रब्बी हंगामाचे क्षेत्र तिप्पट करणार

--- जिल्हाधिकारी अरुण डोंगरे  

नांदेड, दि. 11:- नांदेड जिल्ह्याचे रब्बीचे क्षेत्र हे 1 लाख 36 हजार हेक्टर असून या वर्षी यामध्ये तिप्पट वाढ करण्याचे सुचना जिल्हाधिकारी अरुण डोंगरे यांनी केले. आज जिल्हाधिकारी कार्यालयाच्या निजी सभागृहात जिल्हाधिकारी श्री. डोंगरे यांनी सुचना केल्या.

या बैठकीस जिल्हा परिषदेचे मुख्य कार्यकारी अधिकारी अशोक काकडे, निवासी उपजिल्हाधिकारी सचिन खल्लाळ, जिल्हा अधीक्षक कृषी अधिकारी रवीशंकर चलवदे, कापूस संशोधन केंद्राचे शास्त्रज्ञ श्री. पाटील, पोखरणी कृषी विज्ञान केंद्रचे डॉ. देविकांत देशमुख, महाबीजचे जिल्हा व्यवस्थापक ए.टी. निकम, बियाणे विक्रेते संघाचे राज्यस्तरीय उपाध्यक्ष बिपीन कासलीवाल, पाटबंधारे विभागाचे कार्यकारी अभियंता, कृषि विभागाचे सर्व उपविभागीय कृषि अधिकारी व तालुका कृषी अधिकारी यांची या बैठकीस उपस्थिती होती.

यावर्षी अतिवृष्टीमुळे शेतकऱ्यांचे सुमारे साडे सहा लाख हेक्टरवर नुकसान झालेले असून शेतकऱ्यांना कांही अंशी उत्पादन मिळविण्यासाठी रब्बी हंगामाचा पेरा मोठ्या प्रमाणावर वाढविणे शक्य आहे. जिल्ह्यातील विविध धरणातील पाणी साठ्यात मोठ्या प्रमाणात वाढ झाली असून जलयुक्त शिबीराच्या कामामुळे विहीरींच्या कामामुळे विहीरींच्या पाणी पातळीत वाढ झालेली आहे. तसेच ऑक्टोबरमध्ये झालेल्या पावसामुळे जमिनीत मोठ्या प्रमाणावर ओलावा उपलब्ध आहे. याचा फायदा घेवून शेतकऱ्यांनी मोठ्या प्रमाणावर हरभरा गहू, करडई या रब्बी पिकांची तसेच उन्हाळी ज्वारी व उन्हाळी भुईमुग या पिकांची पेरणी करावी, असे आवाहन यावेळी जिल्हाधिकारी अरुण डोंगरे यांनी केले.

यासाठी महाबीज व राष्ट्रीय बीजनिगम यांनी मागणीप्रमाणे अनुदानावर बियाणे पुरवठा करण्यात यावा, असे सुचविले . तसेच खाजगी कंपन्याचीदेखील मोठ्या प्रमाणावर बियाणे उपलब्ध करुन घ्यावे, असे सांगितले.

शेतकऱ्यांनी स्वत: जवळील तसेच खुल्या बाजारातील हरभरा घेवून उगवण शक्ती तपासून पेरणी करावी, असे जिल्हा अधीक्षक कृषी अधिकारी रवीशंकर चलवदे यांनी सुचविले.

शेतकऱ्यांना विद्युत पुरवठा खंडित होवू नये, यासाठी खबरदारी घेण्याबाबत सुचना दिल्या. तसेच पाटबंधारे विभागाने शेतकऱ्यांच्या मागणीप्रमाणे रब्बी हंगामासाठी पाणी पुरवठा करावा, असे सांगितले.

अनुदानावर विक्री करण्यात येणाऱ्या बियाणांच्या माहिती पत्रकाचे जिल्हाधिकारी अरुण डोंगरे यांच्या हस्ते विमोचन करण्यात आले.

14 हजार 10 क्विंटल बियाणे अनुदानावर पुरवठा करण्यात येणार असून आतापर्यंन्त 8 हजार 221 क्विंटल पुरवठा करण्यात आलेला आहे, आणि उर्वरित बियाणे आठ दिवसात उपलब्ध होतील, असे महाबीजचे जिल्हा व्यवस्थापक ए.टी.निकम यांनी सांगितले.

यापेक्षा अधिक बियाणांची मागणी वाढल्यास शासनाकडे मागणी करण्यात येणार असल्याचे व कोणत्याही बियाणांची कमतरता भासू दिली जाणार नाही, असे जिल्हाधिकारी अरुण डोंगरे यांनी सांगितले.

0000

“ठेलारी” जमातीच्या हरकती, सुचना   

13 नोव्हेंबरला सादर करण्याचे आवाहन

नांदेड, दि. 11 :- महाराष्ट्र राज्य मागासवर्ग आयोगाने “ठेलारी” या जमातीच्या मागणी संदर्भात जाहिर केलेल्या जनसुनावणीस संस्था, संघटना, व्यक्तींना निवेदन, हरकती व सुचना लेखी स्वरुपात मांडावयाच्या असतील त्यांनी आपले लेखी निवेदने, हरकती, सुचना बुधवार 13 नोव्हेंबर 2019 रोजी नवीन नियोजन भवन, जिल्हाधिकारी कार्यालय परिसर धुळे येथे सकाळी 11 ते सायं. 5 यावेळेत सादर करावीत, असे आवाहन पुणे महाराष्ट्र राज्य मागासवर्ग आयोगाचे सदस्य सचिव डी. डी. देशमुख यांनी केले आहे.

महाराष्ट्र राज्य मागासवर्ग आयोग पुणे यांच्याकडे “ठेलारी” (भटक्या जमातीचा-ब) या जमातीचा समावेश राज्य शासनाच्या भटक्या जमातीच्या अ. क्र. 29 धनगरची तत्सम म्हणून (भटक्या जमाती-क मध्ये) समावेश करण्याबाबत निवेदन प्राप्त झाले आहे.

याबाबत “ठेलारी” (महाराष्ट्र शासनाच्या (भटक्या जमाती-ब) अ. क्र. 27 वर या जमातीची नोंद आहे. तर “ठेलारी” (भ.ज.-ब) या भटक्या जमातीचा समावेश “धनगर” या जमातीची (भ.ज.-क) तत्सम म्हणून समावेश करण्याबाबत मागणी आहे. या जनसुनावणीसाठी महाराष्ट्र राज्य मागासवर्ग आयोगाचे सदस्य डॉ. सुवर्णा रावळ, डॉ. भुषण कर्डीले, डॉ. राजाभाऊ करपे, डी. डी. देशमुख सदस्य सचिव उपस्थित राहणार आहेत. अशी माहिती प्रसिद्धी पत्रकात आयोगाचे सदस्य सचिव यांनी दिली आहे.  

0000

नांदेड जिल्ह्यातील 154 रिक्त पदांचा समावेश  

ग्रामीण डाक सेवकाच्या 3 हजार 650 पदांसाठी भरती ;

अर्जाची 30 नोव्हेंबर मुदत ; दहावीच्या गुणवत्तेनुसार निवड होणार

नांदेड, दि. 11 :- ग्रामीण डाक सेवक या पदासाठी भारतीय डाक विभागाकडून ऑनलाईन भरती होणार आहे.   महाराष्ट्र राज्यासाठी 3 हजार 650 जागा रिक्त असून यात नांदेड जिल्ह्यासाठी 154 ग्रामीण डाक सेवकांची पदे रिक्त आहेत. या भरती प्रक्रियेसाठी ऑनलाईन पद्धतीने अर्ज करण्याची मुदत शनिवार 30 नोव्हेंबर 2019 पर्यंत आहे. जिल्ह्यातील दहावी उत्तीर्ण उमेदवारांनी ऑनलाईन पद्धतीने दिलेल्या संकेतस्थळावर अर्ज भरावेत असे आवाहन नांदेड डाक अधिक्षक यांनी केले आहे.

या पदासाठी उमेदवार दहावी उत्तीर्ण असणे गरजेचे आहे. विशेष म्हणजे या भरतीसाठी लेखी परीक्षा घेण्यात येणार नसून फक्त दहावीच्या गुणातील गुणवत्तेनुसारच निवड करण्यात येणार आहे. उमेदवार संगणकाचे ज्ञान असणे गरजेचे आहे. तसेच स्थानिक भाषेचे (मराठी) ज्ञान असणे आवश्यक आहे. अर्जदार हा 18 ते 40 वर्ष वयोगटातील असावा. ओबीसीसाठी 3 वर्ष, एससी/ एसटीसाठी 5 वर्ष आणि अपंगासाठी 10 वर्ष वयाची अट शिथिल करण्यात आली आहे. जे उमेदवार ओबीसी, एसी, एसटी पदासाठी आरक्षित नसतील तेच उमेदवार आर्थिकदृष्ट्या मागासवर्गीय (EWS) पदासाठी पात्र असतील. EWS पदासाठी उमेदवाराची वयोमर्यादा 18 ते 40 वयोगटातील असावी.

नांदेड डाक विभागातील एकूण 154 जागांपैकी खुल्या प्रवर्गासाठी 75, एससी साठी 14 , एसटी साठी 12 आणि ओबीसीसाठी 38 तसेच ईडब्लुएस EWS साठी 15 जागा आरक्षित केल्या आहेत. या भरतीसाठी अर्जदारांनी  https://indiapost.gov.in अथवा http://appost.in/gdsonline या संकेतस्थळाला भेट द्यावी व ऑनलाईन पद्धतीने अर्ज सादर करावा. ऑनलाईन पद्धतीने अर्ज सादर करण्याची मुदत 1 नोव्हेंबर 2019 ते शनिवार 30 नोव्हेंबर 2019 पर्यंत आहे. संबंधित संकेतस्थळावर पात्रता निकष याविषयी सर्व माहिती नमूद केली आहे. नांदेड जिल्ह्यातील दहावी उत्तीर्ण उमेदवारांनी ऑनलाईन पद्धतीने दिलेल्या संकेतस्थळावर अर्ज भरावेत असे आवाहन नांदेड डाक अधिक्षक यांनी केले आहे.

00000

पत्रकार परिषदेचे

प्रसिध्‍दी पत्रक       

                                                                             दि. 11 नोव्हेंबर 2019

केंद्र सरकारच्‍या मा‍हिती आणि प्रसारण मंत्रालयाच्‍या लोकसंपर्क आणि संचार ब्‍यूरोच्‍यावतीने प्रादेशिक लोकसंपर्क ब्‍यूरो अतंर्गत विवीध ठिकाणी कार्यरत असलेल्‍या क्षेत्रीय लोकसंपर्क ब्‍यूरो मार्फत केंद्र आणि राज्‍य सरकारच्‍या विवीध योजना आणि उपक्रमांची माहिती जनसामान्‍यापर्यंत पो‍हचविण्याचे कार्य केले जाते. यासाठी विवीध माध्‍यमांचा वापर केला जातो यात प्रदर्शनी , मेळावे, गीत व नाटक कार्यक्रम आदी माध्‍यमांचा समावेश आहे. देशभर विविध ठिकाणी  श्री गुरुनानक देवजी यांची 550 वी जयंती साजरी करण्‍यात येत आहे. यानुसार माहिती आणि‍ प्रसारण मंत्रालयाच्‍यावतीने देशात 13 ठिकाणी बहुमाध्‍यम प्रदर्शनीचे आयोजन करण्‍यात येत आहे. यापैकी एक असलेल्‍या नांदेड शहरातील जिल्हा परिषद मल्‍टीपर्पज हायस्‍कुल मैदानावर बहुमाध्‍यम प्रदर्शनीचे आयोजन करण्‍यात येत आहे. दिनांक 12 नोव्‍हेंबर 2019 रोजी सकाळी ठिक 11:30 वा. केंद्रीय माहिती  व प्रसारण मंत्री मा. प्रकाशजी जावडेकर यांच्‍या हस्‍ते या बहुमाध्‍यम प्रदर्शनीचे उद्घाटन होणार आहे. या उद्घाटन सोहळयाला केंद्र आणि राज्‍य शासनाचे लोकप्रतिनीधी, पदाधिकारी आणि अधिकारी आदींची प्रमुख उपस्‍थीती असणार आहे.

दिनांक 12 ते 18 नोव्‍हेंबर 2019 दरम्यान 10 हजार चौ.फुट जागेवर उभारण्‍यात येत असलेल्‍या अत्‍याधुनिक व वातानुकुलीत बहुमाध्‍यम प्रदर्शनात श्री गुरूनानक देवजी यांच्‍या जीवनावर आधारित माहिती मिळणार आहे. वायरलेस हेडफोनच्‍या साहयाने एलईडी स्‍क्रीनवर श्री गुरूनानक देवजी यांचे जीवनकार्य बघावयास मिळणार आहे.  नांदेड शहरात प्रथमच आयोजित होत असलेल्‍या या प्रदर्शनीमध्‍ये व्‍ही. आर. तंत्रज्ञानाच्‍या मदतीने असलेल्‍या कर्तारपुर साहेब आणि नानकानासाहेब या गुरूव्‍दारांचे दर्शन या प्रदर्शनातून घडणार आहे.

 लाईट आणि साऊंड शो या प्रदर्शनाचे आकर्षण ठरणार असून याव्‍दारे श्री गुरूनानक देवजी यांचे जीवनकार्य बघावयास मिळणार आहे. शीख धर्मात महत्‍वाचे स्‍थान असणाऱ्या शबद आणि उदासीची माहिती या प्रदर्शनाव्‍दारे मिळणार आहे. तत्‍कालीन वस्‍तु, साहीत्‍यांचा संग्रह या ठिकाणी बघावयास मिळणार आहे. प्रदर्शनीच्या मध्‍यभागी डीजिटल ट्री लावणयात येणार असून यावर असलेल्‍या चित्रांमधुन श्री गुरूनानक देवजी यांच्‍या कार्याची ओळख होणार आहे. स्‍मार्ट फोन वापरणाऱ्यांसाठी अत्‍याधुनिक सेल्‍फी पाॅईंट तयार करण्‍यात आला आहे.  संपुर्ण प्रदर्शनी बघीतल्‍यानंतर सर्वात शेवटी भेट देणाऱ्या प्रत्‍येक व्‍यक्‍तीला प्रदर्शनावर आधारित स्‍पर्धेमध्‍ये भाग घेऊन सन्‍मानचिन्‍ह  मिळविता येइल. या प्रदर्शनीला भेट देण्‍यासाठी शहरातील महिला बचतगट, शालेय विद्यार्थी, अंगणवाडी सेविका यांना प्रशासन आणि स्‍वामी रामानंद तीर्थ मराठवाडा विद्यापिठाच्‍यावतीने  सूचना देण्‍यात आल्‍या आहेत.  तसेच देश-विदेशातून येणाऱ्या शिख श्रध्‍दालूंना गुरूव्‍दारा बोर्डाच्‍यावतीने विविध स्‍तरावर माहिती देण्यात येत आहे. हे प्रदर्शन सर्व जनतेसाठी सकाळी 11 ते रात्री 8.30 वाजेपर्यंत खुले राहणार असून प्रवेश विनामुल्‍य असणार आहे.

           

(जिल्हाधिकारी अरुण डोंगरे आणि माहिती व प्रसारण मंत्रालयाचे संचालक संतोष अजमेरा  यांनी आज जिल्हाधिकारी कार्यालयात आायेजित पत्रकार परिषदेत दिलेली माहिती दिली.

यावेळी जिल्हा परिषदेचे मुख्य कार्यकारी अधिकारी अशोक काकडे, उपवनसंरक्षक अशिष ठाकरे, निवासी उपजिल्हाधिकारी डॉ. सचिन खल्लाळ, माहिती व प्रसारण मंत्रालयाचे सहायक संचालक निखिल देशमुख यांच्यासह विविध माध्यम प्रतिनिधी उपस्थित होते. )

000000

पर्यावरण, माहिती व प्रसारण

मंत्री प्रकाश जावडेकर यांचा दौरा

नांदेड, दि. 11 :- केंद्रीय पर्यावरण, वन व जलवायु परिवर्तन आणि माहिती व प्रसारण मंत्री प्रकाश जावडेकर हे नांदेड दौऱ्यावर येत असून त्यांचा दौरा कार्यक्रम पुढील प्रमाणे राहील. 

मंगळवार 12 नोव्हेंबर 2019 रोजी पुणे येथून विशेष विमानाने सकाळी 11.30 वा. नांदेड विमानतळ येथे आगमन. दुपारी 12 ते 1 वाजेपर्यंत श्री गुरुनानक देवजी यांच्या जीवनावर आधारित शिक्षण आणि तत्त्वज्ञान डिजिटल प्रदर्शनाचे उद्घाटन व संवादास उपस्थिती. दुपारी 1 ते 2 वाजेपर्यंत तख्त सचखंड श्री हुजूर साहिब गुरुद्वारा नांदेड येथे दर्शनास उपस्थिती. दुपारी 2 ते 2.20 वाजेपर्यंत नांदेड विमानतळाकडे प्रयाण. दुपारी 2.30 वा. नांदेड विमानतळ येथून विशेष विमानाने पुणेकडे प्रयाण करतील.  

000000