वृत्‍त क्र.  339

 

1950 नंबरवर आचारसंहिताभंगच्‍या तक्रारी करा

 

नांदेड दि. 14 : भारत निवडणूक आयोगाने प्रत्‍येक नागरिकाला आचारसंहिता भंग संदर्भात तक्रारी करता याव्‍यात यासाठी सहज सोपा संपर्क नंबर म्‍हणून 1950 हा डायल क्रमांक उपलब्‍ध केला आहे. या डायल क्रमांकावरून निवडणुकीच्‍या संदर्भात कुठलाही गैरप्रकार होत असल्‍यास तक्रार करण्‍याचे आवाहन केले आहे.

 

निवडणुकीच्‍या संदर्भात 1950 हा क्रमांक आदर्श आचारसंहितेचा भंग होत असल्‍यास वापरण्‍याचा नंबर आहे. अनेकजण यावर आपले मतदान कुठे यासाठी फोन करतात. मात्र याकरीता निवडणूक आयोगाने वेगळे नंबर दिले असून 1950 वर नागरिकांनी निवडणुकीतील गैरप्रकारासंदर्भात आयोगाला माहिती देण्‍याचे सहकार्य करावे. याठिकाणी आचारसंहिता भंगच्‍या तक्रारी दाखल कराव्‍यात.

 

असे चालते 1950 चे काम

1950 या क्रमांकावर निवडणूक संदर्भात आदर्श आचारसंहिता भंग, पैशांचा वापर, दारूचा वापर, अफवा कोणी पसरवत असेल तर त्याची माहिती देता येते. आपल्या हातातील मोबाईलवरूनही आपल्याला संपर्क साधता येते. 24 तास ही सेवा उपलब्ध आहे. आपल्या मतदानाच्या माहिती संदर्भात नव्हे तर निवडणुकीच्या संदर्भात काही तक्रारी असेल तर याचा वापर करण्यात यावा, असे आवाहन प्रशासनाने केले आहे.

000000

 वृत्‍त क्र.  338 

बंदोबस्‍त वाढवला ; फिरत्‍या पथकांकडून 

आतापर्यंत 57 लाखांचा मुद्येमाल जप्‍त

 

49 लाखाची रोकड, साडेचार किलो चांदी, साडेचार लाखाचे सोने जप्‍त

 

नांदेड दि. 14 : लोकसभा निवडणुकीच्या पार्श्वभूमीवर जिल्ह्यामध्ये कडेकोट बंदोबस्त वाढविण्‍यात आला असून फिरत्‍या पथकांकडून मोठ्याप्रमाणात ठिकठिकाणी तपासणी सुरू आहे. तपासणी प्रत्येकाने सहकार्य करण्याचे आव्हान प्रशासनाने केले आहे.

 

निवडणूक काळात नागरिकांनी व्यापाऱ्यांनी, व्यावसायिकांनी कोणतेही सामान सोबत ठेवतांना त्‍यासंदर्भाचे दस्‍तऐवज सोबत ठेवावेत, असे आवाहन प्रशासनाने केले आहे. आतापर्यंत 57 लाखांचा मुद्देमाल जप्‍त करण्‍यात आला असून यामध्‍ये साडेचार किलो चांदी व साडेचार लाखाचे सोन्‍यांचा समावेश आहे.  

 

नांदेड जिल्‍ह्याची सिमा ही अन्‍य राज्‍याच्‍या सिमेसोबत लागली असल्‍यामुळे आणखी काटेकोर तपासणी करण्‍यात येत आहे. 13 एप्रिलच्‍या रात्री उशिरापर्यंत प्राप्‍त आकडेवारी नुसार आतापर्यंत जवळपास साडेचार किलो चांदी पकडण्‍यात आली आहे याची किंमत 3 लाख 2 हजार 45, पकडलेल्‍या सोन्‍याची किंमत 4 लाख 44 हजार 220 तर आतापर्यंत पकडलेल्‍या रोकडची किंमत 49 लाख 95 हजार 700 एवढी आहे. ही एकुण किंमत 57 लाख 41 हजार 965 एवढी जाते, अशी माहिती सि-व्हिजील कक्षाकडून प्राप्त झाली आहे.

000000