वृत्त  

मराठवाड्यात केंद्रीय पत्रकाचे आगमन 

 विभागीय आयुक्तांकडून दुष्काळी परिस्थितीचे सादरीकरण 

छत्रपती संभाजीनगर, दि. ८ : मराठवाड्यातील दुष्काळी परिस्थितीची प्रत्यक्ष पाहणी करण्यासाठी आलेल्या केंद्र शासनाच्या आंतरमंत्रालयीन केंद्रीय पथकाला विभागीय आयुक्त जी. श्रीकांत यांनी आज विभागीय आयुक्तालयात विभागातील दुष्काळी परिस्थितीबाबत सविस्तर सादरीकरण केले. यावेळी पर्जन्यमान, पीक परिस्थिती, पिकांचे नुकसान, पिण्याच्या पाण्याची उपलब्धता तसेच जनावरांच्या चाऱ्याची सद्यस्थिती याबाबत पथकाला माहिती देण्यात आली.

केंद्रीय कृषी व शेतकरी कल्याण मंत्रालयाचे संयुक्त सचिव व मुख्य कार्यकारी अधिकारी मुक्तानंद अग्रवाल यांच्या नेतृत्वाखालील पथकात एमएनसीएफसीचे उपसंचालक सुनील कुमार दुबे, नीती आयोगाचे सल्लागार (ग्रेड-II) डॉ. जसपाल सिंग आणि पशुसंवर्धन व दुग्धव्यवसाय विभागाच्या पशुधन अधिकारी डॉ. साक्षी भदौरिया, कृषी मंत्रालय अंतर्गत काम करणाऱ्या  पीक अंदाज केंद्राचे (एमएनसीएफसी ) उपसंचालक डॉ. सुनील कुमार दुबे, राज्याचे कृषी विभागाचे सचिव श्री.परिमलसिंग यांचा समावेश आहे.

विभागातील दुष्काळी परिस्थिती, कमी पर्जन्यमानामुळे निर्माण झालेली पाणीटंचाई, खरीप पिकांवरील परिणाम तसेच दुष्काळाच्या अनुषंगाने आवश्यक उपाययोजनांबाबत विभागीय आयुक्तांनी पथकाला माहिती दिली. केंद्रीय पथकाने विभागातील विविध जिल्ह्यांतील परिस्थितीची माहिती जाणून घेत प्रत्यक्ष पाहणीचे उद्या व परवा नियोजन केले.

केंद्रीय पथकाकडून दि. ९ व १० ऑक्टोबर रोजी छत्रपती संभाजीनगर, जालना आणि बीड जिल्ह्यांतील दुष्काळग्रस्त भागांची प्रत्यक्ष पाहणी करण्यात येणार आहे. यावेळी शेतकरी, स्थानिक अधिकारी आणि संबंधित विभागांकडून पीक नुकसान, पाणीटंचाई व दुष्काळी परिस्थितीबाबत माहिती घेतली जाणार आहे. आज आढावा बैठकीला विभागीय आयुक्त जी. श्रीकांत यांच्या समवेत जिल्हाधिकारी जी. सी. गौडा यांची व अन्य अधिकाऱ्यांची यावेळी उपस्थिती होती.याशिवाय आठही जिल्ह्याचे जिल्हाधिकारी या आढावा बैठकीला दूरदृष्य प्रणालीव्दारे उपस्थित होते.

0000