वृत्त क्र. 394

राष्ट्रध्वजासाठी प्लास्टिक वापरास सक्त मनाई 

·  ध्वजसंहितेचे पालन करण्याचे आवाहन  

नांदेड (जिमाका) दि. 29 :- राष्ट्रीय कार्यक्रम,  महत्वाचे सांस्कृतिक कार्यक्रम आदी समारंभाच्या निमित्ताने राष्ट्रध्वजाचा वापर करताना, भारतीय राष्ट्रध्वज संहितेचे काटेकोर पालन करावे. तसेच कोणत्याही परिस्थितीत प्लास्टीकचे राष्ट्रध्वज वापरण्यात येऊ नयेत. यासाठी सर्व शासकीय यंत्रणांसह शाळा, महाविद्यालय, संस्था, संघटना आदीसह नागरीकांनी दक्ष रहावे, असे आवाहन जिल्हा प्रशासनाच्यावतीने करण्यात आले आहे. 

 

दरवर्षी 26 जानेवारी, 15 ऑगस्ट, 1 मे तसेच मराठवाडयात  17 सप्टेंबर आणि इतर राष्ट्रीय कार्यक्रम, महत्वाचे सांस्कृतिक कार्यक्रम व क्रिडा सामन्यांच्यावेळी विद्यार्थी व नागरिकांकडून राष्ट्रध्वजाचा वापर करण्यात येतो. अशा कार्यक्रमात प्लास्टिकेचे ध्वज वापरल्याने, कार्यक्रमानंतर फाटलेले कागदी तसेच प्लास्टिकचे ध्वज मैदानात, रस्त्यावर तसेच कार्यक्रमाच्या ठिकाणी इतस्तत: पडलेले असतात, पायदळी तुडविले जातात. त्यामुळे राष्ट्रध्वजाचा अवमान होतो. राष्ट्रध्वजाचा उचीत सन्मान राखण्यासाठी भारतीय ध्वज संहितेच्या कलम 1.2 ते 1.5 मध्ये राष्ट्रध्वजाच्या उचित वापराबाबत स्पष्ट तरतूद आहे. ध्वजसंहितेच्या कलम 2.2 (x) मधील प्रयोजनासाठीच कागदी राष्ट्रध्वज वापरता येतो. प्लास्टिकच्या राष्ट्रध्वजाच्या वापराबाबत ध्वजसंहितेमध्ये उल्लेख नमूद नाही. याचा विचार करता ध्वजसंहितेच्या तरतुदींचे पालन करावे. तसेच कोणीही प्लास्टिकच्या राष्ट्रध्वजाचा वापर करु नये. 

 

प्लास्टिक व कागदी राष्ट्रध्वजांचा वापर थांबविण्यासाठी जनजागृती करण्याकरिता जिल्हा व तालुका पातळीवर समित्या स्थापन करण्यात आल्या आहेत. कार्यक्रम पार पडल्यानंतर खराब झालेले, माती लागलेले राष्ट्रध्वज मैदानात, रस्त्यावर तसेच कार्यक्रमाच्या ठिकाणी इतस्तत: पडलेले राष्ट्रध्वज गोळा करुन ते तालुका व जिल्हा स्तरावर निर्माण करण्यात आलेल्या यंत्रणेस सुपूर्द करण्याचे अधिकार अशासकीय संस्था तसेच इतर संघटनांना देण्यात आले आहेत. त्यांनी असे खराब झालेले, माती लागलेले ध्वज जिल्हाधिकारी व तहसिलदार यांच्याकडे सुपुर्द करावेत. अशासकीय संस्था, इतर संघटनांनी तसेच नागरिकांनी सुपूर्द केले असे ध्वज गोणी किंवा कपडयामध्ये व्यवस्थित बांधून शिवून बंद करावे. अशाप्रकारे बांधलेले राष्ट्रध्वज सन्मानपूर्वक नष्ट करण्याबाबत परिपत्रकात व ध्वजसंहितेत स्पष्ट सूचना आहेत. त्यानुसार खराब झालेल्या ध्वजाची विल्हेवाट लावण्यासाठी तालुका व जिल्हा पातळीवर केलेल्या उपरोक्त व्यवस्थेबाबत सर्व शासकीय कार्यालये, अर्धशासकीय कार्यालये, स्थानिक प्राधिकरणे व शैक्षणिक संस्था यांनी योग्य ती दखल घ्यावी व कार्यवाही करावी, असेही गृह विभागाने म्हटले आहे.

00000

 वृत्त क्र. 393

पोलीस मैदानावर महाराष्ट्र दिनाचा 1 मे रोजी सकाळी शासकीय समारंभ

नांदेड दि. 29 :- महाराष्ट्र राज्याचा 65 वा स्थापना दिवस समारंभ बुधवार 1 मे 2024 रोजी वजीराबाद पोलीस मुख्यालय कवायत मैदान येथे सकाळी 8 वाजता राष्ट्रध्वज वंदन व संचलन समारंभ होणार आहे. जिल्हाधिकारी अभिजीत राऊत यांच्याहस्ते ध्वजारोहण होणार आहे. या समारंभास उपस्थित रहावे, असे आवाहन नांदेड जिल्हा प्रशासनाच्यावतीने करण्यात आले आहे.

या मुख्य शासकीय कार्यक्रमास सर्वांना उपस्थित राहता यावे यासाठी इतर सर्व कार्यालय, संस्था, आदींनी त्यांचे ध्वजवंदनाचे समारंभ सकाळी 7.15 पुर्वी किंवा 9 वाजेनंतर आयोजित करावेत. सर्व निमंत्रितांनी राष्ट्रीय पोषाखात समारंभ सुरू होण्यापूर्वी 20 मिनिटे अगोदर आसनस्थ व्हावे. सुरक्षिततेच्या दृष्टीने कृपया बँग सोबत आणू नये, असेही आवाहन करण्यात आले आहे. महाराष्ट्र राज्य स्थापनेच्या दिनानिमित्त विविध कार्यक्रम, समारंभ आदी ठिकाणी राष्ट्रध्वज लावण्याच्या योग्य पध्दतीबाबत शासन परिपत्रक तसेच ध्वजसंहितेतील सूचनेचे काटेकोरपणे पालन करण्यात यावे. गृहविभागाच्या राष्ट्रध्वजाच्या उचित सन्मानाबाबतच्या परिपत्रकात नमूद केलेल्या निर्देशनानुसार राष्ट्रध्वजासाठी प्लास्टिकचा वापर होणार नाही, याची दक्षता संबंधितानी घ्यावी, असेही आवाहनही केले आहे.

महाराष्ट्र राज्याचा 65 वा स्थापना दिवस समारंभ 1 मे 2024 रोजी साजरा करण्याबाबत सामान्य प्रशासन विभागाचे 25 एप्रिल 2024 रोजी परिपत्रक निर्गमित झाले आहे. या परिपत्रकात नमूद केल्यानुसार सर्व विभाग प्रमुखांनी कार्यक्रमाचे आयोजन करावे. तसेच ध्वजारोहण व्यवस्थीतरित्या पार पाडण्यासाठी महाराष्ट्र दिनाच्या पूर्व संध्येला रंगीत तालीम घ्यावी. तसेच लोकसभा सार्वत्रिक निवडणूक 2024 च्या अनुषंगाने भारत निवडणूक आयोगाच्या 2 जानेवारी 2024 रोजीच्या पत्रान्वये महत्वाचे दिवस साजरा करण्यासंदर्भात आदर्श आचारसंहिते बाबत दिलेल्या सूचनांचे काटेकोरपणे पालन करावे, असे जिल्हा प्रशासनाच्यावतीने कळविले आहे.

00000

वृत्त क्र. 392

 

23 उमेदवारांचे भवितव्य 4 जून पर्यंत मतयंत्रात बंद ;

निरीक्षकांच्या उपस्थितीत सर्व पेटया स्ट्राँग रूममध्ये

 

·    लोकसभा निवडणुकीत नांदेडमध्ये 60.94 टक्के मतदान

·   तीन स्तरीय सुरक्षा व्यवस्था ; 24 तास इन कॅमेरा निगराणी

·    मतदार, शिक्षक, कर्मचारी, प्रतिनिधींचे जिल्हाधिकाऱ्यांकडून आभार

 

नांदेड दि. 27 एप्रिल : लोकसभा निवडणुकीसाठी काल 26 एप्रिल रोजी मतदान झाल्यानंतर सकाळपर्यंत 16-नांदेड लोकसभा मतदारसंघातील सहाही विधानसभा क्षेत्रातील मतयंत्र नांदेड येथील शासकीय तंत्रनिकेतन महाविद्यालयात स्ट्रॉगरूममध्ये पोहचले आहेत. निवडणूक निरीक्षक, जिल्हाधिकारी, उमेदवार व त्यांच्या प्रतिनिधींच्या उपस्थितीत स्ट्राँग रूम सिलबंद करण्यात आल्या आहेत. लोकसभा निवडणूक यशस्वी करण्यासाठी जिल्हाधिकाऱ्यांनी समस्त मतदार, शिक्षक, कर्मचारी, प्रतिनिधींचे आभार व्यक्त केले आहेत.

 

विदर्भातील पाच व मराठवाड्यातील तीन अशा आठ ठिकाणी दुसऱ्या टप्प्यामध्ये काल २६ एप्रिल रोजी मतदान पार पडले. नांदेडमध्ये २३ उमेदवार रिंगणात आहेत. निवडणूक आयोगाकडून आलेल्या आकडेवारीनुसार नांदेडमधील मतदानाची टक्केवारी 60.94 टक्के आहे. सर्वाधिक मतदान भोकर विधानसभा क्षेत्रात झाले असून सर्वात कमी मतदान मुखेड विधानसभा क्षेत्रात झाले आहे. 4 जून रोजी नांदेडच्या खासदाराची निवड होणार आहे. नांदेड येथील शासकीय तंत्रनिकेतन महाविद्यालयामध्ये ही मतमोजणी होणार आहे.

 

स्ट्राँग रूमला कडक सुरक्षा

शासकीय तंत्रनिकेतन मध्ये ज्या ठिकाणी मतयंत्र ठेवलेली आहेत त्या ठिकाणी कडेकोट बंदोबस्त करण्यात आला आहे. या ठिकाणी कोणालाही प्रवेश नाही. तीन स्तरीय सुरक्षा व्यवस्था या ठिकाणी कार्यरत आहे. यामध्ये बाहेरील सुरक्षा व्यवस्था, स्थानिक पोलीस बघतात. मधल्या सुरक्षा व्यवस्थेमध्ये राज्य राखीव पोलीस दलाचे कर्मचारी आहेत. तर ज्या ठिकाणी मतपेट्या सीलबंद केल्या आहेत. त्या ठिकाणी केंद्रीय राखीव दलाचे सशस्त्र जवान 24 तास कडा पहारा ठेवून आहेत. ही सुरक्षा व्यवस्था 4 जून पर्यंत राहणार आहे. 3 जूनला मतमोजणीचे “मॉक ड्रील” होईल.  

 

आज निवडणूक निरीक्षक शशांक मिश्र यांच्या मुख्य उपस्थितीत स्ट्राँग रूम सील करण्याची प्रक्रिया पूर्ण करण्यात आली. यासाठी शासकीय तंत्रनिकेतन परिसरात जिल्हाधिकारी अभिजीत राऊत, अपर जिल्हाधिकारी पी. एस. बोरगावकर, निवासी उपजिल्हाधिकारी महेश वडदकर, उपजिल्हा निवडणूक अधिकारी राजकुमार माने, सहा विधानसभाक्षेत्राचे सहायक निवडणूक निर्णय अधिकारी यांच्यासह पोलीस दलातील वरिष्ठ अधिकारी उपस्थित होते.

 

लोकसभा निवडणुकीतील मतदान 

काल झालेल्या मतदानानंतर मतदानाची नेमकी टक्केवारी विधानसभाक्षेत्र निहाय पुढीलप्रमाणे आहे.

 

भोकर विधानसभा क्षेत्र एकूण मतदार २ लक्ष ९४ हजार ४०९ यापैकी १ लक्ष ९२ हजार ४४६ मतदारांनी मतदान केले. यामध्ये पुरुष मतदार 1 लक्ष 3 हजार 812,  स्त्री मतदार 88 हजार 633 व तृतीयपंथीयांची संख्या 1 आहे. एकूण टक्केवारी ६५.३७ अशी आहे.

 

नांदेड उत्तर मध्ये एकूण मतदार ३ लक्ष ४६ हजार ८८६ यापैकी २ लक्ष ३ हजार ४२ मतदारांनी मतदान केले. यामध्ये पुरुष मतदार 1 लक्ष 8 हजार 591, स्त्री मतदार  94 हजार 440 व  तृतीयपंथीयांची  संख्या 11 आहे. एकूण टक्केवारी ५८.५३ अशी आहे.

 

नांदेड दक्षिण मध्ये एकूण मतदार ३ लक्ष ८ हजार ७९० यापैकी १ लक्ष ८६ हजार १५७ मतदारांनी मतदान केले. यामध्ये पुरुष मतदार 1 लक्ष 357, स्त्री मतदार 85 हजार 799 व  तृतीयपंथीयांची  संख्या 1 आहे. एकूण टक्केवारी ६०.२९अशी आहे.

 

नायगाव मध्ये एकूण मतदार ३ लक्ष १ हजार २९९ यापैकी १ लक्ष ९६ हजार ८१८ मतदारांनी मतदान केले. यामध्ये पुरुष मतदार 1 लक्ष 5 हजार 725 स्त्री मतदार 91 हजार 91 व तृतीयपंथीची संख्या 2 आहे. एकूण टक्केवारी ६५.३२ अशी आहे.

 

देगलूर मध्ये एकूण मतदार ३ लक्ष ३ हजार ९४३ यापैकी १ लक्ष ८१ हजार ८०६ मतदारांनी मतदान केले. यामध्ये पुरुष मतदार 97 हजार 403, स्त्री मतदार 84 हजार 398 व  तृतीयपंथीयांची संख्या 5 आहे. एकूण टक्केवारी ५९.८२अशी आहे.

 

मुखेड मध्ये एकूण मतदार २ लक्ष ९६ हजार ५१६ यापैकी १ लक्ष ६८ हजार ३०१ मतदारांनी मतदान केले. यामध्ये पुरुष मतदार 90 हजार 600, स्त्री मतदार 77 हजार 701 व  तृतीयपंथीयांची संख्या शून्य. एकूण टक्केवारी ५६.७६ अशी आहे.

 

16-नांदेड लोकसभा मतदारसंघामध्ये एकूण मतदार १८ लक्ष ५१ हजार ८४३ यापैकी ११ लक्ष २८ हजार ५७० मतदारांनी मतदान केले. यामध्ये पुरुष मतदार 6 लक्ष 6 हजार 488, स्त्री मतदार 5 लक्ष 22 हजार 62 व  तृतीयपंथीयांची  संख्या 20 आहे. एकूण टक्केवारी 60.94 अशी आहे.

 

30 व्हीव्हीपॅट बदलले

लोकसभेच्या मतदान प्रक्रियेमध्ये सर्वात महत्त्वाचे असणारे मतयंत्र अर्थात व्हीव्हीपॅट, बॅलेट युनिट आणि कंट्रोल युनिट. जिल्ह्यामध्ये मतदान प्रक्रिया दरम्यान 4 हजार 136 बॅलेट युनिट वापरल्या गेले. त्यापैकी प्रक्रियेदरम्यान 20 बॅलेट युनिट बदलले गेले. 2 हजार 68 कंट्रोल युनिट वापरले गेले. त्यापैकी दहा कंट्रोल युनिट बदलले गेले. तर 2 हजार 68 व्हीव्हीपॅट पैकी 30 व्हीव्हीपॅट प्रक्रिया दरम्यान बदलले गेले. निवडणूक आयोगाने भेल कंपनीच्या 12 अभियंत्यांची जिल्ह्यात नियुक्ती केली होती. ज्या ठिकाणी प्रक्रिया दरम्यान यंत्र बिघडले त्या ठिकाणी ते बदलण्यात आले. मात्र यामुळे मतदान प्रक्रियेवर कोणताही बदल झाल्याची घटना नाही.

 

दोन गुन्ह्यांची नोंद

जिल्ह्यामध्ये देगलूर विधानसभा मतदारसंघांमध्ये दोन गुन्ह्यांची नोंद झाली आहे. यामध्ये एक गुन्हा रामतीर्थ पोलीस स्टेशन अंतर्गत नोंदविण्यात आला आहे. व्हीव्हीपॅट व बॅलेट युनिटची तोडफोड करणाऱ्या या व्यक्तीवर गुन्हा दाखल करण्यात आला आहे. कंट्रोल युनिटला काही डॅमेज झाले नाही. त्यामुळे मतदान प्रक्रियेवर कोणताही फरक पडला नाही. पोलिसांनी गुन्हेगाराला ताब्यात घेतले आहे. दुसरा गुन्हा देखील याच विधानसभा क्षेत्रात झाला आहे. देगलूर येथे विनापरवाना मोबाईलने शूटिंग करणाऱ्या एका व्यक्तीवर गुन्हा दाखल करण्यात आला आहे. गोपनीयतेचा भंग केल्याप्रकरणी हा गुन्हा दाखल केलेला आहे.

 

जिल्हाधिकाऱ्यांनी मानले आभार

जिल्हा निवडणूक निर्णय अधिकारी तथा जिल्हाधिकारी अभिजीत राऊत यांनी लोकसभा निवडणुकीमध्ये मतदान करणाऱ्या सर्व मतदारांचे आभार मानले आहेत. ज्यांना या निवडणुकीत काही कारणास्तव मतदान करता आले नाही त्यांनी तातडीने आपल्या नावाची नोंद करावी. नोंदीची खातरजमा करावी, असे आवाहन केले आहे. येत्या विधानसभा निवडणुकीत सर्वांना सुलभपणे मतदान करता येईल यासाठी नोंदणी प्रक्रियेत लक्षपूर्वक सहभाग घेण्याचे आवाहन केले आहे. याशिवाय गेल्या 75 दिवसांपासून अखंडपणे काम करणाऱ्या आपल्या वरिष्ठ अधिकाऱ्यांपासून सर्व सहकाऱ्यांचे त्यांनी आभार मानले आहेत. निवडणूक यंत्रणेत काम करणाऱ्या विशेषत: शिक्षकांचे त्यांनी विशेष आभार मानले असून प्रशिक्षणापासून प्रत्यक्ष मतदान प्रक्रियेत सक्रियेतेने सहभागी झाल्याबद्दल त्यांनी आनंद व्यक्त केला आहे. विविध संघटना, संस्था, विद्यार्थी, मान्यवरांनी मतदानाची टक्केवारी वाढविण्यासाठी केलेल्या प्रयत्नासाठी विशेष ऋणनिर्देश केले आहे. याशिवाय सर्व बिएलओ, क्षेत्रिय अधिकारी, पोलीस व अन्य सुरक्षा दलाचे अधिकारी-कर्मचारी, वीज मंडळाचे कर्मचारी, प्रसार माध्यमातील सर्व सहकारी तसेच ग्रामपातळीवर काम करणारे ग्रामसेवक, तलाठी, मंडळ अधिकारी यांच्यासह सर्व चतुर्थ श्रेणी कर्मचारी, अंगणवाडी सेविका यांचेही आभार व्यक्त केले आहे.

0000

 

 वृत्त क्र. 391

रामतीर्थ येथे ईव्हीएम फोडण्याच्या  प्रयत्नानंतरही मतदान सुरळीत

 प्रकरणाची तपासणी पोलिसांकडून सुरू

नांदेड दि. २६ : लोकसभा मतदाना दरम्यान आज रामतीर्थ येथे झालेल्या ईव्हीएम तोडफोडीनंतर या ठिकाणच्या व्हीव्हीपॅट व बॅलेट युनिटला बदलविण्यात आले. इव्हीएम फोडण्याच्या प्रयत्नानंतरही मतदान सुरळीत झाले,अशी माहिती जिल्हा प्रशासनामार्फत देण्यात आली आहे.

आज निवडणूक मतदान सुरू असताना देगलूर विधानसभा क्षेत्रातील बिलोली तालुक्यातील रामतीर्थ येथे एका मतदाराने ईव्हीएम मशीनची तोडफोड केल्याची घटना घडली. या घटनेमध्ये बॅलेट युनिट आणि व्हीव्हीपॅट थोडे क्षतीग्रस्त झाले. मात्र कंट्रोल युनिट वर कोणताही परिणाम झालेला नाही. घटनेनंतर निवडणूक आयोगाच्या मार्गदर्शक सूचनेनुसार तातडीने व्हीव्हीपॅट व बॅलेट युनिट बदलविण्यात आले.
 या घटनेनंतर अवघ्या काही मिनिटांमध्ये पुन्हा मतदानाला सुरुवात झाली. कंट्रोल युनिट वर कोणताही परिणाम झाला नसल्यामुळे आधी झालेल्या मतदानाला कोणताही धोका नाही. तसेच संपूर्ण सेट अर्थात व्हीव्हीपॅट व बॅलेट युनिट बदलण्यात आल्यामुळे नव्या यंत्रांसह तातडीने मतदानाला सुरुवात झाली. ज्या मतदाराने ही तोडफोड केली त्याला पोलिसांनी ताब्यात घेतले असून चौकशी सुरू आहे, अशी माहिती जिल्हा प्रशासनाने दिली आहे.

000000

 जिल्हा परिषद हायस्कूल चौफळा येथील मतदान केंद्रावर सायंकाळी साडेपाच वाजता मतदानासाठी मतदारांच्या लागलेल्या रांगा.

जिल्हा परिषद हायस्कूल चौफळा येथील मतदान केंद्रावर सायंकाळी साडेपाच वाजता मतदानासाठी 

मतदारांच्या लागलेल्या रांगा.

 नांदेड जिल्ह्यातील बिलोली तालुक्यातील रामतीर्थ येथे ईव्हीएम मशीनची तोडफोड केलेल्या घटनेबाबत जिल्हाधिकारी अभिजीत राऊत यांनी स्पष्ट केलेली वस्तुस्थिती .माध्यमांसाठी🙏🏻

नांदेड़ जिले के बिलोली तहसील अंतर्गत आनेवाले रामतीर्थ यहां पर हुई इव्हीएम की तोड़फोड़ घटनापर जिलाधिकारी अभिजीत राऊत का तथ्यदर्शक बयान

रामतिर्थ येथील मतदान प्रक्रिया सुरळीत सुरू असल्याची वस्तुस्थिती दर्शविणारी चित्रफित. माध्यमांना संदर्भासाठी

 सखी मतदान केंद्र बारड ता.मुदखेड येथे मतदानासाठी मतदारांच्या रांगा.

नांदेड उत्तर येथील सांगवी मतदार केंद्रावर तृतीय पंथीयांनी मतदान केले.: डॉ सानवी जेठवाणी, बिजली शानूर ब्रश, चमेली जया बकश यांनी मतदानाचा हक्क बजावला. सर्वानी मतदान करावे, असे आवाहन तृतीय पथियांनी नांदेडकरांना केले आहे.

 जिल्हा निवडणूक निर्णय अधिकारी तथा जिल्हाधिकारी अभिजीत राऊत यांनी गुजराती हायस्कूल येथील सखी मतदान केंद्रास भेट दिली त्या वेळेसची चित्रफीत व छायाचित्र.

 नांदेड येथे गांधी राष्ट्रीय विद्यालय गाडीपुरा येथे दुपारी सव्वाचार वाजता मतदानासाठी लागलेल्या रांगा. वयोवृद्ध महिलेने ही बजावला मतदानाचा हक्क.

 Sveep Icon अभिनेते कपिल गुडसुरकर यांनी मतदानाचा हक्क बजावला.

अर्धापुर शहरातील मतदार मतदान करण्यासाठी लावल्या रांगा दिव्यांग व्यक्तीने केले मतदान

 #नांदेड दक्षिण मतदार संघातील विष्णुपुरी येथे #पर्यावरणपूरक मतदान केंद्र स्थापन केले होते.. या मतदान केंद्रावरील सुविधांबाबत मतदारांनी समाधान व्यक्त केले..

 #नांदेड दक्षिण मतदार संघातील विष्णुपुरी येथे #पर्यावरणपूरक मतदान केंद्र स्थापन केले होते.. या मतदान केंद्रावरील सुविधांबाबत मतदारांनी समाधान व्यक्त केले..

 मा. जिल्हाधिकारी अभिजीत राऊत यांचा निवडणुकीतील उमेदवार श्री. अविनाश भोसीकर याच्या आक्षेपा संदर्भातील खुलासा. माध्यमांच्या संदर्भासाठी....

 मतदानाला बाहेर पडा : #नांदेड जिल्ह्यामध्ये १४२ तृतीयपंथीय मतदार आहेत. यापैकी एका मतदाराने मतदानानंतर सर्वानी मतदान करण्याचे केलेले आवाहन बोलके ठरले ...