सरदार वल्लभभाई पटेल यांच्या जयंतीनिमित्त सोमवारी रॅलीचे आयोजन

 

सरदार वल्लभभाई पटेल यांच्या जयंतीनिमित्त

सोमवारी रॅलीचे आयोजन

नांदेड (जिमाका) दि. 29:- नेहरु युवा केंद्राच्यावतीने सरदार वल्लभभाई पटेल यांच्या जयंतीनिमित्त सोमवार 31 ऑक्टोबर रोजी सकाळी 8 वाजता रॅलीचे आयोजन करण्यात आले आहे. जिल्ह्यातील सेवाभावी संस्था, महीला मंडळ, युवा मंडळ, क्रीडा मंडळातील सदस्यांनी या  रॅलीत सहभाग घ्यावा, असे आवाहन नेहरु युवा केंद्राच्या जिल्हा युवा अधिकारी चंदा रावळकर यांनी केले आहे.

 

नेहरु युवा केंद्र नांदेड व जिल्हाधिकारी कार्यालय, जिल्हा क्रीडा अधिकारी, राष्ट्रीय छात्र सेना, भारत स्काऊट आणि गाईड जिल्हा कार्यालय यांच्या वतीने सरदार वल्लभभाई पटेल यांच्या देशभक्तीचा सन्मान व त्यांच्या विचाराच्या मूल्यांची जपणुक करण्यासाठी तसेच स्वातंत्र्याचा अमृत महोत्सवातर्गंत 25 ते 31 ऑक्टोबर 2022 हा कालावधी एकतेचा उत्सव म्हणून साजरा करण्यात येत आहे. त्याअंतर्गत सोमवार 31 ऑक्टोबर रोजी सकाळी 8 वाजता जिल्हाधिकारी कार्यालय ते सरदार वल्लभभाई पटेल यांचा पुतळा, जुना मोंढा या दरम्यान रॅलीचे आयोजन करण्यात आले आहे. रॅलीत सहभागी होण्यासाठी जिल्हाधिकारी कार्यालय येथे सकाळी 7.30 वाजता उपस्थित राहावे, असे  नेहरु युवा केंद्राच्यावतीने कळविले आहे.

00000

जिल्ह्यातील 2263 गायवर्ग पशुधनाला लम्पी बाधा 4 लाख 19 हजार 183 पशुधनाचे लसीकरण

 

  जिल्ह्यातील 2263 गायवर्ग पशुधनाला लम्पी बाधा

4 लाख 19 हजार 183 पशुधनाचे लसीकरण

 

नांदेड (जिमाका) दि. 29 :- गाय वर्ग पशुधनातील लम्पी आजाराचा अधिक फैलाव होऊ नये यासाठी जिल्हा प्रशासनातर्फे व्यापक लसीकरणासह जनावरांच्या स्वच्छतेबाबत जनजागृती केली जात आहे. जिल्ह्यातील एकुण 179 बाधित गावात 2 हजार 263 गाय वर्ग पशुधनाला लम्पीची बाधा झाली आहे. आजवर 101 पशुधन मृत्यूमुखी पडले आहेत. प्रशासनाने बाधित गावासह पाच किमी परिघातील इतर 1050 गावांवर लक्ष दिले असून लसीकरण मोठ्या प्रमाणात केले जात आहे. सद्यस्थितीत 4 लाख 19 हजार 183 प्रागतिक लसीकरण पूर्ण झाले आहे. मृत्त पशुधनाच्या लाभार्थ्यांची संख्या 31 वर पोहचली आहे. जिल्ह्यात पुरेशा प्रमाणात उपलब्ध लसमात्रा असून पशुपालकांनी लसीकरणासाठी पुढाकार घ्यावा, असे आवाहन जिल्हा पशुसंवर्धन उपआयुक्त डॉ. एम. आर. रत्नपारखी यांनी केले.

000000