खत नियंत्रण आदेशाचे उल्लंघन झाल्याने  

दहा कृषि सेवा केंद्राचे परवाने निलंबीत ;

तक्रारींसाठी संपर्क साधण्याचे आवाहन 

नांदेड दि. 18 :- खत विक्री केंद्राकडून खत नियंत्रण आदेश 1985 चे खंड व 35 चे उल्लंघन झाल्याने खताची विक्री करु नये म्हणून जिल्हा परिषदेचे जिल्हा कृषि विकास अधिकारी यांनी जिल्ह्यातील दहा परवाने नुकतेच निलंबीत केले आहेत. शेतकऱ्यांनी बियाणे, खते व किटकनाशकांच्या बाबतीत असलेल्या तक्रारीसाठी प्रत्यक्ष, दुरध्वनी, ई-मेल व एसएमएसद्वारे तसेच कृषि विभागाचा क्रमांक (02462) 234767 व भरारी पथकाचे फ्लेक्स वरील दुरध्वनी क्रमांकावर संपर्क साधावा, असे आवाहन कृषि विकास अधिकारी पंडीत मोरे यांनी केले आहे.

निलंबीत परवान्यांमध्ये श्री रोहीत ॲग्रो एजन्सीज नवा मोंढा नांदेड, विठ्ठल बीज भांडार नवा मोंढा नांदेड, जाधव कृषि सेवा केंद्र नवा मोंढा नांदेड, नवभारत ट्रेडिंग कंपनी नवा मोंढा नांदेड, श्री संतकृपा बीज भांडार इतवारा नांदेड, विलास ॲग्रो एजन्सीज वाडीपाटी नांदेड, साईकृपा कृषि विकास केंद्र नवा मोंढा नांदेड, गुरुकृपा फर्टीलायझर्स नवा मोंढा नांदेड, प्रथमेश ॲग्रो एजन्सीज मालेगांव रोड खुरगावफाटा नांदेड, नायगाव तालुक्यातील कृष्णुर येथील विजयालक्ष्मी कृषि सेवा केंद्र यांचा समावेश आहे.  ग्रीष्मा ॲग्रो इंडस्ट्रीज कंपनीचे विद्राव्य खताचे नमुने घेऊन प्रयोगशाळेस पाठविले असता ती निकृष्ट दर्जाचे आढळून आल्याने कंपनीवर यापुर्वी गुन्हा नोंद झाला आहे. विद्राव्य खते परवान्यात समाविष्ट करुन न घेता खताची खरेदी विक्री, रासायनिक खताचे मासिक खरेदी विक्री अहवाल नियमित सादर न करणे, आदी त्रुटीमुळे खत परवाने निलंबनाचा प्रस्ताव नांदेड जिल्हा परिषदेकडे सादर करण्यात आला होता.

जिल्हयातील शेतकऱ्यांनी बियाणे, रासायनिक खते व किटकनाशक औषधी अधिकृत परवानाधारक  विक्रेत्यांकडूनच खरेदी करावीत. फसवणूक टाळण्यासाठी विक्रेत्याकडून पक्क्या पावती घ्यावी. पावतीवर शेतकरी व विक्रेता या दोघाच्या स्वाक्षरी असावी. कमी वजनाची व छापील किंमतीपेक्षा जास्त किंमतीने बियाणे, रासायनिक खते व किटकनाशक औषधी विक्री होत असल्यास, जादा दराने तसेच कच्ची पावतीद्वारे बियाणे खताची विक्री होत असल्याचे आढळून आल्यास तात्काळ कृषि विभागास, तालुका कृषि अधिकारी किंवा पंचायत समिती कृषि अधिकारी जिल्हा परिषदेच्या मोहीम अधिकाऱ्यांशी तातडीने संपर्क करावा असेही आवाहन करण्यात आले आहे.

00000