सुधारित वृत्त 

वृत्त क्रमांक 657

 

आणीबाणीच्या विविध घटनांच्या

छायाचित्र प्रदर्शनाचे आज उद्घाटन

 

नांदेड दि. 24 जून :- देशात दिनांक 25 जून 1975 रोजी आणिबाणी लागू करण्यात आली होती. या घटनेला येत्या 25 जून रोजी 50 वर्ष पूर्ण होत आहेत. त्यानिमित्त विशेष छायाचित्र प्रदर्शनाचे आयोजन जिल्हा ग्रंथालय अधिकारी कार्यालयात बुधवार 25 जून 2025 रोजी करण्यात आले आहे. जिल्हाधिकारी डॉ. राहुल कर्डिले यांच्या हस्ते सकाळी 10.30 वा. या छायाचित्र माहिती प्रदर्शनाचे उद्घाटन करण्यात येणार आहे.  

 

या प्रदर्शनात आणीबाणीच्या अनुषंगाने जिल्ह्यात घडलेल्या विविध घटना-घडामोडींची तसेच आणीबाणीविरोधी संघर्षात सहभागी झालेल्या विविध कार्यकर्ते-नागरिकांची छायाचित्रे व माहितीचा समावेश असणार आहे. या छायाचित्र माहिती प्रदर्शनास उपस्थित राहण्याचे आवाहन नांदेड जिल्हा माहिती कार्यालयाने केले आहे.

000

वृत्त क्र. 656 

आणीबाणी काळात लढा देणाऱ्या व्यक्तींचा

मुख्यमंत्री यांच्या स्वाक्षरीचे सन्मानपत्र देऊन होणार गौरव 

नांदेड दि. 24 जून :- सन 25 जून 1975 ते 31 मार्च 1977 या कालावधीत घोषत आणीबाणीच्या पार्श्वभूमीवर लोकशाही मुल्यांच्या रक्षणासाठी लढा देणाऱ्या आणि त्यासाठी बंदिवास सोसावा लागला अशा व्यक्तींचा सन्मान, यथोचित गौरव करण्यात येणार आहे. यानुसार अशा आणीबाणीधारकांना बुधवार 25 जून 2025 रोजी संबंधीत जिल्हाधिकारी यांच्या स्तरावर मुख्यमंत्री महोदयांच्या स्वाक्षरीचे सन्मानपत्र देऊन सन्मानित करण्याचे निर्देश दिले आहेत. 

त्यानुषंगाने 25 जून रोजी मुख्यमंत्री महोदयांच्या स्वाक्षरीचे सन्मानपत्र वितरीत करण्याच्या सभारंभाचे आयोजन करण्यात आले आहे. नांदेड, लोहा, कंधार, मुदखेड, हदगाव तालुक्यातील हयात आणीबाणी धारक किंवा त्यांच्या वारस पत्नी यांना बैठक कक्ष जिल्हाधिकारी कार्यालय नांदेड येथे सकाळी 11 वा. न चुकता उपस्थित राहण्याबाबत संबंधित तहसिलदार यांच्या स्तरावरुन कळविण्यात आले आहे. संबंधित तालुक्यातील हयात आणीबाणी धारक किंवा त्यांच्या वारस पत्नी यांनी उपस्थित रहावे, असे आवाहन करण्यात आले आहे.

0000

वृत्त क्र. 655 

नांदेड तालुक्यातील ग्रामपंचायत सरपंच पदाचे आरक्षण 

नांदेड दि. 24 जून :- नांदेड तालुक्यातील ग्रामपंचायत सरपंच पदाचे वर्ष 2025 ते 2030 साठी आरक्षण सोडत 1 जुलै 2025 रोजी सकाळी 10 वा. तहसिल कार्यालय नांदेड (उपविभागीय अधिकारी नांदेड यांच्या बैठक कक्षात दुसरा मजला) येथे काढण्यात येणार आहे. सरपंच पदाचे आरक्षणात नांदेड तालुक्यात एकुण राखीव 73 पदांपैकी 37 महिलांसाठी राखीव पदे आहेत. सर्व संबंधीतानी तसेच माजी जिल्हा परिषद, पंचायत समिती सदस्य, ग्रामपंचायतीचे सरपंच, उपसरपंच, सदस्य यांनी या सोडतीस उपस्थित रहावे, असे आवाहन तहसिलदार नांदेड 

नांदेड जिल्हाधिकारी यांची अधिसूचना 23 जून 2025 नुसार नांदेड तालुक्यातील बिगर अनुसूचित क्षेत्रातील ग्रामपंचायतीसाठी अनुसूचित जाती, अनुसूचित जमाती, नागरिकाचा मागास प्रवर्ग आणि स्त्रिया यांच्यासाठी राखून ठेवावयाची सरपंचाची पदे मुंबई ग्रामपंचायत (सरपंच व उपसरपंच) निवडणूक नियम 1964 च्या नियम 2 अ चे पोटनियम 3 व 4 अन्वये जिल्हाधिकारी नांदेड यांनी पुढील तपशिलानुसार अधिसूचीत करुन दिले आहे. 

सरपंच पदाचे आरक्षण अनुसूचित जातीसाठी एकुण राखीव पद 18 त्यापैकी 50 टक्के महिलांसाठी राखीव 9, अनुसूचित जमाती 1 पैकी महिलासाठी 1, नागरिकांचा मागास प्रवर्ग एकुण राखीव पद 20 पैकी महिलांसाठी 10, खुला प्रवर्ग एकुण राखीव पद 34 पैकी 50 टक्के महिलांसाठी 17 राखीव ठेवण्यात आली आहेत. 

आरक्षण हे सन 2025 ते 2030 मध्ये होणाऱ्या सार्वत्रिक निवडणूकांसाठी अमलात राहील. सदर प्रवर्गाच्या सरपंच पदासाठी सोडत पद्धतीने तहसिल कार्यालय नांदेड (उपविभागीय अधिकारी नांदेड यांचे बैठक कक्ष, दुसरा मजला) येथे मंगळवार 1 जुलै 2025 रोजी सकाळी 10 वा. करण्यात येईल. सर्व संबंधीतानी असेही आवाहन तहसिलदार संजय वारकड यांनी केले आहे.

00000

वृत्त क्र. 654

1 जुलै रोजी जिल्हा परिषदेत कृषी दिनाचे आयोजन

नांदेड दि. 24 जून :- माजी मुख्यमंत्री कै. वसंतराव नाईक यांनी कृषिक्षेत्रात केलेल्या भरीव योगदानाबद्दल 1 जुलै हा दिवस त्यांचा वाढदिवस राज्यात कृषिदिन म्हणून साजरा करण्यात येतो. यावर्षी 1 जुलै 2025 रोजी जिल्हा परिषदेच्या कृषि विभागामार्फत कृषिदिन जिल्हा परिषदेच्या मुख्य कार्यकारी अधिकारी मेघना कावली यांच्या अध्यक्षतेखाली कै. यशवंतराव चव्हाण सभागृह, जिल्हा परिषद, नांदेड येथे साजरा करण्यात येणार आहे.

या कार्यक्रमात सेंद्रीय शेती करणाऱ्या शेतकऱ्यांना प्रमाणपत्र वाटप करण्यात येणार आहेत. या कार्यक्रमासाठी जिल्हाधिकारी राहुल कर्डिले, विद्यापीठ शास्त्रज्ञ, जिल्हा परिषदेचे अधिकारी व कर्मचारी, कृषी विभाग महाराष्ट्र शासन, आत्मा नांदेडचे सर्व अधिकारी व कर्मचारी तसेच जिल्ह्यातील राज्य पुरस्कार प्राप्त शेतकरी, शेती क्षेत्रात उल्लेखनिय काम करणारे शेतकरी व महिला, शेंद्रीय शेती करणारे शेतकरी, माध्यम प्रतिनिधी यांची उपस्थिती राहणार आहे, असे जिल्हा परिषदेचे कृषी विकास अधिकारी यांनी कळविले आहे.

00000

वृत्त क्र. 653

प्राणी क्लेश समितीवर काम करण्यास इच्छुक व्यक्तींनी 30 जून पर्यंत अर्ज करण्याचे आवाहन 

नांदेड, दि. 24 जून :- जिल्हा प्राणी क्लेश प्रतिबंधक समितीमध्ये कार्य करण्यासाठी 4 ते 5 सदस्यांची नेमणूक करावयाची आहे. या समितीत काम करणाऱ्या इच्छुक व्यक्तींनी विहित नमुन्यात जिल्हा पशुसंवर्धन उपआयुक्त, कार्यालय देगलूर नाका, नांदेड या कार्यालयात कार्यालयीन वेळेत उपस्थित राहून 30 जून 2025 पर्यज अर्ज सादर करावेत, असे आवाहन जिल्हा पशुसंवर्धन उपआयुक्त तथा सदस्य सचिव जिल्हास्तरीय प्राणी क्लेश समिती नांदेड यांनी केले आहे.

00000

वृत्त क्र. 652

प्रधानमंत्री धरती आबा जनजाती ग्राम उत्कर्ष अभियानांतर्गत 

किनवट पंचायत समिती येथे कार्यशाळा संपन्न

नांदेड दि.२३ जून:- नांदेड जिल्हा परिषदेच्या मुख्य कार्यकारी अधिकारी मेघना कावली यांच्या मार्गदर्शनाखाली, सहायक जिल्हाधिकारी जेनित चंद्रा दोन्तुला,उप मुख्य कार्यकारी अधिकारी पंचायत श्रीमती मंजुषा कापसे, ज्ञानेश्वर टाकरस गटविकास अधिकारी किनवट, प्रदीप नाईक सहाय्यक प्रकल्प अधिकारी, रामेश्वर मुंडे तहसीलदार किनवट यांच्या प्रमुख उपस्थितीत कार्यशाळेचे आयोजन करण्यात आले होते.

या कार्यशाळेसाठी किनवट, माहुर, हिमायतनगर,भोकर, हदगाव, उमरी, धर्माबाद,मुखेड, मुदखेड, येथील तहसिलदार,गटविकास, ग्रामपंचायत अधिकारी, महसूल अधिकारी, मंडळ अधिकारी यांना प्रशिक्षण देण्यात आले यावेळी मुख्य कार्यकारी अधिकारी मेघना कावली यांनी या अभियानाबाबत सविस्तर मार्गदर्शन करताना सर्व जनजाती कुटुंबांचे आॕनलाईन सर्वेक्षण तात्काळ सुरू करुन विविध योजनेच्या माध्यमातून पात्र लाभार्थी यांना लाभ देण्यासाठी व विविध प्रकारचे दाखले/प्रमाणपत्रे देण्यासाठी आदेशीत केले. आदिवासी बांधवांना विकासाच्या प्रवाहात आणण्यासाठी सामाजिक भावनेतून काम करण्यासाठी अधिकारी कर्मचारी यांना आव्हान केले.तर यावेळी सहाय्यक जिल्हाधिकारी जेनित चंद्रा दोन्तुला यांनी या अभियानाबाबात मार्गदर्शन केले.कार्यशाळा यशस्वी करण्यासाठी  विस्तार अधिकारी वसंत वाघमारे  , कैलास गायकवाड, राजेश मॅकलवार यांनी परीश्रम घेतले.

०००००