शेतकऱ्यांना पीक कर्जाकरीता येणाऱ्या

अडचणीबाबत नांदेड तालुकास्तरीय समिती स्थापन

नांदेड , दि. 5 :- जिल्ह्यातील शेतकऱ्यांना खरीप हंगाम-2017 साठीच्या पीक कर्जाकरीता येणाऱ्या अडचणीबाबत मार्गदर्शन करणे व आवश्यक कागदपत्रे एकाच ठिकाणी उपलब्ध होण्याच्यादृष्टिने जिल्हाधिकारी नांदेड यांच्या सुचनेनुसार नांदेड तालुकास्तरीय समन्वय समितीची स्थापना नुकतीच करण्यात आली आहे. या समितीचे अध्यक्ष संबंधीत तालुक्याचे तहसिलदार हे आहेत. तर उप / सहाय्यक निबंधक, गटविकास अधिकारी , तालुका कृषि अधिकारी, बीएलबीसी समन्वय व जिल्हा मध्यवर्ती सहकारी बँकेचे निरिक्षक हे या समितीचे सदस्य आहेत.  

समितीची सभा दर सोमवारी सकाळी 11 ते दुपारी 3 यावेळेत तहसिल कार्यालय येथे घेण्यात येणार आहे. यावेळेत कर्ज वाटपासंबंधी अडचणी घेऊन येणाऱ्या शेतकऱ्यांना आवश्यक कागदपत्रे जसे सात/बारा, आठ-अ, चर्तु: सिमा, नकाशा, जि.म.स. बँकेचे नादेय प्रमाणपत्र आदी कागदपत्रे उपलब्ध करुन देण्याची जबाबदारी तालुकास्तरीय समन्वय समितीची राहणार आहे. तहसिलदार नांदेड यांनी तालुक्यातील सर्व मंडळ कार्यालयाच्या ठिकाणी या संबंधाने एक-एक मदत केंद्र स्थापन करण्याबाबत सर्व मंडळ अधिकारी यांना दि. 17 जुन 2017 रोजी आदेश दिले आहेत. त्यानुसार शेतकऱ्यांसाठी प्रत्येक मंडळ स्तरावर मदत केंद्र कार्यरत आहे.

राज्य शासनाच्या दि. 6 जुन 2017 रोजीच्या सुलभ पीक कर्ज अभियान-2017 च्या शासन निर्णयाच्या प्रभावी अंमलबजावणीसाठी तसेच  दि. 28 जुन 2017 रोजी शासनाने जाहीर केलेल्या छत्रपती शिवाजी महाराज सन्मान योजना 2017 या कर्जमाफी योजनेच्या पार्श्वभुमीवर शेतकऱ्यांना वेळेत कर्ज मिळण्यासाठी शासकीय यंत्रणा सज्ज ठेवण्यात आली आहे. त्याचा जास्तीतजास्त शेतकऱ्यांनी लाभ घ्यावा, असे आवाहन नांदेड तालुकास्तरीय समन्वय समिती तथा उपनिबंधक सहकारी संस्था नांदेड ता. नांदेड यांनी केले आहे.

000000