लम्पी रोग प्रतिबंध व नियंत्रणासाठी जिल्हा प्रशासन सज्ज - जिल्हादंडाधिकारी खुशालसिंह परदेशी

लम्पी रोग प्रतिबंध व नियंत्रणासाठी जिल्हा प्रशासन सज्ज

-         जिल्हादंडाधिकारी खुशालसिंह परदेशी

 

§  पशुपालकांनी घाबरुन न जाता सूचविलेल्या उपाययोजनावर भर द्यावा

 

नांदेड (जिमाका) दि. 15 :- लम्पी साथरोगाचा शिरकाव जिल्ह्यातील नायगाव, देगलूर, नांदेड तालुक्यातील काही गावात झाला आहे. जिल्हा प्रशासनाने योग्य त्या उपाययोजना व साथरोगावर नियंत्रण आणण्यासाठी मुबलक प्रमाणात लसीची मात्रा व जनजागृतीवर भर दिला आहे. पशुपालकांनी घाबरुन न जाता बाधा झालेल्या जनावरांना गोठयापासून दूर ठेवणे, गोठा स्वच्छ ठेवणे यावर भर देण्यास सांगितले आहे. प्रत्येक ग्रामपंचायत पातळीवर पशूसंवर्धन विभाग लक्ष ठेवून असल्याचे जिल्हाधिकारी तथा जिल्हादंडाधिकारी, आपत्ती व्यवस्थापन प्राधिकरणाचे अध्यक्ष खुशालसिंह परदेशी यांनी कळविले आहे.

जिल्ह्यातील नायगांव तालुक्यातील मौजे कुंचली, देगलूर तालुक्यातील देगलूर शहर, नांदेड तालुक्यातील नांदेड शहर, गुंडेगांव, वडगांव, बोंढार तर्फे हवेली या गावातील पशुधनामध्ये लम्पी स्कीन आजार लागण झाल्याचे आढळून आले आहे. जिल्ह्यातील लम्पी स्कीन आजार लागण झालेली ही ठिकाणे बाधित क्षेत्र म्हणून घोषित केले आहे. जिल्ह्यात लम्पी रोग प्रतिबंध व नियंत्रणासाठी आपत्ती व्यवस्थापन प्राधिकरणातर्फे पुढीलप्रमाणे मार्गदर्शन सूचना निर्गमित केल्या आहेत.

लम्पी रोग प्रादुर्भावाच्या ठिकाणापासून 5 कि. मी. त्रिज्येचा परिसर सतर्कता क्षेत्र म्हणून घोषित करीत आहे. या परिसरातील गावांमध्ये बाधित जनावरे वगळता इतर जनावरांना प्रतिबंधात्मक लसीकरण करावे. साथीच्या काळात बाधित भागातील जनावरे व मानवाचा निरोगी भागात प्रवेश प्रतिबंधित करण्यात येत आहे. तसेच बाधीत गावांमध्ये बाधित जनावरांच्या पिण्याच्या पाण्यासाठी व चराईसाठी पशुपालकांनी स्वतंत्र व्यवस्था करावी. रोग प्रादुर्भावग्रस्त क्षेत्रामध्ये गाई व म्हशींना स्वतंत्र ठेवणे, बाधित व अबाधित जनावरांना वेगळे बांधणे तसेच या रोगाने ग्रस्त पशुधनाचा मृत्यु झाल्यास मृतदेहाची शास्त्रीय पध्दतीने पशुपालकांनी विल्हेवाट लावावी. बाधित परिसरामध्ये स्वच्छता व निर्जंतूक द्रावणाची फवारणी करुन निर्जंतूकीकरण करावे. रोग प्रसारास कारणीभूत असलेल्या डास, माशा, गोचिड इत्यादीच्या नियंत्रणासाठी औषधांची फवारणी करावी. लम्पी स्कीन रोगाचा प्रादुर्भाव व प्रसार थांबविण्यासाठी नांदेड जिल्ह्यातील सर्व ग्रामपंचायती, नगरपरिषद, नगरपंचायत व महानगरपालिका यांचेमार्फत त्यांच्या कार्यक्षेत्रातील भटक्या पशुधनाचे नियमित निरीक्षण करण्यात यावे. बाधित पशुधनाची काळजी घ्यावी. कायद्याशी सुसंगत कृती न करणाऱ्या आणि कायद्याच्या अंमलबजावणीमध्ये अडथळा निर्माण करणाऱ्या पशुपालक व्यक्ती, संस्था, प्रतिनिधी यांच्या विरुध्द नियमानुसार गुन्हा दाखल करण्यात येईल. सर्व खाजगी पदवीधारकांनी/पशुपालकांनी लम्पी स्कीन रोगाची माहिती शासकीय पशुवैद्यकीय संस्थेस देणे बंधनकारक राहील. लम्पी स्कीन रोगाचा उपचार पशुधन विकास अधिकारी किंवा त्यांच्या मार्गदर्शनानुसारच करण्यात यावा. खाजगी पदवीधारकांनी लम्पी स्कीन आजाराचा परस्पर उपचार केल्यास कायदेशीर कार्यवाही करण्यात येईल. जिल्ह्यातील सर्व पशुवैद्यकिय संस्थानी लम्पी स्कीन रोगाच्या उपचारासाठी आवश्यक सर्व औषधे वरिष्ठांशी चर्चा करुन उपलब्ध करुन घ्याव्यात, असेही प्रसिध्दपत्रकाद्वारे कळविले आहे.

00000  

वृत्त क्र. 852

 विशेष गौरव पुरस्कारासाठी

माजी सैनिकांना अर्ज करण्याचे आवाहन 

नांदेड (जिमाका) दि. 14 :- सैनिक कल्याण विभागाच्यावतीने माजी सैनिक / विधवा व त्यांच्या पाल्यांसाठी असलेल्या विशेष गौरव पुरस्कारासाठी रविवार 18 सप्टेंबर 2022 पर्यंत अर्ज मागविण्यात आले आहेत. राष्ट्रीय व आंतरराष्ट्रीय पातळीवर खेळातील पुरस्कार प्राप्त खेळाडू, साहित्य संगीत, गायन, वादन, नर्तन, इत्यादी क्षेत्रातील पुरस्कार विजेते, यशस्वी उद्योजकांचा पुरस्कार मिळविणारे, संगणक क्षेत्रात अतिउत्कृष्ट कामगिरी करणारे तसेच देश / राज्याची प्रतिष्ठा वाढवतील अशा स्वरूपाचे लक्षणीय काम करणाऱ्या माजी सैनिक / पत्नी / पाल्य इत्यादींना विशेष गौरव पुरस्कार आर्थिक स्वरूपात देण्यात येतो. 

राष्ट्रीय पातळीवर कामगिरीसाठी 10 हजार रुपये तर आंतरराष्ट्रीय पातळीसाठी 25 हजार रूपयांचा पुरस्कार, शाल श्रीफळ व सन्मानचिन्ह आणि प्रशस्तीपत्र देण्याची तरतूद माजी सैनिकांसाठी असलेल्या कल्याणकारी निधीमध्ये आहे. इयत्ता दहावी, बारावी परीक्षामध्ये 90 टक्के पेक्षा जास्त गुण मिळवून विभागात पहिल्या पाच मुलांमधून येणाऱ्या पाल्यासांठी व पदवी व पदव्युत्तरमध्ये विद्यापीठात सर्वप्रथम येणाऱ्या माजी सैनिक / विधवा यांच्या पाल्याना एक रक्कमी गौरव पुरस्कार 10 हजार रुपयासाठी अर्ज मागविण्यात येत आहे. जिल्हयातील सर्व पात्र माजी सैनिकांनी या पुरस्कारासाठी अर्ज करावेत. अधिक माहितीसाठी जिल्हा सैनिक कल्याण कार्यालय नांदेड येथे संपर्क करावा असे, आवाहन जिल्हा सैनिक कल्याण अधिकारी, नांदेड यांनी केले आहे.

00000

 वृत्त क्र.  850 

उद्योग केंद्रातील विविध योजनेबाबत

मार्गदर्शन सत्राचे आयोजन

 

नांदेड (जिमाका) दि. 13 :- जिल्ह्यातील बेरोजगार उमेदवार / युवक व युवतींसाठी जिल्हा उद्योग केंद्रातील विविध योजनेबाबत जिल्हा कौशल्य विकास रोजगार व उद्योजकता केंद्राच्यावतीने गुरुवार 15 सप्टेंबर रोजी सकाळी 12 वा. मार्गदर्शन सत्राचे आयोजन केले आहे. शेप स्किल अकॅडमी, नृसिंह मंदिराजवळ कौठा रोड, कौठा, नांदेड येथे जिल्हा उद्योग केंद्राचे लेखापरिक्षक बालाजी जायभाये हे मार्गदर्शन करणार आहेत. जिल्ह्यातील युवक व युवतीनी या मार्गदर्शन सत्राचा लाभ घ्यावा. अधिक माहितीसाठी 02462-251674 क्रमांकावर संपर्क साधावा, असे आवाहन जिल्हा कौशल्य विकास रोजगार व उद्योजकता मार्गदर्शन केंद्राच्या सहाय्यक आयुक्त रेणूका तम्मलवार यांनी केले आहे.

00000 

 गोजातीय प्रजातीचे गुरे, म्हशींच्या बाजारास मनाई

-जिल्हादंडाधिकारी यांचे आदेश

·        जनावरांच्या खरेदी विक्रीसाठीचे सर्व बाजार बंद राहणार

नांदेड (जिमाका) दि. 12 :- लम्पी चर्मरोगाचा वाढता प्रादुर्भाव लक्षात घेता जिल्ह्यात लम्पी चर्मरोगावर नियंत्रण, प्रतिबंध, निर्मुलन करण्यासाठी जिल्हा प्रशासनाने युद्धपातळीवर नियोजन केले आहे. याअनुषंगाने गोजातीय प्रजातीची सर्व गुरे व म्हशी यांची कोणत्याही ठिकाणाहून ने-आण करणे, बाजार भरविणे, प्राण्यांच्या शर्यती लावणे, प्राण्यांच्या जत्रा भरविणे, प्रदर्शन भरविणे किंवा प्राण्यांना एकत्र आणून कार्यक्रम करण्यास प्रतिबंध आदेश जिल्हाधिकारी तथा जिल्हादंडाधिकारी जिल्हा आपत्ती व्यवस्थापन प्राधिकरण खुशालसिंह परदेश यांनी निर्गमित केले आहेत.

 

लम्पी चर्मरोगाच्याबाबत नांदेड जिल्हा नियंत्रित क्षेत्र म्हणून घोषित केले आहे. गोजातीय प्रजातीची सर्व गुरे व म्हशी यांची ज्या ठिकाणी ते पाळले (ठेवले) जातात त्या ठिकाणापासून नियंत्रित किंवा त्या क्षेत्राबाहेरील अन्य कोणत्याही ठिकाणी ने-आण करण्यास मनाई करण्यात आली आहे.

 

गोजातीय प्रजातीची बाधित असलेली कोणतीही जिवंत किंवा मृत गुरे व म्हशी, गोजातीय प्रजातीची कोणत्याही बाधित झालेल्या प्राण्यांच्या संपर्कात आलेली कोणत्याही प्रकारची वैरण, प्राण्यांच्या निवाऱ्यांसाठी असलेली गवत किंवा अन्य साहित्य आणि अशा प्राण्यांच्या शव, कातडी किंवा अन्य कोणताही भाग किंवा अशा प्राण्यांचे उत्पादन किंवा असे प्राणी नियमित क्षेत्राच्या बाहेर नेण्यासाठी कोणत्याही व्यक्तीस मनाई करत आहे.  गोजातीय प्रजातीचे गुरे व म्हशीचा कोणत्याही प्राणी बाजारास मनाई, प्राण्यांच्या  शर्यती लावणे, प्राण्याच्या जत्रा भरविणे, प्राण्यांचे प्रदर्शन आयोजित करणे आणि नियोजित क्षेत्रात गोजातीय प्रजातीच्या प्राण्यांच्या गट करुन किंवा त्यांना एकत्रित करुन कोणताही कार्यक्रम पार पाडणे यास मनाई करण्यात आली आहे.

 

नियमित क्षेत्रामधील बाजार पेठेत, जत्रेत, प्रदर्शनामध्ये किंवा प्राण्यांच्या अन्य जनावरांमध्ये किंवा कोणत्याही सार्वजनिक ठिकाणी गोजातीय प्रजाती प्राण्यांच्या बाधित झालेलया गुरांना व म्हशींना आणणे किंवा आणण्याचा प्रयत्न करण्यास मनाई करण्यात आली आहे. जनावरांच्या खरेदी विक्रीसाठी चे जिल्ह्यातील सर्व बाजार पुढील आदेश होईपर्यत बंद ठेवण्यात येणार आहेत. लम्पी चर्मरोग असल्याने संशयित असलेल्या किंवा संक्रमित किंवा संक्रमित झालेल्या प्राण्यांच्या प्रवेशास प्रतिबंध करण्याच्या दृष्टीने जिल्ह्यात असंक्रमित क्षेत्रामध्ये अनुसूचित रोगाच्या प्रसार होण्यास प्रतिबंध करण्यासाठी सीमा तपासणी नाक्यावर काटेकोर अंमलबजावणी व कार्यवाही करण्यात येईल असेही कळविले आहे.  

00000

 निवडणूक ओळखपत्रास आधार जोडणी ही लोकचळवळ व्हावी

-    उपजिल्हा निवडणूक अधिकारी दीपाली मोतीयेळे  

·        पीपल्स महाविद्यालयात कार्यशाळा संपन्न 

 

नांदेड (जिमाका) दि. 12 :- जिल्हाभरात मतदारांची आधार जोडणी कार्यक्रम मोठ्या प्रमाणात सुरु आहे. त्याचाच एक भाग म्हणून पीपल्स कॉलेज नांदेड राष्ट्रीय सेवा योजना विभाग व जिल्हाधिकारी कार्यालय नांदेड यांच्या संयुक्त विद्यमाने स्वातंत्र्याच्या अमृत महोत्सवानिमित्त आयोजित मतदान ओळखपत्रास आधार  लिंक कार्यशाळेचे उद्घाटन उपजिल्हा निवडणूक अधिकारी दीपाली मोतीयेळे यांच्या हस्ते संपन्न झाले. 

या कार्यशाळेत उपजिल्हा निवडणूक अधिकारी श्रीमती मोतीयेळे यांनी भारतीय शासनात केंद्रीय निवडणूक आयोग आणि राज्य निवडणूक आयोगाची भूमिका विशद केली. भारतीय निवडणूक आयोगाने नागरिकांच्या सेवेसाठी सुरू केलेल्या वोटर हेल्पलाइन ॲप विषयी माहिती दिली. ॲपच्या माध्यमातून नवीन मतदान नोंदणी आणि आपला निवासी मतदार संघ बदलल्यानंतर करावयाच्या दुरुस्ती तसेच विवाहनंतर मुलींच्या नावामध्ये करावयाच्या दुरुस्ती विषयीच्या कार्यपद्धतीबद्दल विद्यार्थ्यांच्या समोर ॲपच्या माध्यमातून प्रात्यक्षिक करून दाखवले. उपस्थित विद्यार्थ्यांना या लोकचळवळीत सहभागी होण्याचे आवाहनही त्यांनी केले. 

पीपल्स महाविद्यालयातील राष्ट्रीय सेवा योजनेचे स्वयंसेवक  राजेश कनकुटे व अश्विनी राठोड यांनी मतदार ओळखपत्र व आधार लिंक राष्ट्रीय कार्यक्रमांमध्ये नोडल स्वयंसेवक म्हणून नियुक्तीपत्र दिले. या कार्यशाळेस तहसीलदार श्रीमती स्नेहलता स्वामी उपस्थित होत्या. यावेळी त्यांनी विद्यार्थ्यांना भारत सरकारने सुरू केलेल्या मतदार ओळखपत्रास आधार लिंक राष्ट्रीय कार्यक्रम कार्यपद्धतीबद्दल माहिती दिली. वोटर हेल्पलाईन ॲपच्या माध्यमातून प्रात्यक्षिक करून दाखविले.   

कार्यक्रमासाठी नायब तहसीलदार श्रीमती उर्मिला कुलकर्णी व उपप्राचार्य डॉक्टर सचिन पवार उपस्थित होते. महाविद्यालयाचे प्राचार्य डॉ. आर एम जाधव यांनी विद्यार्थ्यांना भारताचा सजग नागरिक म्हणून आपल्या कर्तव्याची जाणीव करून दिली. पीपल्स महाविद्यालयाच्या परिसरात मतदान ओळखपत्रास आधार लिंक डेस्क स्थापन करण्यात आला.  कार्यक्रमाचे सूत्रसंचालन व प्रास्ताविक राष्ट्रीय सेवा योजनेचे कार्यक्रमाधिकारी डॉ. अमोल काळे यांनी तर आभार प्रदर्शन प्रा. कल्पना जाधव यांनी केले. यावेळी महाविद्यालयातील डॉ. बालाजी चिरडे, श्रीमती काटे, श्री.वानखेडे, श्रीमती यादव, महाविद्यालयातील विद्यार्थी उपस्थित होते.   

याचबरोबर नारायणराव चव्हाण विधी महाविद्यालय व सायन्स महाविद्यालयात आधार जोडणी कार्यशाळा संपन्न झाली. विधी महाविद्यालयाचे प्राचार्य विकास खाकरे, महेश पाटील, श्री. अली यांच्यासह विद्यार्थी उपस्थित होते. सायन्स महाविद्यालयात प्राचार्य गवई, उपप्राचार्य श्रीमती शुक्ला, श्री. मुनेश्वर व विद्यार्थ्यांची उपस्थिती होती. यावेळी विद्यार्थ्यांनी स्वतः चे आधार लिंक करून आपल्या घरातील सर्वांचे आधार लिंक करावे असे आवाहन प्रशासन व महाविद्यालयामार्फत करण्यात आले.

0000

 जिल्हा रुग्णालयात आहार प्रदर्शनाचे उद्घाटन 

नांदेड (जिमाका) दि. 12 :- स्वस्थ नारी सशक्त नारी, स्वस्थ बालक सशक्त भारत याविषयावर आज जिल्हा रुग्णालयात जिल्हा शल्यचिकित्सक डॉ. नीलकंठ भोसीकर यांच्या हस्ते आहार प्रदर्शनाचे उद्घाटन करण्यात आले. शासनाच्यावतीने 1 ते 30 सप्टेंबर 2022 हा “राष्ट्रीय पोषण महिना” म्हणून साजरा करण्यात येत आहे. यानिमित्ताने हे प्रदर्शन आयोजित केले होते. महिला व बालकांचे आरोग्य सुदृढ करण्यासोबत त्यांच्या  पोषण विषयक स्थितीमध्ये सुधारणा करण्यासाठी जनजागृती करण्यात येत आहे. 

यावेळी निवासी वैद्यकीय अधिकारी डॉ. माने, डॉ. बुट्टे, डॉ हणमंत पाटील, डॉ. साखरे, मेट्रन श्रीमती जाधव, श्रीमती नरवाड सिस्टर यांची  उपस्थिती  होती.  आहार प्रदर्शनासाठी डायट चार्ट आणि अन्न धान्य व पोषक पाककृती यांची प्रदर्शन आहारतज्ञ श्रीमती रेशमा मललेशे यांनी मांडणी केली. यावेळी रुग्ण व नाते नातेवाईक यांना पोषक आहाराबाबत माहिती सांगण्यात आली. यावेळी डॉ, सुजाता राठोड, डॉ. जाधव, डॉ. ढगे, डॉ. तडवी,  डॉ. रहेमान, डॉ. अनुरकर, डॉ तजमुल पटेल, कुलदीपक उपस्थित होते. या कार्यक्रमाच्या यशस्वितेसाठी नरवाड सिस्टर, धनश्री गुंडाळे समुपदेशक, इंगळे सिस्टर, सीमा सरोदे सिस्टर  व  नर्सिंग स्टुडंट व कर्मचारी यांनी मदत केली.

0000

 

 आझादी का अमृत महोत्सवानिमित्त

शहीद सैन्य अधिकारी परिवाराचा सन्मान 

नांदेड (जिमाका) दि. 12 :- भारताच्या अखंडतेसाठी व भारताच्या रक्षणासाठी आपले कर्तव्य पार पाडतांना शहीद झालेल्या परिवारांचा यथोचित गुणगौरव ही तरुणांसाठी प्रेरणादायी बाब आहे. भारतीयांच्या मनामध्ये भारतीय सैन्याबद्दल नितांत आदर आहे. तो आदर वृद्धींगत करण्यासाठी केलेला हा समारोह अतिशय स्तुत्य आहे असे मनोगत माजी खासदार डॉ. व्यंकटेश काब्दे यांनी व्यक्त केले. 

आझादी का अमृत महोत्सव वर्षानिमित्त येथील सायन्स कॉलेजच्या भव्य प्रांगणात 52 महाराष्ट्र बटालियन एन.सी.सी. नांदेड यांच्यावतीने भारतीय सैन्यात कर्तव्य बजावतांना शहीद झालेल्या नांदेड, परभणी, हिंगोली जिल्ह्यातील शहिदांच्या परिवाराचा सन्मान करण्यात आला. यावेळी ते बोलत होते. कार्यक्रमाच्या अध्यक्षस्थानी कमांडिंग अधिकारी कर्नल यम रंगराव तर मुख्य अतिथी म्हणून माजी खासदार तथा नांदेड एज्युकेशन सोसायटीचे अध्यक्ष डॉ. व्यंकटेश काब्दे, प्रशांत दिग्रसकर, जिल्हा शिक्षण अधिकारी सायन्स महाविद्यालयाचे प्राचार्य डॉ. डी. यु. गवई व उप शिक्षणाधिकारी दिलीप भाकरे उपस्थित होते. कार्यक्रमाच्या सुरूवातीला शहीद वीरांना गार्ड ऑफ ऑनरद्वारा सन्मानित करण्यात आले. त्याचप्रमाणे उपस्थित मुख्य अतिथी यांच्यावतीने पुष्प अर्पण करून शहिदांना अभिवादन केले. 

नांदेड जिल्ह्यातून शहीद झालेल्या अधिकारी व सैनिकांचा सन्मानपत्र घेण्यासाठी त्यांचे नातेवाईक कलावती बोडके, धोंडीबा जोंधळे, अरुणाताई ज्ञानोबा तरके, ज्योती प्रफुल गोवंदे, उषा नारायण रणपुरे, शीतल संभाजी कदम , गंगाबाई मारोतराव मोकलीकर, मधुमालती दिलीप केंद्रे, कमलाबाई नारायण लुंगारे, डॉ.प्रतिभा मनोज धायडे, मरीबा गायकवाड हे उपस्थित होते. हिंगोली जिल्ह्यातून शहीद परिवाराचे सदस्य बेबीताई लक्ष्मण कीर्तने, शिवनंदा नामदेव इंगोले रणवीर लक्ष्मी भिकाजी तर परभणी जिल्ह्यातून उपस्थित परिजन यामध्ये अंजना बालाजी अंभोरे, सुनिता सूर्यकांत मुस्तापुरे, अर्चना गणेश चित्रावार, श्रद्धा मुंजाभाऊ तलभारे, मथुराबाई महादू शिरसागर, मनकर्णिक जनार्धन मुंडे, अनुराधा गणेश शहाणे, सुनिता सुधाकर गोडबोले, नामदेवराव रणखांबे , कविताबाई सागर गायकवाड हे शहिदांचे परिजन उपस्थित होते. 

या समारोहात शहिदांना सन्मान देण्यासाठी सन्मान गार्ड आयोजित करण्यात आला. या गार्डनचे नेतृत्व हवलदार जगतराम , हवालदार जसबीर, यांनी केले या गार्ड मध्ये. जसबीर,हवालदार यश, हवालदार संजय घोष ,हवलदार सिद्धाप्पा, हवालदार योगेश, हवलदार नरेंद्र, हवालदार अरविंद यांनी सहभाग घेतला. 

शहिदो को शत शत नमन हा समारोह आयोजित करताना कर्नल यम रंगराव यांच्या मार्गदर्शनाखाली बटालियनचे प्रशासकीय अधिकारी लेफ्टनंट कर्नल वेत्रिवेलू, मेजर पंढरीनाथ घुगे ,सुभेदार मेजर ललित प्रसाद, सुभेदार वैजनाथ चौगुले, ट्रेनिंग जेसिओ सुभेदार गोपाल सिंह, बी एच एम सुनील कुमार, हवालदार संजय कुमार ,हवलदार सुरज कुमार, यांच्यासह राष्ट्रीय छात्र सेनेचे विद्यार्थी विद्यार्थिनी प्रीती हंडा हंडेवार शुभांगी मलशेट्टी, नागेश्री हंडेवार ,कोमल पवार, संदीप सूर्यवंशी व तेजस कांबळे, पांचाळ व्यंकटेश गवळी विठ्ठल, राजू पवार आदी तसेच छात्र सैनिक, छात्र आधिकरी, यांनी परिश्रम घेतले. वैजनाथ चौगुले, ट्रेनिंग जेसिओ सुभेदार गोपाल सिंह, बी एच एम सुनील कुमार, हवालदार संजय कुमार ,हवलदार सुरज कुमार, यांच्यासह राष्ट्रीय छात्र सेनेचे विद्यार्थी विद्यार्थिनी प्रीती हंडा हंडेवार शुभांगी मलशेट्टी, नागेश्री हंडेवार ,कोमल पवार, संदीप सूर्यवंशी व तेजस कांबळे, पांचाळ व्यंकटेश गवळी विठ्ठल, राजू पवार , शेख अन्सारी आदी तसेच छात्र सैनिक, छात्र आधिकरी, मेजर सिद्धेवाड,गावंडे, एनसीसी अधिकारी कदम, केंद्रे, ढवळे, भोसीकर,गाडेकर यांनी परिश्रम घेतले. कार्यक्रमाचे प्रास्ताविक कर्नल यम रंगाराव यांनी केले तर संचालन व आभार मेजर पंढरीनाथ घुगे यांनी केले.

0000