व प्रात्य़क्षिक राबविण्याच्या विस्तार कार्यक्रमाच्या योजनासाठी जैविक किटकनाशके व खते तयार करण्याच्या सोप्या पद्धती शेतकऱ्यांना समजावून सांगणे. तसेच त्यांचा प्रचार व प्रसाराचे विस्तार कार्य करण्यात येणार आहे.
 
आत्महत्याग्रस्त कुटूंबांना प्रोम निर्मिती (पालाशयुक्त सेंद्रीय खत), जैविक कीटकनाशके इ. घरच्या घरी करुन शेतीचा खर्च कमी करणे व काही प्रमाणात उत्पादनाची साधने निर्माण करण्याची आत्मा मधून प्रात्याक्षिक कीट देवून मार्गदर्शन करण्यात येत आहे असे जिल्‍हा अधिक्षक कृषि अधिकारी तथा प्रकल्‍प संचालक (आत्‍मा) भाऊसाहेब बऱ्होट यांनी सांगितले.
 
या कृषि निविष्ठामध्ये कंपोस्ट खत, निम पावडर तयार करणे, निमार्क तयार करणे व बीबीएफची निवड करणे याबाबी शेतकरीस्तरावर करण्यात येणार आहेत व फॉस्‍फेटीक खत, खत विरघळण्यासाठी व शेणखत कुजविण्यासाठी जिवाणू, लाईट ट्रॅप, एनपीके जीवाणू, बीव्हीएम कल्चर व सापळा पिके इ. निविष्ठांचा आवश्यकता आहे. या निविष्ठांचा पुरवठा आत्महत्याग्रस्त कुटूंबांतील शेतकरी यांना करण्यात येवून शेतकऱ्यांना उत्पादन प्रक्रिया व कार्यक्षम वापराबाबत मोफत मार्गदर्शन सुध्दा करण्यात येणार आहे.
 
सार्वभौम ग्रामसभा अंतर्गत शेतकरी आत्महत्या झालेल्या गावांमध्ये ग्राम जयंती महोत्सव साजरा करुन सक्षम ग्राम निर्मितीसाठी जिल्‍हा अधिक्षक कृषि अधिकारी तथा प्रकल्‍प संचालक (आत्‍मा), क्षेत्रीय अधिकारी व कर्मचारी यांची गावभेट दौऱ्याअंतर्गत 1 एप्रिल ते 30 एप्रिल 2024 दरम्यान झालेला आहे. या कार्यक्रमाअंतर्गत सक्षम ग्राम निर्मितीसाठी चला जाऊ गावाकडे कार्यक्रम राबविण्यासाठी आत्मा अंतर्गत खरीप हंगामासाठी जिल्ह्यामध्ये 63 गावामधून 335 आत्महत्याग्रस्त कुटूंब आहेत. आत्महत्याग्रस्त कुटुंबियांना आत्मा यंत्रणेमार्फत जिल्हयांतर्गत प्रशिक्षण कृषि विज्ञान केंद्र, पोखर्णी येथे 29 एप्रिल 2024 व सगरोळी येथे 3 मे 2024 रोजी संपन्न झाले.  त्यामध्ये त्यांना विविध विषयांवर मार्गदर्शन करण्यात आलेले आहे. आजच्या या कार्यक्रमाचे आभार प्रदर्शन उपविभागीय कृषि अधिकारी दत्तकुमार कळसाईत यांनी केले.
00000

वृत्त क्र. 531

शेतकऱ्यांनो पेरणीची घाई करू नका : जिल्हाधिकारी

मुबलक पाऊस झाल्यानंतरच पेरणीला सुरुवात करण्याचा कृषी तज्ञांचा सल्ला 

नांदेड, दि. २६ : जमिनीत ओल धरून ठेवेल असा मुरवणी पाऊस अद्याप जिल्ह्यामध्ये सर्वदूर झालेला नाही. त्यामुळे पेरणीसाठी घाई करू  नका. मुबलक पाऊस झाल्यानंतरच पेरणीला सुरुवात करावी. अद्यापही पेरणी करण्याचे दिवस गेलेले नाहीत, असे आवाहन जिल्हाधिकारी अभिजीत राऊत यांनी केले आहे.

जिल्ह्यामध्ये ग्रामीण भागात काही ठिकाणी शेतकऱ्यांनी पावसाची वाट न बघता पेरणीला सुरुवात केली आहे. मात्र जमिनीत चांगले पाणी मुरल्याशिवाय उत्तम पाऊस झाल्याशिवाय अशा पद्धतीचे धाडस करणे चुकीचे ठरू शकते, असा सल्ला कृषी विभागाने दिला आहे. त्यामुळे कृषी तज्ञाच्या सल्ल्यावरून जिल्हाधिकारी अभिजीत राऊत यांनी अजूनही पेरणीसाठी वाट बघितली जाऊ शकते. तूर्तास पेरणी करू नका,असे आवाहन जिल्ह्यातील शेतकऱ्यांना केले आहे.

जिल्ह्यात नायगाव, उमरी, हदगाव, भोकर, देगलूर, माहूर, हिमायतनगर आदि तालुक्यामध्ये अद्यापही 100 मिलीमिटर पेक्षा कमी पाऊस झाला आहे. संपूर्ण जिल्ह्याची सरासरी देखील फार अधिक नाही. कृषी विभागाने दिलेल्या सल्ल्यानुसार किमान 100 मिलिमीटर पाऊस झाल्यावरच पेरणीचा विचार करण्यात यावा, असे स्पष्ट करण्यात आले आहे. त्यामुळे नांदेड जिल्ह्याला पावसाची आणखी प्रतीक्षा आहे.

काल मुख्यमंत्री महोदयांच्या उपस्थितीत राज्यस्तरीय खरीप आढावा बैठक झाली या बैठकीमध्ये मुख्यमंत्र्यांनी देखील हवामान खात्याचा दाखला देत यावर्षी सरासरीपेक्षा उत्तम पाऊस होणार असल्याचे सांगितले आहे. दमदार पाऊस लवकरच येईल त्यानंतरच पेरणीला हात लावावा, असा सल्लाही त्यांनी दिला आहे. आज या संदर्भात जिल्हाधिकारी अभिजीत राऊत व जिल्हा अधीक्षक कृषी अधिकारी भाऊसाहेब बऱ्हाटे यांनी जारी केलेल्या संयुक्त निवेदनात शेतकऱ्यांनी पेरणीसाठी घाई न करण्याचे आवाहन केले आहे.

000

वृत्त क्र. 530

बिज प्रक्रिया संच अनुदानासाठी अर्ज करण्याचे आवाहन

नांदेड दि. 26 :- शेतकरी उत्पादक संघ, कंपनी (एफपीओ/एफपीसी) यांच्याकडून अटी व शर्तीच्या आधीन राहून अर्ज मागविण्यात आले आहेत. हे प्रस्ताव राष्ट्रीयकृत बँक कर्जाशी निगडीत असून शेतकरी उत्पादक संघ / कंपनीने बँकेकडे प्रस्ताव सादर करावीत. बँकेने कर्ज मंजूर केल्यानंतर शेतकरी उत्पादक संघ / कंपनी (एफपीओ/एफपीसी) अनुदानास पात्र राहतील. तालुका कृषि  अधिकाऱ्याकडे 31 जुलै पर्यत अर्ज सादर करता येतील. लक्षांकाच्या तुलनेत जास्त अर्ज प्राप्त झाल्यास सोडत पद्धतीने निवड करण्यात येणार आहे. या योजनेचा एकदाच लाभ दिला जाणार असून शेतकऱ्यांनी याचा लाभ घ्यावा, असे आवाहन जिल्हा अधिक्षक कृषि अधिकारी भाऊसाहेब बऱ्हाटे यांनी केले आहे. 

कृषि विभागाच्यावतीने नांदेड जिल्ह्यासाठी अन्न आणि पोषण सुरक्षा अन्नधान्य पिके सन 2024-25 मध्ये स्थानिक पुढाकाराच्या बाबींतर्गत फ्लेक्झी फंडामध्ये शेतकरी उत्पादक संघ, कंपनी (एफपीओ/एफपीसी) साठी बीज प्रक्रिया संचचा लक्षांक प्राप्त आहे. प्राप्त लक्षांकाच्या अधिन राहून शेतकरी उत्पादक संघ/कंपनी (एफपीओ/एफपीसी) यांच्याकडून विहित नमुन्यात प्रस्ताव मागविण्यात येत आहेत. या योजनेंतर्गत प्रमाणित बियाणे उत्पादक करणाऱ्या शेतकरी उत्पादक संघ/कंपनी (एफपीओ/एफपीसी) यांना बिज प्रक्रिया प्रकल्प उभारणीसाठी यंत्र सामुग्री व बांधकामासाठी प्रत्यक्ष खर्चाच्या 50 टक्के किंवा 10 लक्ष यापैकी जे कमी असेल ते अनुदान अनुज्ञेय आहे, असेही जिल्हा अधिक्षक कृषि कार्यालयाने कळविले आहे.

00000

 वृत्त क्र. 529

महाराष्ट्र राज्य मुक्त विद्यालय मंडळाच्या

इयत्ता पाचवी व आठवीसाठी विद्यार्थ्यांची ऑनलाईन नावनोंदणी   

नांदेड दि. 26 :- महाराष्ट्र राज्य मुक्त विद्यालय मंडळामध्ये इयत्ता 5 वी व इयत्ता 8 वी परीक्षेसाठी नव्याने प्रविष्ठ होणाऱ्या विद्यार्थ्यांनी ऑनलाईन नावनोंदणी प्रवेश अर्जासाठी  मुदतवाढ 18 जून 2024 ते 1 जुलै 2024 रात्री 11.59 वाजेपर्यंत या कालावधीत स्विकारण्यात येणार आहेत. तरी विद्यार्थ्यांनी 1 जुलै पर्यंत प्रवेश अर्ज करावेत, असे आवाहन सचिव अनुराधा ओक यांनी  केले आहे. 

ऑनलाईन नावनोंदणी प्रवेश अर्ज भरण्यास व कागदपत्रे स्विकारण्यास मुदतवाढ देण्यात आली आहे. याबाबतचा  तपशील पुढील प्रमाणे आहे. ऑनलाईन नावनोंदणी अर्ज भरण्यासाठी 18 जून ते 1 जुलै 2024 च्या रात्री 11.59 वाजेपर्यंत तर गुरुवार 20 जून ते 5 जुलै 2024 या कालावधीत विद्यार्थ्यांना  मूळ अर्ज, विहित शुल्क व मूळ कागदपत्रे  अर्जावर नमूद केलेला संपर्क केंद्र शाळेमध्ये जमा करावे लागतील. सोमवार 12 जुलै 2024 रोजी संपर्क केंद्र शाळांनी विद्यार्थ्यांचे अर्ज विहित शुल्क, मूळ कागदपत्रे व यादी विभागीय मंडळात जमा करतील. या कालावधीमध्ये मुक्त विद्यालय मंडळाच्या इयत्ता 5 वी 8 वीसाठी प्रविष्ठ होणाऱ्या विद्यार्थ्यांनी अर्ज करण्यासाठी http:/msbos.mh-ssc.ac.in या संकेतस्थळाचा वापर करावा, असेही आवाहन करण्यात आले आहे.  

00000

वृत्त क्र. 528

कृषि विभागाच्यावतीने अनुदानावर गोदाम बांधकाम 

नांदेड दि. 26 :- कृषि विभागाच्या वतीने नांदेड जिल्ह्यासाठी अन्न आणि पोषण सुरक्षा अन्नधान्य पिके व राष्ट्रीय खाद्यतेल अभियान सन 2024-25 अंतर्गत स्थानिक पुढाकाराच्या बाबी अंतर्गत फ्लेक्झी फंडामध्ये गोदाम बांधकामासाठी लक्षांक प्राप्त आहे. प्राप्त लक्षांकाच्या आधीन राहुन शेतकरी उत्पादक संघ / कंपनी यांच्याकडून विहित नमुन्यात प्रस्ताव मागविण्यात येत आहेत. इच्छुक लाभार्थ्यांचे अर्ज महाराष्ट्र राज्य वखार महामंडळाच्या प्राधिकृत अधिकाऱ्याकंडून अथवा सार्वजनिक बांधकाम विभागाच्या मान्यताप्राप्त डिझायीन / स्पेसिफीकेशन व खर्चाच्या अंदाजपत्रकासह तालुका कृषि अधिकारी यांचेकडे 31 जुलै 2024 पर्यंत सादर करावेत. 

या योजनेंतर्गत ज्या ठिकाणी गोदामांची व्यवस्था नाही व ज्या गावात हा कार्यक्रम राबविण्यात येतो अशा परिसरात अन्न आणि पोषण सुरक्षा अन्नधान्य पिके व राष्ट्रीय खाद्यतेल अभियानांतर्गत गोदाम बांधकाम कार्यक्रम देण्यात येतो. या योजनेअंतर्गत कमाल 250 मे. टन क्षमतेचे गोदाम बांधकाम करण्यासाठी प्रत्यक्ष खर्चाच्या 50 टक्के किंवा 12.50 लाख रुपये यापैकी जे कमी असेल ते अनुदान अनुज्ञेय आहे. 

अटी व शर्तीच्या आधीन राहुन इच्छूक शेतकरी उत्पादक संघ / कंपनी केंद्र शासनाच्या ग्रामीण भंडारण योजना/नाबार्डच्या मार्गदर्शक सूचनांनुसार राष्ट्रीयकृत बँकेकडे प्रकल्प सादर करावा. सदर प्रस्ताव राष्ट्रीयकृत बँक कर्जाशी निगडीत आहे. लक्षांकाच्या तुलनेत जास्त अर्ज प्राप्त झाल्यास सोडत पध्दतीने निवड करण्यात येईल. वखार महामंडळाच्या तांत्रिक निकषाप्रमाणे लाभार्थ्यांनी जागेची निवड करावी व त्याची खात्री जिल्हा अधिक्षक कृषि अधिकारी किंवा त्यांचा प्रतिनिधी हे करतील. 

या योजनेचा एकदाच लाभ देण्यात येईल. बांधकाम चालु आर्थिक वर्षात पुर्ण करणे बंधनकारक आहे. अपुर्ण बांधकाम, मंजूर डिझाईन, स्पेसिफिकेशनमध्ये बदल केल्यास अनुदान देय राहणार नाही. गोदामाचा वापर शेतकऱ्यांनी उत्पादित केलेल्या कृषि माल साठवणूकीसाठी शेतकऱ्यांना योग्य व माफक दरात करण्यात यावा, असे आवाहन जिल्हा अधिक्षक कृषि अधिकारी नांदेड यांनी केले आहे.

0000