वृत्त क्रमांक

अंड्याच्या पोषणमूल्यांविषयी विद्यार्थ्यांमध्ये जनजागृती

• जागतिक अंडी दिनानिमित्त सोमठाणा येथे पशुसंवर्धन विभागाचा उपक्रम

• अंड्याचे पोषणमूल्य आणि संतुलित आहाराचे महत्त्व पटवून दिले

नांदेड (जिमाका), दि. 9: विद्यार्थ्यांचा शारीरिक व बौद्धिक विकास साधण्यासाठी पौष्टिक आहार आणि आरोग्यदायी सवयी महत्त्वाच्या आहेत. या अनुषंगाने जागतिक अंडी दिनानिमित्त पशुसंवर्धन विभागाच्या वतीने भोकर तालुक्यातील सोमठाणा येथील जिल्हा परिषद शाळेत विद्यार्थ्यांसाठी पोषणविषयक जनजागृती कार्यक्रमाचे आयोजन करण्यात आले. या वेळी विद्यार्थ्यांना अंड्याचे पोषणमूल्य, आरोग्यविषयक फायदे आणि संतुलित आहाराचे महत्त्व समजावून सांगण्यात आले.

जागतिक अंडी दिन दरवर्षी ऑक्टोबर महिन्याच्या दुसऱ्या शुक्रवारी साजरा केला जातो. अंड्याचे मानवी आहारातील महत्त्व आणि त्यातील पोषक घटकांविषयी जनजागृती करणे हा या दिवसाचा प्रमुख उद्देश आहे. ‘सुदृढ आरोग्यासाठी पौष्टिक आहार, पौष्टिक आहारात अंड्याला महत्त्वाचे स्थान’ हा संदेश या उपक्रमातून देण्यात आला.

या कार्यक्रमास जिल्हा उपआयुक्त पशुसंवर्धन व दुग्धव्यवसाय डॉ. सखाराम खुणे, सहाय्यक आयुक्त पशुसंवर्धन व दुग्धव्यवसाय डॉ. प्रवीणकुमार घुले, पशुवैद्यकीय अधिकारी डॉ. अविनाश बुन्नावार, डॉ. दीक्षाली मोरे, डॉ. उमेश सोनटक्के तसेच पशुधन पर्यवेक्षक केदार देशमुख, रविकुमार बबिलवाड आणि विजय विभुते उपस्थित होते.

अंड्यामध्ये उच्च दर्जाची प्रथिने, जीवनसत्त्वे आणि विविध खनिजे असतात. वाढत्या वयातील मुलांची शारीरिक वाढ, स्नायूंचा विकास आणि मेंदूचे कार्य यांसाठी पोषक आहार आवश्यक आहे. संतुलित आहाराचा भाग म्हणून अंड्याचा समावेश उपयुक्त ठरू शकतो, असे मार्गदर्शन यावेळी करण्यात आले.

विद्यार्थ्यांना अंडी योग्य प्रकारे शिजवून खाणे, अन्नाची स्वच्छता राखणे, सुरक्षित अन्नसेवन करणे आणि नियमित संतुलित आहार घेणे याबाबतही माहिती देण्यात आली. बालवयापासून आरोग्यदायी आहाराच्या सवयी विकसित केल्यास मुलांच्या सर्वांगीण विकासाला मदत होते, हा संदेश या उपक्रमातून देण्यात आला.

पशुसंवर्धन विभागाच्यावतीने पशुधन विकास, दुग्धव्यवसाय आणि कुक्कुटपालनाला प्रोत्साहन देण्यासोबतच दूध व अंडी यांसारख्या पशुजन्य अन्नपदार्थांचे पोषणातील महत्त्व जनसामान्यांपर्यंत पोहोचविण्यासाठी विविध जनजागृतीपर उपक्रम राबविण्यात येतात. त्याचाच एक भाग म्हणून सोमठाणा येथे या कार्यक्रमाचे आयोजन करण्यात आले होते.

***