23 मे रोजी सर्व लसीकरण केंद्रावर

कोविड-19 चे लसीकरण  

उपलब्ध डोसप्रमाणे 45 वर्षावरील व्यक्तींना प्राधान्य  

 

नांदेड (जिमाका) दि. 22 :-  जिल्हा आरोग्य विभागातर्फे जिल्ह्यातील सर्व 90 लसीकरण केंद्रांवर कोविड-19 चे लसीकरण व्हावे यादृष्टिने उपलब्ध लस सर्वत्र विभागून पाठविली आहे. दिनांक 23 मे रोजी लसीकरण केंद्रांवर उपलब्ध असलेली डोसची संख्या पुढीलप्रमाणे आहे.

 

मनपा क्षेत्रात मोडणाऱ्या एकुण 6 केंद्रांवर कोविशिल्ड या लसीचे प्रत्येकी 100 डोस उपलब्ध करुन दिले आहेत. या केंद्रात श्री गुरु गोविंदसिंघजी जिल्हा रुग्णालय, डॉ. शंकरराव चव्हाण वैद्यकीय महाविद्यालय, शासकिय आयुर्वेदीक महाविद्यालय, शहरी दवाखाना हैदरबाग,  कौठा, सिडको या हॉस्पिटलचा समावेश आहे. तर शहरी दवाखाना दशमेश हॉस्पिटल येथे कोविशिल्डचे 50 डोस व शिवाजीनगर येथे कोविशिल्डचे 40 डोस दिले आहेत.

 

शहरी भागात मोडणाऱ्या  लसीकरण केंद्रांवर कोविशिल्ड व कोव्हॅक्सिन या दोन्ही लसींचा पुरवठा करण्यात आला आहे. यातील रुग्णालय उपलब्ध असलेले डोस पुढीलप्रमाणे आहे. उपजिल्हा रुग्णालय देगलूर, गोकुंदा, मुखेड, हदगाव, ग्रामीण रुग्णालय धर्माबाद, हिमायतनगर, कंधार, मांडवी, लोहा, माहूर, मुदखेड, नायगाव, उमरी, बारड अशा एकुण 14 लसीकरण केंद्रांवर कोविशिल्डचे प्रत्येक केंद्रनिहाय 100 डोस उपलब्ध करुन दिले आहेत. ग्रामीण रुग्णालय बिलोली येथे कोविशिल्डचे 30 डोस, ग्रामीण रुग्णालय मांडवी येथे कोव्हॅक्सीनचे 30 डोस, ग्रामीण रुग्णालय माहूर येथे कोव्हॅक्सीनचे 10 डोस उपलब्ध करुन देण्यात आले आहेत. जिल्ह्यातील सर्व 67 प्राथमिक आरोग्य केंद्रांवर कोविशिल्डचे प्रत्येकी 100 डोस उपलब्ध केले आहेत.

 

जिल्ह्यात 21 मे पर्यंत एकुण 4 लाख 13 हजार 988 लाभार्थ्यांचे लसीकरण करण्यात आले. तर 22 मे पर्यंत कोविड-19 लसीचा साठा पुढीलप्रमाणे प्राप्त झाला आहे. कोविशिल्डचे 3 लाख 34 हजार 930 डोस, कोव्हॅक्सीनचे 1 लाख 5 हजार 340 डोस याप्रमाणे एकुण 4 लाख 40 हजार 270 डोस प्राप्त झाले आहेत.

 

हे सर्व डोस 45 वर्षावरील व्यक्तींसाठीच दुसऱ्या लसीकरणाला दिले आहेत. केंद्र शासनाच्या सूचनेनुसार कोविशिल्ड लसीचा पहिला डोस ज्यांनी घेतला आहे त्याच्या 12 ते 16 आठवडे म्हणजेच सुमारे 84 दिवसानंतर दुसरा डोस दिला जाईल. एखाद्या केंद्रांवर 45 वर्षावरील लाभार्थी नसेल तर तो डोस प्रथम लसीकरणासाठी वापरता येईल. कोव्हॅक्सीन ही लस 45 वर्षावरील लाभार्थ्यांच्या दुसऱ्या डोससाठीच दिली जाईल. मनपा कार्यक्षेत्रातील 45 वर्षावरील लाभार्थ्यांना कोव्हॅक्सिन या लसीच्या दुसऱ्या डोसकरीता cowin.gov.in या वेबसाईटवर ऑनलाईन नोंदणी करणे अनिवार्य आहे. तसेच Appointment Session Site Confirm झाल्यानंतरच लाभार्थ्यांचे संबंधित केंद्रावर लसीकरण करण्यात येईल. लसीचा उपलब्धतेप्रमाणे आरोग्य विभाग याचे नियोजन करेल. नागरिकांनी लसीच्या उपलब्धतेप्रमाणे आरोग्य विभागातील कर्मचाऱ्यांना सहकार्य करावे, असे आवाहन जिल्हा आरोग्य अधिकारी डॉ. बालाजी शिंदे यांनी केले. 

0000