Thursday, May 17, 2018


आयटीआय उत्तीर्ण उमेदवारांचा
बुधवारी भरती मेळावा   
        नांदेड, दि. 18 :- आयटीआय उत्तीर्ण उमेदवारांसाठी पुणे येथील नामांकित मर्सडीज बेंझ कंपनीत फिटर, डिझेल-मोटार मेकानिक, वेल्डर, सिटमेटल, पेंटर जं., ट्रॅक्टर मे., मशिनिष्ट, मशिनिष्ट ग्रांइडर, टीडीएम, इलेक्ट्रीशियन या व्यवसायाकरीता शिकाऊ उमेदवार भरती बुधवार 23 मे 2018 रोजी औद्योगिक प्रशिक्षण संस्था नांदेड येथील सभागृहात सकाळी 11 वा. होणार आहे.
            पात्र उमेदवारांनी एसएससी, आयटीआय प्रमाणपत्र सोबत आणावे. या संधीचा जास्तीतजास्त उमेदवारांनी लाभ घ्यावा, असे आवाहन संस्थेचे प्राचार्य एस. आर. बुजाडे यांनी केले आहे.
0000000


ऑडिटर्स कार्यशाळेचे आयोजन
        नांदेड, दि. 17 :- जिल्हा उपनिबंधक सहकारी संस्था नांदेड, जिल्हा विशेष लेखापरिक्षक (वर्ग 1), सहकारी संस्था नांदेड व महाराष्ट्र राज्य सहकारी संघ म. पुणे संचलित सहकार प्रशिक्षण केंद्र लातूर यांच्या संयुक्त विद्यमाने 19 ते 20 मे 2018 कालावधीत चार्टड अकौटंट फर्म व प्रमाणित लेखापरिक्षक (सहकारी संस्था) यांचेसाठी जिल्हा मध्यवर्ती सहकारी बँक मुख्य शाखा सभागृह शिवाजीपुतळा नांदेड येथे ऑडिटर्स कार्यशाळेचे आयोजन करण्यात आले आहे.
जिल्ह्यातील चार्टड अकौटंट फर्म व प्रमाणित लेखापरिक्षक (सहकारी संस्था) यांनी कार्यशाळेस उपस्थित रहावे, असे आवाहन जिल्हा उपनिबंधक प्रवीण फडणीस, जिल्हा विशेष लेखापरिक्षक वर्ग 1  डी. ए. बायसठाकूर व लातूर सहकारी प्रशिक्षण केंद्राचे प्राचार्य बी. जे. ठोंबरे यांनी केले आहे.
            या कार्यशाळेत लेखापरिक्षकाची लेखापरिक्षण करताना भुमिका, संगणकीय पद्धतीने लेखापरिक्षण व शासन धोरणानुसार लेखापरिक्षण अहवाल रचना कशी असवा, संपत्ती मुल्यांकण पद्धती, भाग नेटवर्थ, संस्था नेटवर्थ आणि कर्ज उभारणी मर्यादा व काढण्याची पद्धती, सहकारी संस्था प्रकार निहाय 1 ते 53 फॉर्म, परिशिष्ट भरण्याची व तपासण्याची पद्धती, संस्था निधी व खर्चाचा रेशिओ, टीडीएस, जीएसटी, विशेष अहवाल सादर करण्याची पदृधती भाग (अ) - प्रशासकीय, भाग (ब) फौजदारी, लेखापरिक्षण करताना घ्यावयाची दक्षता, सहकारी संस्थेचा मार्गदर्शक म्हणून लेखापरिक्षकाची भुमिका, आर्थिक पत्रके विश्लेषण, 97 व्या घटना दुरुस्ती मधील झालेले बदल व लेखापरिक्षण करताना सहकारी संस्थानी झालेल्या बदलाची अंमलबजावणी केली आहे काय याची नोंद घेणे. ताण-तणाव व्यवस्थान व व्यक्तीमत्व विकास अशा विविध विषयावर तज्ज्ञांचे मार्गदर्शन होणार आहे, असे प्रसिद्धी पत्रकात म्हटले आहे.        
00000000


बोंडअळीने नुकसानग्रस्‍त शेतकऱ्यांना मदत वाटपात लोहा तालुका ठरला जिल्‍हयात अव्‍वल
लोहा तालुक्‍यातील 9471 शेतकऱ्यांना पावने तीन कोटींची मदत
                 नांदेड, दि. 17 :- लोहा तालुक्‍यातील 36 गावातील कापूस पिकावरील बोंडअळीच्‍या प्रादुर्भावामुळे नुकसानग्रस्त 9471 शेतक-यांना पावने तीन कोटी रुपयांची मदत शेतक-यांच्‍या थेट बँक खात्‍यात जमा करण्‍यात आली आहे. शेतक-यांना तातडीने अर्थिक मदत देण्‍यात लोहा तालुका हा नांदेड जिल्‍हयात अव्‍वल ठरला आहे. अशी माहिती तहसिलदार डॉ. आशिषकुमार बिरादार यांनी दिली आहे.
      जिल्‍हाधिकारी अरुण डोंगरे, अप्‍पर जिल्‍हाधिकारी संतोष पाटील, निवासी उपजिल्‍हाधिकारी  जयराज कारभारी, कंधारचे उपविभागीय अधिकारी प्रभोदय मुळे यांच्‍या मार्गदर्शनाखाली सन 2017 च्‍या खरीप हंगामामध्‍ये कापूस पिकावर बोंडअळीचे प्रादुर्भाव व धान पिकावर तुडतुडे रोगाचा प्रादुर्भाव झाल्‍यामुळे कापूस व धान पिकाचे नुकसानीसाठी बाधीत शेतक-यांना शासनाकडून मदत देण्‍यासंदर्भात महसूल व कृषि विभागाच्‍या क्षेत्रिय अधिका-याकडून पंचनामे करण्‍यात आले. त्‍यात लोहा तालुक्‍यातील 36 गावातील 9471 शेतक-यांचे नुकसान झाले. सदर नुकसानग्रस्‍त शेतक-यांना 2,75,69,841 रुपयाची मदत शेतक-यांच्‍या थेट बँक खात्‍यावर जमा करण्‍यासाठी 16 मे रोजी सदर रक्‍कमेचा धनादेश बँकेकडे जमा करण्‍यात आला आहे. सदर रक्‍कमेतून कोणत्‍याही बँकेने कोणत्‍याही प्रकारची वसूली करुनये, आसे निर्देश देण्‍यात आले आहेत.
लोहा तालुक्‍यातील नुकसान ग्रस्‍त गावे व कंसात मदत देण्‍यात आलेल्या शेतक-यांची संख्‍या पुढील प्रमाणे आहे. आडगाव (274), आंबेसांगवी (121), आंडगा (170), आष्‍टूर (668), अंतेश्‍वर (155), बामणी (60), बेरळी (641), बेटसांगवी (348), भाद्रा (169), भारसवाडा (74), भेंडेगाव (213), बोरगाव की (286), बोरगाव आ (292), बोरगाव (को (163), चोंडी (307), चिंचोली प.ऊ (53), चितळी (350), दगडगाव (405), दगडसांगवी (242), दापशेड (288), डेरला (112), देऊळगाव (484), ढाकणी (116), धनज बु (236), धनज खु (160), धानोरा मक्‍ता (975), धानोरा शे (200), धावरी (247), डोलारा (219), डोंगरगाव (94), डोणवाडा (226), घोटका (143), घुगेवाडी (138), गोलेगाव प.क. (309), गोलेगाव प.ऊ (521), गौंडगाव (12),
बोंडअळीच्‍या प्रादुर्भावामुळे नुकसान ग्रस्‍त शेतक-यांना तातडीने आर्थिक मदत देण्‍यात आल्‍यामुळे शेतकरी वर्गात समाधान व्‍यक्‍त करण्‍यात येत असून सदर मदत शेतक-यांच्‍या थेट बँक खात्‍यात जमा करणारा लोहा तालुका नांदेड जिल्‍हयात अव्‍वल ठरला आहे. तहसिलदार डॉ. आशिषकुमार बिरादार यांच्‍या मार्गदर्शनाखाली अव्‍वल कारकुन सुरेखा सुरुंगवाड, लिपीक मेघा लांडगू यांचा सदरील कामात सहभाग आहे.
0000


शिल्पनिदेशकाची तासिका तत्वावर
पदभरतीसाठी 2 जूनला मुलाखती
        नांदेड, दि. 17 :- औद्योगिक प्रशिक्षण संस्था नांदेड येथे शिल्पकारागीर योजनेंतर्गत तत्वाभ्यास व प्रात्यक्षिक शिकविण्यासाठी शिल्पनिदेशकांचे पद तात्पुरत्या स्वरुपात तासिका तत्वावर भरण्यात येणार आहे. इच्छूक पात्र उमेदवारांनी 2 जून 2018 रोजी मुलाखतीसाठी मुळ व छायांकित कागदपत्रांसह शासकीय औद्योगिक प्रशिक्षण संस्था नांदेड येथे सकाळी 11 वा. उपस्थित रहावे, असे आवाहन संस्थेचे प्राचार्य यांनी केले आहे.
            जोडारी, घर्षक, मशिनिष्ट, साचेकार, वेल्ड, कटिंग अँड सुईंग, मेसन, टीडीएम, वायरमन, गणित निदेशक, चित्रकला निदेशक, ड्राफ्टसमन (सिव्हील / मेकॅनिक), यांत्रिक मोटारगाडी (एमएमव्ही), टॅक्टर मेकॅनिक, इलेक्ट्रानिक्स मेकॉ., आर्किटेक्चरल असिस्टंट, कातारी, एम्प्लायबिलिटी स्किल, पत्रेकारागीर. या व्यवसायासाठी उमेदवार हा मेकॉनिकल, इलेक्ट्रॉनिक्स, इलेक्ट्रीकल, सिव्हील अभियांत्रिकी मधील किमान द्वितीय श्रेणीमध्ये पदवी किंवा उत्तीर्ण असावा. त्यानंतरचा एक किंवा दोन वर्षाचा संबंधीत व्यवसायातील अनुभव असावा. आयटीआय प्रमाणपत्र धारकांनी एनसीव्हीटी / एटीएस परीक्षा उत्तीर्ण व त्यानंतरचा तीन वर्षाचा अनुभव असावा. तसेच शिल्पनिदेशक एम्प्लायबिलिटी स्किल या पदाकरीता एमबीए / बीबीए  ही पदवी असणे आवश्यक आहे. सीटीआय उत्तीर्ण उमेदवारास व औद्योगिक प्रशिक्षण संस्थेतून सेवानिवृत्त झालेले शिल्पनिदेशक/गटनिदेशक यांना प्रधान्य देण्यात येईल. सध्या तासिक तत्वावरील सैद्धातिकसाठी 72 रुपये व प्रात्यक्षिकासाठी 36 रुपये प्रती तास याप्रमाणे मानधन मिळेल. तसेच मानधनाची रक्कम वाढविण्यासाठी शासनाकडे प्रस्ताव पाठविला असून तासिका तत्वावरील निदेशकांना वाढीव मानधन मिळण्याची शक्यता आहे. असेही संस्थेचे प्राचार्य यांनी प्रसिद्धी पत्रकात नमूद केले आहे.
000000


विशेष केंद्रीय सहाय्य योजनेंतर्गत
आदिवासी लाभार्थ्यांनी अर्ज करण्याचे आवाहन
        नांदेड, दि. 17 :- विशेष केंद्रीय सहाय्य योजनेंतर्गत आदिवासी मत्स्य व्यवसाय सहाकारी संस्था आदिवासी शेतकरी लाभार्थी, महिला, युवक-युवतींसाठी विविध योजना राबविण्यात येणार आहे. पात्र लाभार्थ्यांनी कार्यालयीन वेळेत गुरुवार 31 मे 2018 पर्यंत अर्ज करावेत, असे आवाहन प्रकल्प अधिकारी एकात्मिक आदिवासी विकास प्रकल्प किनवट यांनी केले आहे.  
            विशेष केंद्रीय सहाय्य योजनेंतर्गत आदिवासी युवक-युवतींना व्हिडीओ एडीटींग अभ्यासक्रमाचे प्रशिक्षण, तालुक्याच्या ठिकाणी व्यवसाय केंद्र स्थापन करणे, मत्सव्यवसाय आदिवासी सहकारी संस्थांना अर्थसहाय्य देणे, सभासदांना मत्स्य जाळे पुरवठा करणे, अनुसूचित जातीच्या दारिद्रय रेषेखालील लाभार्थ्यांना जंगलातील वनोपज मालावर प्रक्रिया करण्याचे प्रशिक्षण व युवकांना ऑटो मोबाईलचे प्रशिक्षण, युवकांना बिल्डींग सुपरवायझरचे प्रशिक्षण, शेतकऱ्यांच्या शेतात शेततळ्याचे खोदकाम करुन प्लास्टिक अस्तरीकरणासह ठिबक सिंचन संच व भाजीपाला फळबाग लागवडीसाठी अर्थसहाय्य या योजनेचा समावेश आहे.
            लाभार्थ्यांनी प्रकल्प अधिकारी एकात्मिक आदिवासी विकास प्रकल्प किनवट येथे माहिती सुविधा केंद्रात परिपुर्ण अर्ज 31 मे 2018 पर्यंत कार्यालयीन वेळेत सादर करावा. विहित नमुन्यातील कोरे अर्ज माहिती सुविधा केंद्रात उपलब्ध आहेत, अधिक माहितीसाठी प्रकल्प अधिकारी एकात्मिक आदिवासी विकास प्रकल्प किनवट येथे संपर्क साधावा.
000000


माजी सैनिकांच्या पाल्यांची  
पंतप्रधान शिष्यवृत्तीसाठी निवड
नांदेड, दि. 17 :- माजी सैनिकांच्या पाल्यांना लागू असलेली पंतप्रधान शिष्यवृत्तीची घोषणा झाली असून जिल्ह्यातील सात माजी सैनिकांच्या पाल्यांना व्यावसायिक अभ्यासक्रमासाठी ही शिष्यवृत्ती देण्यात येणार आहे.
निवड झालेले माजी सैनिकांचे पाल्य कु. कविता रामदास कदम, किनवट. कु. यशोदा गोविंदराव शेवाळकर नांदेड.  कु. वैशाली धोंडीबा कोळेकर, मुखेड.  कु. धनश्री राजेश्वर जोशी, लोहा. कु. ज्योती दिलीप व्यास, नांदेड. कु. सोनी प्रभाकर डाके नांदेड. व कु. प्रतिक्षा हनुमंतराव शिवनकर लोहा यांची नावे आहेत. यांना प्रत्येकी 27 हजार रुपये प्रतिवर्षे अभ्यासक्रम पुर्ण होईपर्यत शिष्यवृत्ती मंजूर झाली आहे. मा. पंतप्रधान यांच्या स्वाक्षरीचे अभिनंदनाचे प्रमाणपत्र माजी सैनिकांच्या पाल्यांना मिळणार आहे.  केंद्र व राज्य सरकारच्या योजनांचा माजी सैनिकांनी जास्तीतजास्त लाभ घ्यावा व ऑनलाईन अर्ज भरण्यासाठी जिल्हा सैनिक कल्याण कार्यालय नांदेड येथे मार्गदर्शनासाठी यावे असे आवाहन जिल्हा सैनिक कल्याण अधिकारी मेजर सुभाष सासने यांनी केले आहे.
000000


पीक कर्जमाफीचे अर्ज करण्यास 20 मे मुदत
वंचित शेतकऱ्यांनी ऑनलाईन अर्ज करण्याचे आवाहन 
नांदेड, दि. 17 :-  छत्रपती शिवाजी महाराज शेतकरी सन्मान योजनेतर्गत यापुर्वी विहित कालावधीत अर्ज करण्यापासून वंचित राहिलेल्या शेतकऱ्यांसाठी ऑनलाईन अर्ज करण्याची सुविधा रविवार 20 मे 2018 पर्यंत  आपले सरकार या सेवा केंद्रावर किंवा शेतकऱ्यांना https://csmssy.mahaonline.gov.in या पोर्टलवर स्वत: नोंदणी करुन युजर आय.डी. व पासवर्डच्या आधारे ऑनलाईन अर्ज सादर करता येतील.
काही शेतकरी वैयक्तिक कारणाने किंवा तांत्रिक अडचणीमुळे ऑनलाईन अर्ज करु न शकल्यामुळे कर्जमाफीच्या योजनेत सहभागी होऊ शकले नाहीत. त्यांना लाभ देण्यात येईल अशी घोषणा मुख्यमंत्री महोदयांनी केली होती. त्यानुसार 20 मे 2018  पर्यंत  आपले सरकार  पोर्टलवर किंवा शेतकऱ्यांनी स्वत: मोबाईल ओटीपीद्वारा केल्यानंतरच संबंधित अर्ज अपलोड करण्यात येणार आहेत. आपले सरकार पोर्टलवर माहिती भरुन ऑनलाईन अर्ज भरण्याची सुविधा नि:शुल्क आहे.
तसेच महाराष्ट्र शासनाचे सहकार, पणन व वस्त्रोद्योग विभागाचे दि. 9 मे,2018 रोजी शासन निर्णयाद्वारे या योजनेची व्याप्ती वाढविण्यात आली आहे. दि.1 एप्रिल 2001 ते 31 मार्च, 2009 पर्यत उचल केलेल्या पीक / मध्यम मुदत कर्जाची दि. 30 जून, 2016 रोजी थकीत असलेल्या थकबाकीदार शेतकऱ्यांना या योजनेचा लाभ देण्यात येणार आहे. दि. 1 एप्रिल,2001 ते 31 मार्च,2016 पर्यंत इमूपालन, शेडनेट, पॉलीहाऊस यासाठी मध्यम मुदत कर्ज घेतलेल्या व दि.30 जून, 2016 रोजी थकीत असलेल्या थकबाकीदार शेतक-यांना या योजनेचा लाभ मिळणार आहे. शासन निर्णय दि.9 मे,2018 च्याप्रमाणे योजनेच्या व्याप्तीत वाढ केल्यामुळे संबंधित शेतक-यांनी 20 मे, 2018 पर्यंत आपले सरकार सेवा केंद्रावर किंवा शेतकऱ्यांनी https://csmssy.mahaonline.gov.in या पोर्टलवर स्वत: नोंदणी करुन युजर आय.डी. व पासवर्डच्या आधारे ऑनलाईन अर्ज भरुन  योजनेचा लाभ घ्यावा, असेही आवाहन प्रवीण फडणीस, जिल्हा उपनिबंधक, सहकारी संस्था, नांदेड यांनी केले आहे.
000000


मान्‍सून पूर्वतयारी आढावा बैठकीचे
बचत भवन येथे आयोजन
      नांदेड, दि. 17 :- पावसाळी नैसर्गिक आपत्‍तीच्‍या संदर्भात करावयाच्‍या कार्यवाहीबाबत जिल्‍हा व तालुकास्‍तरीय खाते प्रमुखांची आढावा बैठक जिल्‍हाधिकारी यांच्‍या अध्‍यक्षतेखाली शनिवार 19 मे 2018 रोजी सकाळी 11.30 वा. बचत भवन जिल्‍हाधिकारी कार्यालय नांदेड येथे आयोजित करण्‍यात आली आहे.
     पावसाळयात उद्भवणाऱ्या विविध आपत्‍तींना तोंड देण्‍यासाठी आणि सावधगिरीच्‍या उपाययोजनांची पुर्वतयारी करण्‍यासाठी या बैठकीचे आयोजन करण्‍यात आले आहे, असे जिल्हाधिकारी कार्यालयातील आपत्ती व्यवस्थापन शाखेच्यावतीने कळविले आहे.
00000


अनाथ प्रमाणपत्रासाठी प्रस्ताव
सादर करण्याचे आवाहन
        नांदेड, दि. 17 :- बालगृहातून बाहेर पडलेल्या ज्या अनाथ मुलांच्या जवळ जातीचे प्रमाणपत्र नाहीत, अशा मुलांनी त्यांच्या शेवटच्या वास्तव्यास असलेल्या संस्थेशी संपर्क साधून ते अनाथ असल्याबाबतचा प्रस्ताव संबंधीत संस्थेमार्फत जिल्हा महिला व बाल विकास अधिकारी कार्यालय नांदेड यांचेकडे सादर करावेत, असे आवाहन जिल्हा महिला व बाल विकास अधिकारी नांदेड यांनी केले आहे.
बालन्याय ( मुलांची काळजी व  संरक्षण ) अधिनियमांतर्गत राज्यात कार्यरत शासकीय, स्वयंसेवी बालगृहांमध्ये दाखल होणाऱ्या अनाथ मुलांना संस्थेतून बाहेर पडतांना त्यांच्याजवळ जातीचे प्रमाणपत्र नसल्यामुळे त्यांना शैक्षणिक, आर्थिक, सामाजिक सवलती आणि विशेष लाभ मिळत नसल्यामुळे अशा लाभार्थ्यांना अनाथ असल्याचे प्रमाणपत्र महिला व बाल विकास आयुक्तालय स्तरावरुन निर्गमीत करण्यात येणार आहे. असेही प्रसिद्धी पत्रकात नमूद केले आहे.    
000000




महाराष्ट्र विधानसभा अध्यक्ष
हरिभाऊ बागडे यांचा दौरा
        नांदेड, दि. 17 :- महाराष्ट्र विधानसभा अध्यक्ष हरिभाऊ बागडे हे नांदेड दौऱ्यावर येत असून त्यांचा दौरा कार्यक्रम पुढील प्रमाणे राहील.
            शुक्रवार 18 मे 2018 रोजी औरंगाबाद येथून मोटारीने सकाळी 10.30 वा. शासकीय विश्रामगृह नांदेड येथे आगमन व राखीव. सकाळी 10.50 वा. शासकीय विश्रामगृह येथून मोटारीने मातोश्री मंगल कार्यालय सिडको रोड कौठा नांदेडकडे प्रयाण. सकाळी 11 वा. आगमन व भारतीय जनता पक्षाचे ज्येष्ठ कार्यकर्ते प्रा. गणपतराव राऊत यांच्या अमृत महोत्सव सत्कार सोहळ्यास उपस्थिती. स्थळ- मातोश्री मंगल कार्यालय सिडको रोड कौठा नांदेड. त्यानंतर सोईनुसार मोटारीने मातोश्री मंगल कार्यालय सिडको रोड कौठा नांदेड येथून औरंगाबादकडे प्रयाण करतील.
00000

  वृत्त क्र.   252   शस्त्रास्त्र बाळगण्यावर बंदी ; विनापरवानगी लाऊडस्पिकर नाही   जिल्हयात 144 कलम लागू ; आचारसंहितेचा कडक अवलंब     नांदेड ...