Saturday, February 17, 2018


माहिती देणाऱ्यास एक लाख रुपये बक्षीस
गर्भलिंग निदान चाचणी तसेच अवैध पद्धतीने गर्भपात
करणाऱ्यांची माहिती द्यावी - अप्पर जिल्हाधिकारी संतोष पाटील    

  नांदेड, दि. 17 :- सोनोग्राफी केंद्रात गर्भधारणापूर्व व प्रसवपूर्व गर्भलिंग निदान अथवा अनोंदणीकृत गर्भपात केंद्रात अवैध पद्धतीने गर्भपात होत असल्यास त्याची माहिती तक्रार टोल फ्री क्र. 18004334475 किंवा www.amchimulgi.gov.in या संकेतस्थळावर नोंदवावी, असे आवाहन अप्पर जिल्हाधिकारी संतोष पाटील यांनी केले आहे.
गर्भधारणापूर्व व प्रसव पूर्व गर्भलिंग निदान निवडीस प्रतिबंध कायदा 2003 ची परिणामकारक अमलबजावणी होण्याच्या दृष्टीकोनातून शासनाने जिल्हाधिकारी यांचे अध्यक्षतेखाली जिल्हास्तरीय दक्षता पथकाची स्थापना केली आहे. त्यानुसार दक्षता पथकाची बैठक अप्पर जिल्हाधिकारी संतोष पाटील यांचे अध्यक्षतेखाली 16 फेब्रुवारी रोजी  घेण्यात आली त्यावेळी ते बोलत होते.  
यावेळी सोनोग्राफी केंद्रात अवैध पद्धतीने गर्भपात होत असल्या किंवा अपात्र व्यक्ती गर्भपात करीत असल्यास अशी माहिती देणाऱ्यास शासनातर्फे एक लाख रुपये बक्षीस देण्यात येणार असल्याची माहिती जिल्हा शल्यचिकित्सक डॉ. बी .पी कदम यांनी दिली.
या बैठकीत नांदेड जिल्ह्यातील सोनोग्राफी केंद्रात तपासणी करण्यात आलेल्या गरोदर मातांच्या सोनोग्राफीचा आढावा घेण्यात आला. नांदेड जिल्ह्यातील लिंग गुणोत्तर प्रमाणाची माहिती देण्यात आली.  जास्तीतजास्त नागरिकांनी गर्भलिंग निदान करणाऱ्या सोनोग्राफी केंद्राची व अवैध पद्धतीने गर्भपात करणाऱ्या केंद्रांची तक्रार टोल फ्री. क्रमांकावर नोंदवावी, असेही आवाहन केले आहे.
बैठकीस मनपाचे वैद्यकीय आरोग्य अधिकारी डॉ. सुमती ठाकरे, पी. जी. देशपांडे, पोलीस निरीक्षक,डॉ. एस. व्ही. फुलवरे, सामाजिक कार्यकर्ती डॉ. शोभा वाघमारे, जिल्हा रुग्णालयाचे डॉ. अन्सारी, विधी समुपदेशक-पएनडीटी कक्षाचे अॅड. पजा राठोर यांची उपस्थिती होती.
000000


भाड्याचे घर, दुकान, जागा
देणाऱ्या मालकांना नोंदणीचे आवाहन  
नांदेड, दि. 17 :- भाड्याचे इमारती, दुकाने, घर, ब्लॉक अथवा जागा देणाऱ्या मालकांनी महाराष्ट्र रेंट कट्रोल ॲक्ट 1999 चे कलम 55 नुसार भाडे करार, लिव्ह लायसन्स करार भारतीय नोंदणी कायद्यानुसार नोंदविणे बंधनकारक आहे, असे आवाहन नांदेडचे मुद्रांक जिल्हाधिकारी एस. के. बोधगिरे यांनी केले आहे.
भाडे करारनामे, लिव्ह लायसन्स करारनामे नोंदविणे नोंदणी कायदा 1908 अन्वये ही घरमालक, जागामालक, दुकानमालक यांची जबाबदारी आहे. या तरतुदीचे उल्लंघन झाल्यास घरमालकांना तीन महिन्याची कैद अथवा पाच हजार रुपयाचा दंड किंवा दोन्ही शिक्षा होऊ शकते. सर्व घरमालकांनी, दुकानमालकांनी जागा मालकांनी भाडे करारनामे, लिव्हलायसन्स करारानामे तात्काळ नोंदणीकृत करावे, असेही आवाहन करण्यात आले आहे.
00000


शासकीय तंत्रनिकेतनमध्ये
श्री गुरुगोविंद सिंघजी जयंती उत्साहात साजरी
नांदेड, दि. 17 :- येथील शासकीय तंत्रनिकेतन, नांदेड येथे श्री गुरुगोविंद ससिंघजी यांची 351 मोठया उत्साहात साजरी करण्यात आली. यावेळी विजेंद्रसिंघजी कपुर   गुरमितसिंघजी पुजारी गुरुद्वारा यांनी मुलांना श्री गुरु गोविंदससिंघजी यांच्या त्यागाची मानवधर्माच्या शिकवणीची जाणीव करुन दिली.
कार्यक्रमाच्या अध्यक्षस्थानी संस्थेचे प्रभारी प्राचार्य सी. व्ही. लहाडे उपस्थित होते. तर एनएसबी महाविद्यालयाचे हिंदी विभाग प्रमुख परविंदर कौर कोल्हापूरे, तेजासिंघजी मुख्यग्रंथी मातासाब गुरुद्वारा यांची प्रमुख उपस्थिती होती.  
            विजेंद्रसिंघजी कपुर यांनी श्री गुरु गोविंदससिंघजी यांच्या कार्याचे महत्व विशद करताना सद्गुण विवेक गुण जीवनात  किती उपयोगी आहे, हे सांगितले. श्री गुरुगोविंदससिंघजी यांनी सर्व धर्मातील लोकांना समानतेचे ज्ञान दिले. शस्त्राचा वापर हिंसेसाठी नसून, अहिंसेसाठी शांततेच्या मार्गाने करावयास सांगितला. शिस्त या शब्दाचा अर्थ शिकणे होय असे सांगितले. गुरमितसिंघजी पुजारी गुरुद्वारा यांनी खालसा पंथाने सर्वच धर्माचा आदर करत केवळ अनिष्ठ बाबींना विरोध केला, साधू संतांचे रक्षण करण्यासाठी दूष्ठांचा समूळ नाश करण्यासाठी कार्य केले असे सांगितले.  डॉ. परविंदर कौर यांनी आपल्या भाषाणात श्रीगुरुनानक हे सर्व मानव जातीधर्मासाठी संत होते असे सांगतानाच श्री गुरुगोविंद सिघजीच्या त्याग बलीदानामुळे भारताच्या इतिहासाला कलाटणी मिळाल्याचे सांगितले. प्राचार्य श्री गुरुबचन सिंघजी शिलेदार यांनी संपुर्ण मानवतावादी विचारवंत असलेल्या श्री गुरुगोविंदससिंघजी यांच्या विचारांची आजही संपुर्ण जगाला आवश्यकता असल्याचे सांगितले.
 प्रसाद जाधव या विद्यार्थ्याने श्री गुरुगोविंदसिंघजी यांच्यावर केलेली स्वत:ची रचना विद्यार्थ्यांसमोर सादर केली. तसेच यावेळी शिख संप्रदायाच्या गुरुच्या जीवनावर आधारीत छायाचित्र प्रदर्शनीचे उद्घाटन यावेळी करण्यात आले. अध्यक्ष समारोपात संस्थेचे  प्रभारी प्राचार्य सी. व्ही. लहाडे यांनी गुरुनानकजींच्या शिकवणीचा अवलंब विद्यार्थ्यांनी आपल्या जीवनात करावा आणि समाजहितासाठी काम करण्याचे सांगितले.
श्री गुरुगोविंदससिंघजी यांच्या 351 व्या जयंती कार्यक्रमासाठी श्री रणजितसिंघजी कामठेकर, गुरुबचनसिंघजी शिलेदार हरनामसिंघजी मनोत्रार, सुजानसिंघजी कामठेकर, आवर्जुन उपस्थित होते. कार्यक्रम यशस्वी करण्यासाठी स. सरताज सिंघ,  स. गुरुसिमरन सिंघ, स. उदयपालसिंघ, स. हंसराज सिंघ, स. गगनदिप सिंघ, सरबजोत सिंघ, तेंजिदर कौर, पुनम कौर, कोमल कौर हर्षदीप कौर  यांनी परिश्रम घेतले.
कार्यक्रमाचे सुत्रसंचालन किरणज्योत कौर संघ, तरण ज्योत कौर, कुंजीवाले या विद्यार्थीनींनी केले तर यावेळी संस्थेचे उपप्राचार्य  ए. डब्ल्यू. पावडे, प्रा. सकळकळे, प्रा. लोकमनवार, प्रा. एस. पी. कुलकर्णी, श्री. आर. एम.दुलेवाड यांच्यासह संस्थेतील विद्यार्थी, अधिकारी, कर्मचारी उपस्थित होते.
00000


दहावी, बारावी परीक्षार्थींनी केंद्रात
अर्धातास लवकर उपस्थित रहावे
  नांदेड, दि. 17 :- राज्य माध्यमिक व उच्च माध्यमिक शिक्षण मंडळामार्फत घेण्यात येणारी परीक्षा इयत्ता बारावीसाठी 76 केंद्र व दहावीसाठी 152 केंद्रात घेण्यात येणार आहेत. परीक्षार्थींनी परीक्षा दालनात परीक्षेपूर्वी अर्धा तास आधी उपस्थित रहावे. परीक्षा सुरु झाल्यानंतर कोणत्याही कारणावरुन उशिराने येणाऱ्या परीक्षार्थीस दालनात प्रवेश दिला जाणार नाही, याबाबत संबंधीत पालक व विद्यार्थ्यांनी दक्षता घ्यावी, असे आवाहन दक्षता समितीने केले आहे.
उच्च माध्यमिक प्रमाणपत्र परीक्षा तसेच माध्यमिक शालांत प्रमाणपत्र परीक्षा 2018 ही अनुक्रमे 21 फेब्रुवारी ते 20 मार्च आणि 1 ते 24 मार्च 2018 या कालावधीत जिल्ह्यातील विविध परीक्षा केंद्रात घेण्यात येणार आहेत. परीक्षा कॉपी मुक्त, भयमुक्त वातावरणात पार पाडण्यासाठी जिल्हा दक्षता समितीची बैठक नुकतीच जिल्हाधिकारी नांदेड यांच्या अध्यक्षतेखाली संपन्न झाली, अशी माहिती शिक्षणाधिकारी (मा.) जि. प. नांदेड यांनी प्रसिद्धी पत्रकाद्वारे दिली.   
00000


केळी पिकाचा कृषि संदेश
  नांदेड, दि. 17 :- केळी करपा रोग नियंत्रणासाठी केळीच्या पानावर पिवळे, तपकेरी ठिपके मोठ्या प्रमाणावर आढळून आल्यास केळीच्या पानाचा प्रादुर्भावग्रस्त भाग काढून टाकावा. प्रोपीकोनेझॉल 0.5 टक्के (0.5 मिली) मिनरल ऑईल 1 टक्के (10 मिली) पाण्यात मिसळून फवारणी करावी. केळी फुलकिडी नियंत्रणासाठी केळीच्या कोवळ्या फळावर छोटी अंडी किंवा ठिपके आढळून आल्यास व्हर्टीसोलियम लेकॉनी 3 ग्रॉम / लि. अधिक स्टीकर 1 मिली / लि. किंवा निमार्क 5 टक्के फवारणी करावी, असे आवाहन नांदेडचे उपविभागीय कृषि अधिकारी डॉ. व्ही. व्ही. भरगंडे यांनी केले आहे.
00000

  वृत्त क्र.   252   शस्त्रास्त्र बाळगण्यावर बंदी ; विनापरवानगी लाऊडस्पिकर नाही   जिल्हयात 144 कलम लागू ; आचारसंहितेचा कडक अवलंब     नांदेड ...