Thursday, July 13, 2017

 क्रीडा स्पर्धा आयोजनासाठी
  शिक्षकांची 18 जुलैला बैठक 
नांदेड, दि. 13 :- क्रीडा व युवक सेवा संचालनालयांतर्गत सन 2017-18 या शैक्षणिक वर्षातील विविध शासकीय क्रीडा स्पर्धा आयोजन व नियोजनाबाबत नांदेड जिल्ह्यात प्रत्येक तालुक्यातील (महानगरपालिका क्षेत्र वगळून) प्राचार्य, मुख्याध्यापक, तालुका क्रीडा संयोजक, क्रीडा शिक्षकांची बैठक मंगळवार 18 जुलै 2017 रोजी जिल्हा क्रीडा संकुल इनडोअर हॉल स्टेडीयम परीसर नांदेड येथे दुपारी 12.30 वा. आयोजित करण्यात आली आहे. संबंधितांनी बैठकीस वेळेत उपस्थित रहावे, असे आवाहन जिल्हा क्रीडा अधिकारी गंगालाल यादव यांनी केले आहे.  

000000
होमगार्ड सदस्य नोंदणी सोमवारी
सकाळी 8 ते सायं 4 यावेळेत होणार
नांदेड दि. 13 :- जिल्हा होमगार्ड कार्यालयांतर्गत नांदेड जिल्ह्यातील पथक निहाय नवीन होमगार्ड सदस्य नोंदणी प्रक्रिया सोमवार 17 जुलै 2017 रोजी सकाळी 8 ते सायं 4 वाजेपर्यंत पोलीस मुख्यालय, वजिराबाद नांदेड येथे होणार आहे. जास्तीतजास्त नागरिकांनी होमगार्ड सदस्य नोंदणीसाठी आवश्यक कागदपत्रांसह वेळेत उपस्थित रहावे, असे आवाहन नांदेड जिल्हा समादेशक होमगार्ड तथा अपर पोलीस अधीक्षक मंगेश शिंदे यांनी केले आहे.
सदस्य नोंदणी प्रक्रियेसाठी सर्वसाधारण अटी व शर्ती पुढील प्रमाणे राहतील. पुरुष उमेदवार- वय 20 ते 50 वर्षे, शिक्षण- दहावी उत्तीर्ण, उंची- 162 सेंमी. छाती न फुगवता 76 सेमी व फुगवुन 81 सेमी. महिला उमेदवार- वय 20 ते 50 वर्षे, शिक्षण- दहावी उत्तीर्ण, उंची- 150 सेमी.
सदस्य नोंदणीचे वेळी पुढील प्रमाणे मुळ कागदपत्रे व झेरॉक्स प्रती आणणे आवश्यक आहे. शाळा सोडल्याचा दाखला, दहावी उत्तीर्ण प्रमाणपत्र, आधारकार्ड / मतदान कार्ड / रहिवाशी दाखला किंवा रेशनकार्ड. नुकतेच काढलेले दोन पासपोर्ट आकाराचे छायाचित्र. तसेच जिल्हास्तर, राज्यस्तर व राष्ट्रीय स्तरीय क्रीडा प्रमाणपत्र, एनसीसीबी सर्ट, सी. सर्ट प्रमाणपत्र, जडवाहन परवाना, नागरी संरक्षण सेवेत असलेले परंतू स्थानीक ठिकाणी तीन प्रशिक्षण प्रमाणपत्रधारक, आयटीआय प्रमाणपत्र किंवा माजी सैनिक यांना प्राधान्य देण्यात येईल.
अधिक माहितीसाठी भाग्यनगर येथील नांदेड जिल्हा समादेशक होमगार्ड कार्यालयाचा दूरध्वनी नंबर 02462-254261 वर संपर्क साधावा. नवीन उमेदवार नोंदणी तसेच मैदानी चाचणीसाठी येणाऱ्या उमेदवारांना येण्या-जाण्याचा कुठलाही प्रवास खर्च दिला जाणार नाही याची संबंधीतांनी नोंद घ्यावी, असेही आवाहन जिल्हा समादेशक होमगार्ड तथा अपर पोलीस अधीक्षक मंगेश शिंदे यांनी केले आहे.

000000
  परीक्षा केंद्र परिसरात प्रतिबंधात्मक आदेश 
नांदेड, दि. 13 :- सहायक कक्ष अधिकारी, विक्रीकर निरीक्षक, पोलीस उपनिरीक्षक संयुक्त पुर्व परीक्षा- 2017 ही रविवार 16 जुलै 2017 रोजी सकाळी 10.30 ते दुपारी 12 वा. या कालावधीत नांदेड शहरातील एकूण 51 केंद्रावर घेण्यात येत आहे. या परीक्षा केंद्राच्या 100 मीटर परिसरात फौजदारी प्रक्रिया संहिता 1973 चे कलम 144 अन्वये प्रतिबंधात्मक आदेश जारी करण्यात आला आहे.
या परीक्षा केंद्राच्या परिसरात रविवार 16 जुलै रोजी सकाळी 8 ते दुपारी 2 वाजेपर्यंत या कालावधीत परीक्षार्थी व परीक्षेच्या कामाशी संबंधीत असलेले अधिकारी व कर्मचारी या व्यतिरिक्त इतर कोणत्याही व्यक्तीस प्रवेश करता येणार नाही. तसेच यावेळेत परीक्षा केंद्राच्या परिसरातील 100 मीटर पर्यंतची सर्व सार्वजनिक टेलिफोन्स, एसटीडी, आयएसडी, भ्रमणध्वनी, फॅक्स, झेरॉक्स आणि ध्वनीक्षेपक चालू ठेवण्यास प्रतिबंध राहील, असे जिल्हादंडाधिकारी नांदेड यांनी कळविले आहे.
000000


बिलोली, भोकर ग्रामीण रुग्णालयाचा
शासनाच्या "कायाकल्प" पुरस्काराने गौरव
नांदेड दि. 13 :- ग्रामीण रुग्णालय बिलोली भोकर यांना शासनाकडून उत्कृष्ट कार्याबद्दल दिला जाणारा "कायाकल्प-2016-17" या पुरस्काराचे वितरण आरोग्य मंत्री डॉ. दीपक सावंत यांच्या हस्ते प्रत्येकी एक लक्ष रुपये, सन्मान चिन्ह प्रमाणपत्र या स्वरुपात देऊन नुकतेच गौरविण्यात आले.   
हा पुरस्कार वितरण सोहळा मुंबई येथील यशवंतराव चव्हाण सभागृहा सोमवार 10 जुलै रोजी पार पडला. यावेळी खासदार अरविंद सावंत, आरोग्य विभागाचे अपर मुख्य सचिव डॉ. विजय सतबीर सिंग, आरोग्य सेवा आयुक्त डॉ. प्रदीप व्यास, आरोग्य सेवा संचालक डॉ. सतीश पवार, डॉ. अर्चना पाटील आदी उपस्थित होते.
पुरस्काराबाबत जिल्हा शल्य चिकित्सक डॉ. बी. पी. कदम म्हणाले की,  हा केवळ संस्थानाचा गौरव नसून त्यासाठी काम करणाऱ्या सर्व कर्मचारी यांचा आहे. येत्या वर्षी नांदेड जिल्ह्याला अधिकाधिक पारितोषिक मिळतील यासाठी आम्ही प्रयत्न रु. जिल्हा आरोग्य अधिकारी डॉ. बालाजी शिंदे यांनी राज्यस्तरीय पुरस्कार मिळणे ही आनंदाची बाब असून नांदेड जिल्ह्यातील वैद्यकीय सेवांची गुणवत्ता उंचावली जाईल. पुरस्काराचे श्रेय जिल्हा गुणवत्ता आश्वासन चमुचे असल्याचे सांगितले. वैद्यकीय अधीक्षक डॉ. उत्तम इंगळे म्हणाले, सातत्य चिकाटी हा गुरुमंत्र अवलंबून प्रथमवर्षीच राज्यस्तरावर 17 व्या स्थानी आहोत. या पुरस्कारासाठी डॉ. कंदेवाड व डॉ. बि. पी. कदम (जिल्हा शल्य चिकीत्सक) यांचे मोलाचे मार्गदर्शन मिळाले तसेच या पुरस्काराचे श्रेय ग्रामीण रुग्णालय भोकर येथील सर्व वैद्यकीय अधिकारी व कर्मचाऱ्यांना जाते.  पुढील काळात सातत्य राखून आणखी सुधारणा करु असे सांगितले. वैद्यकीय अधीक्षक डॉ. नागेश लखमावार यांनी, ही आमच्यासाठी गौरवाची बाब असून असेच कार्य करून पुढील काळात राज्यात अव्वल स्थानी येण्यासाठी प्रयत्न करु असे सांगितले.
राज्यस्तरीय ग्रामीण रुग्णालय उपजिल्हा रुग्णालय प्रवर्गात ग्रामीण रुग्णालय बिलोली दहाव्या क्रमांकावर तर ग्रामीण रुग्णालय भोकर सतराव्या क्रमांकावर आहे. यामुळे नांदेड जिल्ह्यातील आरोग्य विभागाची मान उंचावली आहे. तसेच जिल्हास्तरावर एकूण 5 प्राथमिक आरोग्य केंद्रांना कायाकल्प पारितोषिक जाहीर झाला आहे ज्यामध्ये प्राथमिक आरोग्य केंद्र भोसी, सरसम, अर्धापूर, मालेगाव तुप्पा यांचा समावेश आहे. नांदेडचे जिल्हाधिकारी अरुण डोंगरे यांच्या हस्ते नुकतेच ग्रामीण रुग्णालय बिलोली भोकर यांना ISO २००९:२०१५ नामांकनाचे प्रमाणपत्र देण्यात आले होते.
महाराष्ट्रातील शासकीय वैद्यकीय संस्थांची चार स्तरीय तपासणी करून तेथे सर्व सोई-सुविधा, स्वच्छता, बायोमेडिकल वेस्ट मॅनेजमेंट, कर्मचारी यांची प्रशिक्षणे त्यांचा वापर या सर्व बाबींचा बारकाईने निरीक्षण करून सर्वोत्कृष्ट आरोग्य संस्थांना कायाकल्प हा पुरस्कार शासनामार्फत दिला जातो.
हा पुरस्कार स्वीकारण्यासाठी जिल्हा आरोग्य अधिकारी डॉ. शिंदे, वैद्यकीय अधीक्षक डॉ. इंगळे, डॉ. लखमावार, जिल्हा गुणवत्ता आश्वासन समन्वयक डॉ. साईप्रसाद शिंदे, भोकर वैद्यकीय अधिकारी डॉ. दिलीप लोखंडे सोबत सोएल रब्बानी, विनोद बोधगीरे विठ्ठल शेळके उपस्थित होते.

000000

  वृत्त क्र.   252   शस्त्रास्त्र बाळगण्यावर बंदी ; विनापरवानगी लाऊडस्पिकर नाही   जिल्हयात 144 कलम लागू ; आचारसंहितेचा कडक अवलंब     नांदेड ...