तुर, हरभरा, कापूस पिकांसाठी कृषि संदेश

नांदेड दि. 14 :- तुर सध्या लवकर पक्व होणाऱ्या तुरीचे वाण शेंगाच्या अवस्थेत असुन तो त्यास फायदेशीर आहे. तर मध्यम कालावधीत पक्व् होणाऱ्या अवस्थेतील वाणांसाठी सुध्दा फायदेशीर आहे. ज्या ठिकाणी अतिवृष्टी झाली असेल त्या ठिकाणी  मुळकुज रोग होऊ नये म्हणुन पाणी त्वरीत काढुन  द्यावे. 

शेंगा पोखरणाऱ्या अळीच्या बंदोबस्त करण्यासाठी 5 टक्के निंबोळी अर्काची फवारणी करावी. अथवा अझाडारिक्टीन (300 पीपीएम) 50 मि.ली. किंवा एच.ए. एन. पी. व्ही. 500 एल. ई. 10 मिली किंवा किवनॉलफॉस 20 टक्के प्रवाही 16 मिली किंवा एन्डॉक्झाकार्ब 14.5 टक्के 14.5 टक्के प्रवाही 7 मिली. किंवा फलुबेंडामाईड 20 टक्के दाणेदार 5 ग्रॅम किंवा क्लोरॅनिलीप्रॉल 18.5  टक्के प्रवाही 3 मिली यापैकी कोणतेही एक किटकनाशक फवारावे व गरज पडल्यास दुसरी पंधरा दिवसाच्या अंतराने करावी.

हरभरा पिकासाठी ज्या शेतकऱ्यांनी कोरडवाहु / बागायती हरभरा पेरणी केली आहे. अशा ठिकाणी सततच्या पावसाने  पाणी साठले आहे अशा ठिकाणी पिकाची  उगवण  झाली नाही किंवा पीक उबळुन गेले आहे. अशा ठिकाणी हरभऱ्याची दुबार पेरणी करावी. तसेच ज्या ठिकाणी हरभरऱ्याची उगवण झाली आहे अशा ठिकाणी पीक वापशावर आल्यावर कोळपणी करुन 2 टक्के युरीयाची फवारणी करावी. घाटेअळीचा प्रादुर्भाव दिसुन आल्यास पिकास कामगंध सापळे प्रति एकर दोन लावुन किडींचे सर्वेक्षण करावे. तसेच 5 टक्के निंबोळी अर्काची फवारणी 5 मि. ली. प्रतिलिटर पाणी याप्रमाणे फवारणी करावी. अथवा अझाडीरॅक्टींन (1500 पीपीएम) 5 मिली प्रति लिटर पाण्यात फवारणी करावी अथवा एच.ए. एन. पी. व्ही. 500 एल. ई. 1.5 मिली प्रती लिटर या जैविक विषाणुची फवारणी करावी .

            कापुस पिक क्षेत्रामध्ये पावसाचे पाणी साचुन राहिले असल्यास पाणी दंडाच्या सहाय्याने पिक  क्षेत्राबाहेर काढुन दयावे. कपाशीचे पाने लालसर झाली असतील तर नत्राची कमतरता असण्याची शक्यता आहे. त्यासाठी वाढीच्या काळात 2 टक्के डीएपी खतांच्या दोन फवारणी 15 दिवसांच्या अंतराने कराव्यात. आकस्मिक मर आढळुन आल्यास 1.5 किलो युरीया + 1.5 किलो पालाश 100 लिटर पाण्यात मिसळुन 150 ते 200 मि. ली. प्रति झाड दयावे. पिकावर बोंड अळयांचा प्रादुर्भाव आढळल्यास एच.एन. पी. व्ही. 500 एल.ई / हेक्ट्र अथवा लॅम्ब्डा सायहॅलोथ्रीन 5 टक्के प्रवाही 8 मि. ली. किंवा प्रोफेनोफॉस 50 इ.सी. 30 मि.ली. प्रति 10 लिटर पाण्यात मिसळुन फवारणी करावी, असे आवाहन उपविभागीय कृषि अधिकारी आर. टी. सुखदेव यांनी केले आहे.

000000

तलाठी पदासाठी पात्र उमेदवारांची यादी प्रसिद्ध;

27 नोव्हेंबरला मुळ कागदपत्रांची तपासणी

नांदेड दि. 14 :- नांदेड जिल्‍हाअंतर्गत तलाठी पदभरती 2019 च्या परीक्षेतील त्‍या-त्‍या प्रवर्गातील गुणवत्‍तेनुसार निवड व प्रतिक्षा यादी तयार करण्‍याकरिता मुळ कागदपत्र तपासणीसाठी त्‍या-त्‍या प्रवर्गातील पात्र उमेदवारांची यादी निश्‍चीत करण्‍यात आली आहे. ही यादी व त्‍याबाबत आवश्‍यक सुचना नांदेड जिल्‍हयाच्‍या http://nanded.nic.com  या संकेतस्‍थळावर प्रसिध्‍द करण्‍यात आली आहे.

महापरीक्षा पोर्टल मार्फत नांदेड जिल्‍ह्यातील तलाठी पदभरती 2019 साठी उपलब्‍ध रिक्‍त पदाची जाहीरात प्रसिध्‍द करुन 2 ते 26 जुलै 2019 या कालावधीत परीक्षा घेण्‍यात आली होती. या परीक्षेच्या यादीतील संबंधीत उमेदवारांनी मुळ कागदपत्रे तपासणीसाठी बुधवार 27 नोव्हेंबर 2019 रोजी सकाळी 11 वा. बचत भवन, जिल्‍हाधिकारी कार्यालय परीसर नांदेड येथे उपस्थित रहावे. या यादीवर आक्षेप असल्‍यास सोमवार 25 नोव्हेंबर 2019 पर्यंत कार्यालयीन वेळेत हे आक्षेप लेखी स्‍वरुपात पुरावानिशी प्रत्‍यक्ष उमेदवारांनी उपस्थित राहुन सादर करावे. त्यानंतर प्राप्‍त होणारे आक्षेपांचा विचार करण्‍यात येणार नाही, असे आवाहन जिल्हाधिकारी नांदेड यांच्यावतीने करण्यात आले आहे.

00000

मधुमेह, मानसिक आजार

रोखण्यासाठी व्यायाम महत्वाचा

-         जिल्हा शल्यचिकित्सक डॉ. भोसीकर

नांदेड दि. 14 :- मधुमेह व इतर मानसिक आजार रोखण्यासाठी प्रत्येक व्यक्तींने दिवसातून कमीत कमी तीस मिनिट चालणे किंवा व्यायाम करणे महत्वाचे आहे, असे आवाहन जिल्हा शल्यचिकित्सक डॉ. एन. वाय. भोसीकर यांनी केले आहे.   

“जागतिक मधुमेह दिन” दिनानिमित्त नांदेड जिल्हा रुग्णालयात जिल्हा शल्य चिकित्सक डॉ. एन. आय. भोसीकर यांच्या मार्गदर्शनाखाली “जागतिक मधुमेह दिन” जनजागृती कार्यक्रम आज 14 नोव्हेंबर रोजी घेण्यात आला. त्यावेळी डॉ. भोसीकर बोलत होते.  

डॉ. भोसीकर पुढे म्हणाले, एकविसाव्या शतकात व्यक्तीने इंटरनेटच्या माध्यमातून कामे करणे ही विकासाच्या दृष्टीने महत्वाचे असले तरी यापुढील परिस्थिती बघितली तर व्हाटस्अप्प, फेसबुक, विविध प्रकारचे गेम्स याचा अतिवापर हा मधुमेह व इतर मानसिक अजारचे मोठे कारण असल्याचे दिसून आले आहे.

या कार्यक्रमास निवासी वैद्यकीय अधिकारी (बा.स.) डॉ. ये.पी. वाघमारे, डॉ.एच.के.साखरे, डॉ. लोकडे डॉ. दीपक गोरे, डॉ. पवार, डॉ. खान, डॉ. कांतीलाल इंगळे, डॉ. साईप्रसाद शिंदे, अधिपरिसेविका राठोड तसेच रुग्ण व त्यांची नातेवाईक उपस्थित होते.

यावेळी उपस्थित रुग्ण व त्यांचे नातेवाईकांना तज्ज्ञ डॉक्टरांमार्फत मार्गदर्शन करण्यात आले. प्रास्ताविक जिल्हा कार्यक्रम अधिकारी डॉ. डी. एन. हजारी यांनी केले तर अतिरिक्त जिल्हा शल्यचिकित्सक डॉ. संतोष शिरसीकर यांनी उपस्थित रुग्णांना मधुमेह म्हणजे काय, तो कसा होतो, त्याची करणे कोणती याबद्दल मार्गदर्शन केले. कार्यक्रम यशस्वीतेसाठी समुपदेशक सुवर्णकार सदाशिव व बालाजी गायकवाड यांनी परिश्रम घेतले.

00000