वृत्त क्रमांक 10 

तालुकास्तरावर भ्रष्टाचार निर्मुलन 

समितीच्या बैठकीचे आयोजन 

लेखी स्वरुपात तक्रारी देण्याचे आवाहन 

नांदेड (जिमाका) दि. 4 :- जिल्ह्यातील शासनाच्या कोणत्याही कार्यालयांमध्ये चालू असलेल्या किंवा आजपर्यंत केल्या गेलेल्या भ्रष्टाचाराबाबत कोणाची काही तक्रार असल्यास अथवा आजपर्यंत केल्या गेलेल्या भ्रष्ट कामकाजाबाबत काही निवेदने / तक्रारी असल्यास  किंवा शासनाच्या कोणत्याही कार्यालयांमध्ये करण्यात येणाऱ्या भ्रष्ट काराभाराबाबतची माहिती असल्यास त्याबाबत लेखी स्वरुपात तक्रार तालुकास्तरीय भ्रष्टाचार निर्मुलन समितीच्या संबंधीत तहसिल कार्यालयाकडे सादर करावीत, असे आवाहन जिल्हाधिकारी अभिजीत राऊत यांनी केले आहे. 

शासन परिपत्रकान्वये सर्व तहसिल कार्यालयात तालुकास्तरावर भ्रष्टाचार निर्मुलन समिती गठीत करून सर्व तहसिल कार्यालयांनी बैठका आयोजित करावेत. या समितीची वर्षातून मार्च, जुन, सप्टेंबर व डिसेंबर या महिण्यामध्ये बैठक घेण्याबाबत तरतूद करण्यात आली आहे. जेणेकरून संबंधीत नागरिकांना त्यांचे तक्रारी अर्ज सादर करणे सुलभ होईल. तसेच नगारिकांनी संबंधीत तहसिल कार्यालयात तक्रारी अर्ज सबळ पुराव्यासह सादर करणे आवश्यक आहे. 

कोणत्याही शासकीय, निमशासकीय विभागातील अधिकारी, कर्मचारी यांच्या भ्रष्टाचाराच्याबाबतीत तक्रारीचे निवेदन लेखी स्वरुपात प्रत्यक्ष उपस्थित राहून सादर करावे लागेल. हे निवेदन तालुकास्तरीय भ्रष्टाचार निर्मूलन समिती या नावाने सबळ पुराव्यासह दोन प्रतीत सादर करावे लागेल. या बैठकीसाठी सर्व विभागांचे प्रमुख अधिकारी उपस्थित राहणार असल्यामुळे आपल्या निवेदनाची तातडीने दखल घेवून संबंधितावर नियमानुसार कार्यवाही करण्यात येईल, असे आवाहन जिल्हाधिकारी अभिजीत राऊत यांनी केले आहे.

00000