सातबाऱ्यावर यावर्षी पेरलेल्या पिकांची

नोंद नसली तरी पिक विमा भरता येतो 

नांदेड (जिमाका) दि. 15 :-  नांदेड जिल्ह्यामध्ये विविध समाजमाध्यमांद्वारे पिक विमा भरतांना सातबाऱ्यावर यावर्षीच्या पिकाची नोंद आवश्यक असल्याबाबत चुकीची माहिती पसरविण्यात येत आहे. त्याऐवजी अद्ययावत सातबारा व पिक पेरणीबाबत स्वयंघोषणा पत्र आवश्यक आहे. सातबाऱ्यावर यावर्षी पेरलेल्या पिकांची नोंद नसली तरी देखील पिक विमा भरता येतो. 

पिक विमा नोंदणीच्या अंतिम आठवड्यामध्ये पोर्टलवर जास्त दाब येऊन पोर्टल हळू होते परिणामी पिक विमा भरताना अडचणी येतात. त्यामुळे सर्व शेतकरी बांधवांनी पिक पेरणीचे (सात-बारावर पिक नोंदीची आवश्यकता नाही) स्वयंघोषणापत्र देऊन अंतिम मुदतीची वाट न बघता पिक विमा योजनेमध्ये लवकरात लवकर सहभागी व्हावे, असे आवाहन जिल्हा अधिक्षक कृषि अधिकारी आर. बी. चलवदे यांनी केले आहे.

00000