Tuesday, November 28, 2017

जिल्ह्यातील शस्त्र परवानाधारकांना
नुतनीकरणाबाबत आवाहन
नांदेड, दि. 28 :- जिल्ह्यातील शस्त्र परवानाधारकांनी जिल्हाधिकरी तथा जिल्हादंडाधिकारी कार्यालय नांदेड यांचेमार्फत निर्गमीत शस्त्र परवाने ज्याची मुदत रविवार 31 डिसेंबर 2017 रोजी संपुष्टात येत आहे अशा शस्त्र परवानाधारकांनी त्यांचा शस्त्र परवाना पुढील कालावधीसाठी नुतनीकरण करुन घ्यावा. परवानाधारकाने 1 ते 31 डिसेंबर 2017 या कालावधीत आपला शस्त्र परवाना नुतनीकरण करुन घेण्यासाठी नुतनिकरण शुल्क चलनाने शासन जमा करुन विहित नमुन्यातील अर्ज व मुळ शस्त्र परवाना सेतू समिती जिल्हाधिकारी तथा जिल्हादंडाधिकारी कार्यालय नांदेड येथे दाखल करावा, असे आवाहन अपर जिल्हादंडाधिकारी नांदेड यांनी केले आहे.
केंद्र शासनाचे निर्देशानुसार NATIONAL DATA BASE (NDAL) च्या संकेतस्थळावर ज्या शस्त्र परवानाधारकांची माहिती अपलोड करण्यात आली आहे, अशा शस्त्र परवानाधारकांना युआयएन नंबर देण्यात आला आहे. अशा शस्त्र परवानाधारकांनी स्वत:चा आधार क्रमांक, पॅन क्रमांक अपलोड करण्यासाठी केंद्र शासनाचे निर्देश आहेत. सर्व संबंधितांनी याची नोंद घ्यावी, असेही आवाहन जिल्हाधिकारी तथा जिल्हादंडाधिकारी नांदेड यांनी केले आहे.

00000
कापूस, तूर, हरभरा
पिकासाठी कृषि संदेश
नांदेड, दि. 28 :- क्रॉपसॅप सन 2017-18 अंतर्गत किड व रोग सल्ला प्रकल्पातंर्गत कापूस, तूर व हरभरा या पिकाचे सर्वेक्षण चालू आहे. याअंतर्गत नांदेड कृषि उपविभागातील मुदखेड, अर्धापूर, लोहा व कंधार या तालुक्यांमध्ये सर्वेक्षण चालू आहे. सर्वेक्षणाअधारे किड रोगावर कृषि विद्यापीठाकडून उपचाराबाबत संदेश दिला जातो. त्याप्रमाणे मोबाईलवर लघू संदेश पाठवून शेतकऱ्यांना किड रोगाबाबत जागरुक करण्यात येते.  
सध्या कपाशीवर शेंदरी बोंड अळीचा प्रादूर्भाव दिसून येतो. या अळीच्या नियंत्रणासाठी फेनवलरेट 20 ई.सी. 8 मिली किंवा थायोडिकार्ब 75 टक्के डब्ल्यु पी. 20 ग्रॅम प्रति 10 लिटर पाण्यात मिसळून फवारणी करावी. जेणेकरुन अळीचे नियंत्रण होईल. कपाशीचा हंगाम जास्त काळ लांबवू नये , म्हणजेच फरदड ठेवू नये. कापूस वेचणी झाल्यानंतर जानेवारी महिन्यात मेंढ्या, गुरे चरण्यासाठी कपाशीच्या शेतात सोडावे यामुळे शेंदरी बोंडअळीचे अंडीकोष नष्ट होण्यास मदत होईल व अळीचा जीवनक्रम खंडीत होईल. सोबत कापूस काढणीनंतर जमिनीची खोल नांगरट करुन सुर्यप्रकाशात तापण्यासाठी खुली ठेववी  म्हणजे पक्षांना खाण्यास अंडी कोष उपलब्ध होतील.
तूर हे पिक कळी शेंगा लागण्याच्या अवस्थेत आहे. तूरीवर प्रामुख्याने पाने गुंडाळणारी अळी, पिसारी पतंग , शेंग माशी व शेंगापोखरणाऱ्या अळीचा प्रादुर्भाव प्रामुख्याने दिसून येत असतो. गुंडाळलेली पाने तोडून नष्ट करावीत. शेंगमाशीचा प्रादुर्भाव आढळून येत असल्यास क्विनॉलफॉस 25 टक्के 16 मिली 10 लिटर पाण्यात मिसळून फवारावे. तूरीवरील शेंगा पोखरणाऱ्या अळीमुळे 30 ते 35 टक्के नुकसान होते. या अळीच्या सर्वेक्षणासाठी हे. 5 कामगंधा सापळ्यांचा वापर करावा. यामध्ये सलग 3 रात्री 8 ते 10 पतंग हेलीकोवरपाचे पडल्यास फवारणीची आवश्यकता आहे, असे समजून एचएएनपीव्ही ही जैविक किटकनाशक 500 मिली प्रति हे. फवारावी. प्रादुर्भाव अधिक असल्यास ईमामेक्टींन बेंझोऐट 5 एसजी 4 ग्रॅम प्रति 10 लिटर पाण्यात मिसळून फवारावीत.
हरभरा हे पिक सध्या शाखीय वाढ अवस्था व फुलोरा अवस्थेत आहेत. हरभऱ्यावर प्रामुख्याने मर रोगाचा प्रादुर्भाव आढळून येतो. या मर रोगाच्या नियंत्रणासाठी ट्रायकोड्रमा व्हीरीडी एक टक्के डब्ल्युपी 4 ग्रॅम बीजप्रक्रियेसोबतच प्रादुर्भावीत पिकांनी अळवणी करावी. हरभरा या पिकात घाटे अळीचा प्रादुर्भाव दिसून येतो. या अळीच्या नियंत्रणासाठी हे. 20 पक्षी थांबे उभारावेत. या अळीच्या सर्वेक्षणासाठी कामगंध सापळ्याचा वापर करावा. या सापळ्यात हेलिल्युर या घाटेअळीच्या माधीचा गंध असलेल्या ल्यूर वापरलेला असतो. या गंधामुळे हेलीकोवरपाचे नर पतंग आकर्षित होऊन त्या सापळ्यात अडकतात. त्यामुळे मादी अंडी फलनास अकार्यक्षम होते व त्यामुळे किडीवर नियंत्रण मिळण्यास मदत होते. प्रति सापळ्यात 8 ते 10 पतंग सलग 3 रात्री आढळून आल्यास प्रादुर्भाव अधिकचा समजून रासायनिक किटकनाशकाची फवारणी करावी. याकरिता क्विनॉलफॉस 25 टक्के 16 मिली प्रति लिटर पाण्यात मिसळून फवारावीत. याशिवाय कृषि विद्यापीठाने शिफारस केलेले लेबरक्लेम रासायनिक किटकनाशकांचा वापर क्षेत्रीय कर्मचाऱ्यांशी संपर्क करुन करावा, असे आवाहन नांदेडचे उपविभागीय कृषि अधिकारी डॉ. व्ही. व्ही. भरगंडे यांनी शेतकऱ्यांना केले आहे.

00000
गरीब, निर्धन रुग्णांसाठी
मोफत आरोग्य शिबीर
नांदेड , दि. 28 :- गरीब आणि निर्धन रुग्णांसाठी धर्मादाय रुग्णालयाच्या योजनेंतर्गत सहाय्यक धर्मादाय आयुक्त, सार्वजनिक न्याय नोंदणी कार्यालय नांदेड यांच्या मार्गदर्शनाखाली डॉ. वाडेकर संचलित मराठवाडा मेडिकल फाऊंडेशन नांदेड धर्मादाय रुग्णालयातर्फे मोफत आरोग्य शिबीर सार्वजनिक न्यास नोंदणी कार्यालय नांदेड रेल्वेस्टेशन समोर, चौधरी पेट्रोलपंपाच्या बाजूला, गवळीपुरा, नांदेड येथे रविवार 3 डिसेंबर रोजी सकाळी 10 ते दुपारी 3 यावेळेत मोफत आरोग्य शिबीराचे आयोजन निर्धन व गरीब रुग्णांसाठी केले आहे.
नांदेड जिल्ह्यातील नागरिकांनी या शिबीराचा लाभ घ्यावा, असे आवाहन नांदेडचे सहाय्यक धर्मादाय आयुक्त यांनी केले आहे.

0000
मुख स्वास्थ तपासणी मोहीम
1 ते 31 डिसेंबर कालावधीत
नांदेड दि. 28 :- जिल्ह्यात मुख स्वास्थ तपासणी मोहीम 1 ते 31 डिसेंबर 2017 या कालावधी साजरा करण्यात येणार आहे. यात जिल्ह्यातील 30 वर्षावरील स्त्री व पुरुषांची तोंडाची तपासणी केली जाणार आहे. तपासणी सर्व शासकीय, मनपा, न.पा दवाखाने येथे मोफत आहे. गावपातळीवर आशा, ए.एन.एम. व एम.पी.डब्लू. यांच्यामार्फत तपासणी करुन उपचारासाठी शासकीय दवाखान्यात पाठविण्यात येणार आहे. गरजू व्यक्तींनी या तपासणीचा लाभ घ्यावा, असे आवाहन प्रभारी जिल्हा शल्यचिकीत्सक डॉ. गुंटूरकर यांनी केले आहे.
मुख स्वास्थ हे सर्व शरीराच्या स्वास्थाचे गमक आहे. त्याचप्रमाणे मुख स्वास्थ जर व्यवस्थित ठेवले तर पुढील पुष्कळ आजारांपासून आपण वाचू शकतो. मुख कर्करोग हा कर्करोगामध्ये सर्वात प्रथम क्रमांकावर आढळून येतो. मौखिक कर्करोग जर पुर्वावस्थेत ओळखला तर तो कर्करोगामध्ये परावर्तीत होण्यापासून आपण वाचवू शकतो. तंबाखूचे सेवन करणे हे कर्करोगाचे प्रमुख कारण आहे.

000000
महाराष्ट्र लोकसेवा आयोगातर्फे
2018 या वर्षातील परीक्षांचे अंदाजित वेळापत्रक जाहीर
नांदेड, दि. 28 : महाराष्ट्र लोकसेवा आयोगातर्फे 2018 मध्ये आयोजित करण्यात येणाऱ्या विविध स्पर्धा परीक्षांचे अंदाजित वेळापत्रक जाहीर करण्यात आले आहे. महाराष्ट्र लोकसेवा आयोगाच्या संकेतस्थळावर हे वेळापत्रक प्रसिद्ध करण्यात आले आहे.
लोकसेवा आयोगाच्या वेळापत्रकानुसार राज्य कर (विक्रीकर) निरीक्षक परीक्षा 2017 ( परीक्षेसाठी मागणीपत्र प्राप्त दि. 19 एप्रिल ) साठीची पूर्व परीक्षा रविवार, दिनांक 16 जुलै 2017 रोजी घेण्यात आली होती. आता या पदासाठीची मुख्य परीक्षा रविवार, दि. 7 जानेवारी 2018 रोजी घेण्याचे नियोजित करण्यात आली आहे. राज्य सेवा परीक्षा 2018 साठीची जाहिरात डिसेंबर 2017 मध्ये प्रसिद्ध करण्यात येणार असून पूर्व परीक्षा रविवार, दि. 8 एप्रिल 2018 रोजी तर मुख्य परीक्षा शनिवार, दि. 18,19 ऑगस्ट व सोमवार दि. 20 ऑगस्ट, 2018 अशी तीन दिवस घेण्यात येणार आहे.
महाराष्ट्र दुय्यम सेवा संयुक्त परीक्षेसाठी जानेवारी- 2018 मध्ये जाहिरात प्रसिद्ध होणार असून पूर्व परीक्षा रविवार दि. 6 मे 2018 रोजी घेण्यात येणार आहे. महाराष्ट्र दुय्यम सेवा मुख्य परीक्षा 2018 अंतर्गत संयुक्त पेपर क्रमांक 1- रविवार दि. 26 ऑगस्ट 2018 रोजी, पेपर क्र. 2 (पोलीस उपनिरीक्षक)- रविवार दिनांक 2 सप्टेंबर 2018, पेपर क्रमांक 2 (राज्य कर निरीक्षक)- रविवार दि. 30 सप्टेंबर 2018, पेपर क्र. 2 ( सहायक कक्ष अधिकारी)- शनिवार दि. 6 ऑक्टोबर 2018 रोजी घेण्यात येणार आहे.
महाराष्ट्र कृषि सेवा परीक्षा 2018 साठी फेब्रुवारी 2018 मध्ये जाहिरात प्रसिद्ध होणार असून पूर्व परीक्षा रविवार दि. 13 मे 2018 रोजी तर मुख्य परीक्षा शनिवार दि. 8 सप्टेंबर 2018 रोजी घेण्याचे नियोजित आहे. सहायक मोटार वाहन निरीक्षक परीक्षा 2018 साठी फेब्रुवारी 2018 मध्ये जाहिरात प्रसिद्ध करण्यात येणार असून पूर्व परीक्षा रविवार दि. 20 मे 2018 रोजी तर मुख्य परीक्षा रविवार दिनांक 9 सप्टेंबर2018 रोजी घेण्यात येणार आहे.
महाराष्ट्र गट-क सेवा संयुक्त परीक्षा 2018 साठी मार्च 2018 मध्ये जाहिरात प्रसिद्ध होणार असून पूर्व परीक्षा रविवार दि. 10 जून 2018 रोजी घेण्यात येणार आहे. महाराष्ट्र गट-क सेवा मुख्य परीक्षा 2018अंतर्गत संयुक्त पेपर क्रमांक 1- रविवार दि. 14 ऑक्टोबर 2018 रोजी, संयुक्त पेपर क्रमांक 2 (लिपिक-नि-टंकलेखक)- रविवार दि. 21 ऑक्टोबर 2018, संयुक्त पेपर क्रमांक 2 (दुय्यम निरीक्षक, राज्य उत्पादन शुल्क, गट-क)- रविवार दि. 4 नोव्हेंबर 2018, संयुक्त पेपर क्रमांक 2 (कर सहायक)- रविवार दि. 2 डिसेंबर 2018 रोजी घेण्यात येणार आहे.
महाराष्ट्र वन सेवा परीक्षा 2018 साठी मार्च 2018 मध्ये जाहिरात प्रसिद्ध केली जाणार असून पूर्व परीक्षा रविवार दि. 24 जून 2018 रोजी तर मुख्य परीक्षा रविवार दि. 28 ऑक्टोबर 2018 रोजी घेण्यात येणार आहे. महाराष्ट्र अभियांत्रिकी सेवा परीक्षा 2018 साठी एप्रिल 2018 मध्ये जाहिरात प्रसिद्ध केली जाणार असून महाराष्ट्र अभियांत्रिकी सेवा संयुक्त पूर्व परीक्षा 2018 रविवार दि. 8 जुलै 2018 मध्ये घेण्यात येणार आहे. महाराष्ट्र यांत्रिकी अभियांत्रिकी सेवा मुख्य परीक्षा 2018 शनिवार दि. 17 नोव्हेंबर 2018 रोजी घेण्यात येणार आहे. महाराष्ट्र विद्युत अभियांत्रिकी सेवा मुख्य परीक्षा 2018 शनिवार दि. 24 नोव्हेंबर2018 रोजी घेण्यात येणार आहे. महाराष्ट्र स्थापत्य अभियांत्रिकी सेवा मुख्य परीक्षा 2018 रविवार दि. 25 नोव्हेंबर 2018 रोजी घेण्यात येणार आहे. महाराष्ट्र विद्युत / यांत्रिकी अभियांत्रिकी सेवा मुख्य परीक्षा 2018शनिवार दि. 15 डिसेंबर 2018 रोजी घेण्यात येणार आहे.
महाराष्ट्र शिक्षण सेवा, गट-ब प्रशासन शाखा मर्यादित विभागीय स्पर्धा परीक्षा- 2018 साठी मे 2018 मध्ये जाहिरात प्रसिद्ध केली जाणार असून शनिवार दि. 4 ऑगस्ट 2018 रोजी परीक्षा घेण्यात येणार आहे.सहायक कक्ष अधिकारी मर्यादित विभागीय स्पर्धा परीक्षा 2018 साठी मे, 2018 मध्ये जाहिरात प्रसिद्ध करण्यात येणार असून परीक्षा शनिवार दि. 25 ऑगस्ट 2018 रोजी घेण्याचे नियोजित आहे. परीक्षांचे वेळापत्रक आयोगाच्या www.mpsc.gov.in या संकेतस्थळावर प्रसिद्ध करण्यात आले आहे.
0000000

  वृत्त क्र.   252   शस्त्रास्त्र बाळगण्यावर बंदी ; विनापरवानगी लाऊडस्पिकर नाही   जिल्हयात 144 कलम लागू ; आचारसंहितेचा कडक अवलंब     नांदेड ...