वृत्त क्र. 789

महसूल दिन आज होणार साजरा 

नांदेड तालुक्यात महसूल सप्ताहात विविध कार्यक्रमाचे आयोजन

नांदेड दि. 31 जुलै : शासनाच्या निर्देशानुसार 1 ऑगस्ट महसूल दिन हा विविध महसूल विषयक कार्यक्रम घेऊन साजरा होणार आहे. नांदेड तालुक्यात 1 ते 7 ऑगस्ट महसूल सप्ताह साजरा होणार आहे. त्याअनुषंगाने उपविभागीय अधिकारी डॉ. सचिन खल्लाळ यांच्या अध्यक्षतेखाली व तहसीलदार संजय वारकड यांच्या उपस्थितीत मंडळ अधिकारी, तलाठी कार्यालयीन कर्मचाऱ्यांची आज बैठक घेण्यात आली. 

येत्या 7 दिवसात विविध कार्यक्रम महसूल खात्याच्या अधिकारी-कर्मचाऱ्यामार्फत गावात राबविले जाणार आहेत. त्याचअनुषंगाने 1 ऑगस्ट 2025 रोजी सकाळी 10 वा. तहसील कार्यालयात विविध प्रकारचे प्रमाणपत्र, उत्पन्न, रहिवासी, जातीचे प्रमाणपत्र, नॉन क्रिमिलियर प्रमाणपत्र, बिडी कामगारांना राशन कार्ड, वंचितांना प्रमाणपत्र व राशन कार्ड वाटप, सेवानिवृत्त अधिकारी-कर्मचाऱ्यांचा सत्कार इत्यादी पार पडणार आहेत. सर्वांनी या कार्यक्रमास उपस्थित राहावे, असे आवाहन करण्यात आले आहे.  

साप्ताहात अतिक्रमण नियम कुलकर्णी, रस्त्याच्या दुतर्फावर वृक्ष लागवड करणे, एम सेंडच्या अनुषंगाने प्रचार प्रसिद्धी व परवाने देण्याच्या अनुषंगाने कार्यवाही, विशेष सहाय्य योजनाच्या लाभार्थ्याचे डीबीटी करणे, छत्रपती शिवाजी महाराज महाराज अभियान राबवणे इत्यादी कामे नांदेड तहसील कार्यालयाच्यावतीने तालुक्यात करण्यात येणार आहेत. बैठकीस नायब तहसीलदार संजय नागमवाड, स्वप्निल दिगलवार, सुनील माचेवाड, रवींद्र राठोड, अव्वल कारकून देवीदास जाधव आदी उपस्थित होते.

महसूल सप्ताहातील कार्यक्रमाचे स्वरुप 

शुक्रवार 1 ऑगस्ट रोजी महसूल सप्ताहाचा शुभारंभ होणार आहे. या दिवशी महसूल संवर्गातील कार्यरत, सेवानिवृत्त अधिकारी, कर्मचारी संवाद, उत्कृष्ट अधिकारी, कर्मचारी पुरस्कार वितरण व मान्यवरांच्या हस्ते लाभार्थ्यांना विविध प्रमाणपत्र वितरण समारंभाचे आयोजन केले आहे.

शनिवार 2 ऑगस्ट रोजी शासकीय जागेवर सन 2011 पूर्वीपासून रहिवासी प्रयोजनार्थ अतिक्रमण असलेल्या कुटुंबांपैकी अतिक्रमण नियमानुकूल करण्यास पात्र असलेल्या कुटुंबांना अतिक्रमित जागांचे पट्टे वाटप करण्यात येईल. रविवार 3 ऑगस्ट रोजी पाणंद/शिवरस्त्यांची मोजणी करुन त्यांच्या दुतर्फा झाडे लावणे.  सोमवार 4 ऑगस्ट रोजी प्रत्येक मंडळनिहाय ‘छत्रपती शिवाजी महाराज महाराजस्व अभियान’ राबविण्यात येईल. मंगळवार 5 ऑगस्ट रोजी विशेष सहाय्य योजनेतील ज्या लाभार्थ्यांचे थेट लाभ हस्तांतरण झालेले नाही, त्यांना घरभेटी देऊन डीबीटीद्वारे अनुदानाचे वाटप केले जाईल.

बुधवार 6 ऑगस्टला शासकीय जमिनींवरील अतिक्रमणे निष्कासित करून त्या अतिक्रमणमुक्त केल्या जातील. तसेच शर्तभंग झालेल्या जमिनींबाबत शासन धोरणानुसार (नियमानुकूल करणे/सरकारजमा करणे) निर्णय घेतले जातील. गुरुवार 7 ऑगस्टला एम सँड धोरणाची अंमलबजावणी करून नवीन मानक कार्यप्रणालीनुसार धोरण पूर्णत्वास नेले जाईल आणि ‘महसूल सप्ताहाचा’ सांगता समारंभ आयोजित केला जाईल.  

 00000

वृत्त क्र. 788

जिल्ह्यात डाक कार्यालयातील आर्थिक/पत्रव्यवहार 2 ऑगस्ट रोजी राहणार बंद

 

·   आयटी 2.0 या नवीन तांत्रिक प्रणालीत सर्व डाक कार्यालय 4 ऑगस्ट पासून विलीन होणार  

 
नांदेड दि. 31 जुलै : नांदेड विभागातील सर्व डाक कार्यालय आयटी 2.0 या नवीन तांत्रिक प्रणालीत 4 ऑगस्ट 2025 पासून विलीन होत आहेत. त्यासाठी नांदेड विभागातील सर्व डाक कार्यालयातील आर्थिक/ पत्रव्यवहार हे 2 ऑगस्ट 2025 रोजी पूर्णपणे बंद राहणार आहेत. याबाबत डाक कार्यालयाच्या ग्राहकांनी नोंद घ्यावी, असे आवाहन नांदेड डाक विभागाचे डाक अधीक्षक यांनी केले आहे.

 

टपाल विभागाला पुढील पिढीतील एपीटी अॅप्लिकेशनची (आयटी 2.0) अंमलबजावणी करण्याची घोषणा करताना अभिमान वाटतो. जो आमच्या डिजिटल उत्कृष्टता आणि राष्ट्रउभारणीच्या प्रवासात एक मोठी झेप आहे. या परिवर्तनकारी उपक्रमाचा एक भाग म्हणून, अपग्रेड केलेली प्रणाली नांदेड विभागातील सर्व पोस्ट ऑफिसमध्ये 4 ऑगस्ट रोजी लागू केली जाणार आहे. या प्रगत डिजिटल प्लॅटफॉर्मवर एक अखंड आणि सुरक्षित संक्रमण सक्षम करण्यासाठी येत्या 2 ऑगस्ट रोजी नियोजित डाउन टाइम करण्यात आला आहे. त्यामुळे 2 ऑगस्ट 2025 रोजी नांदेड विभागातील कोणत्याही पोस्ट ऑफिसमध्ये कोणतेही आर्थिक, पत्र व्यवहार केले जाणार नाहीत.

 

डेटा मायग्रेशन, सिस्टम व्हॅलिडेशन आणि कॉन्फिगरेशन प्रक्रिया सुलभ करण्यासाठी, नवीन सिस्टम सुरळीत आणि कार्यक्षमतेने लाइव्ह होईल याची खात्री करण्यासाठी सेवा या 2 ऑगस्टला तात्पुरती बंद राहणार आहे. APT अॅप्लिकेशन वापरकर्त्याचा अनुभव वाढविण्यासाठी, जलद सेवा वितरण आणि अधिक ग्राहक-अनुकूल इंटरफेस प्रदान करण्यासाठी डिझाइन केले आहे. जे गुणवत्तापूर्ण, कार्यक्षम आणि भविष्यासाठी तयार पोस्टल ऑपरेशन्स प्रदान करण्याची वचनबद्धता प्रतिबिंबित करते. डाक कार्यालयाच्या ग्राहकांना आवाहन केले आहे त्यांनी त्यांच्या भेटींचे आगाऊ नियोजन करावे आणि या छोट्या व्यत्ययादरम्यान आमच्यासोबत रहावे. कोणत्याही गैरसोयीबद्दल आम्हाला वाईट वाटते पण डाक कार्यालयाच्या ग्राहकांना, नागरिकांना चांगल्या, जलद आणि अधिक डिजिटल सक्षम सेवा देण्याच्या हितासाठी पावले उचली जात आहेत, असे अधीक्षक डाकघर नांदेड विभाग नांदेड यांनी प्रसिद्धी पत्रकाद्वारे कळविले आहे.

0000

वृत्त क्र. 787 

शासकीय वाळू डेपोतून गरजू ग्राहकास घरकुल लाभार्थ्यांना वाळू उपलब्ध  

 
नांदेड दि. 31 जुलै : जिल्ह्यातील घरकुल लाभार्थी व खाजगी ग्राहकांना 1 ऑगस्ट 2025 पासून आपल्या जवळच्या वाळू डेपोमधून वाळू उपलब्ध करुन देण्यात येत आहे. त्यासाठी संबंधीत गरजु ग्राहकांना ऑनलाईनद्वारे महाखनिज प्रणालीवर सकाळी 11 ते दुपारी 3 वाजेपर्यंत कालावधीत (सार्वजनिक सुट्टी वगळून) वाळू बुकिंग करुन बुकिंग केलेल्या दिनांकापासून 7 दिवसाच्या आत वाळू डेपोतून वाळू उचल करणे बंधनकारक राहणार आहे.

 

त्यामुळे ज्या ग्राहकांना वाळूची आवश्यकता आहे त्या ग्राहकांनी शासनाचे महाखनिज प्रणालीवर mahakhanij.maharashtra.gov.in ऑनलाईन बुकिंग करुन वाळू उचल करावी, असे प्रशासनाने जाहीर केले आहे. याबाबतची सविस्तर माहिती जिल्हाधिकारी नांदेड यांच्या अधिकृत संकेतस्थळ nanded.gov.in वर प्रसिद्ध केले आहे.

00000

वृत्त क्र. 786

आजपासून जागतिक स्तनपान सप्ताहास सुरुवात 

स्तनपान ; एक आरोग्यदायी भविष्य घडवण्यासाठी

नांदेड दि. 31 जुलै : दरवर्षी 1 ते 7 ऑगस्ट दरम्यान जागतिक स्तनपान सप्ताह साजरा केला जातो. यावर्षीचा जागतिक स्तनपान सप्ताह "स्तनपान: एक आरोग्यदायी भविष्य घडवण्यासाठी" या संकल्पनेवर आधारित आहे. स्तनपानाचे महत्त्व अधोरेखित करणे आणि मातांना स्तनपानासाठी प्रोत्साहित करणे हा या सप्ताहाचा मुख्य उद्देश आहे. 

सुपोषित नांदेड बनवण्यासाठी आयआयटी बॉम्बे यांनी जे परिश्रम घेतले, तसेच प्रशिक्षण देऊन प्रशिक्षक बनवले. त्यांनी  संपूर्ण जिल्ह्यात त्याचा उपयोग करून सुपोषित नांदेड ध्येय, उद्देश साध्य करण्याचे निर्देश मुख्य कार्यकारी अधिकारी मेघना कावली यांनी दिले. सर्वांनी या उपक्रमात सहभागी होऊन स्तनपानाचे महत्त्व समजून घ्यावे आणि आरोग्यदायी पिढी घडवण्यासाठी योगदान द्यावे, असेही आवाहन त्यांनी केले.

जिल्हाधिकारी राहुल कर्डिले व मुख्य कार्यकारी अधिकारी मेघना कावली यांच्या मार्गदर्शनाखाली जिल्हा आरोग्य अधिकारी डॉ.संगीता देशमुख व जिल्हा शल्यचिकित्सक डॉ. संजय पेरके यांच्या नियोजनाने  संपूर्ण जिल्ह्यात हा कार्यक्रम राबविण्यात येणार आहे. बाळासाठी आईचे दूध हे अमृततुल्य आहे. जन्मापासून पहिले सहा महिने बाळाला केवळ स्तनपान देणे हे त्याच्या शारीरिक आणि मानसिक वाढीसाठी अत्यंत महत्त्वाचे आहे. स्तनपानामुळे बाळाची रोगप्रतिकारशक्ती वाढते, पोटाचे विकार कमी होतात आणि दमा व ऍलर्जीसारख्या समस्यांचा धोका कमी होतो. स्तनपान करणाऱ्या बाळांचे वजन संतुलित राहते आणि त्यांना भविष्यात मधुमेह किंवा स्थूलपणासारख्या समस्या होण्याची शक्यता कमी असते.

आईसाठी देखील स्तनपानाचे अनेक फायदे आहेत. यामुळे प्रसूतीनंतर गर्भाशय लवकर पूर्वस्थितीत येते, रक्तस्राव कमी होतो आणि वजन कमी करण्यास मदत करते. स्तनपानामुळे आई आणि बाळात भावनिक नाते अधिक घट्ट होते. या जागतिक स्तनपान सप्ताहानिमित्त नांदेड जिल्ह्यातील आरोग्य विभाग, स्वयंसेवी संस्था आणि विविध सामाजिक गट एकत्र येऊन स्तनपानाविषयी जनजागृतीपर कार्यक्रमांचे आयोजन करणार आहेत. यामध्ये कार्यशाळा, चर्चासत्रे, आरोग्य शिबिरे आणि माहितीपर सत्रे यांचा समावेश असेल. स्तनपानाचे महत्त्व, योग्य पद्धती आणि येणाऱ्या अडचणींवर मात कशी करावी याबद्दल मार्गदर्शन केले जाईल.

00000

वृत्त क्र. 785

कृत्रिम वाळूचा वापर करण्यासाठी धोरण जाहीर  

जमिनीची माहिती सादर करण्याचे आवाहन  

नांदेड दि. 31 जुलै :- महसूल व वन विभागाचा शासन निर्णय 23 मे 2025 अन्वये नैसर्गिक वाळूला एम-सॅन्ड (कृत्रिम वाळू) पर्याय म्हणून विकास करण्याच्या अनुषंगाने शासनाने धोरण जाहीर केले आहे. त्यामध्ये जिल्हाधिकारी कार्यालयाने 28 जुलै 2025 रोजी दिलेल्या प्रसिद्धी पत्रकाप्रमाणे माहिती व अर्ज 14 ऑगस्ट 2025 रोजी पर्यंत सादर करावेत असे आवाहन जिल्हा प्रशासनाने केले आहे.

शासनाकडे किंवा कोणत्याही सार्वजनिक प्राधिकरणाकडे निहित असलेल्या कोणत्याही जमिनीवर मंजूर करावयाच्या खाणपट्टयाबाबत पाच एकरापर्यंतच्या क्षेत्रासाठी लिलाव करण्याची कार्यवाही करण्यात येईल. याबाबतची माहिती तहसिलदार यांनी 14 ऑगस्ट 2025 पर्यंत सादर करावी. इच्छुक व्यक्तींनी mahakhanij.maharashtra.gov.in या संकेतस्थळावर 14 ऑगस्ट 2025 रोजी पर्यंत आवश्यक कागदपत्रांसह अर्ज सादर करावेत.

यापुर्वीपासून खाणपटटा मंजूर असलेल्या खाणपटटाधारकांनी 100 टक्के एम-सॅन्ड उत्पादन करण्यास इच्छुक असल्याबाबत अर्ज mahakhanij.maharashtra.gov.in या संकेतस्थळावर सादर करावेत. याबाबत सविस्तर प्रसिध्दीपत्रक जिल्हाधिकारी नांदेड यांचे अधिकृत संकेतस्थळ (nanded.gov.in) वर प्रसिध्द केले आहे. तसेच जिल्ह्यातील सर्व उपविभागीय अधिकारी कार्यालये, तहसिल कार्यालय येथे प्रसिध्द करण्यात आले आहे.

000000

वृत्त क्र. 784

महसूल सप्ताहात जिल्ह्यात विविध नाविण्यपूर्ण उपक्रमांचे आयोजन : जिल्हाधिकारी 

1 ते 7 ऑगस्ट कालावधीत महसूल सप्ताह होणार साजरा

नांदेड दि. 31 जुलै :  जिल्ह्यात महसूल विभागामार्फत 1 ऑगस्ट 2025 रोजी ‘महसूल दिन आणि 1 ते 7 ऑगस्ट, 2025 या कालावधीत ‘महसूल सप्ताह-2025’ साजरा करण्यात येणार आहे. महसूल सप्ताहात नांदेड जिल्ह्यात विविध नाविण्यपूर्ण उपक्रम राबविण्यात येणार असून जिल्ह्यातील नागरिकांनी यात उत्स्फूर्तपणे सहभाग नोंदवावा, असे आवाहन जिल्हाधिकारी राहुल कर्डिले यांनी केले. 

महसूल दिन व महसूल सप्ताहात विशेष उपक्रम राबविण्याबाबत आज विभागीय आयुक्त जितेंद्र पापळकर यांनी दूरदृश्यप्रणालीद्वारे विभागातील सर्व जिल्हाधिकारी यांना सूचना दिल्या. यावेळी विभागातील सर्व जिल्हाधिकारी, निवासी उपजिल्हाधिकारी, तहसिलदार यांची दूरदृश्यप्रणालीद्वारे तर प्रत्यक्ष अपर जिल्हाधिकारी पांडुरंग बोरगावकर, निवासी उपजिल्हाधिकारी किरण अंबेकर, तहसिलदार विपीन पाटील, शंकर लाड आदीची उपस्थिती होती. 

या सप्ताहात प्रत्येक दिवशी तहसिल कार्यालयामार्फत समाजाच्या विविध घटकांतील नागरिकांसाठी विशेष मोहिम, कार्यक्रम, उपक्रम, शिबीरे, महसूल अदातलीचे आयोजन करण्याबाबतच्या सूचना जिल्हाधिकारी राहुल कर्डिले यांनी सर्व उपविभागीय अधिकारी, तहसिलदार यांच्यासह सर्व महसूल अधिकाऱ्यांना व्हीसीद्वारे दिल्या.  

महसूल सप्ताहात नांदेड जिल्ह्यात विविध नाविण्यपूर्ण उपक्रम राबविण्यावर भर देण्यात येणार असून यात 156 गावांत गाव तीथे स्मशानभूमी उभारण्यात येणार आहे. एम-सँड’ धोरणाची अंमलबजावणी, गावातील जे मोठे रस्ते अतिक्रमण मुक्त झाले आहेत तिथे दुतर्फा वृक्षारोपण करणार, 4 ऑगस्टपासून ऑनलाईन सुनावनीस प्रारंभ. भूसंपादनाचे सॉफ्टवेअर सुरु करण्याचे काम अंतिम टप्प्यात असून या कामाला पुर्णत्वाकडे नेणार. महसूल विभागातील सर्व कर्मचाऱ्यांचे मूळ सेवापुस्तके अद्ययावत करण्याचे नियोजन केले असल्याचे माहिती जिल्हा प्रशासनाच्यावतीने दिली आहे.

महसूल सप्ताहातील कार्यक्रमांचे स्वरुप 

शुक्रवार 1 ऑगस्ट रोजी महसूल सप्ताहाचा शुभारंभ होणार आहे. या दिवशी महसूल संवर्गातील कार्यरत, सेवानिवृत्त अधिकारी, कर्मचारी संवाद, उत्कृष्ट अधिकारी, कर्मचारी पुरस्कार वितरण व मान्यवरांच्या हस्ते लाभार्थ्यांना विविध प्रमाणपत्र वितरण समारंभाचे आयोजन केले आहे.

शनिवार 2 ऑगस्ट रोजी शासकीय जागेवर सन 2011 पूर्वीपासून रहिवासी प्रयोजनार्थ अतिक्रमण असलेल्या कुटुंबांपैकी अतिक्रमण नियमानुकूल करण्यास पात्र असलेल्या कुटुंबांना अतिक्रमित जागांचे पट्टे वाटप करण्यात येईल. रविवार 3 ऑगस्ट रोजी पाणंद/शिवरस्त्यांची मोजणी करुन त्यांच्या दुतर्फा झाडे लावणे.  सोमवार 4 ऑगस्ट रोजी प्रत्येक मंडळनिहाय ‘छत्रपती शिवाजी महाराज महाराजस्व अभियान’ राबविण्यात येईल. मंगळवार 5 ऑगस्ट रोजी विशेष सहाय्य योजनेतील ज्या लाभार्थ्यांचे थेट लाभ हस्तांतरण झालेले नाही, त्यांना घरभेटी देऊन डीबीटीद्वारे अनुदानाचे वाटप केले जाईल.

बुधवार 6 ऑगस्टला शासकीय जमिनींवरील अतिक्रमणे निष्कासित करून त्या अतिक्रमणमुक्त केल्या जातील. तसेच शर्तभंग झालेल्या जमिनींबाबत शासन धोरणानुसार (नियमानुकूल करणे/सरकारजमा करणे) निर्णय घेतले जातील. 

गुरुवार 7 ऑगस्टला एम सँड धोरणाची अंमलबजावणी करून नवीन मानक कार्यप्रणालीनुसार धोरण पूर्णत्वास नेले जाईल आणि ‘महसूल सप्ताहाचा’ सांगता समारंभ आयोजित केला जाईल. या महसूल सप्ताहात नांदेड जिल्ह्यातील नागरिकांनी आपला उस्फुर्त सहभाग नोंदवावा, असे आवाहन जिल्हा प्रशासनाच्यावतीने करण्यात आले आहे. 

000000

वृत्त क्र. 783

नीती आयोगाच्या संपूर्णता अभियानात उल्लेखनीय प्रगतीमध्ये किनवटचा समावेश

जिल्हाधिकाऱ्यांचा नीती आयोग व राज्यशासनाच्यावतीने 2 ऑगस्ट रोजी नागपूर येथे सन्मान 

नांदेड दि. 31 जुलै :  नीती आयोगाच्यावतीने जुलै ते सप्टेंबर 2024 या कालावधीत राबविण्यात आलेल्या संपूर्णता अभियानात आकांक्षित किनवट तालुक्याने 6 निर्देशकांपैकी 4 निर्देशक 100 टक्के पूर्ण केल्यामुळे राज्यातुन तिसऱ्या क्रमांकाचे स्थान पटकाविले आहे. याबद्दल राज्य शासनाच्यावतीने  जिल्हाधिकारी राहुल कर्डीले आणि तत्कालीन जिल्हाधिकारी अभिजित राऊत यांचा आयआयएम नागपूर येथे 2 ऑगस्ट 2025 रोजी पदक व प्रशस्तीपत्र देऊन सन्मान करण्यात येणार आहे.

नीती आयोगाच्या आकांक्षित तालुका कार्यक्रमांतर्गत जुलै ते सप्टेंबर 2024 या कालावधीत संपूर्णता अभियान राबविण्यात आले. देशभरातील 500 तालुके यात सहभागी झाले. या अभियानात आरोग्य, पोषण, कृषी आणि सामाजिक विकास या क्षेत्रांतर्गत 6 निर्देशकांचा समावेश करण्यात आला होता. संपूर्णता अभियानात राज्यातील 27 आकांक्षित तालुक्यानी सहभाग घेतला होता. यात पहिल्या क्रमांकावर चंद्रपूर - जिवती, दुसऱ्या क्रमांकावर वाशीम - मालेगाव, पालघर - जवाहर तर तिसऱ्या क्रमांकावर नांदेड-किनवट, वर्धा - कारंजा, यवतमाळ-पुसद, गडचिरोली-अहेरी, नंदुरबार-अकराणी या आकांक्षित तालुक्यानी स्थान पटकाविला आहे.

समावेशित निर्देशक 'संपूर्णता अभियाना'चे फोकस क्षेत्र

तालुक्यातील गर्भवती महिलांचे पहिल्या तिमाहीतील नोंदणीचे प्रमाण 100 टक्के करणे. तालुक्यातील 30 पेक्षा जास्त वय असलेल्या व्यक्तींची उच्च रक्तदाब संदर्भात 100 टक्के तपासणी करणे. तालुक्यातील 30 पेक्षा जास्त वय असलेल्या व्यक्तींची मधुमेह संदर्भात 100 टक्के तपासणी करणे. तालुक्यातील गर्भवती महिलांना आयसीडीएसच्या पूरक पोषण आहार वितरण कार्यक्रमांतर्गत 100 टक्के पूरक पोषण आहाराचे वितरण करणे. मृदा आरोग्य तपासणी कार्ड 100 टक्के वितरण करणे. तालुक्यातील महिला स्वयं सहायता समूहाना खेळत्या भांडवलाचे 100 टक्के वितरण करणे.

संपूर्णता अभियानात किनवट तालुक्याची कामगिरी

संपूर्णता अभियानाच्या माध्यमातून आकांक्षित किनवट तालुक्याने तालुक्यातील लक्ष्यित लोकसंख्येच्या तुलनेत मधुमेहासाठी तपासणी, उच्च रक्तदाबासाठी तपासणी, आयसीडीएस कार्यक्रमांतर्गत नियमितपणे पूरक पोषण आहार घेणाऱ्या गर्भवती महिलांची टक्केवारी आणि माती नमुना संकलन लक्ष्याविरुद्ध तयार केलेल्या मृदा आरोग्य कार्डांची टक्केवारी हे 4 निर्देशक 100 टक्के संतृप्त केले आहेत.

संपूर्णता अंतर्गत राबविलेले उपक्रम

महिन्याच्या संपुर्णता अभियान मोहिमेत सदर निर्देशक संतृप्त करण्यात विविध उपक्रम राबविण्यात आले. यात मधुमेह व उच्च रक्तदाब तपासणी संदर्भात - ग्रामपंचायत निहाय उच्च रक्तदाब-मधुमेह तपासणी शिबिरांचे आयोजन, नियमित आढावा, क्षेत्रभेटी, रिक्त पदांची भरती, जनजागृती इत्यादी उपक्रम घेऊन कामास गती देण्यात आली. 

पोषण आहार संदर्भात - पोषण आहारासंदर्भात जनजागृती, पौष्टिक आहार मेळा, पोषण परसबाग निर्मिती, आयसीडीएस शिबीरे, नुक्कड नाटक,  जागरूकता रॅली, प्रदर्शने, पोस्टर बनवणे, पोषण ट्रॅकर अँप चे प्रशिक्षण, पोषण पंधरवडा व पोषण महाचे आयोजन, माता दिनाचे नियमित आयोजन, जनजागृती पर विभिन्न स्पर्धाचे आयोजन इत्यादी उपक्रम राबविण्यात आले. 

मृदा आरोग्य पत्रिका संदर्भात - शेतीशाळाद्वारे गावस्तरावर माती तपासणीच्या अनुषंगाने जनजागृती, गावनिहाय शिबिरांचे आयोजन, कृषी मित्रांची मदत, जिल्हास्तरीय लॅबशी सातत्याने पाठपुरावा, कृषी सहाय्यक यांच्या माध्यमातून कॅम्पेन मोड वरती माती नमुने गोळा करणे या माध्यमातून दिलेले 1 हजार 500 चे उद्दिष्ट तीन महिन्यात 100 टक्के पूर्ण करण्यात आले.

जिल्हाधिकारी यांचा नीती आयोग व राज्यशासनाच्यावतीने नागपूर येथे सन्मान 

या अभियानात तालुक्याने संपूर्णता प्रतिज्ञाद्वारे मोहिमेची उद्दिष्टे पूर्ण करण्यासाठी निर्धारित वचनबद्धता 6 पैकी 4 निर्देशक संतृप्त करून यात उल्लेखनीय प्रगती केल्याबद्दल राज्य शासनाच्यावतीने  जिल्हाधिकारी राहुल कर्डीले, तत्कालीन जिल्हाधिकारी अभिजित राऊत यांचे आय आय एम नागपूर येथे 2 ऑगस्ट 2025 रोजी पदक व प्रशस्तीपत्र देऊन सन्मान करण्यात येणार आहे. यासाठी जिल्हाधिकारी यांच्या समवेत आकांक्षित तालुका किनवटचे गटविकास अधिकारी ज्ञानेश्वर टाकरस व संबंधित आकांक्षित तालुका फेलो हे राज्यस्तरीय सत्कार समारंभासाठी उपस्थित राहणार आहेत.

जिल्हा व तालुका स्तरावर संपूर्णता अभियान सन्मान समारोह

संपूर्णता अभियान मोहिमेत योगदान दिलेल्या संबंधित तालुक्यातील गटविकास अधिकारी यांना पदक व प्रशस्तीपत्र तर तालुका कृषी अधिकारी, तालुका आरोग्य अधिकारी व बाल विकास प्रकल्प अधिकारी आणि संबंधित विभागाचे गाव पातळीवर उल्लेखनीय काम केलेल्या कर्मचारी यांना प्रशस्तीपत्र देऊन सन्मान करण्यात येणार आहे.

00000

#रस्तासुरक्षामोहिम

#नांदेड

वृत्त क्र. 782

जागतिक मानवी तस्करी विरोधी दिन साजरा

नांदेड ३० जुलै :- जागतिक मानवी तस्करी विरोधी दिनानिमित्त,महिला व बाल विकास विभाग जिल्हा बाल संरक्षण कक्ष चाईल्ड लाईन  व जनसेवा ग्रामीण विकास व शिक्षण प्रतिष्ठान याच्या संयुक्त  विद्यमानाने नांदेड जिल्हामध्ये एक अभिसरण कार्यक्रम आज घेण्यात आला. ज्यामध्ये बाल संरक्षण आणि बाल हक्क परिसंस्थेतील प्रमुख ,सर्व विभाग एकत्र आले होते. बाल तस्करीशी लढण्यासाठी समन्वित, आंतर-एजन्सी कृती आवश्यक आहे हे एकत्रितपणे ओळखून संवादात सहभागी झालेल्या प्रतिनिधींनी या कार्यक्रमात भाग घेतला. जनसेवा ग्रामीण विकास व शिक्षण प्रतिष्ठान नांदेड ही जस्ट राइट्स फॉर चिल्ड्रन मुलांचे संरक्षण, सुटका आणि न्याय सुनिश्चित करण्यासाठी नांदेड जिल्हामध्ये सक्रियपणे काम करत आहे. जस्ट राइट्स फॉर चिल्ड्रन, यांनी बाल तस्करी रोखण्यासाठी कायदा अंमलबजावणी संस्थांना येणाऱ्या आव्हानांवर चर्चा करताना, कार्यक्रमात उपस्थित असलेल्या अधिकाऱ्यांनी विद्यमान कायद्यांबद्दल जागरूकता निर्माण करण्याची, तस्करी नेटवर्कबद्दल समुदायांना संवेदनशील करण्याची आणि सुटका केलेल्या मुलांचे वेळेवर न्याय आणि प्रभावी पुनर्वसन सुनिश्चित करण्यासाठी सर्व एजन्सींमध्ये समन्वय मजबूत करण्याची तातडीची गरज यावर एकमताने सहमती दर्शविली. 

या कार्यक्रमास जिल्हा बाल संरक्षण अधिकारी विद्या आळणे यांनी बालकाच्या संदर्भात काम करत असताना समन्वयाची भूमिका अत्यंत महत्त्वपूर्ण असून नांदेड येथील रेल्वेस्थानक व बसस्थानक येथून बालकांची तस्करी होत असल्यास सदरील हालचालींवर लक्ष ठेवून सर्व यंत्रणेला तात्काळ कार्यान्वित करण्याचे मार्गदर्शन केले.

सर्वांनी आपले महत्वाचे योगदान द्यावे. तसेच मानवी तस्करी विरोधी पथकाचे पोलीस निरीक्षक ए जी मोरे. आर पी एफ चे श्री मीना. जीआरपीएफचे श्रीमती स्वाती ठाकूर जनसेवा प्रतिष्ठानचे जगदीश राऊत व जिल्हा समन्वयक निलेश कुलकर्णी व आशा सूर्यवंशी, जिल्हा बाल संरक्षण कक्षातील कल्पना राठोड, चाईल्ड लाईनच्या ऐश्वर्या व दिपाली हिंगोल, रेल्वे स्थानकातील टी.सी फेरीवाले सदरील रेल्वे स्थानक परिसरात  प्रवाशांना चाईल्ड लाईन 1098 ची माहिती या कार्यक्रमात देण्यात आली.

०००००

वृत्त क्र. 781

जिल्ह्यात जमावबंदी, शस्त्रबंदी आदेश लागू  

नांदेड दि. 30 जुलै : नांदेड जिल्ह्यात  31 जुलैच्या सकाळी 6 वाजेपासून ते 14 ऑगस्ट 2025 च्या मध्यरात्री पर्यंत शस्त्रबंदी व जमावबंदी आदेश लागू राहणार आहे, अशी माहिती अपर जिल्हादंडाधिकारी कार्यालयाकडून देण्यात आली आहे. 

जिल्ह्यातील कायदा व सुव्यवस्था अबाधित रहावी म्हणून अपर जिल्हादंडाधिकारी यांनी महाराष्ट्र पोलीस अधिनियम 1951 चे कलम 37 (1) व (3) अन्वये जिल्ह्यात  31 जुलैच्या सकाळी 6 वाजेपासून ते 14 ऑगस्ट 2025 च्या मध्यरात्री पर्यंत शस्त्रबंदी व जमावबंदी आदेश लागू राहिल.  

त्यानुसार पाच किंवा पाचपेक्षा अधिक व्यक्तींनी या आदेशात नमुद असलेली कृत्ये सार्वजनिक परिसर किंवा त्याच्या जवळपास करण्यास बंदी घालण्यात आली आहे. हा आदेश कामावरील पोलीस अधिकारी, शासकीय कर्मचारी, विवाह, अंत्ययात्रा, धार्मिक कार्यक्रम, यात्रा व इतर सक्षम अधिकारी यांनी विशेषरित्या परवानगी दिलेल्या मिरवणुकांना लागू होणार नाही. 

अशा मिरवणुकांना परवानगी देण्याचे अधिकार तसेच पाच व पाचपेक्षा जास्त इसम जमण्यासाठी, सभा, मिरवणुका, मोर्चा काढणे, ध्वनीक्षेपक वाजविण्यास परवानगी देण्याचे अधिकार जिल्ह्यातील पोलीस ठाणे प्रभारी अधिकारी यांना तसेच पोलीस अधीक्षक नांदेड यांनी प्राधिकृत केलेल्या इतर पोलीस अधिकारी यांना राहतील.

0000

 वृत्त क्र. 780

नांदेड जिल्हा निर्यातक्षम फुल पिके उत्पादक शेतकऱ्यांचा हब होण्यासाठी मदत करणार 

- जिल्हाधिकारी राहुल कर्डिले  

मॅग्नेट प्रकल्पाअंतर्गत फुल पिके उत्तम कृषीपद्धती या विषयावर प्रशिक्षण संपन्न

नांदेड दि. 30 जुलै :- अलिकडच्या काळात शेतकऱ्यांनी इतर पिकांबरोबर निर्यातक्षम फुल पिके  उत्पादकतेवर भर द्यावा. भविष्यात नांदेड जिल्हा निर्यातक्षम फुल पिके उत्पादक शेतकऱ्यांचा हब होण्यासाठी सर्वोतोपरी मदत करण्यात येईल, असे प्रतिपादन जिल्हाधिकारी राहुल कर्डिले यांनी केले. 

जिल्हाधिकारी कार्यालयाच्या जिल्हा नियोजन भवनात आज सहकार व पणन विभाग अंतर्गत आशियाई विकास बँक अर्थसहाय्यीत महाराष्ट्र ऍग्री बिझनेस नेटवर्क (मॅग्नेट) प्रकल्प अंतर्गत महाराष्ट्र सहकार विकास महामंडळ पुणे, कृषी व आत्मा विभाग नांदेड यांच्या संयुक्त विद्यमाने फुल पिके  उत्तम कृषी पद्धती या विषयावर प्रशिक्षणाचे आयोजन करण्यात आले होते, यावेळी ते बोलत होते. 

कार्यक्रमास नांदेड कृषी उत्पन्न बाजार समितीचे सभापती संजय लहानकर, महाराष्ट्र सहकार विकास महामंडळाचे प्रशिक्षण विभाग प्रमुख दिगंबर साबळे, मॅग्नेट प्रकल्प लातूर विभागीय प्रकल्प उपसंचालक महादेव बरडे, जिल्हा अधीक्षक कृषी अधिकारी तथा प्रकल्प संचालक आत्मा दत्तकुमार कळसाईत, महाराष्ट्र सहकार विकास महामंडळ पुणेचे मनुष्यबळ विकास तथा वरिष्ठ प्रशिक्षण अधिकारी हेमंत जगताप, प्रकल्प उपसंचालक मॅग्नेट लातूर महादेव बरडे,  विभागीय प्रकल्प अधिकारी मॅग्नेट,  भारतीय पुष्प अनुसंधान पुण्याचे शास्त्रज्ञ डॉ. गणेश कदम, केएफ बायो प्लांट्स पुणेचे तांत्रिक अधिकारी राजन निफाडकर, न्यू लीफ डायनामिक टेक्नॉलॉजीचे तांत्रिक अधिकारी विवेक वीर  , शितलादेवी शेतकरी उत्पादक कंपनी, बारडचे अध्यक्ष निलेश देशमुख बारडकर, हिरकणी बायोटेकचे रत्नाकर देशमुख, मॅग्नेट प्रकल्पाचे गजेंद्र नवघरे आदी उपस्थित होते. 

नांदेड जिल्ह्यातील फुल उत्पादक शेतकऱ्यांनी एकत्रित येऊन बाजारपेठेचा अभ्यास, प्रक्रिया युक्त फुलपिकांच्या बाबी यासाठी संघटित होऊन शासनाच्या विविध योजनांचा लाभ घ्यावा. तसेच शेतीसह शेतमाल प्रक्रिया उद्योगाकडे वळावे. उत्पादित केलेला पक्का शेतमाल निर्यात करण्याकडे भर द्यावा, असे आवाहन जिल्हाधिकारी राहुल कर्डीले यांनी केले. 

अशा प्रकारचा प्रशिक्षण कार्यक्रम नांदेड जिल्ह्यातील फुल उत्पादक शेतकऱ्यांसाठी राबविल्याबद्दल मॅग्नेट प्रकल्पाचे सभापती संजय लहानकर यांनी आभार मानले. तसेच कृषी उत्पन्न बाजार समितीमार्फत फुल उत्पादक शेतकऱ्यांसाठी आवश्यक ती मदत केली जाईल असेही त्यांनी सांगितले. 

मॅग्नेट प्रकल्प अंतर्गत नांदेड जिल्ह्यातील शेतकऱ्यांसाठी  फुल पिके  निर्यातीसाठी  मॅग्नेट प्रकल्पांतर्गत आवश्यक ती सर्व मदत केली जाईल असे विभागीय प्रकल्प उपसंचालक महादेव बरडे यांनी आश्वासित केले. फुल पिके  निर्यातीसाठी आवश्यक ती सर्व मदत त्यासाठी लागणारी ऑनलाइन नोंदणी याविषयी कृषी विभाग मार्गदर्शन व मदत करेल असे जिल्हा अधीक्षक कृषी अधिकारी दत्तकुमार  कळसाईत यांनी सांगितले. 

फुल पीक तंत्रज्ञानातील वाव व संधी याविषयी प्रशिक्षण विभाग प्रमुख दिगंबर साबळे यांनी मार्गदर्शन केले. 

एमसीडीसीला लातूर विभागामध्ये फुल पिके प्रशिक्षण घेण्यासाठी मॅग्नेट प्रकल्पाने संधी उपलब्ध करून दिल्याबद्दल प्रकल्पाचे आभार मनुष्यबळ विकास तथा वरिष्ठ प्रशिक्षण अधिकारी हेमंत जगताप यांनी मानले. खुल्या वातावरणातील फुलशेती लागवड तंत्रज्ञानातील विविध बारकावे पुण्याचे शास्त्रज्ञ डॉ.गणेश कदम  यांनी समजून सांगितले. संरक्षित शेती वातावरणातील फुल पिके तंत्रज्ञान याविषयी सविस्तर माहिती तांत्रिक अधिकारी राजन निफाडकर दिली. बायोमास आधारित शीत साठवणूक तंत्रज्ञान यासंबंधी मार्गदर्शन तांत्रिक अधिकारी विवेक वीर यांनी केले. या कार्यक्रमासाठी नांदेड जिल्ह्यातील ३५० हून अधिक शेतकऱ्यांनी सहभाग नोंदवला.

00000

वृत्त क्र. 779

राज्य अन्न आयोगाचे अध्यक्ष महेश ढवळे यांचा दौरा

नांदेड दि. 30 जुलै :-राज्य अन्न आयोगाचे अध्यक्ष महेश ढवळे हे नांदेड दौऱ्यावर येत असून त्यांचा दौरा कार्यक्रम पुढीलप्रमाणे राहील. 

सोमवार 4 ऑगस्ट 2025 रोजी मुंबई येथून सकाळी 9 वा. नांदेड येथे आगमन व शासकीय विश्रामगृह कडे रवाना. सकाळी 11.30 वा. जिल्हाधिकारी कार्यालय येथे अप्पर जिल्हाधिकारी तथा जिल्हा तक्रार निवारण अधिकारी यांचे समवेत एईपीडीएस अंतर्गत नियतन, उचल व वाटपाचा आढावा. दुपारी 12 वा. जिल्हाधिकारी कार्यालय येथे शिक्षणाधिकारी प्राथमिक व प्रशासकीय अधिकारी शा.पो.आ यांचे समवेत शालेय पोषण आहार योजनेअंतर्गत नियतन, उचल व वाटपाचा आढावा. जिल्हा आरोग्य अधिकारी, जिल्हा बाल रोग तज्ञ व मनपा बाल रोग यांचेसमवेत कुपोषीत बालकांबाबत आढावा. तसेच एनआरसीमध्ये गत 2 वर्षात दाखल बालकांबाबतचा अहवाल. दुपारी 1 वा. जिल्हाधिकारी कार्यालय येथे जिल्हा कार्यक्रम अधिकारी व प्रकल्प अधिकारी शहरी व ग्रामीण यांचे समवेत महिला व बाल विकास सेवा योजनेअंतर्गत नियतन, उचल व वाटपाचा आढावा. दुपारी 2.30 वा. जिल्ह्यातील तृतीयपंथी संघटना, भीकमुक्ती संदर्भीय काम करणाऱ्या संघटना, वेश्याव्यावसायिक यांच्याशी संलग्न संघटना, आदिवासी तालुक्यांना भेटी, शा. पो.आ.अंतर्गत बचतगट आयसीडीसी अंतर्गत बचतगट, गलीच्छवस्तींना भेटी, शासकीय धान्य गोदाम, शालेय पोषण आहार पुरवठादार गोदामे, महिला व बाल विकास सेवा योजना पुरवठादार गोदामांना भेटी तसेच केंद्रीय स्वयंपाकगृह, शाळा, अंगणवाडी, स्वच्छ धान्य दुकानांना भेटी. सायंकाळी 6 वा. शासकीय विश्रामगृहाकडे रवाना व मुक्काम. 

मंगळवार 5 ऑगस्ट रोजी सकाळी 10.30 ते 6 पर्यत आदिवासी तालुक्यांना  भेटी, शासकीय धान्य गोदामे, महिला व बाल विकास सेवा योजना पुरवठादार गोदामांना भेटी, शा.पो.आ व आयसीडीएस अंतर्गत बचतगट यांना भेटी तसेच केंद्रीय स्वयंपाकगृह शाळा, अंगणवाडी, स्वस्त धान्य दुकानांना भेटी.

बुधवार 6 ऑगस्ट 2025 रोजी सकाळी 10.30 ते 6 पर्यत आदिवासी तालुक्यांना भेटी, शासकीय धान्य गोदाम, शालेय पोषण आहार पुरवठादार गोदामे, महिला व बाल विकास सेवा योजना पुरवठादार गोदामांना भेटी, शा.पो.आ. व आयसीडीएस अंतर्गत बचतगट यांना भेटी तसेच केंद्रीय स्वयंपाकगृह शाळा, अंगणवाडी, स्वस्त धान्य दुकानांना भेटी . सायंकाळी 7 वा. वाहनाने नांदेड येथून मुंबईकडे प्रयाण करतील. 

00000

 वृत्त क्र. 778

सार्वजनिक बांधकाम मंत्री शिवेंद्रराजे भोसले यांचा दौरा कार्यक्रम

नांदेड दि. 30 जुलै :- राज्याचे सार्वजनिक बांधकाम (सार्वजनिक उपक्रम वगळून) मंत्री शिवेंद्रराजे भोसले हे दोन दिवसाच्या नांदेड दौऱ्यावर येत असून त्यांचा दौरा कार्यक्रम पुढीलप्रमाणे राहील. 

गुरुवार 31 जुलै 2025 रोजी देवगिरी एक्सप्रेसने सकाळी 8.50 वा. हुजुर साहेब नांदेड येथे आगमन व मोटारीने शासकीय विश्रामगृह नांदेडकडे प्रयाण करतील. सकाळी 9.10 वा. शासकीय विश्रामगृह नांदेड येथे आगमन व राखीव. दुपारी 2.45 वा. शासकीय विश्रामगृह नांदेड येथून भारतीय जनता पार्टी महानगर कार्यालय शिवाजीनगर औद्योगिक वसाहत प्लाझा नाना नानी पार्कच्या समोर नांदेडकडे प्रयाण. दुपारी 3 ते सायं 5 वाजेपर्यंत भारतीय जनता पक्षाच्या पदाधिकाऱ्यांसमवेत बैठक स्थळ- भारतीय जनता पार्टी महानगर कार्यालय शिवाजीनगर नाना नानी पार्कच्या समोर नांदेड. सायं 5 वा. भारतीय जनता पार्टी महानगर कार्यालय शिवाजीनगर नांदेड येथून कुसुम गोकुळनगर पिपल्स हायस्कुल समोर कुसूम बाळ रुग्णालय नांदेडकडे प्रयाण. सायं 5.10 वा. डॉ. सुधीर कोकरे कार्यवाह राष्ट्रीय स्वयंसेवक संघ यांची सदिच्छा भेट. स्थळ- कुसूम गोकुळनगर कुसूम बाळ रुग्णालय नांदेड. सायं 5.30 वा. गोकुळनगर येथून शासकीय विश्रामगृह नांदेडकडे प्रयाण. सायं. 5.45 वा. शासकीय विश्रामगृह नांदेड येथे आगमन व मुक्काम. 

शुक्रवार 1 ऑगस्ट 2025 रोजी सकाळी 11 ते दुपारी 12.30 वाजेपर्यंत सार्वजनिक बांधकाम विभागाच्या अधिकाऱ्यांसमवेत आढावा बैठक. स्थळ- बैठक कक्ष मिनी सह्याद्री शासकीय विश्रामगृह स्नेहनगर नांदेड. दुपारी 12.30 वा. शासकीय विश्रामगृह नांदेड येथून सचखंड गुरूद्वारा गुरूद्वारा रोड यात्री निवास रोड नांदेडकडे प्रयाण. दुपारी 12.35 वा. सचखंड गुरूद्वारा नांदेड येथे भेट. दुपारी 12.55 वा. सचखंड गुरूद्वारा गुरूद्वारा रोड नांदेड येथून शासकीय विश्रामगृह नांदेडकडे प्रयाण. दुपारी 1 वा. शासकीय विश्रामगृह नांदेड येथे आगमन. दुपारी 1 ते  सायं 5 वाजेपर्यंत राखीव. सायं 5 वा. शासकीय विश्रामगृह नांदेड येथून श्री गुरू गोबिंद सिंघजी विमानतळ नांदेडकडे प्रयाण. सायं. 5.15 वा. श्री गुरू गोबिंद सिंघजी विमानतळ नांदेड येथे आगमन. सायं 6.10 वा. श्री गुरुगोबिंद सिंघजी विमानतळ नांदेड येथून विमानाने पुणेकडे प्रयाण करतील.

0000

वृत्त क्र. 777

शुक्रवारचा आठवडी बाजार बंद

शुक्रवार ऐवजी शनिवारी भरणार आठवडी बाजार

नांदेड दि. 30 जुलै :- नांदेड जिल्ह्यात व शहरात 1 ऑगस्ट 2025 रोजी दरवर्षीप्रमाणे लोकशाहीर अण्णाभाऊ साठे यांची 105 वी जयंती मोठया उत्साहात साजरी करण्यात येणार आहे. यादिवशी शुक्रवार येत असल्याने यादिवशी नांदेड शहरात भरणारा आठवडी बाजार शुक्रवार ऐवजी शनिवारी भरण्यात येणार आहे, कृपया शेतकरी, ग्राहक, व्यापारी यांनी नोंद घ्यावी असे आवाहन जिल्हा प्रशासनाने केले आहे. 

दर शुक्रवारी साठे चौक परिसर, व्हिआयपी रोड, महादेव दाल मिल ते आनंद नगर चौरस्ता रोड नं. 26 हमालपुरा, ईश्वरनगरकडे जाणारे रोडवर गोकुळनगर इत्यादी परिसरात मोठया प्रमाणात आठवडी बाजार भरत असतो व बाजारचे दिवशी मोठी वर्दळ असते. या शुक्रवारी भरणाऱ्या बाजारामुळे जयंती सोहळयास, मिरवणूका यांना अडथळा निर्माण होवून कायदा व सुव्यवस्थेचा प्रश्न निर्माण होवू नये यासाठी मार्केट अँड फेअर अँक्ट 1862 चे कलम 5 अन्वये 1 ऑगस्ट रोजी शुक्रवारी भरणारा आठवडी बाजार बंद ठेवण्याचे आदेश जिल्हाधिकारी तथा जिल्हादंडाधिकारी राहुल कर्डिले यांनी निर्गमित केले आहेत. 

00000

 #मुख्यमंत्रीरोजगारनिर्मितीयोजना

#नांदेड

 वृत्त क्र. 776  

दहावी-बारावी पुरवणी परीक्षेच्या

निकालासह विविध तपशील जाहीर

नांदेड दि. 29 जुलै :- महाराष्ट्र राज्य माध्यमिक व उच्च माध्यमिक शिक्षण मंडळाच्या नऊ विभागीय मंडळामार्फत इयत्ता दहावी व बारावी पुरवणी परीक्षेचा ऑनलाईन निकाल 29 जुलै रोजी जाहीर करण्यात आला आहे. दहावीची पुरवणी परीक्षा 24 जून ते 8 जुलै व बारावीची पुरवणी परीक्षा 24 जून ते 16 जुलै या कालावधीत घेण्यात आली होती. या परीक्षेच्या निकालाची कार्यपध्दती व त्याच्या कार्यवाहीचा तपशील पुढीलप्रमाणे दिला आहे. विद्यार्थ्यांना गुणपडताळणी व छायाप्रतीसाठी बुधवार 30 जुलै ते शुक्रवार 8 ऑगस्ट 2025 पर्यंत अर्ज ऑनलाईन पध्दतीने करता येणार आहे.

 

या निकालानंतर दुसऱ्या दिवसापासून इ. 10 वी व 12 वी पुरवणी परीक्षेस प्रविष्ट झालेल्या विद्यार्थ्यास स्वतःच्या अनिवार्य विषयांपैकी (श्रेणी विषयांव्यतिरिक्त) कोणत्याही विशिष्ट विषयात त्याने संपादित केलेल्या गुणांची गुणपडताळणी व उत्तरपत्रिकांच्या छायाप्रती, पुनर्मूल्यांकनासाठी संबंधित विभागीय मंडळाकडे ऑनलाईन पध्दतीने https://www.mahahsscboard.in या संकेतस्थळावर विद्यार्थ्यांना स्वतः अर्ज करण्याची सोय उपलब्ध करून देण्यात आली आहे. यासाठी आवश्यक अटी-शर्ती व सूचना संकेतस्थळावर देण्यात आल्या आहेत. गुणपडताळणी व छायाप्रतीसाठी 30 जुलै ते 8 ऑगस्ट पर्यंत अर्ज ऑनलाईन पध्दतीने करतांना ऑनलाईन पध्दतीने शुल्क (Debit Card / Credit Card / UPI / Net Banking) याद्वारे भरता येईल.

 

जून-जुलै 2025 पुरवणी परीक्षेच्या उत्तरपत्रिकेचे पुनर्मूल्यांकनासाठी ऑनलाईन पध्दतीने अर्ज करण्यासाठी मंडळाच्या अधिकृत संकेतस्थळावरुन प्रथम उत्तरपत्रिकेची छायाप्रत घेणे अनिवार्य असून छायाप्रत मिळाल्याच्या दिवसापासून त्यापुढील कार्यालयीन कामाच्या पाच दिवसात पुनर्मूल्यांकनाच्या कार्यपध्दतीचा अवलंब करुन विहित नमुन्यात विहित शुल्क भरुन संबंधित विभागीय मंडळाकडे विद्यार्थ्यांनी ऑनलाईन पध्दतीने अर्ज करणे आवश्यक राहील. ज्या विद्यार्थ्यांना उत्तरपत्रिकेचे पुनर्मूल्यांकन करावयाचे असेल त्यांनी अधिक माहितीसाठी संबंधित विभागीय मंडळाकडे संपर्क साधावा.

 

जून-जुलै 2025 च्या इ. 10 वी व इ. 12 वी परीक्षेमध्ये सर्व विषयांसह प्रथम प्रविष्ट होऊन उत्तीर्ण होणाऱ्या विद्यार्थ्यांना त्यांची संपादणूक सुधारण्यासाठी श्रेणी/गुणसुधार योजनेअंतर्गत परीक्षेस प्रविष्ट होण्यासाठी तरतुदींच्या अधीन राहून लगतच्या तीन संधी (फेब्रुवारी-मार्च 2026, जून-जुलै 2026 व फेब्रुवारी-मार्च 2027) उपलब्ध राहतील.

 

फेब्रुवारी-मार्च 2026 इ. 10 वी व 12 वी परीक्षेस ज्या विद्यार्थ्यांना प्रविष्ट व्हावयाचे आहे अशा नियमित, पुनर्परिक्षार्थी विद्यार्थी, नाव नोंदणी प्रमाणपत्र प्राप्त झालेले खाजगी विद्यार्थी तसेच श्रेणीसुधार योजनेअंतर्गत प्रविष्ट होणारे व आटीआय (औद्योगिक प्रशिक्षण संस्था) द्वारे Transfer of Credit घेणाऱ्या विद्यार्थ्यांची आवेदनपत्रे ऑनलाईन पध्दतीने स्विकारली जातील. त्याच्या तारखा मंडळामार्फत स्वतंत्रपणे जाहीर करण्यात येतील, अशी माहिती प्रसिद्धी पत्रकाद्वारे राज्य मंडळाचे सचिव यांनी दिली आहे.

0000

 वृत्त क्र. 777

सोमवारी लोकशाही दिनाचे आयोजन 

नांदेड दि. 29 जुलै :- सामान्य जनतेच्या तक्रारी, अडचणी न्याय व तत्परतेने सोडविण्यासाठी  प्रत्येक महिन्याच्या पहिल्या सोमवारी लोकशाही दिन आयोजित करण्यात येतो. जिल्हा प्रशासनाच्यावतीने लोकशाही दिन सोमवार 4 ऑगस्ट 2025 रोजी दुपारी 1 ते 3 वाजेपर्यंत जिल्हाधिकारी कार्यालय परिसरातील नियोजन भवन येथे आयोजित केला आहे. 

 या दिवशी महसूल,  गृह,  मुख्य कार्यकारी अधिकारी जिल्हा परिषद,  पाटबंधारे, बांधकाम, परिवहन, सहकार, कृषि विभाग व जिल्हा पाणी पुरवठा समन्वय अधिकारी इत्यादी जिल्हा स्तरावरील प्रमुख अधिकारी व ज्या कार्यालयाचे लोकशाही दिनात प्रलंबीत प्रकरणे आहेत असे अधिकारी बचत भवन जिल्हाधिकारी कार्यालय परिसरात उपस्थित राहतील. सकाळी 12 वाजेपासून निवेदनाची नोंदणी सुरु होणार आहे. त्यानंतर लगेचच प्राप्त झालेल्या अर्जावर, निवेदनावर म्हणणे ऐकून घेण्याच्या कामास सुरुवात करण्यात येईल.

लोकशाही दिनाच्या दिवशी प्राप्त होणाऱ्या जनतेच्या तक्रारी, अडचणी एकत्रीतरीत्या समजावून घेऊन त्या शक्य तितक्या लवकर सोडविण्यात येतील, अशी माहिती निवासी उपजिल्हाधिकारी किरण अंबेकर यांनी दिली आहे.

00000

 वृत्त क्र. 778  

आयआयपीएच्या नांदेड शाखेची निवडणूक संपन्न

नांदेड दि. 29 जुलै :- इंडियन इन्स्टिट्यूट ऑफ पब्लिक ॲडमिनिस्ट्रेशन नवी दिल्ली (आयआयपीए) ही भारत सरकारच्या कर्मचारी, लोकतक्रार व निवृत्तीवेतन मंत्रालयाअंतर्गत लोकप्रशासन विकास, प्रशिक्षण, संशोधन व प्रशासकीय सुधारणा या महत्वपूर्ण क्षेत्रात कार्य करणारी एक मूलभूत संशोधन व प्रशिक्षण संस्था आहे.

केंद्र शासनाच्या  भारतीय लोकप्रशासन संस्था ( आय.आय.पी. ए.)  नवी दिल्ली यांच्याकड़ून नांदेड येथे स्थानिक शाखेला स्थापन्यास मान्यता प्राप्त झाले असल्याची माहिती आयआयपीए नांदेड शाखेचे पदसिद्ध अध्यक्ष तथा नांदेडचे जिल्हाधिकारी राहुल कर्डीले यांनी दिली आहे. या महत्वपूर्ण संस्थेच्या इतर पदाधिकारी यांची निवड करण्यासाठी नांदेड स्थानिक शाखेची सर्वसाधारण सभा व निवडणूक प्रक्रीया नुकतीच संपन्न झाली आहे.

आयआयपीए नांदेड संस्थेच्या शाखा उपाध्यक्षपदी जिल्हा परिषदेच्या मुख्य कार्यकारी अधिकारी मेघना कावली यांची तर सचिवपदी देगलूर महाविद्यालयातील लोकप्रशासन विभाग व संशोधन केंद्रप्रमुख प्रा. डॉ. बी आर कतूरवार कोषाध्यक्षपदी प्रतिभा निकेतन महाविद्यालयातील लोकप्रशासन विभाग प्रमुख डॉ.दीपक सुभाष वाघमारे आणि कार्यकारी मंडळ सदस्य म्हणून महात्मा फुले महाविद्यालय, मुखेड येथील प्रा.डॉ. चांदोबा कहाळेकर व प्रा. डॉ. रवी बरडे यांची निवड करण्यात आली आहे. प्रस्तुत निवडणूक प्रक्रिया निवासी उपजिल्हाधिकारी किरण अंबेकर आणि निवडणूक निर्णय अधिकारी योगेश कुमार बाकरे यांच्या मार्गदर्शनाखाली पार पडली.

नांदेड जिल्हा प्रशासनाच्यावतीने आयआयपीएच्या या शाखेद्वारे जिल्हा प्रशासनातील प्रशासकीय अधिकारी व कर्मचारी वर्गाला प्रशिक्षण देण्यासाठी, प्रशासकीय  क्षमता बांधणी विकसित करण्यासाठी आणि प्रशासकीय सुधारणेच्या अनुषंगाने लोकप्रशासन विषयात लेखन, संशोधन व प्रशिक्षण इत्यादी विविध कार्य करण्यासाठी विशेष उपक्रम राबविन्यात येणार आहेत.

नांदेड जिल्ह्यामध्ये आयआयपीएची शाखा स्थापन झाल्यामुळे नांदेड जिल्हा प्रशासनाच्यावतीने विविध लोककल्याणकारी योजनांची अंमलबजावणी अधिक प्रभावीपणे करणे, माहिती व तंत्रज्ञानाच्या  मदतीने प्रशासकीय सेवा सुलभ, पारदर्शक व गतीशील बनविने, विविध  विकास कामांमध्ये लोकसहभाग वाढविणे,  प्रशासकीय अधिकारी वर्गांना वेळोवेळी प्रशिक्षण देऊन शारीरिक, मानसिक, बौद्धिक व नैतिक क्षमता विकसित करणे, लोककल्याणकारी, संवेदनशील  व लोकाभीमुख प्रशासन निर्माण करण्यासाठी उपयुक्त ठरनार आहे. जिल्हा प्रशासनातील प्रशासकीय अधिकारी व कर्मचारी, लोकप्रशासन विषयाचे प्राध्यापक व संशोधक, नागरिक यांच्यात विचारमंथन करण्यासाठी आय आय पी ए ची नांदेड शाखा एक वरदान ठरणार आहे.

0000

वृत्त क्र. 779  

नांदेड जिल्ह्यास 15 मिनीमाती तपासणी प्रयोग शाळा मंजूर

 

प्रयोगशाळा उभारणीसाठी 8 ऑगस्टपर्यंत अर्ज करण्याचे कृषी विभागाचे आवाहन

 

नांदेड दि. 29 जुलै : राष्ट्रीय कृषी विकास योजनेंतर्गत मृद आरोग्य व सुपीकता कार्यक्रम 2025-26 मध्ये नांदेड जिल्ह्यात 15 ग्रामस्तरीय मृद नमुने तपासणी प्रयोगशाळा स्थापन करण्यास मान्यता मिळाली आहे. प्रयोगशाळेसाठी शेतकरी उत्पादक कंपन्या व ईच्छूकांनी 8 ऑगस्टपर्यंत अर्ज करावेत, असे आवाहन जिल्हा अधिक्षक कृषी अधिकारी दत्तकुमार कळसाईत यांनी केले आहे.

 

जिल्हा कृषी विभागाने पात्र लाभार्थ्यांकडून अर्ज मागवले आहेत. राष्ट्रीय कृषी विकास योजना कॅफेटेरिया अंतर्गत मृद आरोग्य व सुपीकता कार्यक्रम सन 2025-26 साठी 2 लाख 22 हजार मृद नमुने ग्रामस्तरीय मृद नमुने तपासणी प्रयोगशाळेकडून तपासणी करण्याबाबत सन 2025-26 च्या राज्याच्या वार्षिक कृती आराखड्यामध्ये मान्यता दिली आहे. सन 2025-26 चे राज्यस्तरीय वार्षिक कृती आराखड्यामध्ये राज्यासाठी एकूण 444 नवीन ग्रामस्तरीय मृद नमुने तपासणी प्रयोगशाळा उभारण्यासाठी मंजुरी मिळालेली आहे.

 

कृषीसंचालक (निविष्ठा व गुणनियंत्रण), कृषी आयुक्तालय, पुणे यांनी नांदेड जिल्ह्यात 15 ग्रामस्तरीय मृद नमुने तपासणी प्रयोगशाळा स्थापन करण्यास मान्यता दिली आहे. केंद्र शासनाच्या मार्गदर्शक सूचनांनुसार सदर प्रयोगशाळा उभारण्यासाठी अर्थसाहाय्य खासगी व्यक्ती, शेतकरी उत्पादक संस्था, कृषी चिकित्सालये आणि कृषी व्यावसायिक केंद्रे, माजी सैनिक बचतगट, शेतकरी सहकारी संस्था, कृषी आवश्यक सेवा, निविष्ठा किरकोळ विक्रेते तसेच शाळा, कॉलेज, युवक-युवती यांना दिले जाणार आहे. नांदेड जिल्ह्यासाठी लाभार्थ्यांकडून अर्ज मागवले जात असून इच्छुकांनी 8 ऑगस्ट, 2025 पर्यंत संबंधित तालुका कृषी अधिकारी कार्यालयात अर्ज सादर करावेत. ग्रामस्तरीय मृद चाचणी प्रयोगशाळेसाठी अर्थसहाय्य रक्कम 1 लाख 50 हजार रुपये आहे. लक्षांकापेक्षा अधिक अर्ज प्राप्त झाल्यास जिल्हास्तरीय निवड समितीकडून सोडत काढून लाभार्थ्यांची अंतिम निवड केली जाणार आहे. अधिक माहितीसाठी लाभार्थ्यांनी संबंधित तालुका कृषी अधिकाऱ्यांशी संपर्क साधावा, असे आवाहन जिल्हा अधिक्षक कृषी अधिकारी दत्तकुमार कळसाईत यांनी केले आहे.

प्रयोगशाळेसाठी लाभार्थी पात्रता 

 

लाभार्थी पात्रता युवक, युवती 18 ते 27 वयोगटातील असावा. व्यक्ती, शेतकरी उत्पादक संस्था (FPOs), कृषी चिकित्सालय आणि कृषी-व्यवसाय केंद्रे, कृषी आवश्यक, माजी सैनिक, बचतगट, शेतकरी उत्पादक संस्था, गट, शेतकरी सहकारी संस्था, निविष्ठा किरकोळ विक्रेते आणि शाळा, कॉलेज युवक / युवती हे अर्ज करू शकतात. लाभार्थ्यांची शैक्षणिक अर्हता किमान 10 वी (विज्ञान विषयासह) उत्तीर्ण असावी. अर्जासोबत शैक्षणिक अर्हतेसोबत आधार कार्ड व पॅनकार्ड जोडणे आवश्यक आहे. अर्जदार/गटाची स्वतःची इमारत किंवा किमान 4 वर्षांचा भाडेकरार असलेली इमारत असणे आवश्यक आहे. 8 ऑगस्ट 2025 पर्यंत संबंधित कार्यालयात अर्ज सादर करता येणार आहेत. अशी माहिती जिल्हा अधिक्षक कृषी अधिकारी कार्यालयाने दिली आहे.

00000

वृत्त

मुख्यमंत्री सहाय्यता निधीतून, मराठवाड्यात 3 हजार रुग्णांना 25 कोटींची मदत

·         आरोग्य शिबिरातून 12 हजार नागरिकांना दिलासा

 

छत्रपती संभाजीनगर, दि.29 : राज्यातील आर्थिकदृष्ट्या दुर्बल व गरीब रुग्णांसाठी मुख्यमंत्री सहाय्यता निधी कक्ष हा मोठा आधार बनला आहे. विशेषतः मराठवाडा विभागात जानेवारी ते जून 2025 या अवघ्या सहा महिन्यांत तब्बल 3 हजार 39 रुग्णांना 25 कोटी 58 लाख 31 हजार रुपयांची वैद्यकीय मदत करण्यात आली आहे.

 मुख्यमंत्री देवेंद्र फडणवीस यांच्या दूरदृष्टीतून नागरिकांचा विचार करून जिल्हा कक्ष स्थापन करण्यात आले. त्यातून लाभार्थी नागरिकांची संख्या वाढली. त्यासोबतच आरोग्य शिबिर व रक्तसंकलन आदी उपक्रम प्रभावीपणे राबविणे सहज शक्य होत आहे, असे मुख्यमंत्री सहाय्यता निधी व धर्मादाय रूग्णालय मदत कक्ष प्रमुख रामेश्वर नाईक यांनी सांगितले.

जिल्हानिहाय मदत :-

मागील सहा महिन्यात छत्रपती संभाजीनगर जिल्ह्यातील 633 रुग्णांना 5 कोटी 33 लाख 38 हजारांची मदत करण्यात आली.  बीड -610 रुग्णांना 4 कोटी 89 लाख 6 हजार, परभणी 533 रूग्णांना 4 कोटी 67 लाख 82 हजार, लातूर- 385 रूग्णांना 3 कोटी  29 लाख 55 हजार, जालना-367 रूग्णांना 3 कोटी 11 लाख 45 हजार, नांदेड- 323 रूग्णांना 2 कोटी 80 लाख 20 हजार, धाराशिव-257 रूग्णांना 2 कोटी 21 लाख आणि हिंगोली-  132 रूग्णांना 1 कोटी 16 लाख रूपये प्रमाणे वैद्यकीय मदत करण्यात आली आहे.  

आरोग्य शिबिरे आणि रक्तदान  

            1 मे ते 25 जुलै दरम्यान जिल्हा कक्षाच्या मदतीने घेण्यात आलेल्या आरोग्य व रक्तदान शिबिरांमध्ये 12,409 नागरिकांची आरोग्य तपासणी तर 2,353 नागरिकांनी रक्तदान केले.

जिल्हा	लाभार्थी नागरिक	रक्तदाते
छत्रपती संभाजीनगर	3,058	161
बीड	1,100	75
परभणी	763	467
लातूर	2,522	852
जालना	373	64
नांदेड	226	639
धाराशिव	742	38
हिंगोली	3,625	57

20 गंभीर आजारांकरिता मदत

       मुख्यमंत्री सहाय्यता निधीच्या माध्यमातून 20 गंभीर आजारांवर मदत केली जाते: त्यात, कॉक्लियर इम्प्लांट, हृदयविकार, किडनी/लिव्हर/बोन मॅरो प्रत्यारोपण, कर्करोग, अपघात, नवजात बालकांचे आजार, मेंदू विकार, डायालिसिस, भाजलेले रुग्ण, विद्युत अपघात आदींचा समावेश आहे. 

जिल्हा कक्षाच्या माध्यमातून मदत

मुख्यमंत्री देवेंद्र फडणवीस यांच्या सुचनेनुसार पेपरलेस आणि डिजिटल प्रणाली तसेच जिल्हा कक्ष स्थापन करण्यात आले आहेत. ज्यामुळे रुग्णांना मंत्रालयात येण्याची गरज भासत नाही.

रुग्णांनी प्रथम महात्मा जोतिराव फुले जन आरोग्य योजना, आयुष्मान भारत, राष्ट्रीय बाल स्वास्थ्य कार्यक्रम, किंवा धर्मादाय रुग्णालयांच्या योजनांचा लाभ घ्यावा. जर या योजनांद्वारे उपचार शक्य नसतील, तर, मुख्यमंत्री वैद्यकीय सहाय्यता निधी कक्षाकडे संलग्न असणाऱ्या रुग्णालयातून अर्ज करता येतो. यामुळे शासकीय योजनांचा सुयोग्य वापर होतो आणि निधीचा उपयोग खऱ्या गरजू रुग्णांपर्यंत पोहोचतो.

आवश्यक कागदपत्रे :-

• आधार कार्ड
• रेशन कार्ड
• उत्पन्नाचे प्रमाणपत्र (१.६० लाखांपेक्षा कमी)
• वैद्यकीय खर्चाचे प्रमाणपत्र
• रुग्णालयाची नोंद मुख्यमंत्री सहाय्यता निधी कार्यालयाच्या संगणक प्रणालीवर असावी
• अपघात असल्यास एफआयआर किंवा एमएलसी
• अवयव प्रत्यारोपण असल्यास झेडटीसीसी नोंदणी पावती

सर्व कागदपत्रे पीडीएफ स्वरूपात aao.cmrf-mh@gov.in या ईमेल वर पाठवावीत.  अधिक माहिती करिता टोल फ्री क्र. १८०० १२३ २२११ या क्रमांकावर कॉल करावा.

०००