Monday, February 20, 2017

अल्पसंख्याक विकास योजना, कामांचा
प्रधान सचिव तागडे यांच्याकडून सर्वंकष आढावा
नांदेड दि. 20 :- जिल्ह्यातील अल्पसंख्याक विकासाशी निगडीत योजना तसेच कामांबाबत राज्याच्या अल्पसंख्याक विभागाचे प्रधान सचिव शाम तागडे यांनी नुकताच जिल्हाधिकारी कार्यालय नांदेड येथे आढावा बैठकीत सर्वंकष आढावा घेतला.  
जिल्हाधिकारी यांच्या निजी कक्षात शनिवार 18 फेब्रुवारी रोजी बैठक संपन्न झाली.बैठकीस जिल्हाधिकारी सुरेश काकाणी, पोलीस अधीक्षक संजय येनपुरे, मनपा आयुक्त समीर उन्हाळे, अप्पर जिल्हाधिकारी संतोष पाटील, प्रभारी मुख्य कार्यकारी अधिकारी पद्माकर केंद्रे, निवासी उपजिल्हाधिकारी जयराज कारभारी, स्‍वामी रामानंद तीर्थ मराठवाडा विद्यापीठाचे कुलसचिव बी. बी. पाटील, जिल्हा नियोजन अधिकारी एस. ए. थोरात, जिल्‍हा शल्‍य चिकित्‍सक डॉ. बी. पी. कदम, जिल्‍हा अग्रणी बॅंकेचे व्यवस्थापक विजय उशिर,  जिल्‍हा ग्रामीण विकास यंत्रणेचे प्रकल्प संचालक डॉ. सुधीर भातलवंडे, जिल्‍हा वक्‍फ अधिकारी महमद अयुब खान आदींची उपस्थिती होती.
बैठकीत मार्गदर्शन करताना प्रधान सचिव श्री. तागडे यांनी अल्पसंख्याक विकासाच्या योजना, त्याअंतर्गत कामांना गती देण्याचे निर्देश दिले. कामांचे काटेकोर नियोजन करावे असेही त्यांनी सांगितले.           यावेळी अल्‍पसंख्‍यांक समाजातील मुलींसाठी वसतिगृह, ग्रामिण क्षेत्र विकास योजनेंतर्गत मंजूर कामे, अल्‍पसंख्‍यांक शाळांना पायाभूत सुविधा पुरविणे, डॉ. झाकीर हुसेन मदरसा आधुनिकीकरण योजना, मराठी भाषा फौंडेशन वर्ग कार्यक्रम, पोस्‍टमॅट्रीक शिष्‍यवृत्‍ती योजना, पोलीस शिपाई भरती पूर्व परीक्षा प्रशिक्षण वर्ग कार्यक्रम सन 2016-17, शासकीय औद्योगिक प्रशिक्षण संस्‍था अंतर्गत तंत्रकौशल्‍य वृध्दिसाठी दुसरी पाळी सुरु करणे, एकात्मिक बालविकास सेवांची समान उपलब्‍धता,अल्‍पसंख्‍यांकांना विविध बॅंकेकडून कर्ज वाटप, नागरी क्षेत्र विकास योजना, वक्‍फ बोर्डाच्‍या जमिनी व त्यांचा वापर याबाबत विस्तृत आढावा घेण्यात आला.    
सुरवातीला जिल्‍हाधिकारी श्री. काकाणी यांनी प्रधान सचिव श्री. तागडे यांचे पुष्‍पगुच्‍छ देऊन स्‍वागत केले. तसेच जिल्ह्यातील अल्पसंख्याक विकासाच्या योजनांची कार्यवाही तसेच कामांची माहिती दिली.  जिल्‍हा नियोजन अधिकारी श्री. थोरात यांनी योजनानिहाय माहितीचे सादरीकरण  केले. यावेळी झालेल्या चर्चेत उपस्थित अधिकाऱ्यांनीही सहभाग घेतला.

000000
एप्रिलमधील व्यवसाय परीक्षेबाबत
आयटीआयचे उमेदवारांना आवाहन
नांदेड, दि. 20 :-  औद्योगिक प्रशिक्षण संस्था ( आयटीआय ) नांदेड अंतर्गत मुलभुत प्रशिक्षण तथा अनुषंगिक सूचना केंद्र (बीटीआरआय) यांची 105 वी अखिल भारतीय व्यवसाय परीक्षा 6 ते 12 एप्रिल 2017 या कालावधीत होणार आहे. त्यासाठी संबंधित उमेदवारांनी आयटीआयशी संपर्क साधावा, असे आवाहन करण्यात आले आहे.
आयटीआयतील ज्या प्रशिक्षणार्थ्यांची अप्रेटिंसशिप पूर्ण होणार आहेत. अशा विद्यार्थ्यांची ही परीक्षा होणार असल्याने संबंधितांनी शुक्रवार 31 मार्च 2017 पर्यंत ज्यांचे अप्रेटिंसशिप पूर्ण होते अशांनी तात्काळ संपर्क साधावा, असेही आवाहन प्राचार्य एस. आर. बुजाडे यांनी केले आहे.

000000
मुरघास, कडबाकुटी यंत्रासाठी  
अर्ज करण्याचे आवाहन
नांदेड, दि. 20 :-  राष्ट्रीय पशुधन अभियानांतर्गत मुरघास व विद्युत चलीत कडबाकुटी यंत्र 50 टक्के अनुदानावर वापरास प्रोत्साहन या योजनेअंतर्गत गुरुवार 2 मार्च 2017 पर्यंत सर्वसाधारण , अनु. जाती, अनु. जमातीतील शेतकऱ्यांकडून अर्ज मागविण्यात येत आहे.
नियम व अटीसाठी इच्छुक लाभार्थ्यांनी नजीकच्या पशुवैद्यकीय दवाखान्यात किंवा पशुधन विकास अधिकारी पंचायत समितीशी संपर्क साधावा व अर्ज सादर करावेत, असे आवाहन जिल्हा पशुसंवर्धन उपाआयुक्त नांदेड यांनी केले आहे.

000000
हरभरा पिकासाठी कृषि संदेश
नांदेड, दि. 20 :- हरभरा घाटेआळीसाठी क्लोरपायरीफॉस 20 ई.सी. 2 मिली प्रति लिटर पाण्यात मिसळून फवारावे. मर रोगासाठी कार्बन्डेन्जीम 2 ग्राम प्रती लिटर पाण्यात मिसळून फवारणी करावी, हा कृषि संदेश उपविभागीय कृषि अधिकारी देगलूर यांनी दिला आहे.  
उपविभागीय कृषि कार्यालय देगलूर यांच्याअंतर्गत देगलूर, मुखेड, नायगाव, बिलोली, धर्माबाद या पाच तालुक्यासाठी हरभरा पिकासाठी क्रॉपसॅप योजनेअंतर्गत पिकावरील किडरोग सर्वेक्षणाचे काम चालू आहे. किडसर्वेक्षक, किडनियंत्रक यांनी केलेल्या सर्वेक्षणानुसार शेतकऱ्यांना वसंतराव नाईक कृषि विद्यापीठ परभणी यांच्याकडून कृषि संदेश देण्यात आला आहे.

000000
दहावी-बारावीच्या परीक्षेसाठी
हेल्पलाईन दूरध्वनी क्रमांक जाहीर
नांदेड, दि. 20 - महाराष्ट्र राज्य माध्यमिक व उच्च माध्यमिक शिक्षण मंडळ पुणे यांच्यावतीने फेब्रुवारी-मार्च 2017 मध्ये घेण्यात येणाऱ्या माध्यमिक व उच्च माध्यमिक प्रमाणपत्र दहावी व बारावी परीक्षा कालावधीत विद्यार्थी, पालक व शाळा प्रमुख यांना येणाऱ्या अडचणी सोडविण्यासाठी विभागीय मंडळ स्तरावर हेल्पलाईन क्रमांक सुरु करण्यात आले आहेत. 
इयत्ता 10 वीसाठी 02382-251633 व बारावीसाठी 02382-251733 ही हेल्पलान सुरु करण्यात आली आहे. विद्यार्थी, पालक व शाळा प्रमुखांनी आपल्या अडचणी विषयी हेल्पलाइन क्रमांकावर व नांदेड जिल्हा समुपदेशक बी. एम. कच्छवे 9371261500 या भ्रमणध्वनी क्रमांकावर संपर्क साधावा, असे विभागीय सचिव लातूर यांनी कळविले आहे.

0000000
सैन्यदलात अधिकारी पदाच्या
भरतीसाठी मोफत पूर्व प्रशिक्षण
नांदेड, दि. 20 :-  भारतीय सैन्यदल, नौदल व वायुदलामध्ये  अधिकारी पदावर भरती होण्यासाठी पात्र उमेदवारांना सर्व्हिस सिलेक्शन बोर्ड Service Selection Board (SSB) या परीक्षेची पूर्व तयारी करुन घेणेसाठी छात्रपूर्व प्रशिक्षण केंद्र नाशिक रोड नाशिक येथे महाराष्ट्र शासनातर्फे महाराष्ट्रातील नवयुवक व नवयुवतीसाठी सोमवार 6 मार्च 2017 ते बुधवार 15 मार्च 2017 या कालावधीत एसएसबी कोर्स क्र. 41 चालविण्याचे आयोजन करण्यात आले आहे. या कोर्ससाठी प्रशिक्षणार्थीची निवास, भोजन आणि प्रशिक्षणाची नि:शुल्क सोय करण्यात आली आहे.
नांदेड जिल्ह्यातील इच्छूक उमेदवारांनी सैन्य दलातील अधिकारी पदाची संधी उपभोगण्यासाठी जिल्हा सैनिक कल्याण कार्यालय नांदेड येथे मंगळवार 28 फेब्रुवारी 2017 रोजी मुलाखतीस उपस्थित रहावे. मुलाखतीस येण्याआधी PCTC Training च्या Google Plus पेजवरती किंवा सैनिक कल्याण विभाग पुणे यांच्या संकेतस्थळावर www.mahasainik.com वरील Recruitment Tab ला क्लीक करुन त्यामधील उपलब्ध Cheek List आणि महत्वाच्या तारखा यांचे अवलोकन करुन त्याची दोन प्रतीमध्ये प्रिंट काढून तसेच त्यामध्ये दिलेले सर्व परिशिष्ट डाऊलोड करुन त्यांचीही दोन प्रतीमध्ये प्रिंट काढून ते पूर्ण भरुन आणावे.
केंद्रामध्ये एस.एस.बी. कोर्समध्ये प्रवेश मिळण्यासाठी पुढील नमूद कोणतीही एक पात्रता आवश्यक आहे व त्यासंबंधीचे पात्रता प्रमाणपत्र कोर्सला येताना घेऊन येणे आवश्यक आहे. कंम्बाईड डिफेन्स सर्व्हीसेस एकझामिनेशन (युपीएससी) अथवा नॅशनल डिफेंस ॲकेडमी एकझामिनेशन (युपीएससी) पास झालेली असावी व त्यासाठी सर्व्हिसेस सिलेक्शन बोर्ड मुलाखतीसाठी पात्र झालेले असावे. एनसीसी सी  प्रमाणपत्र किंवा बी ग्रेडमध्ये पास झालेले असावे व एनसीसी ग्रुप हेडक्वार्टरने एसएसबीसाठी शिफारस केलेली असावी. टेक्नीकल ग्रॅज्युएट कोर्ससाठी एस.एस.बी. मुलाखतीसाठी कॉल लेटर असावे. University Entry Scheme साठी एसएसबी कॉल लेटर असावे किंवा एसएसबीसाठी शिफारस केलेल्या यादीत नाव असावे.
अधिक माहितीसाठी प्रभारी अधिकारी, छात्रपूर्व प्रशिक्षण केंद्र नाशिक रोड नाशिक यांचा दूरध्वनी नंबर 0253-2451031 आणि 2451032 असून कार्यालयीन वेळेत प्रत्यक्ष अथवा दूरध्वनीवर संपर्क करावा, असे आवाहन जिल्हा सैनिक कल्याण अधिकारी नांदेड यांनी केले आहे.

00000

  वृत्त क्र.   252   शस्त्रास्त्र बाळगण्यावर बंदी ; विनापरवानगी लाऊडस्पिकर नाही   जिल्हयात 144 कलम लागू ; आचारसंहितेचा कडक अवलंब     नांदेड ...