गणेश उत्सवाची परवानगी आता ऑफलाईन पद्धतीने

· 16 सप्टेंबर रोजी सार्वजनिक सुट्टीच्या दिवशी कार्यालय राहणार सुरू

नांदेड (जिमाका) दि. 15 :- गणेश मंडळांना परवानगी देण्याच्या कामासाठी शनिवार 16 सप्टेंबर 2023 रोजी या सार्वजनिक सुट्टीच्या दिवशी देखील कार्यालय सुरू राहणार असल्याचे धर्मादाय उप आयुक्त सौ. ममता राखडे यांनी कळविले आहे. गणेश उत्सवासाठी वर्गणी गोळा करण्याच्या परवानगीसाठी अर्जदाराच्या ओळखत्राची प्रत तसेच जागेचा पुरावा देणे आवश्यक आहे.

दरवर्षी प्रमाणे यावर्षी 19 सप्टेंबर 2023 पासून गणेश उत्सवास प्रारंभ होत आहे. गणेश उत्सवासाठी वर्गणी गोळा करण्यासाठी महाराष्ट्र सार्वजनिक विश्वस्त व्यवस्था अधिनियम 1950 चे कलम 41 सी प्रमाणे धर्मादाय आयुक्त कार्यालयाची परवानगी घेणे आवश्यक आहे. ही परवानगी आतापर्यंत ऑनलाईन पद्धतीने देण्यात येत होती. तथापि धर्मादाय आयुक्तांच्या संकेत स्थळावर अचानक तांत्रीक बिघाड झाल्याने आता ही परवानगी ऑफलाईन पद्धतीने देण्यात येत आहे, असे धर्मादाय उप आयुक्त नांदेड विभाग नांदेड यांनी कळविले आहे.

00000