वृत्त क्र. 885

1 ऑक्टोबर रोजी जागतिक ज्येष्ठ नागरिक दिनाच्या कार्यक्रमाचा लाभ घ्यावा

- सहाय्यक आयुक्त शिवानंद मिनगिरे 

नांदेड दि. 30 सप्टेंबर : समाज कल्याण कार्यालय, विधीसेवा प्राधिकरण व महाराष्ट्र ज्येष्ठ नागरिक महासंघ, फेस्कॉम मराठवाडा प्रादेशिक विभाग नांदेड यांच्या संयुक्त विद्यमाने 1 ऑक्टोबर 2024 रोजी सकाळी 10.30 वाजता जागतिक ज्येष्ठ नागरिक दिन हा कार्यक्रम नियोजन भवन येथे साजरा करण्यात येणार आहे. या कार्यक्रमासाठी जास्तीत जास्त नागरिकांनी उपस्थित राहून कार्यक्रमाचा लाभ घ्यावा असे आवाहन समाज कल्याणचे सहाय्यक आयुक्त शिवानंद मिनगिरे व फेस्कॉमचे उपाध्यक्ष अशोक तेरकर यांनी केले आहे. 

या कार्यक्रमाच्या माध्यमातून ज्येष्ठ नागरिकांसाठी कायदे व योजनाविषयक बाबींची माहिती, वृध्दांचे हक्क, ज्येष्ठ नागरिकांना देण्यात येणाऱ्या सोयी-सुविधा, ज्येष्ठ  नागरिकांच्या मदतीसाठी हेल्पलाईन इत्यादीबाबत मार्गदर्शन करण्यात येणार आहे. या कार्यक्रमाचे उद्धघाटक जिल्हाधिकारी अभिजीत राऊत, कार्यक्रमाचे अध्यक्ष जिल्हा विधी सेवा प्राधिकरणाच्या सचिव दलजीत कौर जज, प्रमुख उपस्थिती जिल्हा परिषदेच्या मुख्य कार्यकारी अधिकारी मीनल करनवाल, जिल्हा पोलीस अधिक्षक अबिनाश कुमार, मनपा आयुक्त डॉ. महेशकुमार डोईफोडे, जिल्हा शल्य चिकित्सक, जिल्हा आरोग्य अधिकारी, अग्रणी बँकेचे मुख्य व्यवस्थापक यांचे मार्गदर्शन लाभणार आहे.

00000

वृत्त क्र. 884

नवरात्र उत्सवाच्या काळात डॉल्बी सिस्टीमचा वापर करण्यास प्रतिबंध

· मिरवणूक व उत्सवादरम्यान लेजर लाईटच्या वापरास प्रतिबंध

नांदेड दि. 30 सप्टेंबर : जिल्ह्यात नवरात्र उत्सवाच्या काळात 3 ऑक्टोंबर 2024 ते  15 ऑक्टोबर 2024 च्या मध्यरात्रीपर्यतच्या श्री नवरात्र उत्सव कालावधीत जिल्ह्यात डॉल्बी सिस्टीम मालक, चालक व इतर कुण्‍याही व्‍यक्‍तीस भारतीय नागरिक सुरक्षा संहिता 2023 मधील कलम 163 (1) नुसार डॉल्बी सिस्टीमचा वापर करणेस, चालविण्यास तसेच सदर मिरवणूक/उत्सवादरम्यान लेजर लाइटच्या वापरासही जिल्हादंडाधिकारी अभिजीत राऊत यांनी प्रतिबंध केले आहे.

नवरात्र उत्सवाच्या काळात जिल्हयातील डॉल्बी चालक व मालक यांचेकडे असलेल्या डॉल्बी सिस्टीम उत्सव कालावधीत रोखून ठेवणे आवश्यक आहे. डॉल्बी सिस्टीम मालक, चालक व इतर कुणीही व्यक्ती  हे डॉल्बी सिस्टीम वापरू / चालवू नये याकरीता सदर डॉल्बी सिस्टीम मालक व  चालक यांना भारतीय नागरिक सुरक्षा संहिता 2023 मधील कलम 163 (1) प्रतिबंधात्‍मक आदेश जिल्हादंडाधिकारी अभिजीत राऊत यांनी निर्गमीत केला आहे. संबंधीतावर नोटीस बजावून त्‍यांचे म्‍हणने ऐकूण घेण्‍यास पुरेसा अवधी नसल्‍याने आणीबाणीच्‍या प्रसंगी भारतीय नागरिक सुरक्षा संहिता 2023 मधील कलम 163 (1) नुसार एकतर्फी आदेश निर्गमीत 26 सप्टेंबर 2024 रोजी निर्गमित करण्‍यात आला आहे.   

00000

वृत्त क्र. 883

सुशिक्षित बेरोजगार युवक-युवतींसाठी

आज भोकर, हिमायतनगर व धर्माबाद येथे उद्योग मेळावा

नांदेड दि. 30 सप्टेंबर : मुख्यमंत्री रोजगार निर्मिती कार्यक्रमाद्वारे स्वयंरोजगार निर्मितीला चालना देण्यासाठी  मंगळवार 1 ऑक्टोबर 2024  रोजी पंचायत समिती सभागृह भोकर व पंचायत समिती सभागृह हिमायतनगर, पंचायत समिती सभागृह धर्माबाद येथे सकाळी 10 वा. मेळाव्याचे आयोजन करण्यात आले आहे. या तालुक्यातील पात्र व होतकरु सुशिक्षित बेरोजगार युवक-युवतींनी मेळाव्यास उपस्थित रहावे, असे आवाहन जिल्हा उद्योग केंद्राचे महाव्यवस्थापक अमोल इंगळे यांनी केले आहे.

सुशिक्षित बेरोजगार युवक-युवतींची वाढती संख्या व उद्योग व्यवसाय क्षेत्रात उपलब्ध होत असलेल्या स्वयंरोजगार व रोजगाराच्या विविध संधी विचारात घेऊन उद्योजकतेला चालना देणारी व सर्जनशिलतेला कालानुरुप वाव देणारा सर्वसमावेश कार्यक्रम शासनाने ऑगस्ट-2019 पासून मुख्यमंत्री रोजगार निर्मिती कार्यक्रम सुरु केलेला आहे. सन 2024-25 नांदेड जिल्हयास एकुण 1000 युवक युवतींना वित्तीय संस्थेच्या माध्यमातून लाभ देण्याचे महाराष्ट्र शासनाचे लक्षांक आहे. 

या योजनेतून मोठया प्रमाणात स्वत:चा उद्योग उभारणी करुन त्यातंर्गत स्वयंरोजगार निर्मिती होणार असल्याने मुदतीत लक्षांक पूर्ती होण्यासाठी प्राधान्य देण्यात येत आहे. त्याचाच एक भाग म्हणून या योजनेतर्गंत उद्या 1 ऑक्टोबर 2024 रोजी भोकर, हिमायतनगर व धर्माबाद या तीन तालुक्यामध्ये मेळावे आयोजित केले आहेत. या मेळाव्यात कर्ज मंजुरीचे प्रस्ताव, अर्ज अपलोड करणे, मंजुरीच्या प्रक्रियेबाबत जिल्हा उद्योग केंद्र कार्यालयाचे अधिकारी तसेच बँकेचे अधिकारी मार्गदर्शन करणार आहेत. या योजनेचा  लाभ घेण्यासाठी सुशिक्षित बेरोजगार युवक-युवतींनी अनुषंगिक व आवश्यक त्या कागदपत्रांसह या मेळाव्यास उपस्थित रहावे. तसेच कर्ज प्रस्ताव प्रलंबित असलेल्या अर्जदारांनीही आवश्यक त्या कागदपत्रासह/कारणासह पूर्ततेसाठी उपस्थित रहावे, असे कळविले आहे.

मेळाव्यास येताना आधार कार्ड. पॅन कार्ड, रहिवासी दाखला, शाळा सोडल्याचे प्रमाणपत्र, दोन फोटो, व्यवसायाचा प्रकल्प अहवाल,जातीचा दाखला, व्यवसायानुंषिक इतर परवाने ही आवश्यक कागदपत्रे सोबत आणावीत. ही योजना ऑनलाईन पध्दतीने राबविण्यात येत असून अधिक माहितीसाठी सदर योजनेचे https://maha-cmegp.gov.in या संकेतस्थळ आहे. तालुक्यातील व परिसरातील पात्र-होतकरु सुशिक्षित बेरोजगार युवक-युवतींनी या मेळाव्यास उपस्थित राहून या योजनेचा लाभ घ्यावा, असेही आवाहन जिल्हा उद्योग केंद्राचे महाव्यवस्थापक अमोल इंगळे यांनी केले आहे.

00000

वृत्त क्र. 882

माजी सैनिकांना शंकरराव चव्हाण शासकीय रुग्णालयात नौकरीची संधी

नांदेड दि. ३० सप्टेंबर : माजी सैनिक महामंडळ (मेस्को) महाराष्ट्र शासनामार्फत कै. शंकरराव चव्हाण शासकीय रुग्णालय, विष्णुपूरी नांदेड येथील रुग्णालय व आस्थापनेसाठी सुरक्षा सुपरवायझर, सुरक्षागार्ड पुरुष, सुरक्षागार्ड महिला यांच्या जागा भरावयाच्या आहेत.

माजी सैनिक, माजी सैनिक पाल्य व माजी सैनिक विधवा यांच्यातून कंत्राटी पध्दतीने  पदे भरण्यात येणार आहे. तरी  जिल्ह्यातील पात्रताधारक माजी सैनिक, पाल्य व माजी सैनिक विधवा यांनी तात्काळ कै. शं.च. शासकीय रुग्णालयातील माजी सैनिक महामंडळाचे कार्यालयात सुरक्षा अधिकारी/सुपरवायझर यांच्याशी मोबाईल  क्रमांक 7378593708 वर संपर्क करावा, असे आवाहन मेस्को अधिकारी विश्वास लक्ष्मण यांनी केले आहे.

00000

 वृत्त क्र. 881

7 ऑक्टोबर रोजी लोकशाही दिनाचे आयोजन

नांदेड दि. 30 सप्टेंबर : सामान्य जनतेच्या तक्रारी, अडचणी न्याय व तत्परतेने सोडविण्यासाठी  प्रत्येक महिन्याच्या पहिल्या सोमवारी लोकशाही दिन आयोजित करण्यात येतो. जिल्हा प्रशासनाच्यावतीने लोकशाही दिन सोमवार 7 ऑक्टोबर 2024 रोजी दुपारी 1 ते 3 वाजेपर्यंत जिल्हाधिकारी कार्यालय परिसरातील नियोजन भवन येथे आयोजित केला आहे. 

 या दिवशी महसूल,  गृह,  मुख्य कार्यकारी अधिकारी जिल्हा परिषद,  पाटबंधारे, बांधकाम, परिवहन, सहकार, कृषि विभाग व जिल्हा पाणी पुरवठा समन्वय अधिकारी इत्यादी जिल्हा स्तरावरील प्रमुख अधिकारी व ज्या कार्यालयाचे लोकशाही दिनात प्रलंबीत प्रकरणे आहेत असे अधिकारी बचत भवन जिल्हाधिकारी कार्यालय परिसरात उपस्थित राहतील. सकाळी 12 वाजेपासून निवेदनाची नोंदणी सुरु होणार आहे. त्यानंतर लगेचच प्राप्त झालेल्या अर्जावर, निवेदनावर म्हणणे ऐकून घेण्याच्या कामास सुरुवात करण्यात येईल.

 लोकशाही दिनाच्या दिवशी प्राप्त होणाऱ्या जनतेच्या तक्रारी, अडचणी एकत्रीतरीत्या समजावून घेऊन त्या शक्य तितक्या लवकर सोडविण्यात येतील, अशी माहिती निवासी उपजिल्हाधिकारी महेश वडदकर यांनी दिली आहे.

00000

 वृत्त क्र. 880

नवा मोंढा मैदानावर लाडक्या बहिणींचा आनंद सोहळा साजरा होणार 

 ७ ऑक्टोबरला नांदेडमध्ये मुख्यमंत्री एकनाथ शिंदे, उपमुख्यमंत्री देवेंद्र फडणवीस, अजित पवार यांची उपस्थिती 

 जिल्हा प्रशासनाकडून महिला सशक्तिकरण अभियानाची तयारी सुरु 

नांदेड दि. ३० सप्टेंबर : संपूर्ण महाराष्ट्रातील महिला भगिनींसाठी आर्थिक सक्षमीकरणाची क्रांती ठरलेल्या मुख्यमंत्री माझी लाडकी बहीण योजना व अन्य योजनांचा आनंद सोहळा ७ ऑक्टोबरला नांदेडमध्ये होत आहे. मुख्यमंत्री महिला सशक्तिकरण अभियानांतर्गत होणाऱ्या या कार्यक्रमांमध्ये जिल्ह्यातील हजारो महिला सहभागी होणार असून प्रशासन या दृष्टीने तयारीला लागले आहे.

राज्य शासनाने मुख्यमंत्री महिला सशक्तिकरण अभियान सुरू केले असून या संकल्पनेतून सर्व जिल्ह्यांमध्ये राज्य शासनाच्या पथदर्शी योजनांमधील लाभार्थ्यांची संवाद साधने व त्यांना प्रत्यक्ष या योजनाचा कार्यक्रमांमध्ये लाभ देणे सुरू आहे. विविध जिल्ह्यांमध्ये मुख्यमंत्री महिला सशक्तिकरण अभियानांतर्गत कार्यक्रम झाले असून आता नांदेडमध्ये देखील ७ ऑक्टोबरला हा कार्यक्रम होणार आहे.

आज या संदर्भातील महत्त्वपूर्ण बैठक जिल्हाधिकारी अभिजीत राऊत, जिल्हा परिषदेच्या मुख्य कार्यकारी अधिकारी मीनल करणवाल, अतिरिक्त कार्यकारी अधिकारी संदीप माळोदे, निवासी उपजिल्हाधिकारी महेश वडदकर, यांच्यासह जिल्हा जिल्हा परिषद व महानगरपालिकेतील सर्व विभाग प्रमुखांच्या उपस्थितीत ही बैठक पार पडली. यामध्ये विविध विभाग प्रमुखांना जबाबदारी सोपविण्यात आली आहे.

नवा मोंढा येथील मैदानावर होणाऱ्या या कार्यक्रमासाठी मुख्यमंत्री एकनाथ शिंदे,उपमुख्यमंत्री देवेंद्र फडणवीस, उपमुख्यमंत्री अजित पवार, राज्याचे ग्रामविकास मंत्री तथा जिल्ह्याचे पालकमंत्री गिरीश महाजन ,महिला व बालकल्याण मंत्री आदिती तटकरे यांच्यासह विविध मान्यवर उपस्थित राहणार आहे.

जिल्ह्यातील मुख्यमंत्री माजी लाडकी बहीण योजनेच्या लाभार्थ्यांना या कार्यक्रमाला आमंत्रित करण्यात आले आहे त्यामुळे हजारोच्या संख्येने महिला या ठिकाणी उपस्थित राहणार आहे. याशिवाय मुख्यमंत्री युवा कार्यक्रम प्रशिक्षण योजना, मुख्यमंत्री अन्नपूर्णा योजना, मुख्यमंत्री मोफत उच्च शिक्षण योजना, मुख्यमंत्री तीर्थ दर्शन योजना, मुख्यमंत्री बळीराजा वीज सवलत योजना, मुख्यमंत्री वयोश्री योजनेचे लाभार्थी मोठ्या संख्येने या ठिकाणी उपस्थित राहणार आहे जिल्हा प्रशासन या मोठ्या कार्यक्रमाच्या तयारीला लागले आहे.

0000

 वृत्त क्र. 879

मतदानाची टक्केवारी वाढविणे आगामी निवडणुकीतील प्रथम लक्ष्य: अभिजीत राऊत 

 विधानसभा निवडणुकी संदर्भातील चार जिल्ह्याचे प्रशिक्षण नांदेडमध्ये संपन्न 

नांदेड दि. ३० सप्टेंबर : यावेळी महाराष्ट्राची निवडणूक वेगळी आहे. निवडणूक आयोगाचे या निवडणुकीकडे अतिशय गांभीर्याने लक्ष असून मतदानाची टक्केवारी वाढविणे हे पहिले लक्ष्य ठेवण्याचे आवाहन जिल्हाधिकारी अभिजीत राऊत यांनी आज येथे केले. छत्रपती संभाजी नगर विभागातील नांदेड, हिंगोली, परभणी व लातूर या चार जिल्ह्याच्या निवडणूक नोडल अधिकारी व प्रशिक्षण अधिकाऱ्यांच्या कार्यशाळेचा शुभारंभ करताना ते बोलत होते.

यावेळी व्यासपीठावर जिल्हाधिकारी अभिजीत राऊत यांच्यासह जिल्हा परिषदेच्या मुख्य कार्यकारी अधिकारी मीनल करणवाल, आतिरिक्त जिल्हाधिकारी पांडुरंग बोरगावकर, सहायक जिल्हाधिकारी मेघना कावली, निवासी उपजिल्हाधिकारी महेश वडदकर, जिल्हा निवडणूक उपजिल्हाधिकारी राजकुमार माने, राष्ट्रीय स्तरांवरील प्रशिक्षक उपजिल्हाधिकारी ललित क्हाडे, गणेश पवार, दत्तू शेवाळे, अनिकेत सोनवणे यांच्यासह चार जिल्ह्यातील वरिष्ठ अधिकारी उपस्थित होते.

जिल्हाधिकारी अभिजीत राऊत यांनी मुंबई येथे झालेल्या भारत निवडणूक आयोगाच्या बैठकीचा संदर्भ देऊन निवडणूक आयोगाने ज्या अपेक्षा व्यक्त केल्या त्याबाबतची माहिती उपस्थितांना दिली. ते म्हणाले, यावेळी महाराष्ट्रातील मतदान प्रक्रियेवर लक्ष वेधले असून राज्यात प्रत्येक मतदान केंद्रावर मतदारांना मतदान करणे सुखद वाटले पाहिजे. गेल्या लोकसभा निवडणुकांमध्ये घसरलेली टक्केवारी आणि मतदारांमध्ये मतदानातील अनास्था दूर करण्यासाठी सर्व प्रयत्न करण्यासाठी सिद्ध रहा, असेही त्यांनी सांगितले.

 नवनवीन उपक्रमासोबतच लोकशाही प्रक्रियेत सामान्य नागरिकांचा सहभाग वाढविण्यासाठी उत्तम असे प्रशिक्षण देण्याच्या सूचना यावेळी त्यांनी प्रशिक्षकांना केल्या.अतिरेकी कारवाया होत असलेल्या जम्मू-काश्मीरमध्ये निवडणुकांची आकडेवारी उत्तम आहे मात्र महाराष्ट्रासारख्या प्रगत राज्यात त्यामध्ये घट होत आहे त्यामुळे संपूर्ण यंत्रणेने यासाठी एकजूट होऊन काम करणे आवश्यक असल्याचे त्यांनी सांगितले.

निवडणूक आयोगाकडून प्रशिक्षण घेऊन आलेले उपजिल्हाधिकारी ललित वऱ्हाडे,अनिकेत सोनवणे, गणेश पवार, दत्तू शेवाळे,  यांनी यावेळी अनुक्रमे निवडणुकीतील उमेदवारांची पात्रता अपात्रता, पोस्टल बॅलेट, असुरक्षा उपयोजना, निवडणूक खर्च,पेड न्यूज या संदर्भात मार्गदर्शन केले. तत्पूर्वी अतिरिक्त जिल्हाधिकारी पांडुरंग बोरगावकर यांनी निवडणूक हा विषय दरवेळी नव्याने प्रशिक्षण घेण्याचा व सातत्याने उजळणी करण्याचा असून अतिशय बिनचुकता या कर्तव्यात येणे आवश्यक असल्याचे प्रतिपादन केले.

0000

वृत्त क्र. 877

कर्तव्यात कसूर, नेरली ग्रामपंचायत अधिकारी निलंबित

नांदेड दि. 30 सप्टेंबर : शेकडो लोकांना दूषित पाण्यामुळे अतिसाराला बळी पडावे लागले. ग्राम पंचायत अधिकारी पाणीपुरवठ्यासारख्या जोखमीच्या विषयावर हलगर्जीपणा केला असा ठपका ठेवून जिल्हा परिषद प्रशासनाने कठोर कारवाई केली आहे. नेरली दुर्घटनेत ग्रामपंचायत अधिकारी निलंबित करण्यात आले आहे.

ग्रामपंचायत नेरली येथे 27 नोव्हेंबर 2024 रोजी पिण्याच्या पाण्याच्या टाकीतील दुषीत पाण्यामुळे गावात अतिसार साथ रोगाचा प्रादुर्भाव झाला. यामुळे अनेक लोकांना मळमळ,उलटी, जुलाब होवून अनेक रुग्णांना साथीचा आजार झाला.याबाबत अनेक रुग्णांवर उपचार करुन घरी सोडण्यात आले.आता परिस्थिती आटोक्यात असून आरोग्य विभागाचे पथक लक्ष ठेवून आहे.

याबाबत जिल्हा परिषदेच्या मुख्य कार्यकारी अधिकारी मीनल करनवाल यांनी कर्तव्यात कसूर केल्याप्रकरणी नेरली येथील ग्रामपंचायत अधिकारी आर.एस. हटकर यांना निलंबित केले आहे.  

याबाबतचे आदेश 28 सप्टेंबर 2024 रोजी निर्गमित केले आहे.

गटविकास अधिकारी, पंचायत समिती नांदेड यांनी सादर केलेल्या अहवालावरुन ग्रामपंचायत अधिकारी आर.एस.हटकर हे नेरली येथे कार्यरत असताना त्यांनी ग्रामपंचायत येथे पाणी पुरवठा निर्जतुकीकरण करण्यासाठी टीसीएल पावडरचा नियमितपणे वापर केल्याचे अभिलेखे ग्रामपंचायतीमध्ये आढळून आलेले नाही. नळ योजनेच्या पाण्याची टाकी वेळोवेळी स्वच्छ करणे, योग्य प्रमाणात टीसीएल पावडरचा वापर करणे आवश्यक असताना तसे केल्याचे दिसून आलेले नाही.

0000

शेतकऱ्यांना कापूस, सोयाबीन अनुदान वितरण सुरू

पहिल्या टप्प्यात सुमारे २हजार ३९९ कोटींचे वाटप

मुख्यमंत्री, उपमुख्यमंत्र्यांच्या हस्ते ऑनलाईन शुभारंभ

मुंबई, दि.३०:- राज्यातील कापूस, सोयाबीन उत्पादक शेतकऱ्यांना २०२३ च्या 

खरीप हंगामासाठीचे अनुदान वितरणाचा शुभारंभ आज राज्य मंत्रिमंडळ बैठकीत करण्यात आला. 

मुख्यमंत्री एकनाथ शिंदे, उपमुख्यमंत्री देवेंद्र फडणवीस, उपमुख्यमंत्री अजित पवार यांच्या हस्ते ऑनलाइन पद्धतीने हे अनुदान शेतकऱ्यांच्या खात्यात जमा करण्यात आले.

कापूस आणि सोयाबीन उत्पादक शेतकऱ्यांना पाच हजार रुपये प्रति हेक्टर असे दोन हेक्टर च्या मर्यादेत प्रत्येकी ५ हजार रुपये अनुदान देण्याचा निर्णय झालेला आहे.

पहिल्या टप्प्यात ४९ लाख ५० हजार खातेदारांच्या खात्यांमध्ये २३९८ कोटी ९३ लाख रुपये जमा करण्यात येत आहेत. राज्यात कापूस आणि सोयाबीन उत्पादक शेतकऱ्यांची संख्या सुमारे ९६ लाख ७८७ इतकी आहे. 

त्यापैकी ६८ लाख ६ हजार ९२३ खात्यांची माहिती पोर्टलवर भरली गेली आहे. 

यात नमो शेतकरी महासन्मान च्या माहिती सोबत आधार जुळणी व ७० टक्के पर्यंत नावाची पडताळणी झालेली संख्या ४१ लाख ५० हजार ६९६ इतकी आहे. तर आधार जुळणी व ६९ टक्क्यांहून माहितीची पडताळणी झालेल्यांची संख्या ४ लाख ६०हजार ७३० इतकी आहे. 

याव्यतिरिक्त आधारसंमतीपत्रानुसार माहिती भरलेल्या खात्यांची संख्या १७ लाख ५३ हजार १३० इतकी आहे. 

अशारीतीने ४९ लाख ५० हजार शेतकऱ्यांच्या ६३ लाख ६४ हजार खात्यांवर अनुदानचे अर्थसहाय्य जमा केले जाणार आहे. त्यासाठी २ हजार ३९८ कोटी ९३ लाख रुपयांची तरतूद लागणार आहे.

0000

दिनांक : 29 सप्टेंबर 2024

  वृत्त क्र. 876

नेरली येथील साथरोग नियंत्रणात

सर्व रुग्ण धोक्याबाहेर ; गावात स्वच्छता अभियान

नांदेड दि. 29 सप्टेंबर :  नांदेड जिल्ह्यातील नेरली येथे दुषित पाणी पिल्यामुळे विविध रुग्णालयात दाखल करण्यात आलेल्या सर्व रुग्णांची प्रकृती सुधारत आहे. आरोग्य विभागाने दिलेल्या माहितीनुसार सर्व रुग्ण धोक्याबाहेर असून गावामध्ये स्वच्छता अभियान राबविण्यात येत आहे.

या गावात दुषीत पाण्यामुळे मळमळ, जुलाब व उलटी अशा रुग्णांचा साथीचा उद्रेक झाला होता. त्याठिकाणी जिल्हा परिषदेच्या मुख्य कार्यकारी अधिकारी मीनल करनवाल यांनी भेट देवून तात्काळ प्रभावी उपाययोजना करण्यासाठी आरोग्य विभागाला सूचना दिल्या. जिल्हा आरोग्य अधिकारी डॉ. संगिता देशमुख आणि त्यांचा आरोग्य विभागाची संपूर्ण टीम तळ ठोकून त्या ठिकाणी आहेत. आता परिस्थिती आटोक्यात असून साथरोग नियंत्रणात आहे.

सार्वजनिक पिण्याच्या पाण्याचे स्त्रोताचे सर्व विहिर, हातपंप व बोर व नळ योजना पाण्याची टाकी यांचे बिल्चींग पावडरद्वारे पाणी शुध्दीकरण करण्यात आले आहे. 17 पाणी नमुने तपासण्यासाठी पाठविण्यात आले आहेत. ब्लिचिंग पावडरचा एक नमुना प्रयोगशाळेमध्ये तपासणीसाठी पाठविण्यात आला आहे. अनुजैविक व रासायनिक तपासणीसाठी भुजल सर्वेक्षण विकास यंत्रणा प्रयोगशाळा वर्कशाप नांदेड व जिल्हा आरोग्य प्रयोगशाळा नांदेड येथे पाठविण्यात आला आहे. आरोग्य विभागाच्या वैद्यकीय अधिकारी , आरोग्य सहाय्यक, आरोग्य कर्मचारी यांच्या मार्फत गृहभेटीद्वारे रुग्ण शोध मोहिम सुरु केली आहे. ज्या कुटूंबामध्ये  मळमळ, जुलाब, उलटी यासारखे लक्षणे रुग्णालस दिसून आल्यास रुग्णास आरोग्य उपकेंद्रामध्ये उपचार सुरु करण्यात आले आहे. गावातील नागरिकांना पाणी पुरवठा टॅकरद्वारे सुरु करण्यात आले आहे ते पाणी शुध्द आहे. किंवा नाही याची जिल्हा आरोगय अधिकारी डॉ. संगीता देशमुख यांनी स्वत: ओटी टेस्ट करुन खात्री करत आहेत.

नेरली येथील आता पर्यतच्या रुग्णांची संख्या 344 आहे. यापैकी रेफर 210 पैकी जिल्हा रुगालय 94, शासकीय वैद्यकीय महाविद्यालय 89, नवोदय हॉस्पीटल 27 रुग्ण आहेत. सर्व रुग्ण धोक्याबाहेर आहेत.

नेरली येथील परिस्थीती नियंत्रणात येत आहे याकडे जिल्हाधिकारी अभिजीत राऊत , मुख्य कार्यकारी अधिकारी मीनल करनवाल हे बारकाईने लक्ष ठेवून आहेत. त्याच्या मार्गदर्शनाखाली जिल्हा आरोग्य अधिकारी डॉ. संगीता देशमुख, सहाय्यक जिल्हा आरोग्य अधिकारी डॉ. संतोष सुर्यवंशी, गट विकास अधिकारी नारवटकर, तालुका आरोग्य अधिकारी डॉ. प्रविण मुंडे, वैद्यकीय अधिकारी डॉ. जयश्री खेडकर, डॉ. बालाजी मिरकुटे, समुदाय आरोग्य अधिकारी , विस्तार अधिकारी , ग्रामपंचायत पद अधिकारीव कर्मचारी साथ नियंत्रणासाठी परिश्रम घेत आहेत.

नेरली येथील नागरिकांनी  पाणी गाळून उकळून प्यावे, शिळे अन्न व उघड्यावरचे अन्न खाऊ नये, जेवणापूर्वी व स्वच्छालयाला जावून आल्यानंतर साबनाने हात स्वच्छ धुवावे. मुलांना जेवण भरविण्यापूर्वी हात स्वच्छ धुवावे. स्वंयपाक करण्यापूर्वी महिलांनी हात स्वच्छ धुवावे असे आवाहन जिल्हा आरोग्य अधिकारी डॉ. संगीता देशमुख यांनी  केले. स्तनदा माता व गरोदर माता अंगणवाडीतील सॅम व मॅम मुले व लहान मुले यांचे तपासणी करण्यात येत आहे. मळमळ उलटी व जुलाब यासारखे लक्षणे दिसून आल्यास नागरिकांनी आरोग्य कर्मचारी व आरोग्य उपकेंद्राशी संपर्क करावा, असेही आवाहन आरोग्य विभागाच्यावतीने करण्यात आले आहे.

00000

दिनांक : 28 सप्टेंबर 2024

 वृत्त क्र. 875

नेरली येथे अतिसाराचे २७३रूग्ण आढळले 

 ६ रुग्ण अत्यवस्थ ; आरोग्य यंत्रणा कार्यरत

 ५० आरोग्य कर्मचारी गावामध्ये कर्तव्यावर 

 दूषित पाणी पुरवठयाचे नमुने प्रयोगशाळेत 

नांदेड दि. २८ सप्टेंबर : नांदेड जिल्ह्यातील नेरली येथील तीव्र अतिसाराच्या उद्रेकात २७३ नागरिकांना लागण झाली असून त्यांना जिल्हा रुग्णालय, वैद्यकीय महाविद्यालय व शहराच्या विविध रुग्णालयात दाखल करण्यात आले. सहा रुग्णअत्यवस्थ असून अन्य सर्वांची प्रकृती धोक्याबाहेर आहे.

 जिल्हा आरोग्य यंत्रणेचे परिस्थितीवर नियंत्रण असून  गावामध्ये जिल्हा आरोग्य अधिकारी डॉ. संगीता देशमुख यांच्या नेतृत्वात सहा वैद्यकीय चमू कार्यरत आहे. यामध्ये जवळपास 50 आरोग्य कर्मचाऱ्यांचा सहभाग आहे. जिल्हाधिकारी अभिजीत राऊत व जिल्हा परिषदेच्या मुख्य कार्यकारी अधिकारी मीनल करणवाल परिस्थितीवर लक्ष ठेवून असून गावातील नागरिकांनी आरोग्य यंत्रणेने दिलेल्या सूचनांचे पालन करण्याचे आवाहन त्यांनी केले आहे.

जिल्हा शल्य चिकित्सक डॉ.निळकंठ भोसीकर, जिल्हा आरोग्य अधिकारी डॉ.संगीता देशमुख यांनी दिलेल्या माहितीनुसार गावांमधील दूषित पाणीपुरवठा बंद करण्यात आला असून सध्या टँकरने पाणीपुरवठा करण्यात येत आहे. जिल्हा यंत्रणेने विशेष आरोग्य शिबिर गावात लावले आहे.   

 सद्यस्थिती संदर्भात जिल्हा शल्य चिकित्सांकडून आलेली अधिकृत माहितीनुसार सर्व रुग्णांची परिस्थिती धोक्याबाहेर आहे. मात्र 273 पैकी सहा रुग्ण गंभीर असून त्यांच्यावर अतिदक्षता विभागात उपचार सुरू आहे. जिल्हा शासकीय रुग्णालयामध्ये 90 तर अन्य रुग्ण विष्णुपरी येथील शंकरराव चव्हाण वैद्यकीय महाविद्यालयात आहे. 

जिल्हा यंत्रणेला या संदर्भातील माहिती काल कळल्यानंतर रात्रीपासून या संदर्भातील उपचार सुरू झाले आहे. आरोग्य पथकाने उपकेंद्रावर एकूण २५६ रुग्णांची तपासणी केली.त्यापैकी ९९ रुग्णांना उच्च केंद्रात पाठवण्यात आले.इतर सर्व रुग्णांची प्रकृती स्थिर आहे.

 गावात नळ योजनेतून पाणीपुरवठा होत असून त्यातून प्रादुर्भाव झाला अथवा काय यासाठी प्रयोग शाळेला नमुने पाठविण्यात आले आहे. पूर्वी साठवलेले जलस्रोत रिकामे केले गेले.गावात सध्या 4 पाण्याचे टँकर पोहोचले आहेत, पाण्याच्या टँकरचे क्लोरीनेशन करून ओटी टेस्ट करून गावकऱ्यांना पाणी पुरवठा केला जात आहे.

गावपातळीवर रुग्णवाहिका उपलब्ध आहेत. जिल्हा आरोग्य अधिकारी डॉ. संगिता देशमुख यांच्या उपस्थितीत व मार्गदर्शनाखाली जिल्हा व तालुका जलद प्रतिसाद पथक घटनास्थळी सकाळीच पोहोचले असून शमन उपाययोजना केल्या आहेत. 5 आरोग्य पथकांसह घरोघरी सर्वेक्षण सुरू. 4 आरोग्।य पथके सध्या गावात औषधांसह उपस्थित आहेत.

गावातील नागरिकांनी स्वच्छते संदर्भात आरोग्य यंत्रणेचे निर्देश दिले आहेत त्याचे पालन करावे. गावातील विहिरी व अन्य स्त्रोतांद्वारे होणाऱ्या पाणीपुरवठ्याचा वापर सध्या करू नये, असे आवाहन करण्यात आले आहे.

0000

दिनांक : 28 सप्टेंबर 2024

वृत्त क्र. 874

कृत्रीम अवयव, सहाय्यक उपकरणाच्या माध्यमांतून

दिव्यांगाना सक्षम करण्याचा स्तुत्य प्रयत्न -देवसटवार

 दिव्यांगांना कृत्रीम अवयव व सहायक उपकरणांचे वाटप 

नांदेड दि. २८ सप्टेंबर :  इतरांवर अवलंबून राहिल्यास प्रगती प्रभावित होते. त्यामुळे प्रत्येक दिव्यांगाला आवश्यक कामांसाठी स्वयंपूर्ण करणे महत्त्वाचे आहे.कृत्रीम अवयव, सहाय्यक उपकरणे मोफत देत दिव्यांगाना सक्षम करण्याचा प्रयत्न स्तुत्य असल्याचे प्रतिपादन लातूर समाज कल्याण विभागाचे  प्रादेशिक उपायुक्त अविनाश देवसटवार यांनी केले आहे. 

जनरल इन्शुरन्स कार्पोरेशन ऑफ इंडिया उपक्रमाच्या सीएसआर योजनेअंतर्गत जिल्हा प्रशासन, जिल्हा परिषद समाज कल्याण विभाग, महात्मा गांधी सेवा संघ संचलित जिल्हा दिव्यांग पुनर्वसन केंद्र व राजस्थानी एज्युकेशन सोसायटी संचालित आर. आर. मालपाणी मतिमंद विद्यालय नांदेड यांच्या सहकार्याने शनिवार २८ सप्टेंबर रोजी नवा मोंढा मगनपुरा भागातील आर. आर. मालपाणी मतिमंद विद्यालयात दिव्यांगांना  कृत्रीम अवयव, सहाय्यक उपकरणे वितरित करण्यात आले. 

यावेळी देवसटवार बोलत होते व्यासपीठावर निवासी उपजिल्हाधिकारी महेश वडदकर, अधिष्ठाता डॉ. सुधिर देशमुख, अधिक्षक वाय. एच. चव्हाण समाज कल्याण विभागाचे सहाय्यक आयुक्त शिवानंद मिनगीरे, जिल्हा समाज कल्याण अधिकारी सतेंद्र आऊलवार, राजस्थानी एज्युकेशन सोसायटीचे अध्यक्ष ओमप्रकाश गिल्डा, सचिव प्रकाश मालपाणी, अलीम्कोचे कनिष्ठ प्रबंधक कमलेश यादव, डॉ. लक्ष्मीकांत बजाज, जयप्रकाश काबरा, कमल कोठारी, अंकिता अग्रवाल आदींची उपस्थिती होती.

यावेळी उपजिल्हाधिकारी महेश वडदकर, जिल्हा समाज कल्याण अधिकारी सतेंद्र आऊलवारसह मान्यवरांनी विचार मांडले. या प्रसंगी मान्यवरांच्या हस्ते जिल्ह्यातील दिव्यांगांना मोटाराईज्ड ट्रायसीकल, कव्हेंश्नल ट्रायसीकल, श्रवणयंत्र, ब्रेल कीट,  स्मार्ट मोबाईल फोन, स्मार्ट केन, क्रचेस, व्हिल चेअर, सी.पी. चेअर, चालण्याची काठी, रोलेटर, वॉकर इत्यादी साहित्यांचे वितरण करण्यात आले.  

कार्यक्रमाचे सूत्रसंचलन बापू दासरी तर उपस्थितांचे आभार मुख्याध्यापक नितीन निर्मल यांनी मानले. कार्यक्रम यशस्वी करण्यासाठी आर. आर. मालपाणी मतिमंद विद्यालयातील कर्मचाऱ्यांनी परिश्रम घेतले.

00000

 वृत्त क्र. 873

माहितीअधिकार प्रकरणात  तत्‍परता आवश्‍यक - डॉ.हाटकर 

जिल्‍हाधिकारी कार्यालयात माहितीचा अधिकार दिन साजरा

नांदेड दि. २७ सप्टेंबर - मा‍हितीचा अधिकार अधिनियमांतर्गत प्राप्‍त अर्जांची कार्यवाही तत्‍परतेने करणे आवश्‍यक असल्‍याचे प्रतिपादन माहिती अधिकार कायदा अभ्‍यासक अभिवक्‍ता डॉ. भीमराव हाटकर यांनी केले.

आंतरराष्‍ट्रीय माहितीचा अधिकार दिनानिमित्‍त  जिल्‍हाधिकारी कार्यालयात आयोजित व्‍याख्‍यान कार्यक्रमात ते बोलत होते. माहिती अधिकार कायद्याबाबत सर्वसामान्‍य नागरीकांत जाणीव जागृती होण्‍यासाठी प्रशासकिय पातळीवर दरवर्षी २८ सप्‍टेबर रोजी विविध उपक्रमांचे आयोजन करुन माहितीचा अधिकार दिन साजरा करण्‍यात येतो. यावर्षी दिनांक २८ रोजी शासकिय सुट्टी असल्‍याने शासन निर्देशानुसार शुक्रवार दिनांक २७ रोजी जिल्‍हाधिकारी कार्यालयात माहितीचा अधिकारी दिन साजरा करण्‍यात आला. जिल्ह्यामध्ये 30 सप्टेंबरला कार्यालयामध्ये हा दिन साजरा करण्यात येणार आहे.

पुढे बोलताना माहिती अधिकार कायद्याची निर्मिती, वेळोवळी झालेले बदल, बदलाच्‍या अनुषंगाने समाजमन व प्रशासकिय घटकांच्‍या मानसिकतेतील बदल अधोरेखीत केला.  माहितीचा अधिकार हा मूलभूत अधिकार आहे.त्‍यामुळे अधिकारी कर्मचारी यांनी माहितीचा अधिकार अर्जांची हाताळणी संवेदनशीलता व कर्तव्‍यभावनेने करावी असे आवाहन हाटकर यांनी केले.

व्‍याख्‍यानानंंतर कर्मचा-यांच्‍या शंकाचे निरसन करण्‍यात आले. सूत्रसंचालन संतोष पवार यांनी केले.  यावेळी निवासी उपजिल्‍हाधिकारी महेश वडदकर ,उपजिल्‍हाधिकारी अजय शिंदे, तहसिलदार विपीन पाटील, विकास बिरादार नायब तहसिलदार मकरंद दिवाकर, जया अन्‍नमवार, नयना कुलकर्णी,  यांचे सह अधिकारी कर्मचारी मोठया संख्‍येने उपस्थित होते.

00000

 वृत्त क्र. 872

माहिती अधिकार दिन सोमवारी साजरा करण्याचे निर्देश 

नांदेड दि. 27 सप्टेंबर : माहितीचा अधिकार अधिनियम 2005 या कायद्याच्या अंमलबजावणीसाठी 28 सप्टेंबर हा दिवस राज्यस्तरावर ‘माहिती अधिकार दिन’ म्हणून साजरा करण्यासाठी निर्देशित केले आहे. परंतु 28 व 29 सप्टेंबर 2024 या दिवशी सार्वजनिक सुट्टी असल्यामुळे सदर कार्यक्रम 30 सप्टेंबर 2024 रोजी आयोजित करावा असे निर्देश जिल्हाधिकारी अभिजीत राऊत यांनी सर्व कार्यालयाना दिले आहेत.

 

शासन निर्णयात निर्देशित केल्याप्रमाणे अंमलबजावणी कार्यालय स्तरावरून करण्यात यावी. तसेच 30 सप्टेंबर रोजी आपल्या कार्यालयामार्फत आयोजित करण्यात आलेल्या कार्यवाहीचे अनुपालन अहवाल या कार्यालयास सादर करावा, असे जिल्हाधिकारी कार्यालयाने परिपत्रकान्वये कळविले आहे.

00000

वृत्त क्र. 871

मुख्यमंत्री युवा प्रशिक्षण मेळाव्यास उत्स्फूर्त प्रतिसाद

 ·  चारशे पेक्षा अधिक उमेदवारांची निवड

 

नांदेड दि. 27 सप्टेंबर : औद्योगिक प्रशिक्षण संस्था नांदेड येथे 26 व 27 सप्टेंबर रोजी मुख्यमंत्री युवा प्रशिक्षण मेळाव्याचे आयोजन करण्यात आले होते. या मेळाव्यात औद्योगिक आस्थापना, खाजगी शाळा, महाविद्यालय, महामंडळे, एमएसईबी अशा विविध 65 आस्थापनांनी  प्रत्यक्ष उपस्थित राहून मुलाखती आयोजित केल्या होत्या. या मेळाव्यास उत्स्फूर्त प्रतिसाद मिळाला असून बारावी, पदवी, पदवीका उत्तीर्ण अशा जवळपास 645 उमेदवारांनी या मेळाव्यात नोंदणी केली. त्यापैकी 400 पेक्षा अधिक उमेदवाराना प्राथमिक निवड विविध आस्थापनावर करण्यात आली आहे.

 

कुशल व रोजगारक्षम महाराष्ट्र बनविण्यासाठी तसेच राज्यातील युवकांना त्यांच्या शिक्षणानंतर प्रत्यक्ष कामाचे प्रशिक्षण देवून त्यांना नोकरी मिळण्याची क्षमता वाढविण्यासाठी औद्योगिक प्रशिक्षण संस्थामध्ये मुख्यमंत्री युवा प्रशिक्षण कार्य मेळावा आयोजित करण्यात येत आहेत.

 

या मेळाव्यास कौशल्य रोजगार उद्योजकता व नाविण्यता विभागाच्या सहायक आयुक्त रेणूका तम्मलवार, जिल्हा व्यवसाय शिक्षण व प्रशिक्षण अधिकारी आर.बी.गणवीर, संस्थेचे प्राचार्य एस.व्ही सुर्यवंशी, उपप्राचार्य व्ही.डी. कंदलवाड यांची उपस्थिती होती. या मेळाव्याचे समन्वयक म्हणून गटनिदेशक शेख जी.जी यांनी काम पाहीले. तर  सूत्रसंचालन एस.एम. राका यांनी केले. मेळावा यशस्वी करण्यासाठी संस्थेचे गटनिदेशक के.टी. दासवाड, व्ही.पी. भोसीकर, आर.ई. काबंळे, एस.एम.खानजोडे तसेच राष्ट्रीय सेवा योजनेचे कार्यक्रमाधिकारी एम.जी.कलंबरकर व सर्व शिल्पनिदेशकांनी परिश्रम घेतले.

00000

वृत्त क्र. 870

माजी सैनिकांना शंकरराव चव्हाण शासकीय रुग्णालयात नौकरीची संधी

नांदेड दि. 27 सप्टेंबर : माजी सैनिक महामंडळ (मेस्को) महाराष्ट्र शासनामार्फत कै. शंकरराव चव्हाण शासकीय रुग्णालय, विष्णुपूरी नांदेड येथील रुग्णालय व आस्थापनेसाठी सुरक्षा सुपरवायझर, सुरक्षागार्ड पुरुष, सुरक्षागार्ड महिला यांच्या जागा भरावयाच्या आहेत.

माजी सैनिक, माजी सैनिक पाल्य व माजी सैनिक विधवा यांच्यातून कंत्राटी पध्दतीने  पदे भरण्यात येणार आहे. तरी  जिल्ह्यातील पात्रताधारक माजी सैनिक, पाल्य व माजी सैनिक विधवा यांनी तात्काळ कै. शं.च. शासकीय रुग्णालयातील माजी सैनिक महामंडळाचे कार्यालयात सुरक्षा अधिकारी/सुपरवायझर यांच्याशी मोबाईल  क्रमांक 7378593708 वर संपर्क करावा, असे आवाहन मेस्को अधिकारी विश्वास लक्ष्मण यांनी केले आहे.

00000

मुख्यमंत्री योजनादूत’; अर्ज करण्यास ३० सप्टेंबर पर्यंत मुदतवाढ

 मुंबई, दि. २७  : शासनाच्या विविध योजनांची सर्वसामान्य नागरिकांना माहिती देण्यासाठी  मुख्यमंत्री योजनादूत उपक्रम सुरु करण्यात आला आहे. या योजनेला मिळणारा प्रतिसाद पाहता मुदतवाढ देण्यात आली असून आता इच्छुक उमेदवारांना ३० सप्टेंबर २०२४ पर्यंत नोंदणी अर्ज करता येणार आहे. इच्छुक उमेदवारांनी www.mahayojanadoot.org या संकेतस्थळावर अर्ज करावा, असे आवाहन माहिती व जनसंपर्क महासंचालनालयामार्फत करण्यात आले आहे.

 

मुख्यमंत्री योजनादूत उपक्रमासाठी केलेला ऑनलाईन अर्ज, आधार कार्ड, पदवी उत्तीर्ण असल्याबाबतची पुराव्यादाखल कागदपत्रे / प्रमाणपत्र इ., अधिवासाचा दाखला. (सक्षम यंत्रणेने दिलेला), उमेदवाराकडे आधार जोडणी असलेल्या बँक खात्याचा पुरावा, पासपोर्ट आकाराचा फोटो, हमीपत्र (ऑनलाईन अर्जासोबतच्या नमुन्यामधील) नियुक्तीवेळी सादर करणे आवश्यक आहे. दि. ३० सप्टेंबर २०२४ पर्यंत इच्छुक उमेदवारांना www.mahayojanadoot.org या संकेतस्थळावर नोंदणी करता येईल. योजनादूत पोर्टलवर ज्या उमेदवारांनी नोंदणी केली आहे अशा उमेदवारांनी Apply बटन दाबून अर्ज Submit करायला विसरू नये. तरच नोंदणीची प्रक्रिया पूर्ण होणार आहे.

0000

 वृत्त क्र. 869 

बेरोजगार युवक-युवतींना 50 लाखापर्यंतच्या

उद्योग उभारणीसाठी 35 टक्क्यांपर्यंत अनुदान 

 

·        मुख्यमंत्री रोजगार निर्मिती कार्यक्रमाचा नांदेड जिल्ह्यातील युवकांनी लाभ घेण्याचे आवाहन

नांदेड दि. 26 सप्टेंबर : मुख्यमंत्री रोजगार निर्मिती कार्यक्रमांतर्गत जिल्ह्यातील युवक-युवतींना शासनामार्फत 50 लाखापर्यंतच्या उद्योग उभारणीसाठी 35 टक्क्यांपर्यंत शासकीय अनुदान योजना मिळणार आहे. या योजनेचा जिल्ह्यातील जास्तीत-जास्त पात्र व होतकरू सुशिक्षित बेराजगार युवक-युवतींनी लाभ घ्यावा, असे आवाहन जिल्हा उद्योग केंद्राचे महाव्यवस्थापक अमोल इंगळे यांनी केले आहे. 

ही योजना ऑनलाईन पद्धतीने राबविण्यात येते. या योजनेसाठी https://maha-cmegp.gov.in संकेतस्थळ असून योजनेच्या पात्रतेसाठी अर्जदार हा सर्वसाधारण प्रवर्गात 18-45 वर्षे व राखीव प्रवर्गासाठी 18-50 वर्षे असावे लागेल. अर्जदारास आवश्यक कागदपत्रांमध्ये, पासपोर्ट साईज फोटो, आधारकार्ड, शाळा सोडल्याचा दाखला, शैक्षणिक पात्रता प्रमाणपत्र, आवश्यकतेप्रमाणे जात प्रमाणपत्र, ग्रामीण भागाकरिता लोकसंख्येचा दाखला इत्यादी वेबसाईटवर अपलोड करावी लागतील. या योजनेतंर्गत अर्जदारांना उत्पादन व्यवसाय जसे बेकरी, मसाले, पापड उद्योग, पशुखाद्यनिर्मिती, सिलाई मशिनद्वारे कापड निर्मिती, फॅब्रीकेशन व सेवा उद्योग जसे वैद्यकीय सेवा, हॉटेल, खानावळ, ब्युटीपार्लर, सलूनसाठी अर्ज करता येईल. 

महाराष्ट्र शासनामार्फत राज्यातील शहरी व ग्रामीण युवक-युवतींची वाढती संख्या तसेच उद्योग व्यवसाय क्षेत्रात, इतर विविध क्षेत्रात उपलब्ध होत असलेल्या स्वयंरोजगार व रोजगाराच्या नवीन संधी विचारात घेवून उद्योजकतेला चालना देणारी सर्व समावेशक "मुख्यमंत्री रोजगार निर्मिती कार्यक्रम" ही महत्वाकांक्षी योजना सन 2019 पासून राज्यात राबविली जात आहे. या योजनेची अमलबजावणी जिल्हास्तरावरुन जिल्हा उद्योग केंद्र कार्यालयामार्फत व महाराष्ट्र राज्य खादी ग्रामोद्योग मंडळामार्फत राबविण्यात येते. 

नांदेड जिल्हयातील बेरोजगार युवक-युवतींना नवीन व्यवसाय सुरु करावयाचा आहे तसेच व्यवसायात वाढ करावयाची आहे त्यांनी ऑनलाईन वेबसाईटवर अर्ज करावा किंवा योजनेबाबत सविस्तर माहिती घेण्यासाठी, जिल्हा उद्योग केंद्र उद्योग भवन पहिला मजला सहकारी औद्योगिक वसाहत शिवाजीनगर नांदेड येथे कार्यालयीन कामाच्या दिवशी प्रत्यक्ष भेट द्यावी. ही योजना राबविण्यासाठी या कार्यालयाकडून कोणत्याही खाजगी व्यक्तीची नेमणूक केलेली नाही व त्रयस्थ, मध्यस्थ व्यक्तींकडून आपली फसवणूक होणार नाही याची दक्षता घ्यावी, असेही आवाहन जिल्हा उद्योग केंद्रामार्फत केले आहे.

00000

 वृत्त क्र. 868 

खरीप हंगामातील कापूस, सोयाबीन उत्पादक

शेतकऱ्यांनी अर्थसहाय्यासाठी ई-केवायसी करावी    

 

नांदेड दि. 25 सप्टेंबर : राज्यातील ज्या कापुस व सोयाबीन उत्पादक शेतकऱ्यांनी सन 2023 च्या खरीप हंगामामध्ये ई-पीक ॲप/ पोर्टलद्वारे कापूस व सोयाबीन लागवडीची नोंद केली आहे असे नोंदणीकृत शेतकरीच अर्थसहाय्याकरीता पात्र लाभार्थीं शेतकऱ्यांना 0.20 हेक्टर पेक्षा कमी क्षेत्रासाठी सरसकट रुपये 1 हजार तर 0.20 हेक्टर पेक्षा जास्त क्षेत्रासाठी त्यांच्या क्षेत्रानुसार प्रती हेक्टर 5 हजार रुपये (2 हेक्टरच्या मर्यादेत) अर्थसहाय्य देण्यात येणार आहे. शेतकऱ्यांनी 27 सप्टेंबर पर्यंत 100 टक्के ई-केवायसी प्रक्रिया  करावी, असे आवाहन करण्यात आले आहे.

 

शेतकऱ्यांकडून प्राप्त झालेले संमतीपत्र व नाहरकत पत्र तालुका कृषी अधिकारी कार्यालयामार्फत संकलित करून शासनाने महाआयटीकडून तयार केलेल्या scagridbt.mahaitgov.in या वेबपोर्टलवर माहिती भरली जात आहे. त्या करिता कोणत्याही मध्यस्थांच्या सहभागाशिवाय आर्थिक सहाय्य योजना पात्र लाभार्थ्यांपर्यंत त्यांच्या आधार-सीड बँक खात्यांपर्यंत पोहोचते याची खात्री करण्यासाठी राज्याने ई-केवायसी प्रक्रिया सुरू केली. त्याकरिता शेतकऱ्यांनी नजीकच्या सेतू सुविधा केंद्रावर जाऊन आपले ई-केवायसी पक्रिया पुर्ण करून घ्यावे. केवायसी यशस्वीरित्या पूर्ण केल्यावरच एक वेळ अनुदान वितरणासाठी शेतकरी पात्र ठरतील. शेतकऱ्यांनी 27 सप्टेंबर 2024 पर्यंत 100 टक्के ई-केवायसी प्रक्रिया  करावी. लवकरच अर्थसहाय्य वितरीत करावयाचे अपेक्षित आहे. अधिक माहितीसाठी गावचे कृषी सहाय्यक, कृषी पर्यवेक्षक, मंडळ कृषी अधिकारी किंवा तालुका कृषी अधिकारी कार्यालयास संपर्क करावा, असे आवाहन जिल्हा अधिक्षक कृषि अधिकारी भाऊसाहेब बऱ्हाटे यांनी जिल्ह्यातील शेतकरी बांधवाना केले आहे.

0000

वृत्त क्र. 867

मुख्यमंत्री युवा कार्य प्रशिक्षण मेळाव्याचे 30 सप्टेंबरपर्यंत

जिल्ह्यातील सर्व शासकीय औद्योगिक प्रशिक्षण संस्थामध्ये आयोजन

नांदेड दि. 25 सप्टेंबर :- मुख्यमंत्री युवा कार्य प्रशिक्षण योजनेअंतर्गत जिल्ह्यातील सर्व शासकीय औद्योगिक प्रशिक्षण संस्थामध्ये 24 ते 30 सप्टेंबर 2024 या कालावधीत मेळाव्याचे आयोजन करण्यात आले आहे. या मेळाव्यात सहभागी होण्यासाठी जिल्ह्यातील युवक-युवकांनी जवळच्या शासकीय औद्योगिक प्रशिक्षण संस्थेत संपर्क साधावा, असे आवाहन कौशल्य रोजगार व उद्योजकता विभागाच्या सहाय्यक आयुक्त रेणूका तम्मलवार केले आहे.

या मेळाव्यात सर्व शासकीय /निमशासकीय आस्थापना व सहकारी संस्था, औद्योगिक आस्थापना, लाभार्थी उमेदवार यांचा सहभाग असणार आहे. कार्य प्रशिक्षण इंटर्नशिप कालावधी सहा महिण्याचा राहील. मुख्यमंत्री युवा कार्य प्रशिक्षण योजनेत 12 वी पास युवकांना 6 हजार, आयटीआय पदविका 8 हजार, पदवीधर, पदव्युत्तर  विद्यार्थ्यांना 10 हजार रुपये विद्यावेतन मिळणार आहे.

मुख्यमंत्री युवा कार्य प्रशिक्षण योजनेचे स्वरुप

मुख्यमंत्री युवार कार्य प्रशिक्षण योजनेसाठी 5 हजार 500 कोटीची तरतुद, उमेदवाराचे वय 18 ते 35 या वयोगटातील असावे, शासकीय, निमशासकीय कार्यालये, महामंडळे व विविध क्षेत्रातील प्रकल्प उद्योग, स्टार्टअप्स आस्थापनांनी आवश्यक मनुष्यबळाची मागणी ऑनलाईन नोंदविणे गरजेचे आहे. कार्य प्रशिक्षण इंटर्नशिप कालावधी सहा महिण्याचा राहील. उमेदवारांना प्रशिक्षण कालावधीत 12 वी उत्तीर्ण 6 हजार रुपये, आयटीआय व पदविका उत्तीर्ण 8 हजार रुपये, पदवीधर आणि पदव्युत्तर उत्तीर्ण 10 हजार रुपये दरमहा विद्यावेतन मिळणार आहे. उद्योग क्षेत्रात प्रत्यक्ष कार्य प्रशिक्षणाद्वारे इंटर्नशिप उमेदवारांना रोजगारक्षम करुन उद्योगासाठी मनुष्यबळ तयार करणार. प्रत्येक आर्थिक वर्षात 10 लाख कार्य प्रशिक्षण इंटर्नशिपच्या संधी उपलब्ध होणार आहेत. याबाबत अधिक माहितीसाठी कौशल्य रोजगार व उद्योजकता केंद्राच्या 02462-251674 किंवा 9860725448 व nandedrojgar01@gmail.com वर संपर्क साधावा, असेही प्रसिद्धीपत्रकाद्वारे कळविली आहे.

00000

वृत्त क्र. 866

डॉ. शंकरराव चव्हाण शासकीय वैद्यकीय महाविद्यालयात ‘तंबाखू प्रतिबंधक केंद्र’चा शुभारंभ 

नांदेड दि. 25 सप्टेंबर : भारत सरकारच्या आरोग्य व कुटुंब कल्याण मंत्रालय व राष्ट्रीय आयुर्विज्ञान आयोग, नवी दिल्ली यांच्या निर्देशानुसार भारतातील सर्व शासकीय वैद्यकीय महाविद्यालयात ‘तंबाखू प्रतिबंधक केंद्र’ (TOBACCO CESSASION CENTER )  चा शुभारंभ केंद्रीय मंत्री जे. पी. नड्डा आणि केंद्रीय राज्यमंत्री  प्रतापराव जाधव यांच्या शुभहस्ते दूरदर्शी प्रणालीद्वारे करण्यात आला. 

त्याअनुषंगाने डॉ. शंकरराव चव्हान शासकीय वैद्यकीय महाविद्यालय व रुग्णालय, विष्णुपुरी, नांदेड येथील दंतरोगशास्त्र बाह्यरुग्ण विभागात TCC केंद्राची  (ओ पी डी क्र. 126-A) अधिष्ठाता डॉ. सुधीर देशमुख आणि इतर सर्व विभाग प्रमुखांच्या उपस्थित सुरुवात करण्यात आली. तंबाखू व तंबाखूजन्य पदार्थाच्या सेवनामुळे सध्या भारतातील युवा पिढी दुर्धर आजाराच्या विळख्यात अडकत चालली आहे. सध्यस्थितीत दरवर्षी जगात 80 लाख मृत्यू तर भारतात 13.5 लाख मृत्यू हे केवळ तंबाखूजन्य पदार्थाच्या सेवनामुळे होतात. ही मोठी सामाजिक समस्या बनली असून याचे दुष्परिणाम केवळ रुग्णापुरते मर्यादित नसून संपूर्ण कुटुंबावर परिणाम होत आहेत. त्यामुळे युवा पिढीला या व्यसनाच्या विळख्यातून बाहेर काढण्यासाठी TCC च्या माध्यमातून तज्ञ मार्गदर्शन, समुपदेशन आणि जनजागृती करण्यासाठी केंद्रीय मंत्री, आरोग्य व कुटुंब कल्याण, भारत सरकार, जे.पी. नड्डा यांच्या पुढाकाराने या अभियानाच्या दुसऱ्या टप्प्याचा शुभारंभ करण्यात आला.  

प्रतिबंधात्मक उपाय म्हणून शालेय तसेच महाविद्यालयीन तरुणांमध्ये जनजागृती होणे गरजेचे आहे. तंबाखूजन्य पदार्थाचे सेवन हे विष प्राशन करण्यासारखे असून तंबाखू रुपी विषाची परीक्षा कुणीही करू नये असे आवाहन अधिष्ठाता डॉ. सुधीर देशमुख यांनी केले.  हे महाविद्यालय व रुग्णालय परिसर तंबाखू मुक्त करण्याचा संकल्प  देखील त्यांनी केला.  कार्यक्रमाच्या प्रास्ताविक पर भाषणात बोलताना दंतरोग तज्ञ डॉ. अरुण नागरिक यांनी तंबाखू सेवनामुळे होणारे आजार, दुष्परिणाम, आणि सामाजिक व आर्थिक दुष्परिणाम यावर प्रकाश टाकला. 

या कार्यक्रमासाठी दंतरोग शास्त्र विभागाच्या विभाग प्रमुख डॉ. भावना भगत,  जन औषधवैद्यकशास्त्र विभागाचे विभागप्रमुख डॉ. इस्माईल इनामदार, सहयोगी प्राध्यापक डॉ. रामभाऊ गाडेकर, नर्सिंग महाविद्यालयाचे प्राचार्य  बालाजी नगराळे, TCC प्रमुख डॉ. सुशील येमले, डॉ. अनुराधा राऊत व इतर अधिकारी, कर्मचारी, आंतरवासिता विद्यार्थी, नर्सिंग विद्यार्थी, रुग्ण व नातेवाईक मोठ्या संख्येने उपस्थित होते. या कार्यक्रमाचे सुत्रसंचालन समाजसेवा अधीक्षक गजानन वानखेडे तर आभार अर्जुन राठोड यांनी मानले. कार्यक्रमाच्या यशस्वीतेसाठी सर्व निवासी डॉक्टर्स आणि समाजसेवा अधीक्षक संतोष मुंगल, राजरत्न केळकर, दंत तंत्रज्ञ कल्याण कुंडीकर आदींनी परिश्रम घेतले.

00000

 वृत्त क्र. 865

मुख्यमंत्री युवा प्रशिक्षण मेळाव्याचे

अर्धापूर औद्योगिक प्रशिक्षण संस्थेत 27 सप्टेंबर रोजी आयोजन 

नांदेड दि. 25 सप्टेंबर : कुशल व रोजगारक्षम महाराष्ट्र बनवण्यासाठी तसेच राज्यातील युवकांना त्यांच्या शिक्षणानंतर प्रत्यक्ष कामाचे प्रशिक्षण देवून त्यांना नौकरी मिळण्याची क्षमता वाढवण्यासाठी मुख्यमंत्री युवा प्रशिक्षण मेळावा औद्योगिक प्रशिक्षण संस्था अर्धापूर येथे  27 सप्टेंबर 2024 रोजी सकाळी 11 वा. आयोजित करण्यात आला आहे. पात्र उमेदवारांनी या मेळाव्याचा लाभ घ्यावा, असे आवाहन अर्धापूर औद्योगिक प्रशिक्षण संस्थेचे प्राचार्य विश्वंभर कंदलवाड यांनी केले आहे. 

औद्योगिक प्रशिक्षण संस्था अर्धापूर येथे  मुख्यमंत्री युवा कार्य प्रशिक्षण योजनेअंतर्ग भरती मेळाव्याचे आयोजन केले असून शासकीय, निमशासकीय व खाजगी आस्थापनामध्ये एकूण 100 जागेची मागणी आलेली आहे. तरी परिसरातील 18 ते 35 वयोगटातील 12 वी, आयटीआय, पदवी, पदविका, डीएड, बीएड उत्तीर्ण विद्यार्थ्यांनी 27 सप्टेंबर रोजी सकाळी 11 वाजता शासकीय औद्योगिक प्रशिक्षण संस्था (आयटीआय) म्हाडा कॉलनी जवळ, अर्धापूर जि. नांदेड येथे मुळ कागदपत्रासह उपस्थित राहावे असे अर्धापूर आयटीआयचे प्राचार्य विश्वंभर कंदलवाड यांनी कळविले आहे. अधिक माहितीसाठी गटनिदेशक डी.एन.मोरे यांचा संपर्क क्रमांक 9404738738442 वर संपर्क साधावा .

 00000

  वृत्त क्र. 864

29 सप्टेंबर रोजी शौर्य दिनाचे आयोजन

नांदेड दि. 25 सप्टेंबर :- जिल्हा सैनिक कल्याण कार्यालय, नांदेड येथे 29 सप्टेंबर 2024 रोजी सकाळी 11 वाजता शौर्य दिवस साजरा करण्यात येणार आहे. तरी सर्व माजी सैनिक तसेच शहीद जवानांचे नातेवाईक व समाजातील देशभक्त यांनी या कार्यक्रमास उपस्थित राहावे. अधिक माहितीसाठी कल्याण संघटक यांचा मोबाईल क्रमांक 8698738998/8707608283 यांच्याशी संपर्क साधावा, असे आवाहन जिल्हा सैनिक कल्याण अधिकारी नांदेड यांनी कळविले आहे.

देशभरात 29 सप्टेंबर हा दिवस शौर्य दिवस म्हणून साजरा केला जातो. 29 सप्टेंबर 2016 रोजी भारतीय सैन्य दलाने उरी सेक्टर मधील अतिरेकी भ्याड हल्ल्याचा बदला म्हणून पाकिस्तान हद्दीत घुसून सर्जिकल स्ट्राईक द्वारे अतिरेक्यांचा खात्मा केला. भारतीय सैन्याची ही अभिमानस्पद कामगिरी राज्यातील जनतेपर्यत व्यापक प्रमाणात पोहोचविण्यासाठी तसेच जनतेस देश भक्तीची ज्वाला मोठया प्रमाणात जागविण्यासाठी दरवर्षी 29 सप्टेंबर रोजी माजी सैनिकांचा सन्मान करुन शौर्य दिवस साजरा करण्यात येतो.

00000

  वृत्त क्र. 863

शेतकरी गटांसाठी प्रत्येक तालुक्यात सूक्ष्म प्रक्रिया उद्योग  

- मुख्य कार्यकारी अधिकारी मीनल करणवाल

नांदेड दि. 25 सप्टेंबर :- जिल्ह्यामध्ये सोयाबीन, तुर, मुग, उडीद, हरभरा, हळद, केळी, कापूस इत्यादी प्रमुख पिके आहेत. कच्च्या मालाचे पक्क्या मालात रूपांतर करून पीक मूल्य साखळी विकसित करणे या उद्देशाने शेतकरी उत्पादक कंपनी/ शेतकरी गट/ महिला बचतगट यांच्या माध्यमातून जिल्हा परिषद कृषी विभाग उपकर योजनेच्या अर्थसाहयातून जिल्ह्यातील प्रत्येक तालुक्यात सूक्ष्म प्रक्रिया उद्योगाची उभारणी करीत असल्याची माहिती जिल्हा परिषदेच्या मुख्य कार्यकारी अधिकारी मीनल करनवाल यांनी दिली.

या योजनेच्या माध्यमातून शेतकरी गटांना उद्योग उभारणी करून गटाचे विस्तारीकरण  करणे, बळकटीकरण करणे, रोजगार निर्मिती करणे हा या योजनेचा उद्देश आहे. ही योजना मुख्य कार्यकारी अधिकारी मीनल करनवाल यांच्या संकल्पनेतून राबविण्यात येत आहे.    

जिल्ह्यामध्ये दाल मिल उद्योग, ऑइल मिल, उद्योग, मसाला उद्योग, चिप्स उद्योग, दुग्धजन्य पदार्थ उद्योग, प्राथमिक प्रक्रिया उद्योग इत्यादी सूक्ष्म प्रक्रिया उद्योग उभारणी करण्यात येणार आहे. या योजनेमध्ये प्रत्येक तालुक्यातून पुढील बचतगटांची निवड झालेली आहे. या बचतगटांना जिल्हा परिषदेमार्फत पूर्व संमती देऊन उभारणी करण्यास प्रोत्साहन देण्यात येत आहे .सदर योजनेअंतर्गत शेतकरी गटांनी प्रक्रिया उद्योग उभारणी केल्यानंतर त्या  अनुषंगाने रक्कम रुपये 3 लाख किंवा  75 टक्के अनुदान मर्यादित अनुदान वितरित करण्यात येणार आहे.

या योजनेमध्ये पुढील बचतगटांची निवड झालेली आहे           

माहेर स्वयंसहाय्यता समूह गट जैतापूर तालुका नांदेड सूक्ष्म प्रक्रिया - पापड मशीन ,नमकीन मशीन या 

उद्योगाची उभारणी करण्यात येणार आहे.  अहिल्यादेवी होळकर शेतकरी बचत गट पिंपळकोठा तालुका मुदखेड सूक्ष्म प्रक्रिया उद्योग,-दुग्धजन्य पदार्थ तयार करणे. कै. गिरीश भाऊ  गोरठेकर पुरुष बचत गट गोरठा तालुका उमरी दाल - मिल प्रक्रिया उद्योग उभारणी करण्यात येणार आहे.जेठालाल महाराज महिला सेंद्रिय  शेतकरी बचत गट रूपा नाईक तांडा तालुका माहूर दाल मिल प्रक्रिया उद्योग.  रानी झलकारी महिला बचत गट पोटा बुद्रुक तालुका हिमायतनगर- दाल मिल शेलार मशीन प्रक्रिया उद्योग. संत सावतामाळी महिला बचत गट काठेवाडी देगलूर - मसाले प्रक्रिया उद्योग कृषी उन्नती शेतकरी  गट लोणी बुद्रुक तालुका अर्धापूर - चिप्स उद्योग, ज्योतिर्लिंग फार्मर प्रोडूसर कंपनी सापती तालुका हदगाव - मल्टीग्रेन डीस्टोन मशीन प्रक्रिया उद्योग. ग्रीन ओझोन ऍग्रो प्रोडूसर कंपनी लोणावळा बुद्रुक तालुका मुखेड - तेल घाना भुईमूग फोडणी यंत्र प्रक्रिया उद्योग. शिवानी महिला स्वयंसहाय्यता बचत गट हिप्परगा तालुका कंधार - पॅकिंग मशीन मसाला मशीन प्रक्रिया  उद्योग. अनुसया माता महिला बचत गट काजीपोड तालुका किनवट- दाल मिल प्रक्रिया उद्योग. साई समर्थ शेतकरी गट मांजरम तालुका नायगाव - दाल मिल प्रक्रिया उद्योग. जय भवानी महिला बचत गट चिंचाळा तालुका भोकर - दाल मिल प्रक्रिया उद्योग. धरणी शेतकरी उत्पादक गट जोमेगाव तालुका लोहा दाल मिल - ग्रेडिंग पॅकेज प्रक्रिया उद्योग.  अमृतालयाम शेतकरी उत्पादक कंपनी लिमिटेड बेळकोणी तालुका बिलोली - सोलार ड्रायर प्रक्रिया उद्योग. धर्माबाद ऍग्रो प्रोडूसर कंपनी लिमिटेड समराळा तालुका धर्माबाद - सेंद्रिय दाल प्रतवारी पॅकिंग मशीन, ग्रेडिंग स्वच्छता मशीन. याप्रमाणे नांदेड जिल्ह्यात 16 सूक्ष्म प्रक्रिया उद्योग उभारणी करण्यात येणार आहे.

00000

 वृत्त क्र. 862

उगम प्रमाणपत्राचा समावेश कृषी विक्रेत्याच्या परवान्यामध्ये आवश्यक

शेतकऱ्यांनी पक्की पावती घेवूनच किटकनाशकाची खरेदी करावी 

नांदेड दि. 25 सप्टेंबर :-  कंपनीच्या उगम प्रमाणपत्राचा समावेश परवान्यामध्ये नाही अशा कंपनीच्या किटकनाशकाची खरेदी व विक्री कृषी सेवा केंद्रधारकांनी करू नये. शेतकऱ्यांनी किटकनाशक खरेदी करते वेळेस पक्की पावती घेवून संबंधित कंपनीचे नाव कृषी विक्रेत्यांच्या परवान्यामध्ये असल्याची खात्री करून किटकनाशक खरेदी करावे, असे आवाहन कृषि विभागामार्फत करण्यात आले आहे. 

खरेदी व विक्री कृषी सेवा केंद्रधारकांनी ज्या किटकनाशकाची खरेदी कंपनी कडून करीत आहेत. त्या कंपनीचे उगम प्रमाणपत्र संबंधित घाऊक किटकनाशक विक्रेते यांनी परवान्यामध्ये समाविष्ठ करून खरेदी करावे. संबंधित घाऊक विक्रेते यांनी किटकनाशकाची विक्री करतांना खरेदी करणाऱ्या कृषी सेवा केंद्रधारकांच्या परवान्यामध्ये संबंधित कंपनीचे उगम प्रमाणपत्र समाविष्ट असल्याची खात्री करूनच किटकनाशकाची विक्री करावी. तसेच किरकोळ कृषी सेवा केंद्रधारकांनी त्यांना ज्या कंपनीच्या किटकनाशकांची खरेदी व विक्री करावयाची आहे अशा कंपनीच्या उगम प्रमाणपत्राचा समावेश त्यांच्या परवान्यात करावा असेही प्रसिध्दीपत्रकाद्वारे कळविले आहे.  

00000

 वृत्त क्र. 861

अधिकच्या नुकसान भरपाईसाठी दुसऱ्यांदा विमा कंपनीस पूर्वसूचना देण्याचे आवाहन

नांदेड दि. 25 सप्टेंबर :-  माहे सप्टेंबर महिन्यातील पहिल्या आठवडयात नांदेड जिल्ह्यात अतिवृष्टी झाली ही एक आपत्ती घटना मानली जाते. त्याअनुषंगाने यानंतर जर पुन्हा मोठा पाऊस किंवा अतिवृष्टी झाल्यास लाभार्थी पुन्हा विमा कंपनीस पूर्वसूचना देऊ शकतात. जेणेकरुन संबंधित लाभार्थ्यांना अधिकची नुकसान भरपाई नुकसानीच्या प्रमाणात मिळू शकते. त्यामुळे शेतकऱ्यांनी अधिकचे नुकसान भरपाई मिळण्यासाठी दुसऱ्यांदा पूर्वसूचना देण्याचे आवाहन कृषी विभागाने केले आहे.  

जर 25 टक्के पेक्षा पूर्वसूचना येत असतील तर अशा ठिकाणी लागू व्हायची नियमावली ही विमा कंपनीकडून बदलण्यात आलेली आहे. त्यानुसार नांदेड जिल्ह्यामध्ये जिल्हा समितीने 25 टक्के अग्रीम देण्यासाठी मध्यावधी नुकसान अर्थात मीड सीजन ॲडव्हर्सिटी अधिसूचना लागू केलेली आहे. त्यामुळे या कालावधीत झालेल्या नुकसानीचे वैयक्तीक पंचनामे हे वेगळे करण्याची आवश्यकता राहणार नाही. मात्र या सर्व शेतकऱ्यांना पीक कापणी प्रयोग आधारित नुकसान भरपाई लागू झाल्यास अदा केली जाईल.

00000

 वृत्त क्र. 860 

नांदेडमधील 169 आदिवासी गावांचा कायापालट होणार 

प्रधानमंत्री जनजातीय उन्नत ग्राम अभियानात समावेश 

नांदेड दि. 25 सप्टेंबर :दुर्गम अति दुर्गम भागात राहणाऱ्या आदिवासी बांधवांच्या सर्वांगीण विकासासाठी प्रधानमंत्री जनजातीय उन्नत ग्राम अभियानाला केंद्र सरकारने हिरवा कंदील दाखविला आहे. त्यामुळे देशातील ६३ हजार तर महाराष्ट्रातील ४ हजार ९७६ आदिवासी गावांचा कायापालट होणार आहे. यामध्ये नांदेडच्या १६९ गावांचा सहभाग आहे.

त्यामाध्यमातून राज्यामधील 32 जिल्ह्यातील 12 लाख 87 हजार ७०२ आदिवासी बांधवाचे सामाजिक आणि आर्थिक सक्षमीकरण केले जाणार आहे. या अभियानासाठी आवश्यक निधी केंद्र आणि राज्य सरकारकडून उपलब्ध होणार आहे. 

केंद्रीय अर्थमंत्री निर्मला सीतारामन यांनी सन २०२४-२५ च्या अर्थसंकल्पीय अधिवेशनात प्रधानमंत्री जनजातीय उन्नत ग्राम अभियानाची घोषणा केली होती. प्रधानमंत्री नरेंद्र मोदी यांच्या अध्यक्षतेखाली झालेल्या कॅबिनेट बैठकीत या अभियानाला मंजुरी देण्यात आली. या अभियानाचा शुभारंभ ऑक्टोबर महिन्याच्या पहिल्या आठवड्यात होण्याची शक्यता आहे. 'पीएम-जनमन' अभियानात १७ मंत्रालयांद्वारे राबवण्यात येणाऱ्या विविध २५ उपक्रमांचा समावेश असणार आहे. त्याद्वारे सामाजिक पायाभूत सुविधा, आरोग्य, शिक्षण, अजीविका यामधील तफावत भरून काढण्याचा प्रयत्न असणार आहे. तसेच आदिवासी क्षेत्र आणि समुदायांच्या सर्वांगीण आणि शाश्वत विकासावर भर दिला जाणार आहे. 

प्रधानमंत्री जनजातीय उन्नत ग्राम अभियानात सहभागी प्रत्येक मंत्रालयावर  पुढील 5 वर्षात निश्चित उद्दिष्टे साध्य करण्यासाठी अनुसूचित जमातींचा विकास कृती आराखडा तयार करून उपलब्ध निधीद्वारे त्यांच्याशी संबंधित योजना कालबद्ध पद्धतीने कार्यान्वित करण्याची जबाबदारी असणार आहे. 

दरम्यान, या अभियानांतर्गत समाविष्ट असलेली आदिवासी गावे पीएम गतिशक्ती पोर्टलवर संबंधित विभागाद्वारे त्याच्या योजनेतुन मॅप केल्या जातील. पोर्टलचे भौतिक आणि आर्थिक प्रगतीचे परीक्षण केले जाईल. सर्वोत्तम कामगिरी करणाऱ्या जिल्ह्यांना पुरस्कार देण्यात येणार आहे. 

या सुविधा मिळणार

पक्की घरे, ग्रामीण भागात रस्ते, प्रत्येक घरात शुद्ध पिण्याच्या पाण्याची सोय, सर्व घरांमध्ये वीज जोडणी, मोबाईल मेडिकल युनिटची स्थापना, आयुष्मान कार्ड, एलपीजी कनेक्शन, आदिवासी बहुउद्देशीय विपणन केंद्र, आश्रमशाळांच्या पायाभूत सुविधांमध्ये सुधारणा, सिकलसेल ॲनिमियाशी लढण्यासाठी केंद्राची निर्मिती, होम स्टे. 

जिल्हानिहाय गावांची संख्या

अहमदनगर- 118, अकोला- 43, अमरावती- 321, छत्रपती संभाजीनगर- 11, बीड- २, भंडारा- 14, बुलढाणा- 43, चंद्रपूर- 167, धुळे- 213, गडचिरोली- 411, गोंदिया- 104, हिंगोली- 81, जळगाव- 112, जालना- 25, कोल्हापूर- 1, लातूर- 2, नागपूर- 58, नांदेड- 169, नंदुरबार- 717, नाशिक- 767, उस्मानाबाद- 4, पालघर- 654, परभणी- 5, पुणे- 99, रायगड- 113, रत्नागिरी- 1, सातारा- 4, सोलापूर- 61, ठाणे- 146, वर्धा- 72, वाशीम- 71, यवतमाळ- 366.

0000