मुळ हस्तलिखीत सातबाराशी तंतोतंत जुळविण्‍याचे काम

जिल्‍ह्यात 80 टक्के पुर्ण - जिल्हाधिकारी अरुण डोंगरे

नांदेड, दि. 26 :- राज्‍यातील जनतेस अचूक संगणकीकृत गा.न.नं. सातबारा ऑनलाईन उपलब्‍ध होणे आणि सर्व फेरफार ऑनलाईन पध्‍दतीने होण्‍याच्‍या दृष्‍टीने डिजीटल इंडीया कार्यक्रमांतर्गत डिजीटल इंडीया भूमि अभिलेख आधुनिकीकरण कार्यक्रमाची अंमलबजावणी सुरू आहे. या मोहिमेंतर्गत नांदेड जिल्‍ह्यातील प्रत्‍येक गावात चावडी वाचन पुर्ण करण्‍यात आले असून खातेदारांकडून प्राप्‍त आक्षेप / तक्रारी नुसार प्रत्‍येक संगणकीकृत गाव न.नं. सातबारा मुळ हस्‍तलिखीत गाव.न.नं. सातबाराशी तंतोतंत जुळविण्‍याचे काम जिल्‍ह्यात 80 टक्के पेक्षा अधिक पुर्ण करण्‍यात आलेले आहे, अशी माहिती जिल्हाधिकारी अरुण डोंगरे यांनी दिली. 

            जिल्‍ह्यात हा प्रकल्‍प अंतिम टप्‍प्‍यात असून मुळ हस्‍तलिखीत गाव न.नं. सातबारा व संगणकीकृत गाव न.नं. सातबारा तंतोतंत मेळात आणावयाचा असल्‍याने शासनाने मे 2017 मध्‍ये चावडी वाचनाची विशेष मोहिम राज्‍यात सुरू केली होती. विशेष म्‍हणजे नांदेड जिल्‍ह्यातील 16 तालुक्‍यांपैकी हिमायतनगर, लोहा व हदगाव या तालुक्‍यानी 100 टक्के काम पुर्ण करून जिल्‍ह्यात अनुक्रमे प्रथम, दिव्‍तीय व तृतीय येण्‍याचा मान प्राप्‍त केला आहे. तसेच उर्वरित तालुक्‍याचे कामही अंतिम टप्‍यात असुन ते लवकरात लवकर पूर्ण होण्‍यासाठी सर्व स्‍तरावरून प्रयत्‍न सुरू आहेत. जिल्‍ह्यात सुरू असलेल्‍या चावडी वाचनाच्‍या विशेष मोहिमेच्‍या प्रगतीचा आढावा व कामाचा दर्जा तपासण्‍यासाठी  जमाबंदी आयुक्‍त कार्यालय, पुणे यांच्यामार्फत नुकतेच विशेष पथक नांदेड येथे पाठविण्‍यात आले होते. ज्‍यामध्‍ये उपजिल्‍हाधिकारी तथा राज्‍य समन्‍वयक रामदास जगताप व विभागीय समन्‍वयक गणेश देसाई DILRMP हे तपासणी अधिकारी म्‍हणुन नियुक्‍त करण्‍यात आले होते.

त्‍या अनुषंगाने नुकतीच जिल्‍हाधिकारी अरुण डोंगरे यांच्या अध्‍यक्षतेखाली जिल्हाधिकारी कार्यालयातील नियोजन भवन येथे तपासणी कार्यक्रमाचे आयोजन करण्‍यात आले होते. तपासणी पथकाने प्रत्‍येक तालुक्‍यातील 5 गावांच्‍या कामाची तपासणी करून कामाबद्दल समाधान व्‍यक्‍त केले. जिल्‍ह्यातील सर्व उपविभागीय अधिकारी, तहसिलदार, नायब तहसिलदार (DBA) मंडळ अधिकारी व तलाठी यांना DILRMP प्रकल्‍पाअंतर्गत प्रशिक्षण व मार्गदर्शन केले.

            या कार्यक्रमाचे आयोजन निवासी उपजिल्‍हाधिकारी तथा डी.डी.ई.चे  जयराज कारभारी, जिल्‍हा सूचना व विज्ञान अधिकरी सुनिल पोटेकर यांनी केले. या कार्यक्रमास उपविभागीय अधिकारी धर्माबाद, देगलुर  व सर्व तहसिलदार, नायब तहसिलदार (DBA) मंडळ अधिकारी व तलाठी उपस्थित होते. कार्यक्रमाचे सुत्रसंचलन  नायब तहसिलदार मुगाजी काकडे यांनी तर आभार शिवानंद स्‍वामी यांनी मानले.  

000000

दहावीच्या मार्च 2018 परीक्षेसाठी

ऑनलाईन अर्ज करण्याचे वेळापत्रक जाहीर

नांदेड, दि. 26 :- महाराष्ट्र राज्य माध्यमिक व उच्च माध्यमिक शिक्षण मंडळ यांच्यावतीने घेण्यात येणाऱ्या इयत्ता दहावीच्या मार्च 2018 मध्ये होणाऱ्या परीक्षांसाठी ऑनलाईन अर्ज दाखल करण्याच्या तारखा मंडळाने जाहीर केल्या आहेत.

परीक्षेस नियमित प्रविष्ट होणाऱ्या विद्यार्थी पुनर्परीक्षार्थी, नाव नोंदणी प्रमाणपत्र प्राप्त झालेले पुर्वीचे खाजगी विद्यार्थी, श्रेणीसुधार योजनेअंतर्गत प्रविष्ठ होणारे विद्यार्थी व तुरळक विषय घेवून प्रविष्ट होणारे विद्यार्थ्यांनी ऑनलाईन पद्धतीने अर्ज भरण्याच्या तारखा जाहीर करण्यात आल्या असून www.mahahsscboard.maharashtra.gov.in या संकेतस्थळावर अर्ज भरण्यात यावेत.

माध्यमिक शाळांनी ऑनलाईन पध्दतीने अर्ज सादर करण्याची मुदत नियमित शुल्कासह 16 ऑक्टोंबर ते सोमवार 6 नोव्हेंबर 2017  पर्यंत, शाळांनी बँकेत चलनाद्वारे शुल्क भरावयाची मुदत मंगळवार 7 ते 14 नोव्हेंबर 2017 पर्यंत. विभागीय मंडळाकडे चलन व विद्यार्थ्यांच्या याद्या जमा करावयाची मुदत सोमवार 27 नोव्हेंबर 2017 आहे.  तर विलंब शुल्कासह ऑनलाईन अर्ज भरावयाची मुदत मंगळवार 7 ते 14 नोव्हेंबर 2017 पर्यंत, शाळांनी बँकेत चलन सादर करावयाची मुदत बुधवार 15 नोव्हेंबर ते मंगळवार 21 नोव्हेंबर 2017 पर्यंत. विभागीय मंडळाकडे चलन व विद्यार्थ्यांच्या याद्या जमा करावयाच्या तारीख सोमवार 27 नोव्हेंबर 2017 आहे.

बुधवार 15 नोव्हेंबर ते शनिवार 25 नोव्हेंबर 2017 या कालावधीत शाळांनी विद्यार्थ्यांच्या याद्या एक्सलमध्ये मुद्रीत कराव्यात. परीक्षेचे अर्ज ऑनलाईन पध्दतीने स्विकारण्यात येणार असल्याने विद्यार्थ्यांनी अर्ज भरण्यासाठी शाळेशी संपर्क साधावा. ऑनलाईन अर्ज भरताना येणाऱ्या अडचणीबाबत मुख्याध्यापक यांनी संबंधित विभागीय मंडळाशी संपर्क साधावा.  ऑनलाईन अर्ज भरताना विद्यार्थ्यांचे जन्म ठिकाण नमूद करण्याची कार्यवाही शाळांनी ऑनलाईन प्रक्रियेमध्ये करावी. प्रचलित शुल्क बॅक ऑफ इंडियात जमा करुन बँक ऑफ इंडियाची चलनाची प्रत, विद्यार्थ्यांच्या याद्या दिलेल्या मुदतीत विभागीय मंडळाकडे सादर करण्यात याव्यात. अर्जामध्ये आधारकार्ड क्रमांक नमुद करण्याबाबत अनिवार्य केलेले असले तरी एखादा विद्यार्थ्यांकडे आधार कार्ड नोंदणी केलेली असेल तर नोंदणी क्रमांक देखील ग्राह्य धरण्यात येईल. आधार नोंदणी केली नसेल तर निकालापर्यंत आधार कार्ड काढण्यात येईल असे विद्यार्थ्यांनी मुख्याध्यापकांना लेखी हमीपत्र देणे आवश्यक आहे. आधार कार्ड क्रमांक नाही म्हणून अर्ज भरले नाही असे होणार नाही याची दक्षता घ्यावी, असे लातूर विभागीय मंडळाचे विभागीय सचिव यांनी कळविले आहे.

0000000