वृत्त क्र. 9
नशामुक्‍त भारत अभियान व संविधान जागर
कार्यशाळेचे 5 जानेवारी रोजी लातूर येथे आयोजन
नांदेड (जिमाका) दि. 3 :-विदयार्थ्‍यांमध्‍ये समाजभान निर्माण व्‍हावे म्‍हणुन लातूर विभागातील महाविद्यालयांचे प्राचार्य, माध्‍यमिक शाळांचे मुख्‍याध्‍यापक, वसतिगृहांचे गृहपाल यांचेसाठी शुक्रवार 5 जानेवारी 2024 रोजी सकाळी 11 वा. दयानंद सभागृह, लातूर येथे नशामुक्‍त भारत अभियान व संविधान जागर कार्यशाळेचे आयोजन करण्‍यात आलेले आहे. या कार्यशाळेस लातूर विभागातील महाविद्यालयांचे प्राचार्य, माध्‍यमिक शाळांचे मुख्‍याध्‍यापक, वसतिगृहांचे गृहपाल यांनी उपस्थित रहावे, असे आवाहन लातूर समाज कल्‍याण विभागाचे प्रादेशिक उपायुक्‍त अ.र.देवसटवार यांनी केले आहे.
काळानुरुप विविध संस्थेमध्‍ये तसेच कुटुंब व्‍यवस्‍थेमध्‍ये बदल झालेले आहेत. दिव्यांग व्‍यक्‍ती, तृतियपंथी, ज्‍येष्‍ठ नागरिक यांचे बाबतीत सर्वांनी संवेदनशील होणे गरजेचे आहे. तसेच संविधानाप्रती व देशाप्रती प्रत्‍येकाने जबाबदार होणे गरजेचे आहे. त्‍यादृष्‍टीने समाजामध्‍ये जागृती निर्माण व्‍हावी या दृष्‍टीने या कार्यशाळेमध्‍ये संविधान जागृती, व्‍यसनमुक्‍ती, दिव्‍यांगाच्‍या अडचणी आणि समाजाचे दायित्‍व, ज्‍येष्‍ठ नागरिकांच्‍या व्‍यथा आणि उपचार, तृतीयपंथीयांच्‍या समस्‍या व अंधश्रध्‍दा निर्मुलन या विषयावर तज्ञ मान्‍यवरांचे मार्गदर्शन होणार आहे.
या कार्यशाळेचे उद्घाटन लातूरच्या जिल्हाधिकारी श्रीमती वर्षा ठाकूर-घुगे यांचे हस्‍ते होणार असून कार्यक्रमाचे अध्‍यक्ष जिल्हा परिषदेचे अतिरिक्‍त मुख्‍य कार्यकारी अधिकारी अस्‍लम तडवी हे भूषविणार आहेत. या कार्यक्रमात लातूरचे पोलीस अधिक्षक सोमय मुंडे यांचा मान्‍यवरांच्‍या हस्‍ते सत्‍कार करण्‍यात येणार आहे. या कार्यक्रमास प्रमुख अतिथी स्‍वामी रामानंद तिर्थ मराठवाडा विद्यापीठ उपकेंद्र लातूरचे संचालक डॉ.राजेश शिंदे, विभागीय शिक्षण उपसंचालक डॉ. गणपत मोरे, शिक्षणाधिकारी (माध्‍यमिक) नागेश मापारी, शिक्षणाधिकारी (प्राथमिक) श्रीमती वंदना फुटाणे हे उपस्थित राहणार आहेत.
या कार्यशाळेत प्रा. सविता शेटे यांचे अंधश्रध्‍दा निर्मुलन-जागृती प्रा.डॉ.हर्षवर्धन कोल्‍हापुरे यांचे संविधान वाचन-गरज, नंदकुमार फुले यांचे दिव्यांग व्‍यक्‍ती-अडचणी आणि समाजाचे दायित्‍व, डॉ.बी.आर.पाटील यांचे ज्‍येष्‍ठ नागरिक व्‍यथा आणि उपचार जागृती डॉ.अनिल जायभाये यांचे तृतियपंथी आणि समाज भान व डॉ. विजयकुमार यादव यांचे व्‍यसनमुक्‍ती जागृती या विषयावर मार्गदर्शन होणार आहे.
0000
No comments:
Post a Comment