वृत्त क्रमांक 1338

खडकुत ते जांभरुन फाटापर्यंत राष्ट्रीय महामार्गावरील वाहतूक लगतच्या एकेरी मार्गाने 

नांदेड दि. 31 डिसेंबर :- नांदेड ते हिंगोली जाणाऱ्या राष्ट्रीय महामार्गावरील खडकूतपाटी ते जांभरुनफाटा दरम्यानचा रस्ता येत्या 2 ते 4 जानेवारी पर्यंत प्रतिबंध करण्यात आला आहे. यासाठी पर्यायी मार्ग जाण्या-येण्यासाठी नांदेड ते हिंगोली जाणाऱ्या राष्ट्रीय महामार्गावरील खडकूत पाटी ते जांभरुन फाटा दरम्यानचा रस्त्याच्यापलिकडे एकेरी मार्ग असा राहील. 

मोटार वाहन कायदा 1988 चे कलम 115 मधील तरतुदीनुसार जिल्हादंडाधिकारी राहुल कर्डिले यांनी संबधीत विभागाने पुढील उपाययोजना करुन 2 जानेवारी 2026 रोजीचे 6 वा. पासून ते 4 जानेवारी 2026 रोजीच्या 10 वा. पर्यंत उक्त नमुद केल्याप्रमाणे नांदेड ते हिंगोली जाणाऱ्या राष्ट्रीय महामार्गावरील खडकूत पाटी ते जांभरुन फाटा या दरम्यानची सर्व प्रकारच्या वाहनांची वाहतूक पलिकडच्या एकेरी मार्गाने वळविण्यास अधिसुचनेद्वारे मान्यता दिली आहे. 

पोलीस अधिक्षक नांदेड यांनी कायदा व सुव्यवस्थेच्या अनुषंगाने आवश्यक त्या उपाययोजना कराव्यात. उपविभागीय पोलीस अधिकारी नांदेड ग्रामीण यांनी प्रस्तुत अधिसुचना प्रचार व प्रसारसाठी आवश्यक ती कार्यवाही करावी. उपविभागीय पोलीस अधिकारी नांदेड ग्रामीण /कार्यकारी अभियंता, सार्वजनिक बांधकाम विभाग नांदेड/ प्रकल्प संचालक भारतीय राष्ट्रीय राजमार्ग प्राधिकरण, पीआययू नांदेड यांनी रस्ता वाहतूक प्रतिबंध व पर्यायी रस्त्यासाठी आवश्यक असलेले बोर्ड, चिन्ह लावणे इत्यादी बाबतची कार्यवाही करावी, असेही अधिसूचनेत नमूद केले आहे.

00000

वृत्त क्रमांक 1337

नांदेड जिल्ह्यासाठी 3 स्थानिक सुट्या जाहीर 

नांदेड दि. 31 डिसेंबर :- नांदेड जिल्ह्यासाठी सन 2026 या वर्षाकरीता शासन निर्णयाद्वारे प्राप्त झालेल्या अधिकारानुसार जिल्हाधिकारी राहूल कर्डिले यांनी पुढे नमुद यात्रा व सणाच्या दिवशी 3 स्थानिक सुट्या जाहीर केल्या आहेत.   

मंगळवार 6 जानेवारी 2026 रोजी हजरत हाजी सय्याह सरवरे मगदुम बडी दर्गाह कंधार ऊर्स, शुक्रवार 28 ऑगस्ट 2026 रोजी रक्षाबंधन तर शुक्रवार 18 सप्टेंबर 2026 रोजी ज्येष्ठा गौरी पूजन निमित्त स्थानिक सुट्टी जाहीर केली आहे.  

या तीन दिवसाच्या स्थानिक सुट्या नांदेड जिल्हयातील सर्व राज्य शासकीय कार्यालये, जिल्हा परिषदअंतर्गत कार्यालये, महानगरपालिका, नगरपालिका कार्यालये, स्थानिक स्वराज्य संस्थांची कार्यालये तसेच कोषागार, उपकोषागार कार्यालये व इतर शैक्षणिक संस्था यांना लागू राहतील. तसेच हा आदेश नांदेड जिल्ह्यातील दिवाणी व फौजदारी न्यायालये तसेच केंद्र शासनाची कार्यालये आणि बँका यांना लागू होणार नाही, असेही अधिसुचनेत नमूद केले आहे.

00000

 वृत्त क्रमांक 1336

गौण खनिजांचे अनधिकृत उत्खनन, वाहतूक केल्यास कारवाई

नांदेड दि. 31 डिसेंबर :- राज्यात वाळू तसेच इतर गौण खनिजांचे अनधिकृत उत्खनन, साठवणूक व बेकायदेशीर वाहतूक रोखण्यासाठी शासनाने कडक धोरण राबविण्याचे अनुषंगाने महसूल व वन विभागाने 26 नोव्हेंबर 2025 रोजी परिपत्रक प्रसिध्द केले आहे. या निर्देशानुसार परिवहन विभाग, महसूल विभाग व पोलीस प्रशासन यांच्यात समन्वय ठेवून संयुक्त तपासणी व प्रभावी अंमलबजावणी करण्यात येणार आहे. 

ज्यामध्ये बेकायदेशीर कृत्यांमध्ये सहभागी असलेल्या वाहनांवर मोटार वाहन अधिनियम 1988 अंतर्गत कठोर प्रशासकीय कारवाई करण्यात येणार आहे. अवैध वाहतूकीमध्ये संबंधित वाहनाकडून पहिल्यांदा गुन्हा आढळून आल्यास वाहनाचा परवाना 30 दिवसांसाठी निलंबित करून वाहन जप्त करण्यात येईल. दुसऱ्यांदा गुन्हा सिद्ध झाल्यास 60 दिवसांसाठी परवाना निलंबित करून वाहन जप्त करण्यात येईल. तिसऱ्यांदा किंवा वारंवार गुन्हा आढळल्यास संबंधित वाहनाचा परवाना रद्द करण्याबाबत प्रादेशिक परिवहन प्राधिकरणामार्फत कार्यवाही करुन परिवहन विभागामार्फत कारवाई पूर्ण झाल्यानंतर महाराष्ट्र जमीन महसूल अधिनियम 1966 मधील कलम 48 (7) व 48 (8) अन्वये दोषींविरुद्ध पुढील कायदेशीर कारवाईसाठी परिवहन विभागाकडून संबंधित उपविभागीय अधिकारी यांच्याकडे तात्काळ प्रस्ताव सादर करावा, असे निर्देश जिल्हाधिकारी राहुल कर्डिले यांनी दिले आहेत.  त्यामुळे नांदेड जिल्हयातील वाळू माफिया व बेकायदेशीर खनिज वाहतुकीवर आळा बसण्यास मदत होणार असून कायदा व सुव्यवस्था अबाधित राहण्यास तसेच शासनाच्या महसुलाचे संरक्षण होण्यास हातभार लागणार आहे, असे निवासी उपजिल्हाधिकारी किरण अंबेकर यांनी प्रसिद्धी पत्रकाद्वारे कळविले आहे.

00000

वृत्त क्रमांक 1335 

सैनिकी मुलांचा वसतीगृहात कंत्राटी पद्धतीने भरती 

नांदेड दि. 31 डिसेंबर :- सैनिकी मुलांचे वसतीगृह विष्णूपुरी नांदेड येथील वसतीगृहात कंत्राटी पध्दतीने माजी सैनिक, माजी सैनिक अवलंबित मधुन सफाई कामगाराचे एक पद भरण्यात येणार आहे. या पदासाठी माजी सैनिक/माजी सैनिक अवलंबित उपलब्ध नसल्यास हे पद नागरी (सिविलन) संवर्गातून भरण्यात येईल. यासाठी वयोमर्यादा 21 ते 50 वर्षे असून कामाचा अनुभव असल्यास प्राधान्य देण्यात येईल. इच्छुक उमेदवाराने जिल्हा सैनिक कल्याण कार्यालय नांदेड येथे सोमवार 5 जानेवारी 2026 पर्यंत अर्ज दाखल करावेत. अधिक माहितीसाठी दूरध्वनी क्रमांक 02462-359056 किंवा भ्रमणध्वनी क्रमांक 8380873985, 8999638872 वर संपर्क साधावा, असे आवाहन निवासी उपजिल्हाधिकारी तथा जिल्हा सैनिक कल्याण अधिकारी नांदेड यांनी केले आहे.

00000

वृत्त क्रमांक 1334

यंदाच्या परीक्षेत गैरप्रकार खपवून घेतले जाणार नाहीत – जिल्हाधिकारी राहुल कर्डिले

गैरप्रकार आढळल्यास परीक्षा केंद्राची मान्यता रद्द करण्याचा इशारा

नांदेड, दि. 30 डिसेंबर :-मागील वर्षी 2025 झालेल्या परीक्षांतील अनुभव लक्षात घेता, फेब्रुवारी/मार्च 2026 मध्ये होणाऱ्या दहावी व बारावीच्या परीक्षांदरम्यान कोणत्याही परीक्षा केंद्रावर गैरप्रकार आढळून आल्यास संबंधित कोणाचीही गय केली जाणार नाही. आवश्यक असल्यास संबंधित परीक्षा केंद्राची मान्यताही रद्द करण्यात येईल, असे स्पष्ट निर्देश जिल्हाधिकारी तथा जिल्हा दक्षता समितीचे अध्यक्ष राहुल कर्डिले यांनी दिले.

फेब्रुवारी/मार्च 2026 च्या परीक्षांच्या अनुषंगाने जिल्ह्यातील माध्यमिक शाळांचे मुख्याध्यापक व कनिष्ठ महाविद्यालयांचे प्राचार्य यांची संयुक्त पूर्वतयारी आढावा बैठक आज मातोश्री प्रतिष्ठाण इंजिनिअरिंग कॉलेज, खुपसरवाडी ता. जि. नांदेड येथे पार पडली. ही बैठक विभागीय मंडळाचे अध्यक्ष सुधाकररावजी तेलंग यांच्या अध्यक्षतेखाली आयोजित करण्यात आली होती.

यावेळी विभागीय मंडळाच्या प्रभारी सचिव श्रीमती अनुपमा भंडारी, शिक्षणाधिकारी माध्यमिक माधव सलगर, शिक्षणाधिकारी (योजना) दिलीपकुमार बनसोडे, संस्थेचे अध्यक्ष कामाजी पवार व सचिव श्री. चारी  उपस्थित होते.

बैठकीत बोलताना जिल्हाधिकाऱ्यांनी 2025 च्या परीक्षेदरम्यान काही केंद्रांवरील अव्यवस्थेबाबत तीव्र नाराजी व्यक्त केली. “परीक्षार्थ्यांना बसण्यासाठी ड्युअल डेस्क नाहीत, कंपाऊंड वॉल नाही, बाहेर मोठ्या प्रमाणावर गर्दी असते. त्यामुळे ही दहावी-बारावीची परीक्षा आहे की जत्रा, असा भास होतो,” अशा शब्दांत त्यांनी परिस्थितीवर भाष्य केले.

2026 च्या परीक्षेपूर्वी सर्व परीक्षा केंद्रांनी भौतिक सुविधांची पूर्णता करावी. सर्व परीक्षार्थ्यांना ड्युअल डेस्कची व्यवस्था असावी. सीसीटीव्ही, पिण्याचे पाणी, वीज व्यवस्था, पंखे, लाईट, रॅम्प, कंपाऊंड वॉल आदी सुविधा अनिवार्यपणे उपलब्ध असाव्यात. या सुविधा आढळून न आल्यास संबंधित केंद्र बंद करण्याची शिफारस करण्यात येईल, असा स्पष्ट इशारा त्यांनी दिला.

परीक्षेदरम्यान एखाद्या केंद्रावर गैरप्रकार झाला किंवा त्यास प्रोत्साहन मिळाल्यास संबंधितांविरुद्ध कठोर कारवाई प्रस्तावित करण्यात येईल. कॉपी करून उत्तीर्ण होणे ही अत्यंत खेदजनक बाब असून, गैरप्रकारातून उत्तीर्ण झालेला विद्यार्थी भविष्यात चांगला नागरिक होत नाही, याची जाणीव सर्वांनी ठेवावी, असेही जिल्हाधिकाऱ्यांनी नमूद केले.

आजच्या शिक्षण पद्धतीत अंतर्गत मूल्यांकनाचे 20 गुण असून लेखी परीक्षेत 80 पैकी केवळ 15 गुण आवश्यक आहेत. वर्षभरात विद्यार्थ्यांना ही तयारी करून परीक्षा देता येत नसेल, तर त्यावर गांभीर्याने विचार करण्याची गरज असल्याचेही त्यांनी स्पष्ट केले. त्यामुळे 2026 च्या परीक्षेत कोणत्याही प्रकारचा गैरप्रकार खपवून घेतला जाणार नाही, असा सज्जड इशाराच जिल्हाधिकारी राहुल कर्डिले यांनी दिला.

यावेळी विभागीय मंडळाचे अध्यक्ष सुधाकररावजी तेलंग यांनी मंडळाच्या कामकाजाची सविस्तर माहिती दिली. अपार आयडी, खाजगी विद्यार्थ्यांचे अर्ज, अतिविलंब शुल्काच्या तारखा तसेच कॉपीमुक्त अभियानाची पूर्वतयारी याबाबत त्यांनी मार्गदर्शन केले. गैरप्रकाराला प्रोत्साहन दिल्यास कोणाचाही फायदा होत नाही, उलट नुकसानच होते, असे मत त्यांनी व्यक्त केले.

शिक्षणाधिकारी माधव सलगर व दिलीपकुमार बनसोडे यांनीही कॉपीमुक्त अभियान प्रभावीपणे राबविण्याचे आवाहन केले. संस्थेचे अध्यक्ष कामाजी पवार यांनी प्रस्ताविकातून संस्थेच्या कामकाजाची व विविध अभ्यासक्रमांची माहिती दिली.

या सहविचार सभेस जिल्ह्यातील 11 तालुक्यांतून सुमारे 635 मुख्याध्यापक व प्राचार्य उपस्थित होते. कार्यक्रमाचे सूत्रसंचालन व आभार विभागीय मंडळ, लातूर येथील सहायक अधीक्षक श्री. वैद्य यांनी मानले. कार्यशाळेच्या यशस्वितेसाठी सहायक शिक्षण उपनिरीक्षक हनुमंत पोकले यांनी परिश्रम घेतले, तर संस्थेचे प्रतिनिधी श्री. किनेकर यांनी पूर्वनियोजन केले.

यापूर्वी 27 डिसेंबर 2025 रोजी शिवनेरी पोदार लर्न स्कूल, बिजूर (ता. बिलोली) येथे पाच तालुक्यांची बैठक पार पडली होती. त्या बैठकीस 217 मुख्याध्यापक व प्राचार्य उपस्थित होते.

०००००

वृत्त क्रमांक 1333

विना नंबर हायवांवर जिल्हाधिकाऱ्यांची अचानक धडक कारवाई

हायवांवर आरटीओकडून ७३ हजार ७५० रुपयांचा दंड; चालक-मालकांना कडक इशारा

रेती, मुरुम, मातीची वाहतूक विना नंबर हायवांद्वारे केल्यास कठोर कारवाई

नांदेड, दि. 30 डिसेंबर :-जिल्ह्यातील बेकायदेशीर विना नंबर अवजड वाहनांवर जिल्हा प्रशासनाने कडक भूमिका घेतली असून, जिल्हाधिकारी राहुल कर्डिले यांनी आज नांदेड शहरात अचानक धडक कारवाई करत ११ विना नंबर हायवा पकडल्या. लातूर रोडवरील लक्ष्मी पेट्रोल पंप, विष्णुपुरी परिसरात अवैध वाहतुकीच्या उद्देशाने उभ्या असलेल्या अकरा विना क्रमांकाच्या हायवा त्यांच्या निदर्शनास येताच त्यांनी तत्काळ दखल घेत कारवाईचे आदेश दिले.

वाहतूक नियमांचे सर्रास उल्लंघन, शासनाचा महसूल बुडविणे तसेच अपघातांना आमंत्रण देणाऱ्या विना नंबर वाहनांमुळे नागरिकांच्या सुरक्षिततेचा गंभीर प्रश्न निर्माण होत असल्याचे जिल्हाधिकाऱ्यांनी स्पष्ट केले. पकडण्यात आलेल्या सर्व विना क्रमांकाच्या हायवा पुढील कार्यवाहीसाठी महसूल विभाग व प्रादेशिक परिवहन कार्यालय (RTO) यांच्या पथकाकडे तात्काळ सुपूर्द करण्यात आल्या.

आरटीओ कार्यालयामार्फत या वाहनांवर नियमानुसार एकूण ७३ हजार ७५० रुपयांचा दंड आकारून दंडात्मक कारवाई करण्यात आली आहे.

जिल्ह्यात यापुढेही रेती, मुरुम, माती आदींची वाहतूक विना नंबर, अपूर्ण कागदपत्रे किंवा नियमबाह्य पद्धतीने करणाऱ्या हायवा व इतर अवजड वाहनांविरोधात विशेष मोहीम राबविण्यात येणार असून, दोषी आढळणाऱ्या वाहनांवर कठोर दंडात्मक कारवाई करण्यात येईल, असा इशारा जिल्हाधिकारी राहुल कर्डिले यांनी दिला. “वाहन चालक व मालकांनी वाहतूक नियमांचे काटेकोर पालन करावे, अन्यथा कठोर कारवाईला सामोरे जावे लागेल,” असे स्पष्ट निर्देश त्यांनी दिले.

पकडण्यात आलेल्या हायवा वाहनांचे क्रमांक पुढीलप्रमाणे :

एमएच 46 बीबी 9546,

एमएच 26 सीएच 2721,

एमएच 26 सीटी 7779,

एमएच 26 सीएम 7779,

एमएच 26 सीएच 4909,

एमएच 21 बीएच 0804,

एमएच 26 सीएच 7565,

एमएच 29 बीई 4869,

एमएच 26 सीएच 2909,

एमएच 14 एलएक्स 4892,

एमएच 26 सीएच 2429.

००००००

वृत्त क्रमांक 1332

नियमित लसीकरणाबाबत जिल्हाधिकारी राहुल कर्डिले यांनी घेतला आढावा; जिल्ह्यात लवकरच 'एचपीव्ही' (HPV) लसीकरण सुरू

नांदेड दि. ३० डिसेंबर:- जिल्हाधिकारी राहुल कर्डिले यांच्या अध्यक्षतेखाली आज जिल्हास्तरीय नियमित लसीकरण समन्वय समितीची बैठक संपन्न झाली. या बैठकीत जिल्ह्यातील लसीकरणाच्या विविध निर्देशकांचा (Indicators) सविस्तर आढावा घेण्यात आला आला.या बैठकीत uwin आणि आगामी काळात सुरू होणाऱ्या एचपीव्ही (HPV) लसीकरण मोहिमेवर विशेष चर्चा करण्यात आली.

ग्रामीण व शहारी भागातील लसीकरणावर भर

बैठकीत माहिती देण्यात आली की, जिल्ह्याच्या ग्रामीण भागात साधारणतः २ हजार लसीकरण सत्रे व शहरी भागात 250 लसीकरण सत्रे आयोजित केली जातात. या सत्रांच्या माध्यमातून ग्रामीण व शहरी भागातील प्रत्येक बालकापर्यंत आणि गरोदर मातांपर्यंत लसीकरणाचा लाभ पोहोचवण्याचे निर्देश जिल्हाधिकारी श्री. कर्डीले यांनी दिले. लसीकरणाचे उद्दिष्ट पूर्ण करण्यासाठी सूक्ष्म नियोजन (Micro-planning) करण्याच्या सूचनाही त्यांनी यावेळी दिल्या.

'एचपीव्ही' लसीकरण: ३३ हजार लाभार्थ्यांचे उद्दिष्ट

या बैठकीचे मुख्य आकर्षण म्हणजे गर्भाशयाच्या मुखाच्या कर्करोगाला प्रतिबंध करणाऱ्या एचपीव्ही (HPV) लसीची चर्चा झाली आणि मुलींना गर्भाशयाच्या मुखाच्या कर्करोगाचा प्रतिबंध होणार हा फार मोठा फायदा होणार आहे . सर्व पात्र लाभार्थ्यांनी या लसीचा लाभ घ्यावा असे आवाहन जिल्हाधिकारी राहुल कर्डिले यांनी केले आहे.

लाभार्थी संख्या: जिल्ह्यातील एकूण लोकसंख्येनुसार साधारणतः ३३,००० लाभार्थी या लसीकरणासाठी पात्र ठरणार आहेत.

वयोगट: ही लस १४ वर्षे पूर्ण ते १५ वर्षे वयोगटातील मुलींना देण्यात येणार आहे (अर्थात मुलीच्या १४ व्या वाढदिवसानंतर ते १५ व्या वाढदिवसापर्यंत).

विविध निर्देशकांचा आढावा

जिल्हाधिकाऱ्यांनी लसीकरण इंडिकेटरवाईज प्रगतीचा आढावा घेतला. यामध्ये प्रलंबित राहिलेली बालके (Left-outs) आणि अर्धवट लसीकरण झालेली बालके (Drop-outs) शोधून त्यांचे लसीकरण पूर्ण करण्यावर भर देण्यात आला. माता व बालमृत्यू दर कमी करण्यासाठी नियमित लसीकरण ही काळाची गरज असल्याचे त्यांनी नमूद केले.

या महत्त्वपूर्ण बैठकीला  उपमुख्य कार्यकारी अधिकारी प्रशांत थोरात,जिल्हा माता व बाल संगोपन अधिकारी डॉ. शिवशक्ती पवार, निवासी वैद्यकीय अधिकारी डॉ. राजाभाऊ बुटे, शिक्षण अधिकारी माधव सलगर, एस एम ओ लातूर डॉ. अमोल गायकवाड, बाळ रोग तज्ञ विभागप्रमुख,.किशोर राठोड, आयएपी नांदेड डॉ सुहास बेंद्रीकर,  जिल्हा विस्तार व माध्यम अधिकारी रेणुका दराडे जिल्हा सहनियंत्रण व मूल्यमापन अधिकारी अनिल कांबळे, शहरी कार्यक्रमाधिकारी सोनुले सुहास,रोहित जोशी तसेच संबंधित विभागाचे इतर अधिकारी  उपस्थित होते.

००००००

वृत्त क्रमांक 1331

निवडणूक आचारसंहितेमुळे लोकशाही दिन रद्द

नांदेड, दि. 29 डिसेंबर :- राज्य निवडणूक आयोगाचे पत्र 15 डिसेंबर 2025 अन्वये राज्यातील 29 महानगरपालिकांच्या सार्वत्रिक निवडणुकांचा कार्यक्रम 2025-26 जाहिर झाला आहे. त्यानुसार नांदेड जिल्ह्यात 15 डिसेंबर 2025 पासून महानगरपालिकेच्या निवडणुकीचा निकाल जाहिर होईपर्यत म्हणजेच 16 जानेवारी 2026 पर्यत आचारसंहिता अंमलात राहील. त्यामुळे माहे जानेवारी 2026 या महिन्यात पाहिल्या सोमवारी म्हणजेच 5 जानेवारी 2026 रोजी जिल्हाधिकारी कार्यालय, नांदेड येथे आयोजित होणारा लोकशाही दिन रद्द करण्यात आला आहे, असे निवासी उपजिल्हाधिकारी किरण अंबेकर यांनी प्रसिध्दीपत्रकाद्वारे कळविले आहे.

00000

वृत्त क्रमांक 1330

शुक्रवारी जिल्हाधिकारी कार्यालयात राष्ट्रीय ग्राहक दिनाचे आयोजन

नांदेड, दि. 29 डिसेंबर :- ग्राहकांचे हक्क व ग्राहक संरक्षण कायद्याबाबत जनजागृती व्हावी, या उद्देशाने दरवर्षीप्रमाणे यंदाही शुक्रवार 2 जानेवारी 2026 रोजी राष्ट्रीय ग्राहक दिन साजरा करण्यात येणार आहे. या कार्यक्रमाचे आयोजन डॉ. शंकरराव चव्हाण प्रेक्षागृह, नियोजन भवन, जिल्हाधिकारी कार्यालय, नांदेड येथे दुपारी १ वाजता करण्यात आले आहे.

या कार्यक्रमाचे उद्घाटन जिल्हाधिकारी राहुल कर्डिले यांच्या हस्ते होणार असून, जिल्हा ग्राहक तक्रार निवारण मंचाचे अध्यक्ष राहुल पाटील हे कार्यक्रमाचे अध्यक्षस्थान भूषविणार आहेत.

कार्यक्रमात ग्राहक पंचायतचे संघटक ॲड. आनंद बळवंतराव कृष्णापूरकर, उपाध्यक्ष सायन्ना मठमवार व सहसचिव ॲड. दिपाली डोणगावकर हे प्रमुख वक्ते म्हणून मार्गदर्शन करणार आहेत.

तरी सर्व ग्राहक व नागरिकांनी राष्ट्रीय ग्राहक दिनाच्या कार्यक्रमास मोठ्या संख्येने उपस्थित राहावे, असे आवाहन जिल्हाधिकारी राहुल कर्डिले यांनी केले आहे.

00000

वृत्त क्रमांक 1329

निवडणूक आचारसंहितेमुळे लोकशाही दिन रद्द

नांदेड, दि. 29 डिसेंबर :-  राज्य  निवडणूक आयोगाचे पत्र 15 डिसेंबर 2025 अन्वये राज्यातील 29 महानगरपालिकांच्या सार्वत्रिक निवडणुकांचा कार्यक्रम 2025-26 जाहिर झाला आहे. त्यानुसार नांदेड जिल्ह्यात 15 डिसेंबर 2025 पासून महानगरपालिकेच्या निवडणुकीचा निकाल जाहिर होईपर्यत म्हणजेच 16 जानेवारी 2026 पर्यत आचारसंहिता अंमलात राहील. त्यामुळे माहे जानेवारी 2026 या महिन्यात पाहिल्या सोमवारी म्हणजेच 5 जानेवारी 2026 रोजी जिल्हाधिकारी कार्यालय, नांदेड येथे आयोजित होणारा लोकशाही दिन रद्द करण्यात आला आहे, असे निवासी उपजिल्हाधिकारी किरण अंबेकर यांनी प्रसिध्दीपत्रकाद्वारे कळविले आहे. 

00000

वृत्त क्रमांक 1328

नांदेड वाघाळा महानगरपालिका सार्वत्रिक निवडणूक

विविध बाबींवरील निर्बंध आदेश निर्गमित      

नांदेड, दि. 29 डिसेंबर :- राज्य निवडणूक आयोगाकडून नांदेड वाघाळा महानगरपालिका सार्वत्रिक निवडणूकीची दिनांक 15 डिसेंबर 2025 रोजी घोषणा केली असून घोषणेच्‍या दिनांकापासून आदर्श आचारसंहिता अंमलात आली आहे. नांदेड जिल्‍ह्यात महापालिका सार्वत्रिक निवडणूकीची संपूर्ण प्रक्रिया शांततेत, निर्भय व न्‍याय वातावरणात पार पाडण्‍याच्‍या दृष्‍टीकोणातून नांदेडचे जिल्‍हादंडाधिकारी राहुल कर्डिले यांनी भारतीय नागरिक सुरक्षा संहिता 2023 चे कलम 163 अन्‍वये अधिकाराचा वापर करुन विविध बाबींवर निर्बंध आदेश निर्गमीत केले आहेत.  

निवडणूक कालावधीत विश्रामगृह वापरावरील निर्बंध

शासकीय व निवडणूकीच्‍या कामावर असलेले अधिकारी व कर्मचारी यांच्‍या व्‍यतीरिक्‍त, इतर कोणत्‍याही व्‍यक्‍तीस महानगरपालिका मतदार संघ कार्यक्षेत्रासह नांदेड जिल्ह्यातील सर्व शासकीय व निमशासकीय विश्रामगृहात थांबण्‍यासाठी संबंधित खात्‍याने दिलेला अधिकृत परवाना असल्‍याशिवाय किंवा सक्षम अधिकाऱ्याच्‍या पूर्व परवानगीशिवाय प्रवेश करण्यास प्रतिबंधीत करण्यात आले आहे. 

ध्‍वनीक्षेपक, ध्‍वनिवर्धकाचा वापर

कोणतीही व्‍यक्‍ती, संस्‍था, पक्ष व पक्षाचे कार्यकर्ते यांना ध्‍वनीक्षेपक व ध्‍वनिवर्धकाचा वापर सक्षम प्रधिकाऱ्याच्‍या पूर्व परवानगीशिवाय करता येणार नाही. फिरत्‍या वाहनांवर ध्‍वनिक्षेपक व ध्‍वनिर्धकाचा वापर करता येणार नाही. महाराष्‍ट्र शासन पर्यावरण विभाग, शासन निर्णय क्रमांक ध्‍वनीप्र 2009/प्र.क्र.12/08/ता.क.1, दिनांक 31 जुलै, 2013 नुसार ध्‍वनिक्षेपक व ध्‍वनिवर्धकाचा वापर ध्‍वनि प्रदुषणाची पातळी विहित मर्यादेत राखून करावी. ध्‍वनिक्षेपक व ध्‍वनिवर्धकाचा वापर सकाळी 6 वाजेपुर्वी आणि रात्री. 10 वाजेनंतर करता येणार नाही. 

कार्यालये, विश्रामगृहे परिसरातील निर्बंध

नांदेड वाघाळा महानगरपालिका कार्यक्षेत्राचे हद्दीपावतो, सर्व शासकीय, निमशासकीय व स्थानिक स्वराज्य संस्थाची कार्यालये, विश्रामगृहे इत्‍यादी परिसरात कोणत्‍याही प्रकारची मिरवणूक, मोर्चा काढणे, सभा घेणे, उपोषण करणे, कोणत्‍याही प्रकारच्‍या घोषणा देणे, वाद्य वाजविणे किंवा गाणी म्‍हणने, कोणत्‍याही प्रकारचा निवडणूक प्रचार करण्यावर निर्बंध राहतील. 

शासकीय वाहनाच्‍या गैरवापरास प्रतिबंध

निवडणूकीचे कालावधीत नांदेड वाघाळा महानगरपालिका मतदार संघ कार्यक्षेत्रासह नांदेड जिल्ह्यात नांदेड वाघाळा महानगरपालिका हद्दीपावेतो निवडणूक कालावधीत कोणत्‍याही वाहनांच्‍या ताफ्यामध्‍ये तीन पेक्षा जास्‍त मोटारगाडया अथवा वाहने (Cars/Vehicles) वापरण्‍यास या आदेशाव्‍दारे प्रतिबंधीत करण्‍यात आले आहे. 

वाहनांवर पक्ष प्रचाराचे कापडी फलके, झेंडे लावणे इत्‍यादी बाबीस काही प्रतिबंध

फिरत्‍या वाहनांवर पक्ष प्रचाराचा झेंडा हा वाहनाच्‍या डाव्‍या बाजुला विंड स्‍क्रीन ग्‍लासच्‍या पुढे राहणार नाही आणि तो त्‍या वाहनाच्‍या टपापासून 2 फुट उंची पेक्षा जास्‍त राहणार नाही. प्रचाराच्‍या फिरत्‍या वाहनावर कापडी फलक वाहन चालकाच्‍या आसनामागे वाहनाच्‍या डाव्‍या व उजव्‍या बाजुनेच लावण्‍यात यावा. इतर कोणत्‍याही बाजूस तो लावता येणार नाही. फिरत्‍या वाहनावर लावावयाचा पक्ष प्रचाराचा झेंडा किंवा कापडी फलक संबंधीत पक्षाचे जिल्‍हाध्‍यक्ष, उमेदवार व उमेदवाराचे निवडणूक प्रतिनिधी यांच्‍या वाहना व्‍यति‍रीक्‍त इतर कोणत्‍याही वाहनावर लावता येणार नाही. 

सार्वजनिक ठिकाणी तात्पुरती पक्ष कार्यालय स्‍थापन करण्यास निर्बंध 

नांदेड वाघाळा महानगरपालिका मतदार संघ कार्यक्षेत्र पावेतो निवडणूकीचे कालावधीत धार्मिक स्‍थळे, रुग्‍णालये किंवा शैक्षणिक संस्‍था व सार्वजनिक ठिकाणाच्या जवळपास तात्‍पुरती पक्ष कार्यालये स्‍थापन करण्‍यास प्रतिबंधीत करण्‍यात आले आहे. 

सार्वजनिक ठिकाणी पक्षांचे चित्रे, चिन्‍हांचे कापडी फलके, भाषण देण्याबाबतचे निर्बंध

निवडणूक कालावधीत सार्वजनिक ठिकाणी पक्षांचे चित्रे, चिन्‍हांचे कापडी फलके, सार्वजनिक ठिकाणी भाषण देण्यास प्रतिबंधीत करण्‍यात आले आहे. 

शासकीय, सार्वजनिक मालमत्‍तेची विरुपता करण्‍यास निर्बंध

निवडणूक कालावधीत शासकीय, निमशासकीय, सार्वजनिक मालमत्‍तेची प्रत्‍यक्ष किंवा अप्रत्‍यक्ष स्‍वरुपात विरुपता करण्‍यास प्रतिबंधीत करण्‍यात आले आहे.

शस्‍त्र परवानाधारकाकडील शस्‍त्रास्‍त्रे वाहून नेण्‍यावर बंदी

निवडणूकीचे कालावधीत शासकीय कर्तव्‍य पार पाडणाऱ्या अधिकारी व कर्मचारी, बँक सुरक्षा गार्ड यांचे व्‍यतिरिक्‍त इतर सर्व परवाना धारकास परवान्‍यातील शस्‍त्रास्‍त्रे बाळगण्यास व वाहून नेण्‍यास या आदेशान्‍वये बंदी घालण्‍यात आली आहे. 

वरील सर्व आदेश नांदेड जिल्ह्यातील नांदेड वाघाळा महानगरपालिका मतदारसंघ कार्यक्षेत्राच्या हद्दीपावेतो आदेश निर्गमीत झाल्‍याचा दिनांक 15 डिसेंबर 2025 पासून 16 जानेवारी 2026 रोजी मध्यरात्री पर्यंत अंमलात राहतील. 

नामनिर्देशनपत्र दाखल करताना अवलंब करावयाची कार्यपद्धत 

नांदेड जिल्ह्यात नांदेड वाघाळा महानगरपालिका निवडणूक कालावधीत निवडणूक निर्णय अधिकारी यांच्‍या कार्यालयात उमेदवारांनी नामनिर्देशनपत्र दाखल करते वेळेस कार्यालयाच्या 100 मी. च्या बाहेर वाहने व मिरवणूक थांबवावी. तसेच वाहनांच्‍या ताफ्यामध्‍ये तीन पेक्षा जास्त मोटारगाड्या/वाहनांना तसेच नामनिर्देशन पत्र दाखल करतेवेळेस निवडणूक निर्णय अधिकारी यांचे दालनात उमेदवारासोबत तीन पेक्षा जास्त व्‍यक्‍तीनी तसेच निवडणूक निर्णय अधिकारी यांचे कार्यालयात नामनिर्देशनपत्र दाखल करते वेळेस कार्यालयाच्‍या परिसरात मिरवणूक/सभा घेणे, कोणत्‍याही प्रकारच्‍या घोषणा देणे/ वाद्य वाजविणे किंवा गाणी म्‍हणने आणि कोणत्‍याही प्रकारचा निवडणूक‍ प्रचार करणेस प्रतिबंधीत करण्‍यात आले आहे.

हा आदेश नांदेड जिल्‍हयाच्या नांदेड वाघाळा महानगरपालिका निवडणूकीच्या अनुषंगाने संबंधित निवडणूक निर्णय अधिकारी यांचे कार्यालयाच्या हद्दी पावेतो 23 डिसेंबर 2025 चे 6 वाजेपासून ते 3 जानेवारी 2026 चे मध्यरात्री पर्यंत अंमलात राहील.

00000

दि.२७ डिसेंबर 2025

वृत्त क्रमांक 1327

अवैध वाळू उत्खननाविरोधात पुन्हा नांदेड महसूल प्रशासनाची कार्यवाही

३५ लाख किमतीचा मुद्येमाल नष्ट

नांदेड, दि.२७ डिसेंबर:-आज दिनांक 27 डीसेंबर 2025 रोजी जिल्हाधिकारी  राहुल कर्डिले यांच्या मार्गदर्शनाखाली उपविभागीय अधिकारी डॉ.सचिन  खल्लाळ, तहसीलदार संजय वारकड यांच्या आदेशानुसार पथक प्रमुख नायब तहसीलदार स्वप्निल  दिगलवार यांच्या नेतृत्वात मंडळ अधिकारी संतोष अस्कुलकर, अनिरुद्ध जोंधळे, मोहसीन सय्यद, प्रमोद बडवने, ग्राम महसूल अधिकारी माधव भिसे, गौतम पांढरे, एम.के.पाटील, मनोज जाधव, मनोज सरपे, दिलीप पवार, आढाव, मोहन कदम, सचिन उपरे, रमेश गिरी, माधव शिराळे महसूल सेवक शिवा तेलंगे यांचे महसूल पथक त्रिकुट परिसरामध्ये सकाळी 6 वाजता अवैध रेती उत्खनन प्रतिबंधासाठी गस्तीवर असताना त्रिकुट संगमजवळ रेती उत्खनन करणारे 3 मोठी  बोट , एक  छोटी बोट आढळून आले. 

पथकाने मजुरांच्या साह्याने 2 मोठी  बोट  बुडवून टाकले तर एक मोठी बोट व 1 लहान बोट जिलेटीने स्फोट करून नष्ट केले.असे एकूण 35 लाख किमतीचा मुद्देमाल पाण्यात बुडवून व स्फोट करून नष्ट करण्यात आला.

अवैध उत्खननासंदर्भात  महसूल प्रशासन सक्तीने कारवाई करेल असा इशारा नांदेडचे उपविभागीय अधिकारी डॉ.सचिन खल्लाळ व तहसीलदार संजय वारकड यांनी दिला आहे.

0000

दि. २६ डिसेंबर 2025

वृत्त क्रमांक 1326

श्री गुरु गोबिंदसिंघजी शासकीय औद्योगिक प्रशिक्षण संस्थेत ‘वीर बाल दिवस’ उत्साहात साजरा

नांदेड, दि. २६ डिसेंबर : दिनांक २६ डिसेंबर हा दिवस श्री गुरु गोबिंदसिंघजी महाराज यांच्या दोन लहान सुपुत्रांच्या अतुलनीय शौर्य, धैर्य व बलिदानाच्या स्मरणार्थ ‘वीर बाल दिवस’ म्हणून साजरा केला जातो. हा दिवस मुलांमध्ये धैर्य, त्याग, प्रामाणिकपणा, राष्ट्रभक्ती, संवेदनशीलता तसेच सत्य, स्वाभिमान व न्यायाच्या मूल्यांची जाणीव करून देणारा आहे. वयाला धैर्याचे बंधन नसते आणि मूल्यांसाठी जगणारेच खरे वीर असतात, ही प्रेरणा या दिवसातून मिळते.

या अनुषंगाने श्री गुरु गोबिंदसिंघजी शासकीय औद्योगिक प्रशिक्षण संस्था, नांदेड येथे शुक्रवार २६ डिसेंबर २०२५ रोजी वीर बाल दिवस साजरा करण्यात आला.

कार्यक्रमास ॲड. अमरिकसिंघ वासरीकर, संस्था व्यवस्थापन समितीचे सदस्य हर्षदभाई शहा, क्रीडा प्रशिक्षक व सचिव वृषाली पाटील, पिनॅकल शाळेचे क्रीडा प्रशिक्षक साहेबराव शिंदे तसेच संस्थेचे प्राचार्य व जिल्हा व्यवसाय शिक्षण व प्रशिक्षण अधिकारी सचिन सूर्यवंशी उपस्थित होते.

कार्यक्रमाची सुरुवात राष्ट्रगीताने झाली. विविध क्षेत्रात विशेष कौशल्य दाखवलेल्या कु. अवनी अविनाश कापसे, आर्यन लक्ष्मण मालेवार, अथर्व जोंधळे, स्वयंम मालू कांबळे, सानिध्य बळीराम अकोले व सूर्या सतीशकुमार पाटील या बालकांचा मान्यवरांच्या हस्ते सन्मानपत्र देऊन गौरव करण्यात आला.

श्री गुरु गोबिंदसिंघजी महाराज व त्यांच्या चार सुपुत्रांचा जीवनपरिचय तसेच त्यांनी दाखवलेल्या अतुलनीय शौर्यावर संस्थेतील शिल्प निदेशक सुरेंद्रसिंघ सुखमणी यांनी पीपीटीच्या माध्यमातून माहिती सादर केली.

मार्गदर्शन करताना ॲड. अमरिकसिंघ वासरीकर म्हणाले की, महान विभूतींच्या बलिदानामुळेच भारत देश घडला आहे. धर्माच्या रक्षणासाठी अनेकांनी आपले प्राण अर्पण केले असून, त्यांचे स्मरण ठेवून आपल्या जीवनात सत्य, स्वाभिमान व न्यायाची ज्योत सदैव प्रज्वलित ठेवली पाहिजे.

कार्यक्रमाचे सूत्रसंचालन राका एस. एम. (शि. नि.) यांनी केले. संस्थेचे प्रभारी गटनिदेशक कलंबरकर एम. जी. यांनी वीर बाल दिवसानिमित्त उपस्थितांना राष्ट्रीय मूल्ये व शौर्य शपथ दिली. सिलेदार डी. के. (शि. नि.) यांनी आभार प्रदर्शन केले.

कार्यक्रमाची सांगता “इतनी शक्ति हमें देना दाता” या प्रेरणादायी गीताने झाली. कार्यक्रम यशस्वी होण्यासाठी संस्थेतील सर्व कर्मचाऱ्यांनी सहकार्य केले.

00000

दि. 26 डिसेंबर 2025

 वृत्त क्रमांक 1325

जिल्ह्यात जमावबंदी, शस्त्रबंदी आदेश लागू  

नांदेड दि. 26 डिसेंबर : नांदेड जिल्ह्यात 28 डिसेंबरचे सकाळी 6 वाजेपासून ते 11 जानेवारी 2026 च्या मध्यरात्री पर्यंत शस्त्रबंदी व जमावबंदी आदेश लागू राहणार आहे, अशी माहिती अपर जिल्हादंडाधिकारी कार्यालयाकडून देण्यात आली आहे. 

जिल्ह्यातील कायदा व सुव्यवस्था अबाधित रहावी म्हणून अपर जिल्हादंडाधिकारी यांनी महाराष्ट्र पोलीस अधिनियम 1951 चे कलम 37 (1) व (3) अन्वये जिल्ह्यात 28 डिसेंबरचे सकाळी 6 वाजेपासून ते 11 जानेवारी 2026 च्या मध्यरात्री पर्यंत शस्त्रबंदी व जमावबंदी आदेश लागू राहिल.  

त्यानुसार पाच किंवा पाचपेक्षा अधिक व्यक्तींनी या आदेशात नमुद असलेली कृत्ये सार्वजनिक परिसर किंवा त्याच्या जवळपास करण्यास बंदी घालण्यात आली आहे. हा आदेश कामावरील पोलीस अधिकारी, शासकीय कर्मचारी, विवाह, अंत्ययात्रा, धार्मिक कार्यक्रम, यात्रा व इतर सक्षम अधिकारी यांनी विशेषरित्या परवानगी दिलेल्या मिरवणुकांना लागू होणार नाही. 

अशा मिरवणुकांना परवानगी देण्याचे अधिकार तसेच पाच व पाचपेक्षा जास्त इसम जमण्यासाठी, सभा, मिरवणुका, मोर्चा काढणे, ध्वनीक्षेपक वाजविण्यास परवानगी देण्याचे अधिकार जिल्ह्यातील पोलीस ठाणे प्रभारी अधिकारी यांना तसेच पोलीस अधीक्षक नांदेड यांनी प्राधिकृत केलेल्या इतर पोलीस अधिकारी यांना राहतील.

0000

वृत्त क्रमांक 1324

महाविस्तार एआय अॅप : शेतकऱ्यांसाठी ‘चालते-बोलते कृषी विद्यापीठ’

शेतीविषयक कोणताही प्रश्न विचारा, त्वरित मिळेल तज्ज्ञ सल्ला

नांदेड दि.२४ डिसेंबर:- शेतकऱ्यांना आधुनिक तंत्रज्ञानाच्या माध्यमातून अचूक, वेळीच व विश्वासार्ह कृषी माहिती मिळावी, या उद्देशाने कृषी विभागाने राज्यभर ‘महाविस्तार एआय’ हे कृत्रिम बुद्धिमत्तेवर आधारित अॅप सुरू केले आहे. या अॅपमधून शेतीविषयक सल्ला, हवामान अंदाज, पीक व्यवस्थापन, कीड-रोग नियंत्रण, खतांच्या शिफारशी तसेच बाजारभावाची माहिती एका क्लिकवर उपलब्ध होणार आहे.

राज्यातील चार कृषी विद्यापीठांच्या सहकार्यातून विकसित करण्यात आलेले हे अॅप कृत्रिम बुद्धिमत्तेवर आधारित असून, त्यामध्ये मराठी भाषेतील चॅटबॉट सुविधा देण्यात आली आहे. शेतकरी या चॅटबॉटवर शेतीसंबंधी कोणताही प्रश्न विचारू शकतात. त्यामुळे शेतीकामात निश्चितच मोठी मदत होणार आहे.

हवामान बदलाच्या पार्श्वभूमीवर शेतकऱ्यांसमोर उभी राहिलेली आव्हाने लक्षात घेऊन या अॅपच्या माध्यमातून हवामान अंदाज, पीक लागवडीच्या पद्धती, कीड व्यवस्थापन, खतांचा योग्य वापर, मृदा आरोग्य, गोदाम व्यवस्था तसेच डीबीटीवरील विविध शासकीय योजनांची माहिती देण्यात येणार आहे. याशिवाय ऑडिओ व व्हिडीओ स्वरूपातही शेतीपूरक मार्गदर्शन उपलब्ध होणार आहे.

महाविस्तार एआय अॅपमध्ये फार्मर आयडी वापरून लॉगिन करता येते. फार्मर आयडी नसल्यास मोबाईल नंबरच्या सहाय्यानेही लॉगिनची सुविधा उपलब्ध आहे. खरीप पेरणीपासून ते शेतीमाल विक्रीपर्यंतची सर्व आवश्यक माहिती या अॅपवर मिळणार असल्याने शेतकऱ्यांचा वेळ व श्रम वाचणार आहेत.

शेतकऱ्यांनी गुगल प्ले स्टोअरवरून ‘महाविस्तार एआय’ अॅप जास्तीत जास्त संख्येने डाउनलोड करून त्याचा लाभ घ्यावा, असे आवाहन जिल्हा अधीक्षक कृषी अधिकारी दत्तकुमार कळसाईत यांनी केले आहे.

०००००

वृत्त क्रमांक 1323

सैनिकी मुलांचे वसतीगृहात कंत्राटी पध्दतीने पदभरती

नांदेड दि. 23 डिसेंबर :- सैनिकी मुलांचे वसतीगृह, विष्णुपूरी नांदेड येथील वसतीगृहामध्ये कंत्राटी पध्दतीने माजी सैनिक संवर्गातून पद भरावयाचे आहे. माजी सैनिक उपलब्ध नसल्यास नागरी सिवीलीन संवर्गातून पद भरण्यात येतील. 

पदाचा तपीशील - साहेयक वसतीगृह अधिक्षक पद संख्या 1 पात्रता शिक्षण 10 वी पास, वय 1 जानेवारी 2026 रोजी 50 वर्षापेक्षा जास्त नसावे. तरी आपण जिल्हा सैनिक कल्याण कार्यालय, नांदेड येथे 31 डिसेंबर 2025 पर्यत अर्ज दाखल करावेत. अधिक माहितीसाठी वसतीगृह अधीक्षक अर्जून जाधव – 8380873985 यांच्याशी संपर्क साधावा असे आवाहन निवासी उपजिल्हाधिकारी नांदेड तथा जिल्हा सैनिक कल्याण अधिकारी नांदेड यांनी केले आहे. 

0000

 वृत्त क्रमांक 1322

प्रादेशिक परिवहन कार्यालयातर्फे तालुक्याच्या ठिकाणी

शिकाऊ व पक्के अनुज्ञप्ती शिबिराचे आयोजन

नांदेड दि. 23 डिसेंबर :-  प्रादेशिक परिवहन कार्यालयातर्फे शिकाऊ व पक्के अनुज्ञप्तीसाठी माहे जानेवारी  ते जून 2026 या महिन्यात तालुका शिबिर कार्यालयाचे आयोजन करण्यात येणार आहे. या शिबिरासाठी जागा उपलब्धतेच्या आधीन राहून ऑनलाईन अपॉईटमेंट महिना सुरुवात होण्याच्या 5 दिवस आधी कार्यालयीन वेळेत सुरु करण्यात येईल. तरी अपॉईटमेंट घेतलेल्या अर्जदारांनी यांची नोंद घेवून शिबिर कार्यालयास उपस्थित राहावे, असे आवाहन प्रादेशिक परिवहन अधिकारी विनय शिवराम अहिरे यांनी केले आहे.

तालुकानिहाय कॅम्पचे ठिकाण व दिनांक पुढीलप्रमाणे आहे. कंधार येथे 2 जानेवारी, 3 फेब्रुवारी, 4 मार्च, 3 एप्रिल, 4 मे, 3 जून 2026 यादिवशी आहे. धर्माबाद येथे 5 जानेवारी, 5 फेब्रुवारी, 6 मार्च, 6 एप्रिल, 6 मे, 5 जून 2026 यादिवशी करण्यात आले आहे. किनवट येथे 9 जानेवारी, 9 फेब्रुवारी, 9 मार्च, 9 एप्रिल, 11 मे, 10 जून 2026 रोजी करण्यात आले आहे. मुदखेड येथे 13 जानेवारी, 13 फेब्रुवारी, 13 मार्च, 13 एप्रिल, 13 मे, 12 जून 2026 रोजी करण्यात आले आहे. माहूर येथे 16 जानेवारी, 16 फेब्रुवारी, 16 मार्च, 15 एप्रिल, 15 मे, 15 जून 2026 रोजी करण्यात आले आहे. हदगाव येथे 19 जानेवारी, 18 फेब्रुवारी, 18 मार्च, 17 एप्रिल, 18 मे, 18 जून 2026 रोजी करण्यात आले आहे. धर्माबाद येथे 23 जानेवारी, 23 फेब्रुवारी, 23 मार्च, 23 एप्रिल, 22 मे, 22 जून 2026 रोजी करण्यात आले आहे. हिमायतनगर येथे 28 जानेवारी, 25 फेब्रुवारी, 27 मार्च, 27 एप्रिल, 26 मे, 25 जून 2025 रोजी करण्यात आले आहे. किनवट येथे 30 जानेवारी, 27 फेब्रुवारी, 30 मार्च, 29 एप्रिल, 29 मे , 29 जून  2026 रोजी करण्यात आले आहे. शिकाऊ व पक्क्या अनुज्ञप्तीसाठी तालुक्याच्या ठिकाणी मासिक शिबिराचे आयोजन करण्यात आले आहे. तसेच वरील शिबिराच्या दिवशी स्थानिक सुटटी जाहीर झाल्यास अथवा आपत्कालीन परिस्थिती निर्माण झाल्यास शिबिराच्या तारखेमध्ये बदल होवू शकतो याची नागरिकांनी नोंद घ्यावी, असेही प्रसिध्दीपत्रकान्वये कळविले आहे.

00000

 वृत्त क्रमांक 1321

न्याय आपल्या दारी उपक्रमांतर्गत नांदेड जिल्ह्यात येणार मोबाईल व्हॅन

नांदेड, दि. 23 डिसेंबर :- ग्रामीण भागातील जनसामान्यांना न्यायव्यवस्थेपर्यंत पोहोचता यावे व त्यांनी न्यायापासून वंचित राहू नये याकरिता नांदेड जिल्हामध्ये ‘न्याय आपल्या दारी’ या संकल्पनेंतर्गत 3 जानेवारी 2026 ते 22 जानेवारी 2026 पर्यंत फिरते लोकअदालतीचे मोबाईल व्हॅन नांदेड जिल्ह्यातील प्रत्येक तालुक्यामधील खेडोपाडी पोहोचणार आहे. 3 जानेवारी 2026 रोजी जिल्हा विधी सेवा प्राधिकरण प्रमुख जिल्हा व सत्र न्यायाधीश तथा अध्यक्ष सुनिल वेदपाठक यांच्या हस्ते जिल्हा न्यायालय नांदेड येथून मोबाईल व्हॅनच्या प्रवास कार्यक्रमास हिरवा झेंडा दाखवून कार्यक्रमाचे उद्घाटन संपन्न होईल. त्यानंतर तालुक्यातील पुढील प्रवास पुढीलप्रमाणे राहील.

दिनांक 3 जानेवारी 2026 रोजी लोहा तालुक्यात मारतळा येथे, 5 जानेवारी 2026 रोजी कंधार तालुक्यात कौठा, 6 जानेवारी 2026 रोजी मुखेड तालुक्यात बाऱ्हाळी, 7 जानेवारी 2026 रोजी देगलूर तालुक्यात हानेगाव, 8 जानेवारी 2026 रोजी नायगाव तालुक्यात सावरखेड, 9 जानेवारी 2026 रोजी बिलोली तालुक्यात बडुर, 12 जानेवारी 2026 रोजी धर्माबाद तालुक्यात मंगनाळी, 13 जानेवारी 2026 रोजी उमरी तालुक्यात गोरठा, 14 जानेवारी 2026 रोजी मुदखेड तालुक्यात डोणगाव, 15 जानेवारी 2026 रोजी अर्धापूर तालुक्यात शेलगाव, 16 जानेवारी 2026 रोजी हदगाव तालुक्यात तामसा, 17 जानेवारी 2026 रोजी माहूर तालुक्यात वझरा शे.फ., 19 जानेवारी 2026 रोजी किनवट तालुक्यात मांडवी, 20 जानेवारी 2026 रोजी हिमायतनगर तालुक्यात मंगरुळ, 21 जानेवारी 2026 रोजी भोकर तालुक्यात हळदा येथे तर 22 जानेवारी 2026 रोजी नांदेड तालुक्यातील मौजे बळीरामपुर येथे शिबीराचे आयोजन करण्यात आले आहे.

सदर कायदेविषयक शिबीर व फिरते लोकअदालतीच्या माध्यमातून राष्ट्रीय विधी सेवा प्राधिकरणामार्फत राबविण्यात येणाऱ्या महाराष्ट्र राज्यातील विविध योजनांची माहिती व कायदेविषयक मार्गदर्शन देण्यात येणार आहे. या गावांच्या पोलीस स्टेशन हद्यीतील तडजोडपात्र दिवाणी, फौजदारी प्रलंबित प्रकरणांचा निपटारा करण्यात येणार आहे. ग्रामीण भागातील पक्षकार, ग्रामस्थ-नागरिकांनी या संधीचा लाभ घ्यावा, असे आवाहन जिल्हा विधी सेवा प्राधिकरणचे सचिव शरद देशपांडे यांनी केले आहे.

00000

वृत्त क्रमांक 1320

बालविवाहासाठी सेवा पुरवाल तर कारवाई होणार - अपर जिल्हाधिकारी 

बालविवाहमुक्त समाजासाठी सर्वांचे योगदान आवश्यक

बालविवाह होत असल्यास चाईल्ड हेल्पलाईन 1098 वर संपर्क साधा

विवाहसेवा पुरवठादार यांच्यासोबत बैठक संपन्न

नांदेड, दि. 22 डिसेंबर :- बालविवाह प्रतिबंध अधिनियम 2006 नुसार बालविवाह करणे, त्यास परवानगी देणे, प्रोत्साहन देणे किंवा कोणत्याही प्रकारे चालना देणे हा अजामीनपात्र गुन्हा आहे. अधिनियमातील कलम 10 व 11 नुसार बालविवाह घडवून आणण्यासाठी मदत किंवा परवानगी देणाऱ्या व्यक्तीस दोन वर्षांपर्यंत सश्रम कारावास व एक लाख रुपयांपर्यंत दंडाची तरतूद आहे. या पार्श्वभूमीवर बालविवाहासाठी कोणत्याही प्रकारची सेवा पुरवाल तर कारवाई होईल, असे निर्देश जिल्ह्यातील विवाहासंबंधित सेवा पुरवठादार यांना अपर जिल्हाधिकारी डॉ.रत्नदीप गायकवाड यांनी दिले.

बालविवाहमुक्त नांदेड जिल्हा करण्यासाठी जिल्हाधिकारी राहुल कर्डिले यांनी विशेष मोहिम हाती घेतली आहे. त्या अनुषंगाने जिल्हा प्रशासन, महिला व बाल विकास विभाग, युनिसेफ, एसबीसी 3 मुंबई यांच्या संयुक्त विद्यमाने जिल्हाधिकारी यांच्या अध्यक्षतेखाली विवाहासंबंधित सेवा पुरवठादारा सोबत बैठक जिल्हाधिकारी कार्यालयात आज संपन्न झाली.  बैठकीस महिला व बाल विकास अधिकारी गणेश वाघ, पर्यवेक्षक गजानन जिंदमवार, युनिसेफच्या मोनाली धुर्वे, जिल्हा समन्वयक निलेश कुलकर्णी यांच्यासह जिल्ह्यातील विविध विवाहसेवा पुरवठादार संघटनांचे अध्यक्ष, सचिव, प्रतिनिधी यांची उपस्थिती होती.

बालविवाह निर्मूलनासाठी विवाहसेवा पुरवठादारांची भूमिका अत्यंत महत्त्वाची असल्याचे नमूद करताना अपर जिल्हाधिकारी डॉ. रत्नदिप गायकवाड म्हणाले की, भटजी, मौलवी, भंते यांच्यासह हॉल मालक, मंडप डेकोरेशन मालक, केटरर्स, प्रिंटिंग प्रेस मालक, फोटोग्राफर्स, ब्युटीशियन, कापड दुकानदार, सराफा, किराणा दुकानदार, बँड पथक, वाहनसेवा तसेच इतर संबंधित घटकांनी विवाहासंबंधी सेवा देताना योग्य ती खबरदारी घ्यावी यामुळे बालविवाहास निश्चितच आळा बसेल.

विवाहसेवा पुरवठादारांनी आवश्यक दक्षता न घेतल्यास तसेच बालविवाहात प्रत्यक्ष किंवा अप्रत्यक्ष सहभाग आढळल्यास एक लाख रुपयांपर्यंत दंड व दोन वर्षांपर्यंत सश्रम कारावासाची शिक्षा होऊ शकते. त्यामुळे प्रत्येकाने आपली सामाजिक जबाबदारी ओळखून बालविवाह न करण्याचा व आपल्या आजूबाजूला होऊ न देण्याचा तसेच कायद्याचे पालन करून प्रशासनास सहकार्य करण्याचा संकल्प करावा, असे महिला व बाल विकास अधिकारी गणेश वाघ यांनी प्रास्ताविकात सांगितले. विवाहसेवा पुरवठादार बैठकीत माहितीचे युनिसेफच्या मोनाली धुर्वे यांनी सादरीकरण केले. 

यावेळी बालविवाह प्रतिबंधक प्रतिज्ञा उपस्थिताना देण्यात आली. तसेच बालविवाह प्रतिबंधक कायदा-2006 च्या पोस्टर्सचे प्रकाशन करण्यात आले. हे पोस्टर्स सर्व पुरवठादार अध्यक्ष, सचिव, प्रतिनिधी यांच्या व्हॉटसअपवरुन जास्तीत पुरवठादार यांना पाठवावे. याची जास्तीतजास्त जनजागृती करण्यात यावी असे आवाहनही यावेळी करण्यात आले. 

तसेच आपल्या आजूबाजूला बालविवाह होत असल्याचे लक्षात आल्यास किंवा तशी माहिती मिळाल्यास तात्काळ चाईल्ड लाईन हेल्पलाईन 1098 वर संपर्क साधावा. यामध्ये तक्रारदाराचे नाव गोपनीय ठेवण्यात येते, त्यामुळे या राष्ट्रीय कार्यात सर्वांनी पुढाकार घ्यावा, असे आवाहन जिल्हा प्रशासनाच्यावतीने  करण्यात आले आहे. 

00000

 फोटो कॅप्शन : दक्षिण भारतातील प्रसिद्ध श्रीक्षेत्र माळेगाव यात्रेत शुक्रवारी जिल्हाधिकारी राहुल कर्डिले यांनी भेट देऊन पशुप्रदर्शनाची पाहणी केली. यावेळी डॉ शितल मुकणे, अतिरिक्त आयुक्त पशुसंवर्धन विभाग पुणे, राजकुमार पडिले, प्रवीण घुले, आदी उपस्थित होते.

 वृत्त क्रमांक 1319

माळेगाव यात्रेतील पशुप्रदर्शन स्पर्धेत शेतकरी विनायक थोरात यांच्या देवणी वळूंनी मारली बाजी 

नांदेड जिल्ह्यातील माळेगाव यात्रेनिमित्त आयोजित करण्यात आलेल्या पशुप्रदर्शन स्पर्धेत मराठवाड्याचे भूषण मानल्या जाणाऱ्या देवणी जातीच्या वळूंनी बाजी  मारली आहे . लातूर जिल्ह्यातील चाकूर तालुक्यातील उजळंब येथील शेतकरी विनायक श्रीमंतराव थोरात यांच्या देवणी जातीच्या वळूंनी या स्पर्धेत बाजी मारली. 

या स्पर्धेत एक वर्षाखालील गटात प्रथम क्रमांक तसेच एक वर्षावरील गटात द्वितीय क्रमांक असे दोन्ही पारितोषिके विनायक थोरात यांच्या देवणी जातीच्या वळूंनी पटकावून उपस्थितांचे लक्ष वेधून घेतले. देवणी जातीची वैशिष्ट्ये, उत्तम बांधा, चांगले आरोग्य व शुद्ध वंश या गुणांच्या आधारे परीक्षकांनी या वळूंना विशेष गुण दिले. 

या यशामुळे देवणी जातीच्या गोवंश संवर्धनाला चालना मिळाली असून परिसरातील शेतकऱ्यांमध्ये उत्साहाचे वातावरण निर्माण झाले आहे. माळेगाव यात्रेतील या पशुप्रदर्शन स्पर्धेमुळे ग्रामीण भागातील देशी गोवंशाच्या जतन व संवर्धनाला नवी दिशा मिळाल्याची भावना उपस्थितांनी व्यक्त केली.या यशाबद्दल शेतकरी विनायक श्रीमंतराव थोरात यांनी यासाठी घेतलेल्या मेहनतीसाठी त्यांचे पशुपालक, ग्रामस्थ तसेच शेतकरी बांधवांकडून अभिनंदन करण्यात येत आहे.

मालेगाव यात्रा  ही नांदेड जिल्ह्यातील लोहा तालुक्यात खंडोबा देवाची मोठी यात्रा असते जी दरवर्षी मार्गशीर्ष वद्य चतुर्दशीला भरते आणि दक्षिण भारतातील सर्वात मोठी यात्रा म्हणून ओळखली जाते. 

कोट

शेतकरी विनायक श्रीमंतराव थोरात

वळूची काळजी लहान मुलांप्रमाणे घ्यावी लागते. दररोज दोन वेळा शेंगदाण्याची पेंड भिजवून द्यावी लागते. तसेच मका, ज्वारी-बाजरीचा भरडा, पौष्टिक खुराक आणि हिरवा चारा खाऊ घालावा लागतो. रोज सकाळी व संध्याकाळी योग्य असा व्यायाम करून घ्यावा लागतो आणि स्वच्छतेची विशेष काळजी घ्यावी लागते. दररोज शाम्पू व साबणाने नीट स्वच्छ करून घ्यावे लागते.

00000

 वृत्त क्रमांक 1318

बालविवाह मुक्त भारत अभियानाअंतर्गत सर्व कार्यालयात बालविवाह प्रतिबंध प्रतिज्ञा 

बालविवाहाची माहिती मिळाल्यास 1098 या टोल फ्री क्रमांकावर संपर्क करावा जिल्हाधिकारी यांचे आवाहन

नांदेड, दि. १९ डिसेंबर :- जिल्हाधिकारी कार्यालय व बाल विकास प्रकल्प अधिकारी (नागरी) नांदेड शहर यांच्या संयुक्त विद्यमाने बालविवाह मुक्त भारत – १०० दिवसांचे अभियान अंतर्गत आज शुक्रवार, १९ डिसेंबर रोजी सकाळी ११ वाजता शहरातील सर्व शासकीय कार्यालये तसेच प्राथमिक व माध्यमिक शाळांमध्ये बालविवाह प्रतिबंध प्रतिज्ञा घेण्यात आली.

बालविवाह समूळ उच्चाटन करणे हा या अभियानाचा मुख्य उद्देश असून, बालविवाहामुळे मुलांच्या शारीरिक, मानसिक व सामाजिक आयुष्यावर विपरीत परिणाम होतात. त्यामुळे बालविवाह प्रतिबंध ही काळाची गरज असल्याचे यावेळी नमूद करण्यात आले.

बालविवाहाबाबत माहिती मिळाल्यास १०९८ या टोल फ्री क्रमांकावर तात्काळ संपर्क साधावा, असे आवाहन जिल्हाधिकारी राहुल कर्डिले यांनी केले आहे.

या अनुषंगाने आज जिल्हाधिकारी कार्यालयात आयोजित शपथविधी कार्यक्रमास निवासी उपजिल्हाधिकारी किरण अंबेकर, बाल विकास प्रकल्प अधिकारी (नागरी) कैलास तिडके तसेच सर्व शाखांचे प्रमुख व कर्मचारी उपस्थित होते.

तसेच याच अनुषंगाने नांदेड शहरातील सर्व अंगणवाडी केंद्रांमध्येही बालविवाह प्रतिबंध प्रतिज्ञा घेण्यात आली.

०००००

वृत्त क्रमांक 1317

नगरपरिषद / नगरपंचायत निवडणूक क्षेत्रातील कामगारांना मतदान करण्यासाठी आज सुट्टी   

नांदेड दि. 19 डिसेंबर :- नांदेड जिल्ह्यातील धर्माबाद, मुखेड, कुंडलवाडी, भोकर व लोहा नगरपरिषदेच्या मतदार संघात सार्वत्रिक निवडणुकीसाठी शनिवार 20 डिसेंबर 2025 रोजी मतदान होणार आहे. या निवडणुकीच्या अनुषंगाने धर्माबाद, मुखेड, कुंडलवाडी, भोकर व लोहा नगरपरिषदेच्या मतदार संघात शनिवार 20 डिसेंबर 2025 रोजी सार्वजनिक सुटी जाहीर करण्यात आली आहे. 

ही सार्वजनिक सुट्टी धर्माबाद, मुखेड, कुंडलवाडी, भोकर व लोहा या मतदार संघाच्या क्षेत्रातील जे मतदार कामासाठी त्या त्या मतदार संघाच्या बाहेर असतील त्यांना देखील लागू राहील. तसेच या मतदान असलेल्या क्षेत्रातील नगरपरिषद व नगरपंचायत क्षेत्रातील केंद्र शासनाची शासकीय कार्यालये, निमशासकीय कार्यालये, सार्वजनिक उपक्रम, बँका इ. ना ही सार्वजनिक सुट्टी लागू राहिल असे नमूद केले आहे, अशी माहिती जिल्हा सह आयुक्त गंगाधर इरलोड यांनी प्रसिध्दीपत्रकाद्वारे कळविली आहे. 

0000

वृत्त क्रमांक 1316

प्रतिबंधात्मक आदेश लागू

नांदेड, दि. 19 डिसेंबर :- नांदेड वाघाळा शहर महानगर पालिका सार्वत्रिक निवडणूक 2025-26 साठी महानगरपालिका निवडणूकीचा कार्यक्रम जाहिर झाला आहे. याबाबत 15 डिसेंबर 2025 पासून आदर्श आचारसंहिता अंमलात आली आहे. 

महानगपालिका निवडणूकीची प्रक्रीया, शांततेत, निर्भय व न्याय वातावरणात पार पडावी, या दृष्टीकोनातून आंदोलन, मोर्चा, आमरण उपोषण, आत्मदहन इत्यादी कारणावरुन कायदा व सुव्यवस्थेचा प्रश्न निर्माण होण्याची शक्यता नाकारता येत नसल्याने व सद्या महानगरपालिका निवडणूकीची आदर्श आचारसंहिता लागू असल्यामुळे 19 डिसेंबर 2025 चे सकाळी 6 वाजेपासून ते 16 जानेवारी 2026 चे मध्यरात्रीपर्यत भारतीय नागरीक सुरक्षा संहिता 2023 चे कलम 163 प्रमाणे प्रतिबंधात्मक आदेश लागू केले आहेत. 

जिल्हाधिकारी कार्यालय, जिल्हा परिषद, नांदेड वाघाळा महानगर पालिका, तहसिल कार्यालय, नांदेड तसेच नांदेड शहरातील इतर शासकीय कार्यालय तसेच सार्वजनिक ठिकाणे परिसरात आंदोलन, मोर्चा, धरणे, आमरण उपोषण, आत्मदहन इत्यादी कार्यक्रमासाठी प्रतिबंधित आदेश पोलीस अधीक्षक अबिनाश कुमार यांनी निर्गमित केले आहेत. 

00000

  वृत्त क्रमांक 1315

शस्त्र परवाना नुतीनकरण करुन घेण्याचे आवाहन

 

नांदेड, दि. 19 डिसेंबर :- जिल्हाधिकारी तथा जिल्हादंडाधिकारी नांदेड कार्यालयामार्फत निर्गमित, अभिलेखात नोंद असलेले शस्त्रपरवाने ज्याची मुदत बुधवार 31 डिसेंबर 2025 रोजी संपुष्टात येत आहे अशा शस्त्र परवानाधारकांनी त्यांचा शस्त्र परवाना पुढील कालावधीसाठी नुतनीकरण करुन घ्यावा, असे आवाहन करण्यात आले आहे.

 

परवानाधारकाने पुढील कालावधीत आपला शस्त्र परवाना नुतनीकरण करुन घेण्यासाठी नियमानुसार असलेले नुतनीकरण शुल्क (चलनाने) शासनास जमा करावे. आपले शस्त्रपरवान्यात नमुद असलेल्या अग्निशस्त्राची पडताळणी या कार्यालयात करुन विहित नमुन्यातील अर्ज, जन्म तारखेचा पुरावा, पॅनकार्ड, आधार कार्ड, एक पासपोर्टफोटो व मुळ शस्त्रपरवाना जिल्हादंडाधिकारी कार्यालय नांदेड येथे मंगळवार 23 डिसेंबर 2025 पासून संबंधित विभागात दाखल करावा. नांदेड जिल्हयातील शस्त्र परवाना धारक व सर्व संबंधीतांनी नोंद घ्यावी, असे जिल्हाधिकारी तथा जिल्हादंडाधिकारी राहुल कर्डिले यांनी केले आहे.

00000