Friday, May 5, 2017

'भारताचे नवनिर्माण'
केंद्र सरकारच्या तीन वर्षपूर्तीनिमित्त लोकराज्यचा विशेषांक

मुंबई, 5 : केंद्र सरकारच्या तीन वर्षपूर्तीनिमित्त लोकराज्यचा मे 2017 चा विशेषांक प्रकाशित झाला आहे. महाराष्ट्रातील केंद्रीय मंत्र्यांच्या मुलाखती आणि विविध विभागांच्या विकासकामांची माहिती हे या अंकाचे वैशिष्ट्य आहे.
प्रधानमंत्री नरेंद्र मोदी यांच्या नेतृत्वाखालील केंद्र सरकारला 26 मे 2017 रोजी 3 वर्षे पूर्ण होत आहेत. भारत निर्माणाच्या दृष्टीने ही तीन वर्षे महत्त्वपूर्ण ठरली आहेत. त्याचा सर्वांगीण आढावा या विशेषांकात घेण्यात आला आहे. या अंकासाठी मुख्यमंत्री देवेंद्र फडणवीस यांनी विशेष लेख लिहिला असून त्यात केंद्र सरकारच्या महत्त्वाच्या व दूरदृष्टीच्या निर्णयांवर त्यांनी भाष्य केले आहे. त्यासोबतच निश्चलनीकरण, ऊर्जानिर्मिती, विविध योजनांची माहिती व त्यांची संकेतस्थळे आदी विषयांवर उपयुक्त माहिती अंकात देण्यात आली आहे.
केंद्रीय रस्ते वाहतूक आणि महामार्ग मंत्री नितीन गडकरी, रेल्वे मंत्री सुरेश प्रभू, मनुष्यबळ विकासमंत्री प्रकाश जावडेकर, अवजड उद्योगमंत्री अनंत गिते, ऊर्जा राज्यमंत्री पियूष गोयल, संरक्षण राज्यमंत्री डॉ. सुभाष भामरे, गृहराज्यमंत्री हंसराज अहिर आणि सामाजिक न्याय राज्यमंत्री रामदास आठवले यांनी विशेष मुलाखतीत त्यांच्या खात्यामार्फत महाराष्ट्रात होत असलेल्या विविध विकासकामांविषयी माहिती दिली आहे. केंद्र सरकारने विविध ॲप्स लॉन्च केले असून नागरिकांसाठी ते उपयोगी पडत आहेत. त्याविषयी लेखाचा अंकात समावेश आहे.
दूरदर्शनवरून प्रक्षेपित आणि आकाशवाणीवरून प्रसारित 'मी मुख्यमंत्री बोलतोय' या कार्यक्रमातील मुख्यमंत्री आणि जनता यांच्यातील संवाद अंकात समाविष्ट करण्यात आला आहे. कामगार मंत्री संभाजी पाटील निलंगेकर यांनी‍ कामगारांसाठी घेण्यात आलेले विविध निर्णय व कायद्याविषयीची माहिती तर सहकार, पणन व वस्त्रोद्योगमंत्री सुभाष देशमुख यांनी पणन व्यवस्थेतील सुधारणांबाबत माहिती दिली आहे. सायबर गुरू, यशकथा, प्रेरणा, प्रासंगिक, आपले गाव, आरोग्य आणि स्मरण ही सदरे वाचनीय व माहितीपूर्ण आहेत. अंकाची किंमत 10 रुपये आहे. अंक सर्वत्र उपलब्ध आहे.
००००


रास्तभाव धान्य दुकानात
मे महिन्याची साखर उपलब्ध
नांदेड दि. 5 :- सार्वजनिक वितरण व्‍यवस्‍थेअंतर्गत नांदेड जिल्‍हयातील बीपीएल व अंत्‍योदय शिधपत्रिकाधारकासाठी शासनाने मे 2017 साठी नियमित नियतन साखर प्रति व्‍यक्‍ती 500 ग्रॅम प्रमाणे प्रौढ अथवा मूल / बालक असा भेदभाव न करता मंजूर केले आहे. मे 2017 या महिन्‍यात जिल्‍हयासाठी 4 हजार 575 क्विंटलचे नियतन शासनाकडून प्राप्‍त झाले असून पुढील प्रमाणे तालुका निहाय नियतन देण्‍यात आले आहे. या नियतनाची उचल करुन प्रत्‍यक्ष शिधापत्रिकाधारकास संबंधीत स्‍वस्‍त धान्‍य दुकानामार्फत वितरण करण्‍यात येणार आहे.
नांदेड व लोहा- 534 , हदगाव- 399, किनवट- 527, भोकर- 175, बिलोली- 287, देगलूर- 255, मुखेड- 487, कंधार- 374, लोहा- 323, अर्धापूर- 128, हिमायतनगर- 198, माहूर- 194, उमरी- 135, धर्माबाद-152, नायगाव- 263, मुदखेड- 144. याची सर्व बीपीएल, अंत्‍योदय शिधापत्रिकाधारकांनी स्‍वस्‍तधान्‍य दुकानातून साखरेची उचल करावी , असे आवाहन जिल्‍हाधिकारी नांदेड यांच्यावतीने जिल्हा पुरवठा अधिकारी नांदेड यांनी  केले आहे.

0000000
जनधन खातेदारांना महाराष्ट्र ग्रामीण बँकेतर्फे
रुपे एटीएम कार्डचे 8 मेपासून वितरण
नांदेड, दि. 5 :-  केंद्र सरकारने दिलेल्या सूचनेनुसार बँकेच्या रोख-रहीत व्यवहार करण्यासंबंधी महाराष्ट्र ग्रामीण बँक क्षेत्रीय कार्यालय नांदेड यांच्याकडून सर्व खातेदारांना रुपे डेबिट एटीएम कार्ड घेण्याचे आवाहन केले आहे. नांदेड जिल्ह्यात एकूण 63 शाखेमार्फत सोमवार 8 मे ते शनिवार 20 मे 2017 पर्यंत गावनिहाय मेळावे घेऊन एटीएम कार्ड वितरीत केले जाणार आहे.    
प्रधानमंत्री जनधन योजनेअंतर्गत उघडलेल्या खातेदारांना एटीएम कार्डवर व्यवहार करणे आवश्यक आहे. एटीएम कार्डवर व्यवहार केल्यावरच त्यांना एक लाख रुपये वैयक्तिक अपघात विमा संरक्षण मिळणार आहे. तसेच मेळाव्यामध्ये एटीएम कार्ड वापरण्यासंबंधी माहिती व सूचना बँकेमार्फत देण्यात येणार आहे.
प्रधानमंत्री जनधन खातेधारकांनी आपले एटीएम कार्ड घेऊन या योजनेचा लाभ घ्यावा. अधीक माहितीसाठी आपल्या शाखेशी किंवा बँक प्रतिनिधीशी संपर्क साधावा, असे आवाहन क्षेत्रीय व्यवस्थापक महाराष्ट्र ग्रामीण बॅंक क्षेत्रीय कार्यालय नांदेड यांनी केले आहे.  

000000
माहूर शासकीय निवासी शाळेत प्रवेश सुरु
नांदेड, दि. 5 :-  अनुसूचित जाती मुलींची शासकीय निवासी शाळा माहूर येथे इयत्ता सहावी वर्गात ( सेमी इंग्रजी) माध्यमाची प्रवेश प्रक्रिया सुरु झाली आहे. विनामुल्य अर्ज वाटप चालू आहे. अनुसूचित जाती- 32, अनुसूचित जमाती- 4, विभाभज-2, विशेष मागास प्रवर्ग- एक व अनाथ / अपंगासाठी  एक जागा या सामाजिक आरक्षणानुसार भरती प्रक्रिया चालू आहे, संबंधितांनी अर्ज करावे, असे आवाहन माहूर येथील अनु. जाती मुलींची शासकीय निवासी शाळेचे मुख्याध्यापक यांनी केले आहे.

000000
जि.प. कर्मचाऱ्यांचे बदल्यांच्या
समुपदेशनाचे वेळापत्रक जाहीर
नांदेड दि. 5 :-  जिल्हा परिषदेच्या गट क व गट ड कर्मचाऱ्यांच्या जिल्हांतर्गत बदलीबाबत शासनाने ठरवून दिलेल्या वेळापत्रकानुसार  सार्वत्रिक बदल्या 2017 साठी जिल्हा स्तरावरील बदल्यांचे समुपदेशनाचे वेळापत्रक जिल्हा परिषदेचे अध्यक्ष यांनी निश्चित केले आहे. त्यानुसार वेळापत्रकाची नांदेड जिल्हा परिषदेअंतर्गत गट क व ड मधील कर्मचाऱ्यांनी नोंद घ्यावी, असे जिल्हा परिषदेचे मुख्य कार्यकारी अधिकारी नांदेड यांनी कळविले आहे.
जिल्हा परिषद सार्वत्रिक बदल्या सन 2017 चे वेळापत्रक पुढील प्रमाणे राहील. गुरुवार 11 मे 2017 रोजी सकाळी 10 ते दुपारी 12 वाजेपर्यंत बांधकाम विभाग. दुपारी 12 ते बदली प्रक्रिया संपेपर्यंत- आरोग्य विभाग. शुक्रवार 12 मे 2017 रोजी सकाळी 10 ते दुपारी 12 वाजेपर्यंत अर्थ विभाग, दुपारी 12 ते बदली प्रक्रिया संपेपर्यंत ग्रामपंचायत विभाग. शनिवार 13 मे 2017 रोजी सकाळी 10 ते दुपारी 12 वाजेपर्यंत महिला व बाल कल्याण विभाग, दुपारी 12 ते बदली प्रक्रिया संपेपर्यंत सामान्य प्रशासन विभाग. रविवार 14 मे 2017 रोजी सकाळी 10 ते 11 वाजेपर्यंत कृषि विभाग, दुपारी 11 ते 1 पशुसंवर्धन विभाग, दुपारी 2 ते 3 लघुपाटबंधारे विभाग, दुपारी 3 ते बदली प्रक्रिया संपेपर्यंत ग्रामीण पाणी पुरवठा विभाग. सोमवार 15 मे 2017 रोजी सकाळी 10 ते बदली प्रक्रिया संपेपर्यंत शिक्षण प्राथमिक व माध्यमिक विभाग. या सर्व समुपदेशनचे ठिकाण कै. यशवंतराव चव्हाण सभागृह जिल्हा परिषद नांदेड हे राहील.  या बदलीच्या वेळापत्रकात काही बदल झाल्यास तसे कळविण्यात येईल, असेही प्रसिद्धी पत्रकात म्हटले आहे.

000000
नांदेड जिल्हा परिषदेची
सोमवारी सर्वसाधारण सभा
नांदेड दि. 5 :- जिल्हा परिषदेची सर्वसाधारण सभा सोमवार 8 मे 2017 रोजी दुपारी 2 वा. कै. यशवंतराव चव्हाण सभागृह जिल्हा परिषद नांदेड येथे आयोजित केली आहे, असे जिल्हा परिषदेचे उपमुख्य कार्यकारी अधिकारी (सा. प्र.) यांनी कळविले आहे.
या सभेत पाणीटंचाई आढावा, जि. प. उपकर सुधारीत अंदाजपत्रक सन 2016-17 व मुळ अंदाजपत्रक सन 2017-18, तसेच जि. प. उपकर योजना, विविध विकास कामे सन 2017-18 अंतर्गत आराखड्यास मान्यता देणे, या विषयसुची अन्वये कामकाज होणार असल्याचे सामान्य प्रशासन विभागाने म्हटले आहे.

0000000
जिल्‍हयात वंचित समहातील नागरिकांची
मतदार यादीत नोंदणीची मोही
            नांदेड दि. 5 :- भारत निवडणूक आयोगाने प्रत्‍येक पात्र व्‍यक्‍तीची मतदार यादीत नोंदणी व्‍हावी यादृष्‍टीने मोहीम राबविण्‍यासाठी सूचना दिलेल्‍या आहेत. त्‍यानुसार जिल्‍हयात प्रत्‍येक पात्र व्‍यक्‍तीची मतदार यादीत नाव नोंदणविण्‍यासाठीची मोहीम सुरु करण्‍यात आलेली आहे. या मो‍हिमेत विशेषत कामगार, हमाल, कचरा वेचणारे, दिव्‍यांग व्‍यक्‍ती आदींची यादीत नावे नोंदविण्यासाठी प्रयत्‍न करण्‍यात येत असल्याचे जिल्हा निवडणूक कार्यालयाने कळविले आहे.
            या मोहिमेअंतर्गत नांदेड तहसिल व सेवाभावी संस्‍था यांच्‍या मदतीने शहरात कचरा वेचणारे यांची नावे मतदार यादीत नोंदविण्‍यासाठी शिबिराचे आयोजन करण्‍यात आले होते. यास अत्‍यंत चांगला प्रतिसाद मिळाला आहे. यामध्‍ये जवळपास 102 पात्र व्‍यक्‍तीचे मतदार यादीत नाव नोंदविण्‍यासाठी अर्ज भरुन घेण्‍यात आले तसेच विविध क्षेत्रात काम करणारे कामगार यांचीही कामगार दिनाच्‍या निमीत्‍ताने नोंदणी करण्‍यात आली आहे. जवळपास 211 अर्ज प्राप्‍त झाले आहे. वरल प्रमाणे नोंदणीनंतर सर्व पात्र अर्जदाराना लवकरच मतदान ओळखपत्राचे वाटप करण्‍यात येणार आहे.
            याशिवाय सर्वच तालुक्‍यामध्‍ये वंचत व्‍यक्‍तीची नावे मतदार यादीत नोंदविण्‍यासाठी प्रयत्‍न करण्‍यात येत आहे. यामध्‍ये बीएलओ हे झोपडपटृी, तात्‍पुरत्‍या निवा-यात राहणा-या व्‍यक्‍तींना भेट देवून त्‍यांची नावे यादीत नसल्‍यास त्‍यांचेकडून अर्ज भरुन घेण्यात येत आहेत, अशी माहितीही उपजिल्हाधिकारी (निवडणूक) नांदेड यांनी दिली आहे.

000000
"नीट" परीक्षा सीबीएसईच्या नियमावलीनुसार
काटेकोरपणे सुरळीत पार पाडावी - जिल्हाधिकारी डोंगरे





नांदेड दि. 5 :- "नीट" ही परीक्षा विद्यार्थ्यांच्या आयुष्याला वळण देणारी ही एक महत्वपूर्ण परीक्षा आहे. त्यामुळे सीबीएसईच्या नियमावलीनुसार कोटेकोर नियोजन करुन परीक्षा सुरळीतपणे पार पाडावी, असे निर्देश जिल्हाधिकारी अरुण डोंगरे यांनी आज येथे दिले. वैद्यकीय अभ्यासक्रमाची प्रवेश पूर्व परिक्षा "नीट"  देशभरात रविवार 7 मे 2017 रोजी होणार आहे. त्याअनुषंगाने होरायझन डिस्कव्हरी अकॅडमी येथे आयोजित "नीट" परीक्षा पर्यवेक्षक कार्यशाळेत जिल्हाधिकारी डोंगरे बोलत होते. 
नांदेड येथे यावर्षी पहिल्यांदाच केंद्र मंजूर झाल्यानंतर "नीट" परीक्षा होत आहे. या परीक्षेसाठी 13 हजार 700 विद्यार्थ्यांनी नोंदणी केली आहे. जिल्ह्यातील 35 केंद्रांवर परीक्षा होणार आहे.  ही परीक्षा व्यवस्थीत पार पाडण्याची जबाबदारी पर्यवेक्षकांनी समर्थपणे पेलावी, असे आवाहनही जिल्हाधिकारी डोंगरे यांनी केले.  
            याप्रसंगी निवासी उपजिल्हाधिकारी जयराज कारभारी यांनी पर्यवेक्षकांना मार्गदर्शन केले. तसेच परीक्षा सुरळीत पार पाडण्यासाठी पोलीस बंदोबस्ताबाबतची माहिती पोलीस उपअधीक्षक विश्वेश्वर नांदेडकर यांनी दिली. होराझनचे प्राचार्य तथा नीट परीक्षा शहर समन्वयक प्राचार्य फनिद्र बोरा यांनी पी.पी.टी.च्या माध्यमातून पर्यवेक्षकांना सविस्तर मार्गदर्शन करुन शंकेचे निरसन केले.
आर.सी.एम.टी. ग्रुपचे सचिव ॲड संजय रुईकर यांनी प्रास्ताविक केले. संस्थेचे अध्यक्ष व्ही. बी. चारी, तंत्रनिकेतनचे प्राचार्य अशोक कामठाणे,  मुख्य कार्यकारी अधिकारी अशिष शिरसाट तसेच होरायझनचे उपप्राचार्य प्रवीणकुमार उपस्थित होते. मुरलीधर हंबर्डे यांनी सुत्रसंचालन केले.

000000

  वृत्त क्र.   252   शस्त्रास्त्र बाळगण्यावर बंदी ; विनापरवानगी लाऊडस्पिकर नाही   जिल्हयात 144 कलम लागू ; आचारसंहितेचा कडक अवलंब     नांदेड ...