आस्थापनांनी कर्मचाऱ्यांची

माहिती सादर करण्याचे आवाहन

            नांदेड, दि. 21:- माहे  डिसेंबर-2018 या महिन्याचे वेतन देयक दाखल करतांना सर्व शासकिय, निमशासकिय कार्यालयांना तसेच खाजगी आस्थापनाना सुचित करण्यांत येते की, जिल्हा कौशल्य विकास रोजगार व उद्योजकता मार्गदर्शन केंद्र,नांदेड यांचेकडे आपल्या आस्थापनेवरील कर्मचाऱ्यांची माहिती बाबतचे माहे-डिसेंबर-2018 अखेरचे ई. आर-1 त्रैमासिक विवरणपत्र माहे-31 जानेवारी-2019 पर्यंत भरावयाची मुदत असून या कार्यालयाचे संकेतस्थळ www.mahaswayam.gov.in  वरुन ऑनलाईन ई-आर-1 भरुन दिल्याचे ऑनलाईनचे प्रमाणपत्र देयकासोबत जोडल्याशिवाय मासिक वेतन देयके व इतर कोणतेही देयके कोषागारात  स्विकारले जाणार नाहीत, याची संबंधीतानी नोंद घ्यावी.  

सर्व कार्यालयांना या कार्यालया मार्फत युजर आय.डी. व पासवर्ड यापुर्वीच कळविण्यांत आलेले आहेत. तसेच सर्व कार्यालयानी आपले ई-मेल आय.डी. व फोन नंबर, पत्ता, टॅन नंबर,पॅन नंबर टाकून आपली प्रोफाईल अपडेट करावी, असे आवाहन नांदेड कौशल्य विकास,रोजगार उद्योजकता सहायक संचालक उल्हास सकवान यांनी केले आहे.

0000

रास्तभाव धान्य दुकानात

तीन महिन्याची साखर उपलब्ध

 

नांदेड, दि. 21:-   सार्वजनिक वितरण व्यवस्थेअंतर्गत नांदेड जिल्ह्यातील अंत्योदय शिधापत्रिकाधारकासाठी शासनाने डिसेंबर, 2018 , जानेवारी व फेब्रुवारी, 2019 साठी नियमित नियतन साखर प्रति शिधापत्रिका एक किलो याप्रमाणे मंजूर केले आहे. या महिन्यात जिल्ह्यासाठी 598 क्विंटलचे नियतन शासनाकडून प्राप्त झाले आहे. या नियतनाची उचल करुन प्रत्यक्ष शिधापत्रिकाधारकास संबंधित स्वस्त धान्य दुकानामार्फत वितरण करण्यात येणार आहे.

तालुका निहाय नियतन पुढील प्रमाणे देण्यात आले आहे. नांदेड 24.41 , हदगांव -45.94, किनवट -151.94, भोकर-26.93 , बिलोली -43.95 , देगलूर-17.25, कंधार-25.53, लोहा-41.5 , हिमायतनगर -28.29, माहूर-67.26, धर्माबाद-25, नायगाव-36.51, मुदखेड-7.21 याची सर्व अंत्योदय शिधापत्रिकाधारकांनी स्वस्त धान्य दुकानातून साखरेची उचल करावी, असे आवाहन जिल्हा पुरवठा अधिकारी, नांदेड यांनी केले आहे.

 

00000

अनधिकृत पाणी उपसा करणाऱ्यावर

फौजदारी तथा कायदेशीर कार्यवाही करण्यात येणार    

 

नांदेड, दि. 21:-  उर्ध्व पैनगंगा प्रकल्पाच्या (इसापूर धरण) उजव्या व डाव्या कालव्यावर व त्यावरील शाखा कालवे, वितरीका, उपवितरीकांवर अनधिकृतपणे विनापरवानगी पंपाद्वारे उपसा करणाऱ्या तसेच कालव्यावरील बांधकामांना क्षती पोहचवून नदी, नाल्याद्वारे पाणी घेवून अथवा कालवा भरावास क्षती पोहचवून कालवा भरावून विहीरी , शेततळे अनधिकृतपणे , विनापरवानगी भरुन घेण्याचे प्रकार निदर्शनास येत आहेत. अशा सर्व उपसा करणाऱ्या व्यक्ती, संस्था, शेतकरी यांना कळविण्यात येते की, सदरील कृती ही महाराष्ट्र पाटबंधारे अधिनियम 1976 नुसार बेकायदेशीर असून अशा सर्व घटना या फौजदारी प्रक्रियेस पात्र आहेत. वरील अनधिकृत पाणी उपस्यामुळे शेवटच्या भागातील लाभधारक सिंचनाच्या लाभापासून वंचित राहत आहेत.

त्यामुळे अशा सर्व अनधिकृत उपसा करणाऱ्या / अथवा पाणी घेणाऱ्या व्यक्ती , संस्था, शेतकरी यांना कळविण्यात येते की, अशी बेकायदेशीर कृती केल्याचे आढळून आल्यास संबंधित व्यक्ती, संस्था, शेतकरी, यांच्या विरोधात महाराष्ट्र पाटबंधारे अधिनियम 1976 अन्वये फौजदारी तथा कायदेशीर कार्यवाही करण्यात येईल, याची गांभीर्याने नोंद घ्यावी, असे नांदेड उर्ध्व पैनगंगा प्रकल्प विभाग क्र. 1 चे कार्यकारी अभियंता वि. कि. कुरुंदकर यांनी कळविले आहे.

0000