Saturday, December 8, 2018


वाहन भाडेतत्वावर घेण्यासाठी
नगर रचना कार्यालयाचे आवाहन 
 नांदेड, दि. 8 :- सहायक संचालक नगर रचना नांदेड कार्यालयात भाडे तत्वावर Swift Dizire / Ford Aspire / Indiog0 / Sedan Cars या सारख्या वाहनाची आवश्यकता आहे. त्यासाठी वाहन मालकाकडून इंधनविरहित दरपत्रक मागविण्यात येत आहे. दरपत्रके सिलबंद पाकीटात 17 डिसेंबर 2018 रोजी सायं. 5 वाजेपर्यंत सहायक संचालक नगर रचना कार्यालय नांदेड येथे पाठविण्यात यावे, असे आवाहन सहायक संचालक नगर रचना नांदेड यांनी केले आहे.
दरनिविदेच्या अटी व शर्ती सहायक संचालक नगर रचना कार्यालय, घोडजकर इमारत, दुसरा मजला, गांधीनगर हिंगोली नाका, नांदेड यांच्या सूचना फलकावर पाहण्यास मिळतील, असेही प्रसिद्धी पत्रकात नमूद केले आहे.
000000


लोहा नगरपरिषदेच्या
मतदानासाठी मतदारांना सुट्टी
 नांदेड, दि. 8 :-  लोहा नगरपरिषदेच्या निवडणूकीत मतदारांना मतदान करण्यासाठी रविवार 9 डिसेंबर 2018 रोजी सुट्टी अथवा दोन तासांची सवलत देण्याबाबत उद्योग, ऊर्जा व कामगार विभागाच्या परिपत्रकान्वये सूचना देण्यात आल्या आहेत.  
या शासन परित्रकात म्हटले आहे की, निवडणूक मतदान क्षेत्रात मतदार असलेले कामगार, अधिकारी, कर्मचारी, यांना मग ते कामानिमित्त निवडणूक होणाऱ्या क्षेत्राबाहेर कार्यरत असले तरी त्यांना निवडणूकीच्या दिवशी मतदानाचा हक्क बजावण्यासाठी भरपगारी सुट्टी देण्यात यावी. ही सुट्टी उद्योग, ऊर्जा व कामगार विभागांतर्गत येणाऱ्या सर्व आस्थापना, कारखाने, दुकाने इत्यादींना लागू राहिल. अपवादात्मक परिस्थितीत पूर्ण दिवस सुट्टी देणे शक्य नसेल तर मतदान क्षेत्रातील कामगारांना मतदानाचा हक्क बजावण्यासाठी सुट्टी ऐवजी दोन ते तीन तासाची सवलत देण्यात यावी. मात्र त्याबाबत त्यांनी संबंधीत महानगरपालिका आयुक्त अथवा जिल्हाधिकारी यांची पूर्व परवानगी घेणे आवश्यक राहील. कोणत्याही परिस्थिती मतदारांना मतदानासाठी किमान दोन ते तीन तासांची सवलत मिळेल याची दक्षता संबंधित आस्थापना मालकांनी घेणे आवश्यक राहील. शासन परिपत्रकान्वये सर्व आस्थापना, कारखाने, दुकाने इत्यादींच्या मालकांनी / व्यवस्थापनांनी सुचनांचे योग्य ते अनुपालन होईल याची काटेकोरपणे खबरदारी घ्यावी. असे जिल्हाधिकारी नांदेड यांनी कळविले आहे.
000000


राज्यस्तरीय शालेय बेसबॉल स्पर्धेचा
उद्घाटन कार्यक्रम नांदेड येथे संपन्न
खेळाडुनी खेळातील कौशल्य दाखवावे
-         जिल्हाधिकारी डोंगरे  
 नांदेड, दि. 8 :- खेळाडूनी त्यांच्या खेळातील कौशल्य दाखवावे, निवड समिती सदस्यांनी निपक्षपणे काम करावे, असे जिल्हाधिकारी अरुण डोंगरे यांनी सांगितले.  
  क्रीडा व युवक सेवा संचालनालय, जिल्हा क्रीडा परिषद नांदेड व जिल्हा क्रीडा कार्यालयाच्यावतीने महाराष्ट्र बेसबॉल असोसिएशन व नांदेड जिल्हा बेसबॉल असोसिएशन नांदेड यांच्यावतीने राज्यस्तर शालेय बेसबॉल 14 वर्षे मुला-मुलींसाठी क्रीडा स्पर्धेचे आयोजन 7 ते 10 डिसेंबर या कालावधीत पोलिस कवायत मैदान वजिराबाद नांदेड येथे संपन्न होत आहे. या स्पर्धेचे उद्घाटन जिल्हाधिकारी श्री. डोंगरे यांचे हस्ते  करण्यात आले. त्यावेळी ते बोलत होते.
यावेळी कलीमओद्यीन, जिल्हा क्रीडा अधिकारी, परभणी डॉ. दिपक सोनटक्के, डॉ. संजय पतंगे, उपाध्यक्ष नांदेड जिल्हा बेसबॉल असोसिएशन, डॉ. बळीराम लाड, निवड समिती सदस्य गोकुळ तांदळे, पवन जांगीड, श्रीमती रेश्मा पणेकर आदींची यावेळी प्रमुख उपस्थिती होती.
प्रास्ताविक जिल्हा क्रीडा अधिकारी राजेश्वर मारावार यांनी या स्पर्धेसाठी राज्यातून 8 विभागातून 256 खेळाडू, निवड चाचणीसाठी 80 मुले-मुली, 16 क्रीडा मार्गदर्शक व संघ व्यवस्थापक व 20 स्वयंसेवक व निवड समिती सदस्य असे एकुण 388 उपस्थित राहणार आहेत. तसेच या स्पर्धेमधून निवड झालेले खेळाडू 7 ते 11 जानेवारी 2019 दरम्यान उज्जैन मध्यप्रदेश येथे संपन्न होणाऱ्या राष्ट्रीय शालेय बेसबॉल स्पर्धेसाठी राज्याचे प्रतिनिधीत्व करतील असे सांगितले.
यावेळी सुवर्ण पदक प्राप्त सृष्ठी गौतम कांबळे यांच्यामार्फत खेळाडू, पंच, सामनाधिकारी यांना शपथ देण्यात आली.
00000


राज्य अल्पसंख्याक आयोगाचे अध्यक्ष
हाजी अरफात शेख यांचा दौरा
नांदेड, दि. 8 :- महाराष्ट्र राज्य अल्पसंख्याक आयोगाचे अध्यक्ष (मंत्री दर्जा) हाजी अरफात शेख हे नांदेड दौऱ्यावर येत असून त्यांचा दौरा कार्यक्रम पुढील प्रमाणे राहील.
सोमवार 10 डिसेंबर 2018 रोजी सकाळी 8.45 वा. शासकीय विश्रामगृह नांदेड येथे आगमन. सकाळी 10 वा. जैन समाजाच्या प्रतिनिधींची भेट. सकाळी 10.30 वा. बौद्ध समाजाच्या प्रतिनिधींची भेट. सकाळी 11 वा. शीख समाजाच्या प्रतिनिधींची भेट. सकाळी 11.30 वा. ख्रिश्चन समाजाच्या प्रतिनिधींची भेट. दुपारी 12 वा. मुस्लिम समाजाच्या प्रतिनिधींची भेट. दुपारी 2.30 वा. पंधरा कलमी कार्यक्रम आणि केंद्र व राज्य शासनाच्या योजनांचा आढावाबाबत जिल्हाधिकारी, पोलीस अधीक्षक, मुख्य कार्यकारी अधिकारी, मनपा आयुक्त, शिक्षणाधिकारी (प्राथमिक, माध्यमिक व निरंतर), सेवायोजन अधिकारी व इतर सर्व संबंधीत अधिकारी यांचे सोबत जिल्हाधिकारी कार्यालयात बैठक. सायं. 4 वा. पत्रकार परिषद. रात्री 7.30 वा. नांदेड येथून वाशीमकडे प्रयाण करतील.
00000


लोहा नगरपरिषदेच्या
मतदानासाठी मतदारांना सुट्टी
 नांदेड, दि. 8 :-  लोहा नगरपरिषदेच्या निवडणूकीत मतदारांना मतदान करण्यासाठी रविवार 9 डिसेंबर 2018 रोजी सुट्टी अथवा दोन तासांची सवलत देण्याबाबत उद्योग, ऊर्जा व कामगार विभागाच्या परिपत्रकान्वये सूचना देण्यात आल्या आहेत.  
या शासन परित्रकात म्हटले आहे की, निवडणूक मतदान क्षेत्रात मतदार असलेले कामगार, अधिकारी, कर्मचारी, यांना मग ते कामानिमित्त निवडणूक होणाऱ्या क्षेत्राबाहेर कार्यरत असले तरी त्यांना निवडणूकीच्या दिवशी मतदानाचा हक्क बजावण्यासाठी भरपगारी सुट्टी देण्यात यावी. ही सुट्टी उद्योग, ऊर्जा व कामगार विभागांतर्गत येणाऱ्या सर्व आस्थापना, कारखाने, दुकाने इत्यादींना लागू राहिल. अपवादात्मक परिस्थितीत पूर्ण दिवस सुट्टी देणे शक्य नसेल तर मतदान क्षेत्रातील कामगारांना मतदानाचा हक्क बजावण्यासाठी सुट्टी ऐवजी दोन ते तीन तासाची सवलत देण्यात यावी. मात्र त्याबाबत त्यांनी संबंधीत महानगरपालिका आयुक्त अथवा जिल्हाधिकारी यांची पूर्व परवानगी घेणे आवश्यक राहील. कोणत्याही परिस्थिती मतदारांना मतदानासाठी किमान दोन ते तीन तासांची सवलत मिळेल याची दक्षता संबंधित आस्थापना मालकांनी घेणे आवश्यक राहील. शासन परिपत्रकान्वये सर्व आस्थापना, कारखाने, दुकाने इत्यादींच्या मालकांनी / व्यवस्थापनांनी सुचनांचे योग्य ते अनुपालन होईल याची काटेकोरपणे खबरदारी घ्यावी. असे जिल्हाधिकारी नांदेड यांनी कळविले आहे.
000000


नांदेड ग्रंथोत्सवाची सुरुवात ग्रंथ दिंडीने उत्साहात  

नांदेड, दि. 8 :- महाराष्ट्र राज्य ग्रंथालय संचालनालय नांदेड जिल्हा ग्रंथालय अधिकारी कार्यालयच्यावतीने येथील डॉ. शंकरराव चव्हाण प्रेक्षागृह शेजारी आयोजित "नांदेड ग्रंथोत्सव 2018" हा दिनांक 8 व 9 डिसेंबर,  2018 दोन दिवस आयोजित करण्यात आला आहे. याची सकाळी ग्रंथदिंडीने सुरुवात करण्यात आली. ही ग्रंथदिंडी महात्मा फुले पुतळा आयटीआयपासून कुसूम सभागृह मार्गे जिल्हा ग्रंथालय कार्यालयाच्या आवारात पोहचली. ग्रंथदिंडीची सुरुवात जिल्हाधिकारी अरुण डोंगरे यांच्या हस्ते पुजनाने झाली.
यावेळी सहाय्यक ग्रंथालय संचालक सुनिल हुसे, जिल्हा ग्रंथालय अधिकारी आशिष ढोक, डॉ. जगदीश कुलकर्णी, डॉ. हंबर्डे, प्रताप सुर्यवंशी, संजय कर्वे, संजय पाटील, निर्मलकुमार सुर्यवंशी, माजी आमदार गंगाधरराव पटणे, संजय पोतदार व जिल्ह्यातील वाचनालयाचे सर्व कर्मचारी आणि ग्रंथप्रेमींची यावेळी उपस्थिती होती.
नांदेड ग्रंथोत्सव -2018 या ग्रंथदिंडीमध्ये मधुबन महाराज हायस्कूल (धनेगाव), शारदा भवन हायस्कूल (नांदेड), विमलेश्वर वारकरी शिक्षण संस्था (मरळक), वारकरी सांप्रदाय भजणी मंडळ (हाळदा), बंजारा महिला नृत्य (वर्ताळा तांडा ता. मुखेड), तसेच शाहीर जाधव व त्यांचा चमू (सुजलेगाव ता. नायगाव) इत्यादींनी सहभाग घेतला होता. वाजत-गाजत निघालेल्या दिंडीत अनेक साहित्यिक, ग्रंथप्रमी आणि ग्रंथ चळवळीतले मान्यवर सहभागी झाले होते. या दिंडीमुळे साहित्यमय वातावरण तयार झाले होते.
00000


लोकराज्य प्रदर्शनाच्या दालनास
जिल्हाधिकारी डोंगरे यांची भेट

नांदेड, दि. 8 :- नांदेड ग्रंथोत्सवानिमित्त जिल्हा ग्रंथालयाच्यावतीने आयोजित ग्रंथ प्रदर्शनामध्ये नांदेड येथील जिल्हा माहिती कार्यालयातर्फे  लोकराज्य मासिकाच्या अंकाचे प्रदर्शन व विक्रीचे दालन भरविण्यात आले असून या दालनास जिल्हाधिकारी अरुण डोंगरे यांनी भेट दिली.
जिल्हाधिकारी डोंगरे यांनी भेटी दरम्यान लोकराज्य च्या विविध संग्राह्य विशेषांकाची पाहणी करुन लोकराज्य मासिकाच्या दर्जेदार व संग्राह्य माहितीपूर्ण स्वरुपाचा गौरव केला. यावेळी जिल्हा माहिती अधिकारी अनिल आलुरकर यांनी लोकराज्यच्या डिसेंबरच्या महामानव विनम्र अभिवादन या विशेषांकाची प्रत देवून स्वागत केले. या अंकात जिल्हा माहिती अधिकारी अनिल आलुरकर यांनी लिहिलेल्या शहापूर ता. देगलूर या शंभर शेततळ्यांच्या गावाची यशोगाथा प्रसिध्द झाली असून याबद्दल जिल्हाधिकारी यांनी लेख वाचून कौतूक केले. जिल्हाधिकारी डोंगरे यांच्या मार्गदर्शनाखाली शहापूर येथे शंभर शेततळे तयार करण्यात आली असल्याने कृषी विभागाच्या या उपक्रमाचे सर्वत्र कौतूक होत आहे.
लोकराज्य दालनास यावेळी साहित्य अकादमी पुरस्कार विजेते साहित्यिक श्रीकांत देशमुख, ग्रंथालय संघाचे अध्यक्ष गंगाधर पटने, ग्रंथालय विभागाचे सहाय्यक संचालक सुनिल हुसे, निर्मल प्रकाशनचे निर्मलकुमार सुर्यवंशी व इतर मान्यवरांनी भेट दिली.
या दालनात गत चार वर्षातील अंकाचे प्रदर्शन मांडण्यात आले असून लोकराज्य ची वर्गणी भरण्याची सोय करण्यात आली आहे. जिल्हा माहिती कार्यालयाचे विवेक डावरे, काशिनाथ आरेवार, महंमद युसूफ आणि बालनरसय्या अंगली हे लोकराज्य विषयी भेट देणाऱ्यांना माहिती सांगत आहेत.
000000




ग्रंथोत्सवामुळे वाचन संस्कृतीची जोपासणा व्हावी
- जिल्हाधिकारी डोंगरे 
"नांदेड ग्रंथोत्सव-2018" चे उद्घाटन उत्साहात संपन्न

 नांदेड, दि. 8 :- पुस्तक वाचनातून वाचनाची आवड निर्माण झाली पाहिजे. यातून समाज सुसंस्कृत होत जातो, यासाठी ग्रंथोत्सवासारखे उपक्रम महत्वाचे ठरतात, असे प्रतिपादन जिल्हाधिकारी अरुण डोंगरे यांनी केले.
उच्च व तंत्रशिक्षण विभाग ग्रंथालय संचालनालय, मुंबई व जिल्हा ग्रंथालय नांदेड यांच्यावतीने आयोजित  नांदेड ग्रंथोत्सव 2018 चे उद्घाटन जिल्हाधिकारी श्री डोंगरे यांच्या हस्ते करण्यात आले, त्यावेळी ते बोलत होते. या कार्यक्रमाच्या अध्यक्षस्थानी जिल्हा ग्रंथालयाचे अध्यक्ष माजी आमदार ॲड.  गंगाधर पटणे हे होते. तर विभागीय सहनिबंधक तथा साहित्य अकादमी पुरस्कार विजेते साहित्यिक श्रीकांत देशमुख, जिल्हा माहिती अधिकारी अनिल आलूरकर,  औरंगाबादचे सहाय्यक ग्रंथालय संचालक सुनिल हुसे, उच्च  शिक्षण विभागाचे वरिष्ठ लेखाधिकारी निळकंठ पांचगे, माजी जिल्हा परिषदेचे अध्यक्ष संभाजीराव धुळगुंडे, जिल्हा ग्रंथालय अधिकारी अशिष ढोक, सेवानिवृत्त जिल्हा माहिती अधिकारी रामचंद्र देठे, माजी नगराध्यक्ष प्रतापराव देशमुख, ग्रंथालय चळवळीचे बी.जी. देशमुख, प्रकाशक निर्मलकुमार सुर्यवंशी, राजेंद्र हंबिरे, विठ्ठल कावे आदिंची यावेळी प्रमुख उपस्थिती होती.
जिल्हाधिकारी श्री. डोंगरे म्हणाले नांदेड ग्रंथोत्सवात विविध दालनात नवनवीन पुस्तकांचा समावेश करण्यात आला आहे. नागरिकांनी व विद्यार्थ्यांनी या दालनाला भेट देवून ग्रंथांची खरेदी करुन ती वाचली पाहिजेत. नवीन पिढीचे समाज माध्यमांवरील वाचन वाढले आहे, अशावेळी पुस्तक वाचनाला विसरुन चालणार नाही. वाचनातून सुंदर जीवन घडण्यास मदत होते. वाचनातील आकलन करुन ते कृतीत विचार आले पाहिजे, असे सांगून त्यांनी उज्ज्वल नांदेड या उपक्रमात स्पर्धा परीक्षेची तयारी करणाऱ्या विद्यार्थ्यांसाठी जिल्हा प्रशासनाच्यावतीने देण्यात येत असलेल्या विविध उपक्रमांची माहिती दिली. पुस्तक वाचनातून स्पर्धा परिक्षा देणाऱ्या अनेक विद्यार्थ्यांचे आयुष्य घडले आहे. त्यांनी शिक्षण घेतलेल्या शाळेतील विद्यार्थ्यांसाठी पुस्तके देवून त्यांना उज्ज्वल जीवनाकडे नेण्यासाठी सहकार्य करावे, असे आवाहन श्री. डोंगरे यांनी केले.
श्री पटणे म्हणाले अवांतर वाचनाची आवड लहान वयातून झाली तर कोणत्याही क्षेत्रात त्यांना सहज यश मिळते. नांदेड ग्रंथोत्सवात विविध दालनात उपयुक्त ग्रंथ उपलब्ध आहेत. ती खरेदी करुन वाचली पाहिजे असे आवाहन करतांना नांदेड महानगरपालिकेने त्यांच्या राम मनोहर लोहिया सार्वजनिक वाचनालयाची नवीन इमारत वाचकांसाठी लवकरात-लवकर उभी करावी, अशी मागणी केली.
विभागीय सहनिबंधक श्रीकांत देशमुख म्हणाले, ग्रंथ वाचनातून विचार करण्याची क्षमता वाढते. अनेक समाज सुधारकांनी ज्ञानातून समाज घडविला. आधुनिक भारत ज्ञानातून घडत आहे. अनावश्यक खर्च टाळून पुस्तक खरेदी करावीत. घराचा स्वर्ग करायचे असेल, तर त्याठिकाणी पुस्तक असले पाहिजे ती वाचली पाहिजेत. यातून सर्वांगीण विकासाचा विचार निर्माण होण्यास मदत होते, असे त्यांनी सांगितले.
सहाय्यक ग्रंथालय संचालक श्री. हुसे यांनी नांदेड ग्रंथोत्सव हा नेहमीच राज्यात पहिल्या क्रमांकावर राहिला आहे. जिल्ह्यातील ग्रंथालयांनी येथील दालनातून उपयुक्त ग्रंथांची खरेदी करुन आपले ग्रंथालये विविध ग्रंथांनी परिपूर्ण ठेवावीत, असे आवाहन केले.
जिल्हा ग्रंथालय अधिकारी अशिष ढोक यांनी प्रस्ताविकात नांदेड ग्रंथोत्सव आयोजनामागची भुमिका मांडली. वाचन संस्कृती वाढावी त्यांना नवीन ग्रंथ मिळावे यासाठी हा कार्यक्रम घेण्यात येत आहे. ग्रामीण भागात ग्रंथचळवळीचे चांगले काम होत आहे. शासनाने पुस्तकाचे गाव म्हणून सातारा जिल्ह्यातील भिल्लार गावाची निवड केली आहे, तशी गावे नांदेड येथे झाली पाहिजेत. नांदेड ग्रंथोत्सवात आयोजित विविध कार्यक्रमाचा जिल्ह्यातील नागरिकांनी लाभ घ्यावा, असे आवाहन केले.
महात्मा गांधी यांच्या 125 व्या जयंतीनिमित्त त्यांच्या जीवन चरित्रावरील चित्र प्रदर्शनाचे आयोजन याठिकाणी करण्यात आले होते. यावेळी मान्यवरांनी चित्र प्रदर्शन व ग्रंथ दालनाला भेट देवून पाहणी केली. प्रास्ताविक देवदत्त साने यांनी केले तर आभार प्रताप सुर्यवंशी यांनी मानले.
नांदेड ग्रंथोत्सवात रविवार 9 डिसेंबर रोजी सकाळी 11 वा. परिसंवाद आणि दुपारी 2 वा. वक्तृत्व स्पर्धा आणि  4 वा. समारोप कार्यक्रम व बक्षिस वितरण होणार आहेत. ग्रंथ प्रदर्शन सकाळी 10 ते रात्री 8 पर्यंत सुरु राहणार आहे, नागरिकांनी या कार्यक्रमाचा व ग्रंथ प्रदर्शनाचा लाभ घ्यावा, असेही आवाहन करण्यात आले आहे.
000000

  वृत्त क्र.   252   शस्त्रास्त्र बाळगण्यावर बंदी ; विनापरवानगी लाऊडस्पिकर नाही   जिल्हयात 144 कलम लागू ; आचारसंहितेचा कडक अवलंब     नांदेड ...