Thursday, December 8, 2016

राज्य निवडणूक आयुक्त सहारिया यांचा नांदेड दौरा
नांदेड, दि. 8 :-  राज्य निवडणूक आयुक्त ज. स. सहारिया हे शुक्रवार 9 डिसेंबर 2016 रोजी नांदेड दौऱ्यावर येत असून त्यांचा दौरा कार्यक्रम पुढील प्रमाणे राहील.
शुक्रवार 9 डिसेंबर रोजी सकाळी 9.30 वा. शासकीय विमानाने नांदेड विमानतळावर आगमन. सकाळी 10 वा. जिल्हाधिकारी कार्यालय नांदेड येथे जिल्हा औरंगाबाद, नांदेड व लातूर येथील नगरपालिका निवडणुकासंबंधी आढावा बैठक. दुपारी 12 वा. नांदेड जिल्ह्यातील राजकीय पक्ष बैठक. दुपारी 12.30 वा. पत्रकार परिषद. दुपारी 2 वा. शासकीय विमानाने नागपूरकडे प्रयाण करतील.

000000
विक्रेत्यांनी शेतकऱ्यांना ऑनलाईन पद्धतीने
कृषिनिविष्ठा उपलब्ध करुन दयाव्यात
-         जिल्हाधिकारी सुरेश काकाणी
नांदेड, दि. 8 :- कॅशलेस व्यवहारामुळे कृषि निविष्ठांची खरेदीसाठी शेतकऱ्यांनी ऑनलाईन पद्धतीचा अवलंब करणे आवश्यक आहे. त्यासाठी विक्रेत्यांनी स्वाईप ( पीओएस ) मशीनची सुविधा शेतकऱ्यांसाठी उपलब्ध करुन द्यावी , असे निर्देश जिल्हाधिकारी सुरेश काकाणी यांनी दिले.
येथील जिल्हाधिकारी कार्यालयातील जिल्हाधिकारी यांच्या निजी कक्षात कृषि निविष्ठांची खरेदीची रक्कम ऑनलाईन पद्धतीने आदा करण्याबाबत आयोजित बैठकीत जिल्हाधिकारी श्री. काकाणी बोलत होते. यावेळी नांदेड मनपाचे आयुक्त समीर उन्हाळे, जिल्हा अधीक्षक कृषि अधिकारी डॉ. तुकाराम मोटे, जिल्हा कृषि अधिकारी पी. एस. मोरे, अग्रणी बँकेचे व्यवस्थापक बी. यु. वाघमारे, कृषि विभागाचे, बॅकेचे अधिकारी व कृषिनिष्ठा विक्रेते उपस्थित होते.
शेतकऱ्यांमध्ये कॅशलेश व्यवहारासंबंधी बँकानी जागृती करुन या डिजिटल पद्धतीच्या वापरासाठी त्यांना प्रेरीत करावेत. जनधन योजनेमुळे प्रत्येक व्यक्तीचे बँक खाते आहे. बँक खाते उघडताना कार्ड दिलेले आहे. परंतू त्याच्या वापराअभावी कार्ड बंद असले तरी ते पुन्हा बँकेशी संपर्क साधून सुरु करता येते. त्यामुळे शेतकऱ्यांना खते, बियाणे व किटकनाशकांची खरेदी या कार्डच्या सहाय्याने करता येईल. विक्रेत्यांनी बँकेकडून स्वाईप (पीओएस) मशीन घेवून ही सुविधा शेतकऱ्यांना उपलब्ध करुन दयावी असेही जिल्हाधिकारी श्री. काकाणी यांनी सांगितले.
शेतकऱ्यांपासून सामान्य नागरिकांमध्ये कॅशलेस व्यवहाराचे महत्व पटवून देण्यासाठी जनजागृती करणे गरजेचे आहे. बँकांनी डिजीटल बँकिंग पद्धतीची माहिती देण्यासाठी गावोगावी प्रात्यक्षिकांचे उपक्रम हाती घ्यावेत. पोस्टर, माहितीपत्रके, दृकृश्राव्य आदींचा वापर करण्यावर भर दयावा. बँकांना जोडलेल्या गावात प्रशिक्षणाचे कार्यक्रम आयोजित करावेत. शेतकऱ्यांची शंकांचे निरासरन करण्यासाठी मास्टर टेनर नियुक्त्या कराव्यात, प्रत्येक बँकांनी किमान एका गावाची निवड करुन गाव कॅशलेस करण्याचे प्रयत्न करावेत. शेतकऱ्यांचे बँक खाते नसेल तर त्यांना प्रिपेडकार्ड घेता येणार आहे. त्यामुळे कृषि निविष्ठा खरेदीस अडचण येणार नाही. त्यासाठी बँकांनी त्यांना मदत करावी, असेही जिल्हाधिकारी श्री. काकाणी यांनी सांगितले.
यावेळी जिल्हा कृषि अधिकारी पी. एस. मोरे यांनी कृषि निविष्ठांची खरेदीची रक्कम ऑनलाईन पद्धतीने अदा करण्याची पद्धतीची माहिती सादरीकरणाने दिली तर स्टेट बँक ऑफ इंडियाचे सहाय्यक प्रफुल्ल जोगी यांनी कॅशलेस व्यवहारासाठी पर्यायी माध्यमाची माहिती सादरीकरणातून दिली.
या बैठकीच्या चर्चेत मनपा आयुक्त श्री. उन्हाळे , जिल्हा अधीक्षक कृषि अधिकारी डॉ. मोटे, जिल्हा अग्रणी बँकेचे व्यवस्थापक श्री. वाघमारे यांनी भाग घेवून विधायक सूचना केल्या.

000000
दैनंदिन कॅशलेस व्यवहारासाठी बँकांनी
अधिकाधिक सुविधा देण्यासाठी प्रयत्नशील रहावे
-         जिल्हाधिकारी काकाणी
नांदेड, दि. 8 :- दैनंदिन कॅशलेस व्यवहार करताना शेतकरी व सामान्य नागरिकांना अधिकाधिक सुविधा सहजरित्या उपलब्ध करुन देण्यासाठी बँकांनी प्रयत्नशील रहावेत, अशा सूचना जिल्हाधिकारी सुरेश काकाणी यांनी दिल्या.
जिल्हाधिकारी कार्यालयातील निजी कक्षात आज कॅशलेस व्यवहारांविषयी सादरीकरणातून माहिती देण्यात आली. त्यावेळी जिल्हाधिकारी श्री. काकाणी बोलत होते. यावेळी जिल्हा परिषदेचे मुख्य कार्यकारी अधिकारी अशोक शिनगारे, नांदेड वाघाळा शहर महानगरपालिकेच आयुक्त समीर उन्हाळे, अग्रणी बँकेचे व्यवस्थापक बी. यु. वाघमारे, जिल्हा अधीक्षक कृषि अधिकारी डॉ. तुकाराम मोटे आदी विविध विभागांचे अधिकारी, बँकेचे अधिकारी उपस्थित होते.
जिल्ह्यातील शेतकऱ्यांपासून, नागरिकांपर्यंत दैनंदिन व्यवहारात डिजिटल पद्धतीचा अवलंब करणे काळाची गरज झाली आहे. दैनंदिन व्यवहार करताना कॅशलेस व्यवहाराचा वापर करण्यासाठी बँकांनी विविध सुविधा उपलब्ध करुन दिल्या आहेत.  बँक खाते आधार कार्डाशी आणि मोबाईल क्रमांकाशी संलग्न करुन घेतल्यास कॅसलेस व्यवहाराच्या सुविधेस मदत होईल. खात्यात होणाऱ्या व्यवहाराची अद्यावत माहिती ग्राहकांना मिळू शकेल. त्यामुळे आर्थिक व्यवहारात अधिक पारदर्शकता आणणे सहज शक्य आहे. यासाठी बँकांनी कॅशलेस व्यवहारासंबंधी अधिकाधिक जागृती निर्माण करुन सुविधाही उपलब्ध करुन द्याव्यात, असेही जिल्हाधिकारी श्री. काकाणी यांनी सांगितले.
 शासकीय योजनांचा लाभ वस्तु व रोख स्वरुपात न देता रक्कम लाभार्थ्याच्या थेट बँक खात्यावर संबंधित विभागाने जमा करावेत. अधिकारी व बँकांनी यासंबंधी शेतकऱ्यांमध्ये जागृती निर्माण करावी. कॅशलेस व्यवहारासाठी शहरी भागाबरोबर ग्रामीण भागातही बँकांनी स्पाईप (पीओएस) मशीन अधिकाधिक उपलब्ध करुन द्याव्यात, असे निर्देश जिल्हाधिकारी श्री. काकाणी यांनी दिले.
यावेळी स्टेट बँक ऑफ इंडियाचे सहाय्यक प्रफुल्ल जोगी यांनी सादरीकरणातून कॅशलेस व्यवहारासंबंधी असणारे पर्यायांची माहिती दिली.

– डिजिटल बँकिंगचे विविध मार्ग –
यूपीआय : या पद्धतीत आपला मोबाईल क्रमांक बँक अथवा एटीएम मध्ये नोंदवा. संबंधित बँकेचे ॲप डाऊनलोड करा. आपला आयडी तयार करा. आपला पिन नंबर सेट करा. यानंतर आपण कोठूनही आपली आर्थिक देवाण-घेवाण करु शकतात. यूएसएसडी : आपला मोबाईल नंबर बँक खात्याशी लिंक करा. आपल्या फोन वरुन * 99 # डायल करा. आपल्या बँकेचे नाव भरा (फक्त पहिली तीन आद्याक्षरे) किंवा आयएफएससी कोडची पहिली चार अक्षरे, फंड ट्रान्स्फर- MMID हा ऑप्शन निवडा. ज्यांच्याशी व्यवहार करावयाचा आहे त्यांचा मोबाईल नंबर आणि MMID टाका, द्यावयाची रक्कम आणि MPIN स्पेस आणि खाते नंबरचे शेवटचे चार अंक भरा. यानंतर आपण आर्थिक देवाण-घेवाण करु शकतात. ई वॅलेट : एसबीआय बडी paytm, freecharge यापैकी कोणतेही वॅलेट डाऊन लोड करा, आपला मोबाईल नंबर रजिस्टर करा, त्याला आपल्या डेबिट, क्रेडिट कार्ड किंवा नेट बँकिंगशी लिंक करा, आता तुमचा फोन हेच तुमचे वॅलेट अर्थात पैशाचे पाकीट झाले आहे. स्वाईप (पीओएस) : आपली आर्थिक देयके आपल्या प्रिपेड, क्रेडिट किंवा डेबिट कार्डद्वारे करा. आपले कार्ड स्वाईप करा, आपला पिन नंबर टाका, पावती घ्या. आधार संलग्न पेमेंट पद्धती : आपले आधार कार्ड हे आपल्या बँक खात्याशी संलग्न करा. आपण आपली देवाण-घेवाण, खात्यावरील शिलकेची चौकशी, पैसे जमा करणे, काढणे, एका खात्यातून दुसऱ्या खात्यावर पाठविणे हे सर्व व्यवहार करु शकता.
0000000






राज्य निवडणूक आयुक्त सहारिया यांच्या
अध्यक्षतेखाली आज आढावा बैठक
नांदेड, दि. 8 :-  जिल्ह्यातील नगरपरिषद / नगरपंचायतीच्या सार्वत्रिक निवडणुकीच्या तयारीचा आढावा राज्य निवडणूक आयुक्त ज. स. सहारिया यांच्या अध्यक्षतेखाली शुक्रवार 9 डिसेंबर 2016 रोजी सकाळी 10 वा. जिल्हाधिकारी कार्यालयातील जिल्हा नियोजन समिती सभागृह नांदेड येथे घेण्यात येणार आहे, असे जिल्हाधिकारी नांदेड यांनी कळविले आहे.
संबंधित विभागांनी निवडणुकीच्या अनुषंगाने केलेल्या कार्यवाहीच्या अद्यावत माहितीसह बैठकीस उपस्थित रहावे, असेही त्यांनी कळविले आहे.
00000


उमेदवारांनी आचार संहितेचे पालन करावे
नांदेड, दि. 8  :- उमेदवारांनी आचार संहितेचे पालन करावे व शांततेत निवडणूक पार पाडावेत, असे आवाहन निवडणुक निर्णय अधिकारी, नगरपरिषद धर्माबाद  डॉ. सचिन खल्‍लाळ यांनी केले.
धर्माबाद नगरपरिषद सार्वत्रिक निवडणूक संदर्भात उमेदवार व राजकीय पक्षाकडून आचार संहिताचे उल्‍लंघन होवू नये यासाठी कोणतदक्षता घेणे आवश्‍यक आहे. याबाबत संबंधीत उमेदवारांना माहिती व्‍हावी यासाठी आज आचारसंहिता संदर्भात नगरपरिषद सभागृहात बैठक आयोजन करण्‍यात आली होती.
            आचार संहिताबाबत काय करावे व काय करु नये याबाबत सहाय्यक निवडणूक निर्णय अधिकारी श्रीमती ज्‍योती चौहान यांनी मार्गदर्शन केले.  बैठकीस सहाय्यक निवडणूक निर्णय अधिकारी सुनिल माचेवाड, उमेदवार पक्षाचे कार्यकर्त नगरपरिषद निवडणूक विभागाचे रुक्‍माजी भोगावार व पोलीस कर्मचारी उपस्थित होते.

000000
जिल्ह्यात जमावबंदी, शस्त्रबंदी आदेश लागू
नांदेड, दि. 8  :- जिल्ह्यात बुधवार 21 डिसेंबर 2016  रोजी मध्यरात्रीपर्यत शस्त्रबंदी व जमावबंदी आदेश लागू केला आहे, अशी माहिती अपर जिल्हादंडाधिकारी कार्यालयाकडून देण्यात आली आहे.
आगामी काळातील सण, उत्सव आणि इतर सार्वजनिक कार्यक्रम, विविध प्रकारची संभाव्य आंदोलनांची शक्यता यांच्‍या पार्श्वभुमीवर जिल्ह्यात शांतता व सुव्यवस्था कायम रहावी म्हणून अपर जिल्हादंडाधिकारी यांनी मुंबई पोलीस अधिनियम 1951 चे कलम 37 (1) व (3) अन्वये जिल्ह्यात बुधवार 7 डिसेंबर ते 21 डिसेंबर 2016 रोजीच्‍या मध्यरात्रीपर्यत शस्त्रबंदी व जमावबंदी आदेश लागू केला आहे. त्यानुसार पाच किंवा पाचपेक्षा अधिक व्यक्तींनी या आदेशात नमूद असलेली कृत्ये सार्वजनिक परिसर किंवा त्याच्या जवळपास करण्यास बंदी घालण्यात आली आहे. हा आदेश पोलीस अधिकारी, शासकीय कर्मचारी, विवाह, अंत्ययात्रा, धार्मिक कार्यक्रम, यात्रा व इतर सक्षम अधिकारी यांनी विशेषरित्या परवानगी दिलेल्या मिरवणुकांना लागू होणार नाही.

000000
अंशकालीन उमेदवारांना नाव नोंदणीसाठी
30 डिसेंबर पर्यंत मुदत ; अर्ज करण्याचे आवाहन
नांदेड, दि. 8 :- जिल्ह्यातील अंशकालीन उमेदवारांनी जुलै-2016 मध्ये अंशकालीन प्रमाणपत्र पडताळणीसाठी विहित नमुन्यात अर्ज सादर केली नाहीत अशा उमेदवारांनी पुरवणी यादीसाठी मंगळवार 13 डिसेंबर ते शुक्रवार 30 डिसेंबर 2016 पर्यंत विहित नमुन्यातील अर्ज शपथपत्र, शैक्षणिक प्रमाणपत्रांसह जिल्हा कौशल्य विकास रोजगार व उद्योजकता मार्गदर्शन केंद्र नांदेड येथे सादर करावीत, असे आवाहन सहाय्यक संचालक जिल्हा कौशल्य विकास, रोजगार केंद्र नांदेड यांनी केले आहे.   
अंशकालीन उमेदवारांची अद्यावत यादी तयार करण्यात आली होती. शासनाकडून या यादीस मुदतवाढ देण्यात आली आहे. पुरवणी यादी तयार करण्यासाठी जिल्ह्याती ज्या अंशकालीन उमेदवारांचे यादीत नाव समाविष्ट नाहीत अशा उमेदवारांनी विहित नमुन्यातील अर्जासोबत शपथपत्र व शैक्षणिक कागदपत्रे सादर करावीत. मुदतीनंतर आलेल्या उमेदवारांची नावे यादीत समाविष्ट होणार नाहीत. अधिक माहितीसाठी 02462-251674 या दूरध्वनीवर संपर्क साधवा, असेही आवाहन केले आहे.

00000

  वृत्त क्र.   252   शस्त्रास्त्र बाळगण्यावर बंदी ; विनापरवानगी लाऊडस्पिकर नाही   जिल्हयात 144 कलम लागू ; आचारसंहितेचा कडक अवलंब     नांदेड ...