वृत्त क्रमांक

स्वाधार योजनेच्या नूतनीकरण अर्जासाठी 15 ऑक्टोबरपर्यंत मुदतवाढ

• पात्र विद्यार्थ्यांनी ऑनलाइन अर्ज व कागदपत्रे तातडीने सादर करावीत

• मागील वर्षांच्या पात्र विद्यार्थ्यांनी दुसऱ्या हप्त्यासाठी विवरणपत्र भरावे

नांदेड(जिमाका), दि. 9: अनुसूचित जातीतील पात्र विद्यार्थ्यांना शिक्षणासाठी आर्थिक सहाय्य उपलब्ध करून देणाऱ्या भारतरत्न डॉ. बाबासाहेब आंबेडकर स्वाधार योजनेच्या सन 2026-27 या शैक्षणिक वर्षातील नूतनीकरण अर्ज सादर करण्यासाठी 15 ऑक्टोबर 2026 पर्यंत मुदतवाढ देण्यात आली आहे. पात्र विद्यार्थ्यांनी आवश्यक कागदपत्रांसह परिपूर्ण अर्ज ऑनलाइन सादर करावेत, असे आवाहन समाजकल्याण विभागाचे सहाय्यक आयुक्त शिवानंद मिनगिरे यांनी केले आहे.

अनुसूचित जातीतील 50 टक्क्यांपेक्षा अधिक गुण मिळवून उत्तीर्ण झालेल्या आणि समाजकल्याण विभागाच्या शासकीय वसतिगृहात प्रवेश न मिळालेल्या पात्र विद्यार्थ्यांसाठी ही योजना राबविण्यात येते. जिल्हा व तालुका स्तरावर राबविण्यात येणाऱ्या या योजनेचा लाभ महानगरपालिका क्षेत्रापासून पाच किलोमीटरच्या आतील तसेच नगरपालिका, नगरपरिषद, नगरपंचायत आणि तालुक्याच्या हद्दीतील महाविद्यालयांमध्ये प्रवेश घेतलेल्या पात्र विद्यार्थ्यांना नियमानुसार मिळू शकतो.

सन 2026-27 या शैक्षणिक वर्षासाठी नूतनीकरण अर्ज करणाऱ्या विद्यार्थ्यांनी https://hmasnew.mahait.org या संकेतस्थळावर आपल्या वापरकर्ता नाव व परवलीचा शब्दाच्या साहाय्याने प्रवेश करून नूतनीकरणाचा अर्ज आवश्यक कागदपत्रांसह पूर्ण भरावा. अर्जातील त्रुटी असल्यास त्या दूर करून संबंधित कागदपत्रे सादर करावीत. अर्जाची सद्यस्थिती विद्यार्थ्यांनी संकेतस्थळावर नियमितपणे तपासावी. मुदत संपल्यानंतर नूतनीकरण अर्ज सादर करता येणार नसल्याने विद्यार्थ्यांनी विलंब न करता कार्यवाही करावी. यासंदर्भातील सूचना विद्यार्थ्यांच्या नोंदणीकृत भ्रमणध्वनी क्रमांकावर तसेच ई-मेलवर पाठविण्यात आल्या आहेत.

सन 2024-25 आणि 2025-26 या शैक्षणिक वर्षांत स्वाधार योजनेसाठी पात्र ठरलेल्या आणि पहिला हप्ता प्राप्त झालेल्या विद्यार्थ्यांनी दुसऱ्या हप्त्याच्या अनुषंगाने ऑनलाइन ‘बी स्टेटमेंट’ (B Statement) लवकरात लवकर भरावे, असेही आवाहन करण्यात आले आहे.

नूतनीकरण अर्जाची प्रत संबंधित महाविद्यालयात स्थापन करण्यात आलेल्या समान संधी केंद्रात जमा करावी. योजनेसंदर्भातील अधिकृत माहिती, अर्जातील त्रुटी आणि शंकांचे निरसन करण्यासाठी विद्यार्थ्यांनी समाजकल्याण विभागाच्या अधिकृत ‘samajkalyannanded’ या समाजमाध्यम खात्यावरील माहिती पाहावी. तसेच विभागाने तयार केलेल्या अधिकृत व्हॉट्सॲप गटांमध्ये सहभागी व्हावे. अनधिकृत व्यक्ती किंवा गटांकडून माहिती घेण्याऐवजी थेट समाजकल्याण कार्यालयातील संबंधित कर्मचाऱ्यांशी संपर्क साधून आपल्या अडचणींचे निराकरण करून घ्यावे, असे आवाहन सहाय्यक आयुक्त शिवानंद मिनगिरे यांनी केले आहे. 

***