वृत्त क्र. 1158

नीती आयोगाच्या मूल्यांकनात #किनवट आकांक्षित तालुका राज्यातून चौथ्या क्रमांकावर तर देशातून 51 व्या क्रमांकावर

जिल्हाधिकारी, मुख्य कार्यकारी अधिकारी यांच्या प्रभावी अंमलबजावणीचे फलित

#नांदेड दि. 3 डिसेंबर : #नीती आयोगाच्या #आकांक्षित तालुका कार्यक्रमाअंतर्गत समावेशित देशभरातील 500 तालुक्यांचा चालू आर्थिक वर्षातील पहिल्या तिमाहीचा डेल्टा रँक नुकताच प्रकाशित झाला आहे. यात किनवट तालुक्याने राज्यातून चौथा क्रमांक पटकावला आहे, तर संपूर्ण देशातून 51 वा क्रमांक पटकावला आहे.

मागास तालुक्यांना विकसित करण्यासाठी व नागरिकांचे जीवनमान उंचावण्यासाठी केंद्र सरकारने नीती आयोगामार्फत आकांक्षित जिल्हा कार्यक्रमाच्या धर्तीवर आकांक्षित तालुका कार्यक्रम या महत्वाकांक्षी कार्यक्रमाची सुरुवात केली आहे. यात देशभरातील 500 तालुक्यांचा समावेश करण्यात आला. तर महाराष्ट्र राज्यातून 27 तालुक्यांचा यात समावेश असून त्यात नांदेड जिल्ह्यातील किनवट तालुक्याचा समावेश आहे.

या कार्यक्रमात आरोग्य, पोषण, शिक्षण, कृषी, मूलभूत पायाभूत सुविधा व सामाजिक विकास या 5 क्षेत्रातील 40 निर्देशकांचा समावेश करण्यात आलेला आहे. या मानकांच्या प्रगतीची माहिती दर तिमाहीला नीती आयोगामार्फत डेल्टा रँकिंगच्या माध्यमातून प्रकाशित करण्यात येते. जिल्हाधिकारी अभिजित राऊत, मुख्य कार्यकारी अधिकारी मिनल करनवाल, सहाय्यक जिल्हाधिकारी तथा प्रकल्प अधिकारी कावली मेघना यांच्या मार्गदर्शनाखाली किनवट तालुक्यात आकांक्षित तालुका कार्यक्रमाची प्रभावी अंमलबजावणी सुरु आहे आणि याचीच यशस्वीता म्हणजे चालू आर्थिक वर्षाच्या पहिल्या तिमाहीच्या डेल्टा रँकिंग मध्ये किनवट तालुक्याने प्रगतीकडे वाटचाल असल्याचे दाखवून दिले आहे.

आकांक्षित तालुका कार्यक्रमाअंतर्गत नीती आयोगाच्या निर्देशानुसार संकल्प सप्ताह, चिंतन शिबीर, संपूर्णता अभियान इ. महत्वपूर्ण उपक्रम राबविण्यात आले आहेत. तालुका विकास आराखडयानुसार टीबीमुक्त गाव, सुदृढ माता-सुदृढ बाळ, लढा रक्तक्षयाविरुद्ध, सुंदर माझा दवाखाना, उच्च रक्तदाब व मधुमेह संदर्भात तपासणी व उपचार, यशस्वी स्तनपानाच्या पद्धती आणि शिशु संरक्षणाच्या संदर्भाने जनजागृती, पोषण अभियान, पौष्टिक आहार मेळावा, किशोरी हितगुज मेळावा, मासिक पाळी व्यवस्थापनाबाबत जनजागृती, बालविवाह मुक्त भारत मोहिम, पोषण परसबाग निर्मिती, कुपोषणमुक्त गाव, विशेष गरजा असणाऱ्या बालकासाठी प्रत्येक शाळेवर प्रशिक्षित शिक्षक, शालेय परसबाग निर्मिती, मुलींसाठी स्वतंत्र स्वच्छतागृह, लोकसहभागातून शाळांचे संवर्धन, शाळा व्यवस्थापन समिती कार्यान्वित, गाव बाल संरक्षण समितीची बांधणी, मुलींना मोफत सायकलीचे वाटप, मृदा आरोग्य पत्रिका वितरण, शेतकरी उत्पादक कंपनीची स्थापना, लाळ खुरकत रोगाविरुद्ध जनावरांचे लसीकरण, जलसंधारण आणि जलसंवर्धनासाठी विविध योजनांचे अभिसरण, हर घर जल अंतर्गत नळाची जोडणी, सांडपाणी व घनकचरा व्यवस्थापन, बँकिंग टच पॉईंट्सची निर्मिती, प्रधानमंत्री डिजिटल साक्षरता अभियान, महिला स्वयंसहायता समुहाची बांधणी आणि फिरत्या निधीचे वितरण इत्यादी विविध उपक्रम राबविण्यात येत आहेत.

संकल्प #सप्ताह

3 ते 9 ऑक्टोंबर या कालावधीत तालुक्यात प्रत्येक दिवस एका विशिष्ट विकास विषयक संकल्पनेला समर्पित करून तालुक्याच्या विकासासाठी काम करण्याचा जणु संकल्पच करण्यात आला आणि पहिल्या 6 दिवसाच्या संकल्पनेमध्ये 'संपूर्ण आरोग्य', 'सुपोषित कुटुंब', 'स्वच्छता', `कृषी', 'शिक्षण' आणि 'समृद्धी दिवस' याबाबींचा समावेश होता तर शेवटच्या दिवशी संपूर्ण आठवडाभर लोकसहभागातून आयोजीत केलेल्या या कार्याचा संकल्प सप्ताह समारोह म्हणून साजरा करण्यात आला.

चिंतन शिबिर

आकांक्षित तालुका कार्यक्रमाची प्रभावी अंमलबजावणी करण्यासाठी आणि परिणामकरक तालुक्याच्या विकासाची योजना तयार करण्यासाठी गाव आणि तालुकास्तरावर चिंतन शिबीरांचे आयोजन करून तालुका विकास आराखडा तयार करण्यात आला.

संपूर्णता अभियान

संपूर्णता अभियानाच्या माध्यमातून आरोग्य, पोषण, कृषी आणि सामाजिक विकास या 4 क्षेत्रातील 6 निर्देशक 100 टक्के पूर्ण करण्यासाठी 3 जुलै ते 30 सप्टेंबर या 3 महिन्याच्या कालावधीत विशेष मोहिमेचे आयोजन करण्यात आले होते. या अभियानाचे उदघाटन जिल्हाधिकारी अभिजित राऊत यांच्या हस्ते करण्यात आले. संपूर्णता अभियानात 6 सुचकावर विशेष लक्ष केंद्रित करून सदर अभियान यशस्वीतेसाठी काम करण्यात आले.

यात प्रामुख्याने -

१. गरोदरपणात पहिल्या तिमाहीत प्रसूतीपूर्व काळजीसाठी नोंदणी केलेल्या गर्भवती महिलांची टक्केवारी ही 94 टक्केवारी वरून 97 टक्केवारी पर्यंत वाढविण्यात यश आले.

२. तालुक्यातील लक्षित लोकसंख्येच्या तुलनेत मधुमेहासाठी तपासणी केलेल्या व्यक्तींची टक्केवारी ही 85 वरून 100 टक्केपर्यंत पोहोचण्यात यश आले.

४. तालुक्यातील लक्षित लोकसंख्येच्या तुलनेत उच्च रक्तदाबासाठी तपासणी केलेल्या व्यक्तींची टक्केवारी ही 85 वरून 100 टक्केपर्यंत पोहोचण्यात यश आले.

३. बालविकास विभागाच्या पोषण आहार कार्यक्रमांतर्गत पूरक पोषण आहार घेणाऱ्या गर्भवती महिलांची टक्केवारी ही 100 टक्के कायम ठेवण्यात यश आले आहे.

५. चालू आर्थिक वर्षातील मृदा नमुना संकलन उद्दिष्टाच्या तुलनेत तयार करण्यात आलेल्या मृदा आरोग्य पत्रिकेची टक्केवारी 00 टक्के वरून 100 टक्के पूर्ण करण्यात आली आहे.

६. तालुक्यातील एकूण महिला स्वयंसहायता समूहाच्या तुलनेत फिरता निधी मिळालेल्या गटांची टक्केवारी ही 35 टक्के वरून 45 टक्के पर्यंत पोहोचन्यात यश आले.

नीती आयोगामार्फत सुरु करण्यात आलेल्या या कार्यक्रमाच्या प्रभावी अंमलबजावणीसाठी जिल्हाधिकारी अभिजित राऊत, जिल्हा परिषदेच्या मुख्य कार्यकारी अधिकारी मिनल करनवाल हे सातत्याने आढावा घेऊन मार्गदर्शन करत आहेत. ज्यामुळे तालुकास्तरावरील प्रगतीचा वेग वेगवान करण्यासाठी संबंधित शासनाचे सर्व विभाग आणि विविध विकास भागीदारासोबत काम करून तालुक्याच्या स्थितीत सुधारणा करण्यात येत आहे. जिल्हास्तरावर जिल्हा नियोजन अधिकारी तर तालुकास्तरावर गट विकास अधिकारी हे कार्यक्रमाचे नोडल अधिकारी म्हणून काम पाहत आहेत. कार्यक्रमाच्या यशस्वीतेसाठी तालुकास्तरावरील सर्व विभागप्रमुख आणि या कार्यक्रमासाठी कार्यक्रम समन्वयक म्हणून नियुक्त असलेले आकांक्षित तालुका फेलो हे तालुका विकास आराखडा राबविण्यासाठी महत्वपूर्ण भूमिका बजावत आहेत.

नीती आयोगाच्या मूल्यांकनातुन

हा डेल्टा रँकिंगमध्ये राज्यातून पहिल्या क्रमांकावर कारंजा वर्धा, दुसऱ्या क्रमांकावर चिखलदरा अमरावती, तिसऱ्या क्रमांकावर तळोदा नंदुरबार, चौथ्या क्रमांकावर किनवट नांदेड आणि पाचव्या क्रमांकावर नवापूर नंदुरबार ने स्थान पटकावंले आहे.

जिल्हाधिकारी अभिजीत राऊत यांनी व्यक्त केला आनंद

आकांक्षित तालुका कार्यक्रम हा देशाच्या सर्वात दुर्लक्षित आणि मागासलेल्या तालुक्यांमध्ये सर्व समावेशक आणि शाश्वत विकास साधण्यासाठी नीती आयोगामार्फत सुरु केलेला हा एक महत्वाकांक्षी कार्यक्रम आहे. या कार्यक्रमात आरोग्य, पोषण, शिक्षण, कृषी व संबंधित सेवा, मूलभूत पायाभूत सुविधा आणि सामाजिक विकास या 5 क्षेत्रांतर्गत 40 निर्देशकांचा समावेश असून या निर्देशकांच्या संपुर्णतेसाठी किनवट तालुक्याची वाटचाल ही प्रगतीच्या दिशेने सुरु आहे याबाबत जिल्हाधिकारी अभिजीत राऊत यांनी आनंद व्यक्त केला.

०००००

वृत्त क्र. 1157

शेतकरी ओळख क्रमांकासाठी जिल्ह्यात 16 डिसेंबरपासून मोहीम शेतकऱ्यांना योजनांचा लाभ सुलभरितीने मिळण्यासाठी ॲग्रिस्टॅक योजना

• मोहिमेच्या दिवशी उपस्थित राहून शेतकऱ्यांनी ओळख क्रमांक प्राप्त करुन घ्यावा

नांदेड दि. 3 डिसेंबर : कृषि क्षेत्रात डिजीटल सेवांचा वापर करुन शासनाच्या विविध योजनांचा जलदगतीने व परिणामकारकरित्या लाभ देणे सुलभ व्हावे यासाठी राज्यात ॲग्रिस्टॅक योजना राबविण्यात येत आहे. या योजनेअंतर्गत प्रत्येक गावात सर्व शेतकऱ्यांचे #शेतकरी ओळख क्रमांक (फार्मर आयडी) तयार करण्यात येत आहेत. नांदेड जिल्ह्यात यासाठी 16 डिसेंबरपासून मोहिम राबविण्यात येत आहे. जिल्ह्यातील शेतकऱ्यांनी मोहिमेच्या दिवशी उपस्थित राहून आपला शेतकरी ओळख क्रमांक प्राप्त करुन घ्यावा, असे आवाहन जिल्हाधिकारी अभिजीत राऊत यांनी केले आहे.

शेतकरी ओळख क्रमांकामुळे शेतकऱ्यांना अपेक्षित फायदा होणार आहे. पीएम किसान योजनेअंतर्गत अनुदान प्राप्त करण्यासाठी आवश्यकतेच्या अटी पूर्ण करुन लाभ प्राप्त करण्यामध्ये सुलभता येणार आहे. यामुळे सर्व पात्र लाभार्थी समाविष्ट करुन घेण्यास सहाय्य मिळेल. पिकासाठी कर्ज मिळण्यासाठी किसान क्रेडिट कार्ड आणि कृषि इन्फ्रास्ट्रक्चर फंड व शेतीच्या विकासासाठी इतर कर्जे उपलब्ध करुन घेण्यात सुलभता राहील. पिक विमा तसेच आपत्ती व्यवस्थापना अंतर्गत शेतकऱ्यांचे देय नुकसान भरपाईसाठी सर्वेक्षण करण्यात सुलभता येईल, किमान आधारभूत किंमतीवर खरेदीमध्ये शेतकऱ्यांचे नोंदणीकरण ऑनलाईन पध्दतीने होऊ शकेल.

शेतकऱ्यासाठी कृषि कर्ज, वित्त, निविष्ठा आणि इतर सेवा देणाऱ्या यंत्रणाना कृषि सेवा सहजपणे उपलबध करुन देता येईल. विविध सरकारी योजनांचा लाभ , कृषि व संलग्न विभागांना शेतकऱ्यांचा व त्यांच्या शेतांचा आधार संलग्न माहिती संचच्या उपलब्ध आकडेवारीच्या आधारे योजनांचा लाभ वितरीत करण्यामध्ये सुलभता येणार आहे. तसेच लाभार्थ्याना वारंवार प्रमाणिकरणाची आवश्यकता राहणार नाही. शेतकऱ्यांना वेळेवर कृषि विषयक सल्ले, विविध संस्थाकडून संपर्क करण्याच्या संधीमध्ये वाढीसह नाविण्यपूर्ण कार्यक्रमांच्या विस्तार व प्रचारात सफलता प्राप्त होणार आहे.

तरी शेतकऱ्यांनी शासकीय योजनांचे लाभ प्राप्त करुन घेण्यासाठी आपल्या गावात मोहिमेच्या दिवशी शेतकरी ओळख क्रमांक प्राप्त करुन घ्यावा, असे आवाहन जिल्हा प्रशासनाने केले आहे.

०००००

#नांदेड

वृत्त क्र. 1156

जागतिक एड्स दिनानिमित्त रॅली संपन्न 

                                                                                                                                                               एड्स जनजागृतीसाठी 2 ते 9 डिसेंबरपर्यत विविध कार्यक्रमाचे आयोजन

                                                                                                                                                                      नांदेड, दि. २ डिसेंबर :-  जागतिक एड्स दिनानिमित 1 डिसेंबर 2024 रोजी महाराष्ट्र राज्य एड्स नियंत्रण सोसायटी मुंबई, जिल्हा एड्स प्रतिबंध व नियंत्रण विभाग नांदेड, श्री गरुगोबिंदसिंघजी स्मारक जिल्हा रुग्णालय, नांदेड अंतर्गत एचआयव्ही/एड्स जनजागृतीसाठी 02 डिसेंबर ते 09 डिसेंबर पर्यंत जिल्ह्यात विविध कार्यक्रम प्रस्तावित केले आहेत.

 यामध्ये सोशल मिडीयावरती एचआयव्ही/एड्सची माहिती व जनजागृती करणारे पोस्ट तयार करून व्हायरल करण्याकरिता पोस्ट तयार करण्याच्या स्पर्धेचे आयोजन 02 डिसेंबर ते 09 डिसेंबर पर्यंत करण्यात आले आहे. याकरिता जिल्हास्तरावर प्रथम पारिताषिक 1500/- रू रोख, व्दितीय पारितोषिक 1000/-रू आणि तृतीय पारितोषिक 500/-रू रोख देण्यात येणार आहे. तालुकास्तरावर ग्रामीण रुग्णालय व उपजिल्हा रूग्णालयामार्फत विविध महाविद्यालयात प्रभातफेरी, रांगोळी स्पर्धा, पोस्टर तयार करणे इ. स्पर्धांचे आयोजन या सप्ताहात करण्यात येणार आहेत. यासप्ताहमध्ये सेवाभावी संस्था यांच्या मदतीने अतिजोखीम गटासाठी विशेष तपासणी शिबिर आयोजित केले जाणार आहे. एआरटी केंद्र विष्णुपुरी येथे 4 डिसेंबर  रोजी एचआयव्हीसह जगणाऱ्या मुलांसाठी रांगोळी स्पर्धेचे आयोजन करण्यात आले आहे. यासाठी जिल्हास्तरावर प्रथम पारिताषिक 1500/- रू रोख, व्दितीय पारितोषिक 1000/-रू आणि तृतीय पारितोषिक 500/-रू रोख देण्यात येणार आहे.

                                                                                                                                                                        जागतिक एड्स दिनानिमित मध्यवर्ती बसस्थानक, नांदेड येथे एचआयव्ही टेस्टींग शिबिर घेण्यात आले. आयसीटीसी केंद्र व सुरक्षा क्लिनिक यांच्या सहकार्याने जिल्ह्यात 250 गावांमध्ये एचआयव्ही/एड्स बद्दल जनजागृती व आयईसी वाटप करण्यात आले आहे. जिल्ह्यात 15 रेडरिब्बन क्लबमार्फत एचआयव्ही/एड्स जनजागृतीसाठी पथनाट्य, फ्लॅश मॉब आयोजन करण्यात येणार आहे अशी माहिती जिल्हा शल्य चिकित्सक डॉ. निळकंठ भोसीकर यांनी दिली.

यावेळी जिल्ह्यात एचआयव्ही बाधीत (पिएलएचआव्ही) 7 हजार 13 अॅक्टीव रुग्ण उपचार घेत आहेत. यामध्ये पुरुष 3 हजार 197, महिला 3 हजार 310 एमएसएम/टीएस / टीजी 22, बालक 484 आदींचा समावेश आहे. सर्व बाधीत रुग्णांवरती एआरटी सेंटर शासकिय वैद्यकिय महाविद्यालय नांदेड यांच्यामार्फत नियमित उपचार केले जातात. याशिवाय बाधित रुग्णांना दुर्धर आजाराचे प्रमाणपत्र, मोफत बस प्रवास, आधार कार्ड, राशन कार्ड, मतदान कार्ड आदी देणे, घरकुल, संजय गांधी निराधार योजना आदी सुविधांचा लाभ एनजीओ मार्फत देण्यात येतो. समाजामध्ये उपेक्षित समजल्या जाणाऱ्या किन्नर, एफएसडब्लु आदी घटकांना देखील मुख्य प्रवाहात आणण्यासाठी जिल्हा एड्स प्रतिबंध व नियंत्रण विभाग नांदेड व त्यांच्या अंर्तगत एनजीओ तर्फे विशेष प्रयत्न केले जातात.

                                                                                                                                                                        2 डिसेंबर 2024 रोजी जागतिक एड्स दिनानिमित  ‘योग्य अधिकाराचा मार्ग स्विकारा माझे आरोग्य माझा अधिकार’ या घोषवाक्या‌द्वारे आपण एचआयव्ही/एड्स विरूध्द जनजागृती करून एड्सचा धोका टाळु शकतो असे आवाहन जिल्हाधिकारी अभिजित राऊत यांनी केले आहे. 

जिल्हा आरोग्य अधिकारी यांनी यावर्षी गरोदर मातांची एचआयव्ही तपासणी पहिल्या तिमाहात करण्यासाठी विशेष शिबिरांचे आयोजन करण्याबाबत सर्व कर्मचाऱ्यांना आदेशित केले आहे. जेणेकरून जिल्ह्यातील गरोदर मातापासुन बाळाला होणारा एचआयव्हीचे प्रमाण शुन्यावर आणता येईल.

                                                                                                                                                                        2 डिसेंबर 2024 रोजी जागतिक एड्स दिना निमित श्री गुरुगोविदसिंगजी स्मारक रूग्णालय, नांदेड येथुन महाविर चौक-मुथाचौक-शिवाजी पुतळा यामार्गे प्रभातफेरीचे आयोजन करण्यात आले होते. श्री गुरुगोविदसिंगजी स्मारक रूग्णालय नांदेड येथील प्रांगणात एचआयव्ही/एड्स रूग्णांसोबत समानतेची वागणुकीबाबत सर्वांनी शपथ ग्रहण केली. तसेच उपस्थीतांना अल्पोपहार देवुन कार्यकमाची सांगता करण्यात आली. यावेळी  जिल्हाधिकारी अभिजित राऊत, जिल्हा शल्य चिकित्सक डॉ. निळकंठ भोसीकर, जिल्हा आरोग्य अधिकारी डॉ. संगीता देशमुख, विभाग प्रमुख सुक्ष्मजिवशास्त्र डॉ. संजय मोरे, अतिरिक्त जिल्हा शल्य चिकित्सक डॉ. संजय पेरके, निवासी वैद्यकिय अधिकारी डॉ. राजाभाऊ बुट्टे, डॉ. विद्या झिने , वरिष्ठ वैद्यकिय अधिकारी डॉ. शिवाजी जाधव, जिल्हा कार्यकम अधिकारी डॉ. कुलदिप अंकुशे, विविध सेवाभावी संस्थेचे पदाधिकारी, आयसिटीसीचे कर्मचारी, सुरक्षा क्लिनिक येथील कर्मचारी, विविध महाविद्यालयातील एनएसएस प्रमुख व विद्यार्थी यांची प्रमुख उपस्थीती होती.

०००००

वृत्त क्र. 1155

जिल्ह्यात जमावबंदी, शस्त्रबंदी आदेश लागू 

                                                                                                                                                                            नांदेड दि. 2 डिसेंबर :- नांदेड जिल्ह्यात 3 डिसेंबरचे सकाळी 6 वाजेपासून ते दिनांक 17 डिसेंबर 2024 च्या मध्यरात्री पर्यंत शस्त्रबंदी व जमावबंदी आदेश लागू राहणार आहे, अशी माहिती अपर जिल्हादंडाधिकारी कार्यालयाकडून देण्यात आली आहे.  

जिल्ह्यातील कायदा व सुव्यवस्था अबाधित रहावी म्हणून अपर जिल्हादंडाधिकारी यांनी महाराष्ट्र पोलीस अधिनियम 1951 चे कलम 37 (1) व (3) अन्वये जिल्ह्यात 3 डिसेंबरचे सकाळी 6 वाजेपासून ते दिनांक 17 डिसेंबर 2024 च्या मध्यरात्री पर्यंत शस्त्रबंदी व जमावबंदी आदेश लागू राहिल. त्यानुसार पाच किंवा पाचपेक्षा अधिक व्यक्तींनी या आदेशात नमुद असलेली कृत्ये सार्वजनिक परिसर किंवा त्याच्या जवळपास करण्यास बंदी घालण्यात आली आहे. हा आदेश कामावरील पोलीस अधिकारी, शासकीय कर्मचारी, विवाह, अंत्ययात्रा, धार्मिक कार्यक्रम, यात्रा व इतर सक्षम अधिकारी यांनी विशेषरित्या परवानगी दिलेल्या मिरवणुकांना लागू होणार नाही. 

अशा मिरवणुकांना परवानगी देण्याचे अधिकार तसेच पाच व पाचपेक्षा जास्त इसम जमण्यासाठी, सभा, मिरवणुका, मोर्चा काढणे, ध्वनीक्षेपक वाजविण्यास परवानगी देण्याचे अधिकार जिल्ह्यातील पोलीस ठाणे प्रभारी अधिकारी यांना तसेच पोलीस अधीक्षक नांदेड यांनी प्राधिकृत केलेल्या इतर पोलीस अधिकारी यांना राहतील.

00000

 ​वृत्त क्र. 1154

भारतरत्न डॉ. बाबासाहेब आंबेडकर स्वाधार

योजनेसाठी नविन अर्ज करण्यासाठी 16 डिसेंबरपर्यत मुदतवाढ

                                                                                                                                                                                    नांदेड, दि. २ डिसेंबर :- भारतरत्न डॉ. बाबासाहेब आंबेडकर स्वाधार योजना सन 2024-25 साठी पात्र विद्यार्थ्यांना नविन अर्ज करण्यासाठी 16 डिसेंबर 2024 पर्यंत मुदतवाढ देण्यात आली आहे.  पात्र विद्यार्थ्यांनी http://hmos.mahait.org या संकेतस्थळावर 16 डिसेंबर 2024 पर्यत कार्यालयीन वेळेपर्यत ऑनलाईन भरलेला अर्ज भरल्यानंतर 2 दिवसांत अर्जाची 1 प्रिंट आवश्यक कागदपत्रासह सहाय्यक आयुक्त, समाज कल्याण कार्यालय, डॉ. बाबासाहेब आंबेडकर सामाजिक न्यायभवन, ग्यानमाता शाळेसमोर, नमस्कार चौक नांदेड येथे कार्यालयीन वेळेत स्वाधार विभागाकडे सादर  करावा, असे आवाहन समाज कल्याण कार्यालयाचे सहायक आयुक्त शिवानंद मिनगिरे यांनी केले आहे.

सामाजिक न्याय व विशेष सहाय्य विभागाकडुन अनुसूचित जाती व नवबौध्द घटकातील जे विद्यार्थी शासकीय वसतिगृहात प्रवेशास पात्र असुन प्रवेश मिळालेला नाही, अशा विद्यार्थ्यांना मॅट्रीकोत्तर शिक्षण घेता यावे यासाठी भारतरत्न डॉ. बाबासाहेब आंबेडकर स्वाधार योजना राबविण्यात येत आहे. यात भोजन, निवास व इतर शैक्षणिक सुविधा विद्यार्थ्यांना स्वत: उपलब्ध करुन घेण्यासाठी आवश्यक रक्कम संबंधीत अनुसूचित जाती व नवबौध्द घटकातील विद्यार्थ्यांच्या आधार संलग्न बँक खात्यामध्ये 13 जुन 2018 रोजीच्या शासन निर्णयानुसार थेट वितरीत करण्यात येते.

                                                                                                                                                                                   लाभाचे स्वरूप 

या योजने अंतर्गत अनुसूचित जाती व नवबौध्द घटकांतील विद्यार्थ्यांच्या आधार संलग्न बँक खात्यामध्ये पुढील प्रमाणे रक्कम थेट वितरीत करण्यात येणार आहे. या योजनेचा लाभ घेण्यासाठी निकष पुढीलप्रमाणे राहतील. या योजनेचा लाभ घेण्यासाठी नांदेड महानगरपालिका क्षेत्रामध्ये तसेच नांदेड महानगरपालिका हद्दीपासुन 5 कि.मी. परिसरात असलेली महाविद्यालये/शैक्षणिक संस्था याठिकाणी उच्च शिक्षण घेणाऱ्या विद्यार्थ्यांसाठी अनुज्ञेय रक्कम पुढीलप्रमाणे आहे. भोजन भत्ता 28 हजार रुपये, निवास भत्ता 15 हजार रुपये, निर्वाह भत्ता 8 हजार रुपये, प्रति विद्यार्थी एकुण देय रक्कम 51 हजार रुपये वरील रकमेव्यतिरिक्त वैद्यकीय व अभियांत्रिकी शाखेतील विद्यार्थ्यांसाठी प्रति वर्ष 5 हजार रुपये व अन्य शाखेतील विद्यार्थ्यांना प्रतिवर्ष २ हजार रुपये इतकी रक्कम शैक्षणिक साहित्यासाठी ठोक स्वरुपात देण्यात येईल. वरील एकुण देय रक्कमेतून भारत सरकार शिष्यवृत्ती अंतर्गत दिला जाणारा निर्वाह भत्ता कपात करण्यात येईल.                       

                                                                                                                                                                                      या योजनेचा लाभ घेण्यासाठी निकष

विद्यार्थी अनुसूचित जाती व नवबौध्द घटकातील असावा, विद्यार्थी महाराष्ट्राचा रहीवासी असावा, शासकीय वस्तीगृहात प्रवेशासाठी पात्र असलेल्या अभ्यासक्रमास विद्यार्थ्याने प्रवेश घेतलेला असावा, विद्यार्यागृने नांदेड जिल्ह्यातील सामाजिक न्याय विभागाच्या कोणत्याही शासकीय वसतीगृहात प्रवेशासाठी  (केवळ प्रथम वर्षात प्रवेशित असलेल्या) विद्यार्थ्यानी अर्ज करणे आवश्यक आहे. परंतु शासकीय वसतीगृहात प्रवेश मिळालेला नसावा, विद्यार्थ्यास इयत्ता 10,11,12 वी तसेच पदवी, पदविकामध्ये किमान 50 टक्के पेक्षा जास्त गुण असणे अनिवार्य आहे. या योजनेमध्ये दिव्यांग (अनुसूचित जाती व नवबौध्द घटकातील) विद्यार्थ्यासाठी  3 टक्के आरक्षण असेल व गुणवत्तेची मर्यादा 40 टक्के असेल, विद्यार्थ्याच्या पालकांचे उत्पन्न 2.50  लाखापेक्षा जास्त नसावे, विद्यार्थ्याने ज्या महाविद्यालयात प्रवेश घेतला आहे तेथील स्थानिक रहीवासी नसावा, या योजनेचा लाभ घेण्यासाठी नांदेड महानगरपालिका क्षेत्रामध्ये असलेली महाविद्यालये तसेच नांदेड महापालिका हद्दीपासून 05 किमी परिसरात असलेली महाविद्यालये यामध्ये शिक्षण घेत असलेल्या महाविद्यालयातील विद्यार्थ्यानीच अर्ज करावा. विद्यार्थ्याने ज्या अभ्यासक्रमास प्रवेश घेतला आहे तो अभ्यासक्रम हा 02 वर्षापेक्षा कमी कालावधीचा नसावा, विद्यार्थ्याची महाविद्यालयातील उपस्थिती 75  टक्के पेक्षा जास्त असणे बंधनकारक असेल, विद्यार्थ्याची निवड विद्यार्थ्यांच्या गुणवत्तेच्या आधारावर करण्यात येईल, या योजनेसाठी खासबाब सवलत लागू राहणार नाही, तसेच या प्रणालीमध्ये आपल्या महाविद्यालय महानगर पालिकेच्या हद्दीपासून 5 किमी च्या आत असल्याबाबतचे प्रमाणपत्र जोडणे आवश्यक आहे. 

                                                                                                                                                                                    सूचना

विद्यार्थ्याने खोटी माहिती अथवा कागदपत्रे देवून लाभ घेण्याचा प्रयत्न केल्यास किंवा शैक्षणिक अभ्यासक्रम पूर्ण न केल्यास अथवा नोकरी व व्यवसाय करत असल्यास आणि इतर मार्गाने या योजनेचा लाभ घेवून गैरवापर केल्याचे निदर्शनास आल्यास तो कार्यवाहीस पात्र राहील. तसेच त्यास दिलेल्या रक्कमेची 12 टक्के व्याजासह वसुली करण्यात येईल.

तसेच अपूर्ण भरलेले, आवश्यक कागदपत्र सादर न केलेले अर्ज रद्द समजण्यात येतील व अपात्र, त्रुटी असलेल्या विद्यार्थ्यांना वेगळे कळविण्यात येणार नाही यांची नोंद घ्यावी, असेही समाज कल्याण कार्यालयाने प्रसिध्दीपत्रकाद्वारे कळविले आहे. 

00000

 वृत्त क्र. 1153

निवडणुका पारदर्शीतेत पार पाडण्यात माध्यमांचे सहकार्य : जिल्हाधिकारी 

 जिल्हाधिकाऱ्यांनी माध्यमांचे मानले आभार  

नांदेड दि. 2 डिसेंबर : निवडणूक प्रक्रियेच्या प्रत्येक टप्प्यावर माध्यमांनी सहकार्य केले, त्यामुळे निवडणुकीचे कार्य अधिक पारदर्शितेत पार पाडणे शक्य झाल्याचे प्रतिपादन जिल्हाधिकारी अभिजीत राऊत यांनी केले आहे. 

जिल्हाधिकारी कार्यालयामार्फत निवडणुकीनंतर पत्रकारांसोबत  शासकीय विश्रामगृहात रविवारी अनौपचारिक कार्यक्रमाचे आयोजन करण्यात आले होते.यावेळी जिल्हाधिकारी अभिजीत राऊत बोलत होते. 

व्यासपीठावर यावेळी निवासी उपजिल्हाधिकारी महेश वडदकर, विभागीय अधीस्वीकृती समितीचे अध्यक्ष तथा जेष्ठ पत्रकार विजय जोशी, जिल्हा मराठी पत्रकार संघाचे अध्यक्ष गोवर्धन बियाणी,ज्येष्ठ पत्रकार शंतनू डोईफोडे,म.अब्दूल सत्तार आरेफ,केशव घोणसे पाटील, प्रिंट इलेक्ट्रॉनिक्स व समाज माध्यमांच्या  प्रतिनिधीची उपस्थिती होती. 

यावेळी माध्यमांशी अनौपचारिक गप्पा करताना त्यांनी गेल्या वर्षभरापासून यंत्रणा निवडणुकीच्या संदर्भातील कामांमध्ये व्यस्त असल्याचे स्पष्ट केले.मात्र यावेळी नांदेडच्या प्रिंट, इलेक्ट्रॉनिक आणि सोशल मीडियाने निवडणूक कार्यामध्ये उत्तम प्रसिद्धी दिली. त्यामुळे शासनाने सामान्य जनता यामध्ये निवडणुकीची पारदर्शकता आणखी उठून दिसली. विशेषतः नांदेडमध्ये लोकसभा आणि विधानसभा निवडणूक एकत्रित असताना निवडणुकी संदर्भातील प्रत्येक गोष्ट आम्ही माध्यमाला सांगितली. कोणतीही गोष्ट बाजूला ठेवली नाही. लपवून ठेवली नाही. त्यामुळे पारदर्शतेने जनतेपुढे आमचेही कार्य आले. त्यासाठी माध्यमांचे आम्ही आभारी आहोत ,असे कौतुक त्यांनी यावेळी केले. 

दोन्ही निवडणुका एकत्रित असल्यामुळे काही ठिकाणी मतदानाची प्रक्रिया खूप वेळेपर्यंत चालली.सहा वाजेपर्यंत मतदान केंद्रावर उपस्थित असणाऱ्या प्रत्येक मतदाराचे मत घेता आले. त्या संदर्भातील सर्व व्हिडिओ फुटेज आमच्याकडे उपलब्ध आहेत. त्यामुळे आम्हाला याबाबत योग्य तो खुलासा करता आला. 

 पुन्हा मतमोजणी मागण्याची संधी 

 निवडणूक मतमोजणी संपल्यानंतर 45 दिवसांनंतर C and V ही तपासणी न्यायालयीन प्रकरणाच्या अधीन राहून केली जाते. मतमोजणीतील द्वितीय व तृतीय स्थानावरील उमेदवारांना ठराविक EVM बाबत शंका असेल ते उमेदवार प्रत्येक ईव्हीएम साठी 47 हजार दोनशे रुपये भरून चेकिंग वेरिफिकेशन करू शकतात. यात डमी मतदानाद्वारे मशिनची तपासणी केली जाते. तसेच दुसरा पर्याय म्हणजे न्यायालयाकडे दाद मागू शकतात. 

 राजकीय पक्षाचा सहभाग 

विशेष म्हणजे मतदान प्रक्रिया, मतमोजणी प्रक्रिया, प्रशासन डोळ्यात तेल घालून करत असते. प्रत्येक टप्प्यावर राजकीय पक्षांना प्रशासन सहभागी करून घेते. मशीनचे वाटप असो, मशीन लावणे असो, मशीन मतमोजणीला घेणे असो, राजकीय प्रतिनिधीचा सहभाग असतो. एवढेच नाही तर प्रत्येक मतदान केंद्रावर सुरुवातीला मॉक पोल घेतले जाते. या ठिकाणी प्रत्येक उमेदवाराला दोन मते दिली जातात. ही प्रक्रिया देखील मतदान प्रतिनिधींच्या उपस्थितीत केली जाते. आपल्या जिल्ह्यामध्ये मतदानाच्या टक्केवारी वाढल्याबद्दल फारशा नकारात्मक बातम्या आल्या नाही. कारण मतमोजणीत महत्त्वपूर्ण असणाऱ्या सतरा सी या अर्जातील आकडे आणि मशीन वरील आकडे यामध्ये कुठेही तफावत राहिली नाही. तसेच वेळोवेळी माध्यमांना माहिती तात्काळ उपलब्ध करण्यात आली. कुठे? का? वेळ झाला याचे खुलासेही जिल्हा प्रशासनाने लगेच दिले.

 एका मताचा फरक नाही 

तसेच लोकसभा व विधानसभा निवडणूक एकत्रित होत असताना 75 मशीनमध्ये झालेल्या मतदानाची आणि व्हीव्हीपॅट मधील चिठ्ठ्यांची रँडम जुळवणी केली आहे. एकाही ठिकाणी एकाही मताचा फरक नाही. पूर्णतः ताळमेळ जुळलेला आहे. त्यामुळे कुठेही शंकेला वाव नसल्याचेही त्यांनी सांगितले.

२९ विभागाचे सातत्यपूर्ण कार्य  

यावेळी विशेषतः मीडिया कक्षाने सतत 45 दिवस या निवडणुकीत केलेल्या सातत्यपूर्ण कामकाजाचे कौतुक केले. तसेच निवडणुकांमध्ये जवळपास 29 विभाग विविध पातळीवर काम करत होते. दररोज नवीन काम व ठरल्याप्रमाणे काम असे कामाचे स्वरूप होते. प्रत्येक कामाचे वेळापत्रक निवडणुकीत ठरले राहते. ते त्याच दिवशी करावे लागते. तथापि, प्रत्येकाने मन लावून काम केल्यामुळे लोकसभा व विधानसभा निवडणूक शांततेत पार पडली. विशेषतः स्वीप अभियान राबविणारे अधिकारी कर्मचारी तपासणी, छापे घालणाऱ्या पथकातील कर्मचारी, सायबर सेल ते बंदोबस्तासाठी कार्यरत पोलीस प्रशासन, जिल्ह्यापासून तर तालुक्यापर्यंत काम करणारे महसूल कर्मचारी, गावागावातील कोतवाल, तलाठी यांच्यापर्यंत सर्वांच्या ज्या ठिकाणी त्यांची भूमिका असेल त्या त्या ठिकाणी अतिशय उत्तम रीतीने काम केल्याबद्दल त्यांनी जिल्ह्यातील सर्व कर्मचाऱ्यांचे आभार मानले.

 माध्यमांच्या सकारात्मकतेचे कौतुक 

तसेच माध्यमांनी सकारात्मकतेने यासर्व बाबीचे वृत्तांकन केल्याबद्दल त्यांचेही आभार व्यक्त केले. दिलेले वृत्त वेळेत प्रसिद्धीस दिले. काही  खुलासे लगेच  प्रसिद्ध केले. मतदार लोकप्रतिनिधी यांच्यासाठी निवडणूक काळामध्ये वेगवेगळ्या सूचना वेळोवेळी द्याव्या लागतात. अशावेळी प्रशासन माध्यमांवर अवलंबून असते. जनजागृती पासून तर वेगवेगळ्या सूचनांना वेळेत प्रसिद्धी दिल्याबद्दल जिल्हाधिकाऱ्यांनी माध्यमांचे आभार मानले. 

यावेळी निवासी उपजिल्हाधिकारी महेश वडदकर यांनी पत्रकारांसोबत या स्नेह निमंत्रण कार्यक्रमाच्या आयोजनाबद्दल माहिती दिली. 

पत्रकार विजय जोशी, शंतनु डोईफोडे, म. अब्दूल सत्तार आरेफ, डॉ. दिलीप शिंदे, श्रीनिवास भोसले, राम तरटे, किशोर वागदरीकर यांनी आपल्या संबोधनात प्रशासनाचे आभार मानले. तसेच गतिशील पद्धतीने माहिती दिल्याबद्दल जिल्हा माहिती कार्यालयाच्या यंत्रणेची व मीडिया पक्षाचे स्वागत केले. 

विश्राम गृहात झालेल्या या कार्यक्रमाच्या आयोजनासाठी नायब तहसीलदार मकरंद दिवाकर यांच्यासह जिल्हा माहिती कार्यालयाच्या कर्मचाऱ्यांनी परिश्रम घेतले. यावेळी प्राथमिक स्वरूपात काही माध्यम प्रतिनिधींचा सत्कार करण्यात आला.

०००००

​वृत्त क्र. 1152

​जिल्हास्तरीय युवा महोत्सवास उत्साहात सुरुवात 

नांदेड, दि. १ डिसेंबर:- क्रीडा व युवक सेवा संचालनालय, महाराष्ट्र राज्य पुणे अंतर्गत जिल्हा क्रीडा अधिकारी कार्यालय, नांदेड, राष्ट्रीय सेवा योजना विद्यापीठ व युवा अधिकारी, नेहरु युवा केंद्र, नांदेड यांच्या संयुक्त विद्यमाने जिल्हास्तरीय युवा महोत्सवाचे आयोजन 01-02 डिसेंबर,2024  या कालावधीत मंच क्रं.01- जिल्हा क्रीडा संकुल, बास्केटबॉल मैदान, नांदेड,  मंच क्रं. 02- डॉ.शंकरराव चव्हाण प्रेक्षागृह, स्टेडियम परिसर, नांदेड व  मंच क्रं.03- जिल्हा क्रीडा संकुल, इनडोअर हॉल, नांदेड,  या ठिकाणी करण्यात आले.

या जिल्हास्तरीय युवा महोत्सवाचे उदघाटन आज 01 डिसेंबर,2024 रोजी सकाळी 11 वा. जिल्हा क्रीडा अधिकारी जयकुमार टेंभरे यांचे हस्ते करण्यात आले. याप्रसंगी प्रमुख पाहुणे म्हणून श्रीमती सान्वी जेठवाणी (राज्य निवडणुक दुत,भारत सरकार), श्रीमती चंदा रावळकर (युवा अधिकारी, नेहरु युवा केंद्र, नांदेड), मा.श्रीमती कविता जोशी (जिल्हा समन्वयक,सी.सी.आर.टी न्यु दिल्ली) व्यासपीठावर संजय बेतीवार (क्रीडा अधिकारी), बालाजी शिरसीकर (राज्य क्रीडा मार्गदर्शक तथा कार्यासन), चंद्रप्रकाश होनवडजकर (राज्य क्रीडा मार्गदर्शक), राहुल श्रीरामवार (क्रीडा अधिकारी), विपुल दापके (क्रीडा अधिकारी), संतोष कनकावार (वरिष्ठ लिपीक) आदी मान्यवर उपस्थित होते.

जिल्हा क्रीडा अधिकारी जयकुमार टेंभरे यांनी आपल्या अध्यक्षीय भाषणात युवा महोत्सव म्हणजे युवकाना आपल्या मधील कलागुण दाखविण्याचे एक खुले व्यासपीठ असुन  या मध्ये युवकांचा सर्वागिण विकास करणे, देशाची संस्कृती व परपंरा जतन करणे, राष्ट्रीय एकात्मता वाढिस लावणे, युवकाना तृणधान्याचे महत्त्व पटवुन देणे, शिक्षण, उद्योग व्यवसाय, या सोबतच शेती या व्यवसायाशी युवकाची ओळख करून देणे, सामाजिक विकासात विज्ञानाचे महत्त्व युवकाना पटवुन देणे इत्यादी बाबीवर युवा महोत्सव साजरा करण्यात येत आहे. तसेच यामध्ये प्राविण्य प्राप्त करणारे स्पर्धक हे लातूर येथे संपन्न होणा-या विभागीय युवा महोत्सवात सहभागी होणार आहे. तसेच राज्यस्तरीय युवा महोत्सव आयोजनाचे यजनाम पद नांदेड जिल्हयास मिळालेले असल्यामूळे नांदेड जिल्हयातील जास्त-जास्त स्पर्धक सहभागी होण्याबाबत शुभेच्छा दिल्या.

या युवा महोत्सवामध्ये 1) सांस्कृतिक कला प्रकार:- समुह लोकनृत्य, लोकगीत 2) कौशल्य विकास:- कथालेखन, चित्रकला, वक्तृत्व स्पर्धा (इंग्रजी व हिंदी), कविता (500 शब्द मर्यादा  सहभाग संख्या 01), 3) संकल्पना आधारीत स्पर्धा:- विज्ञान व तंत्रज्ञान यामधील नवसंकल्पना (Innovation in science and Technology) 4) युथ आयकॉन:- युथ ऑयकान जिल्हयातुन युवक कल्याण क्षेत्रात तसेच युवांना प्रभावित कार्य केलेल्या 15 ते 29 वयोगटातील 5 युवांना विभागीयस्तरावर सहभागी होता येणार आहे.

उदघाटन  प्रसंगी श्रीमती सान्वी जेठवाणी (राज्य निवडणूक दुत,भारत सरकार) यांनी विद्यार्थ्यांच्या सुप्त गुणांना वाव मिळावा त्यांचे कलागुण विकसित व्हावेत यासाठी शासनाने हे व्यासपीठ उपलब्ध करुन दिलेले आहे. त्याचा स्पर्धकांनी उपयोग करुन घ्यावा. त्याचबरोबर मनोरंजनाबरोबरच स्पर्धकांनी खेळाकडे वळावे याबाबत मार्गदर्शन केले.

या जिल्हास्तरीय युवा महोत्सवाकरीता श्रीमती सान्वी जेठवाणी यांचेबरोबरच विविध कलाप्रकाराचे परिक्षक म्हणुन संदीप काळे, डॉ. पांचाळ पांडुरंग, डॉ.संदीप देवुळगांवकर, डॉ.मनिष देशपांडे, डॉ.शिवराज शिंदे, डॉ.आनंद आष्टुरकर, डॉ.संभाजी मनुरकर, डॉ.बालाजी पेनूरकर, श्रीमती कविता जोशी, आदी परीक्षक म्हणुन नियुक्ती करण्यात आली आहे.

कार्यक्रमाचे प्रस्तावीक बालाजी शिरसीकर यांनी केले तर सुत्र संचलन डॉ. पांचाळ पांडुरंग यांनी केले.

​हा कार्यक्रम पार पाडण्यासाठी कार्यालयातील संजय चव्हाण, आनंद जोंधळे, हनमंत नरवाडे, आकाश भोरे, मोहन पवार, सुभाष धोंगडे, इक्रम शेख, चंद्रकांत गव्हाणे, विद्यानंद भालेराव, यश कांबळे आदी परिश्रम घेत आहेत.

या युवा महोत्सवाचा नांदेड जिल्हयातील रसिकांनी लाभ घ्यावा, असे जिल्हा क्रीडा अधिकारी,नांदेड यांनी कळविले आहे.

०००००